Tagged: 西貢

0

【西貢遊車河玩埋免費航海體驗 歎海景BBQ+鹽田仔探秘】Local自駕遊

如果放假想遠離市區,去近郊或海邊唞吓氣,相信好多人都會諗起有「香港後花園」之稱嘅西貢,揸車嘅朋友就更加鍾意入去遊車河添。其實西貢都有好多值得去嘅地方㗎,等小編幫你安排行程啦,無論係一家大細定熱戀中嘅情侶,都有啱你哋嘅節目嘅,今個weekend揸車入西貢chill住玩返日啦! 一日限定!免費航海體驗 聽日入西貢又想體驗唔同嘅航海活動嘅話,去西貢白沙灣遊艇會嘅航海訓練中心就啱喇!佢哋聽日(5月4日)免費開放俾公眾,年滿七歲嘅小朋友同埋大人都可以試玩小型帆船、獨木舟同直立板,仲有專業教練喺度親身示範添,有興趣就唔好錯過喇!   航海訓練中心公眾開放日 地址:西貢白沙灣西貢公路10.5咪 開放日期:2019年5月4日 開放時間:10:00-17:00   海傍打卡歎Cafe 每次入西貢必去西貢碼頭,既可以悠閒咁行吓海傍,附近又有唔少特色小店,仲有啲打卡位俾你影靚相添! 沿著萬年街行,會見到唔少呢啲咁有藝術感嘅壁畫。佢哋係由「藝聚西貢」同多個藝術家合作創作嘅,呢一幅就喺蘇珊娜牛扒屋外牆,行過記得欣賞吓再打卡喇。 行到餓餓哋,想搵間cafe食啲嘢?行簡約風嘅Little Cove Espresso環境開揚,不妨喺度感受吓慢活嘅生活節奏啦! 呢款雞腿肉開心果沙律(HKD105)健康之餘,仲分量十足喎。 cafe有唔少菜式都加入地中海元素,呢款煙三文魚配酵母麵包(HKD88)就用咗中東獨特嘅香料調味,值得一試呀!   Little Cove Espresso 地址:西貢海旁廣場兆日樓地下1-2號舖 電話:9572 8560 營業時間:星期一至日:07:30-18:00   經過市場街呢間一起果醬,聽個名就知主打自家製嘅果醬啦。呢度亦果醬入饌,大部分食物都同果醬有關添。 View this post on Instagram 九官格吐司 九種不同果醬味道❤️...

0

【西貢假日好去處 可愛柴犬清新咖啡店】柴太郎咖啡店

平時去開西貢都係食海鮮?唔怕,依家去西貢又有多個新選擇喇!依家西貢有間柴太郎咖啡店,店長柴犬(柴太郎)幾乎每一日都會落舖頭同客人玩㗎! Café負責人Candice就話,開柴犬主題餐廳係為柴太郎建立品牌,客人可以同柴太郎玩樂,仲可以帶埋自己啲寵物過嚟,喺西貢享受吓relax吓。 餐廳主打All Day Breakfast、意粉同甜品,每款食物都由Candice主理,食物賣相好靚㗎,當然要相機食先啦!呢個名叫Happy Tummy(HKD98)嘅All Day Breakfast真係好豐富,有豬肉腸、煙肉同芝士炒蛋,連麵包嘅果醬都係自家製,誠意十足!如果想配煙三文魚只係加多HKD10就得,成個餐仲包一杯$30以下嘅飲品,想特別啲歎返杯榛子奶泡咖啡就要加HKD12,平時單點要HKD42㗎,梗係跟餐飲抵啦! 另外呢個薄燒牛肉香蒜辣椒意粉(HKD88),薄薄牛肉燒起嚟依然保持住粉紅色嘅嫩肉,一啲都唔香口膠㗎;意粉就帶微辣,又幾惹味喎!熱情果汁雜莓特飲(HKD58),跟餐半價。冰凍嘅雜莓熱情果汁,可以一解意粉嘅辣味,夏天飲,爽呀! 食完正餐,當然要食埋個甜品先叫完美啦!雜莓焦糖香蕉法式多士(HKD98),原條香蕉切半,再用火燒香焦糖,再將鮮雜果放喺西多士上面,淋上蜜糖再配埋朱古力cream,真係好邪惡! 仲有個窩夫配自家製果醬(HKD58),果醬天然,食落唔會好死甜,而窩夫入口就夠香脆,配埋果醬食一流呀! 柴太郎咖啡店 地址:西貢市場街11號地舖 電話:9488 0623 營業時間:星期一至五:10:00-18:00;星期六至日:09:00-20:00

0

【肉汁噴射機 肉眼×手撕豬肉4D漢堡】CENA

記得細細個嘅時候,媽媽成日會煮啲食物,帶小編去隔離鄰舍度一齊食,一齊玩。就算依家長大咗都好,仍然懷念依種親切歡聚嘅氛圍。想搵個大啲,坐得舒服,食物又好味嘅地方聚下,不妨去呢間位於西貢嘅CENA,佢地都想大家有個又平民價又正嘅聚腳點,可以一家大細同埋朋友一齊嚟歎下。 店內嘅畫作裝飾都好隨性,座位有一排咕?可以挨下,或者坐吧檯又得,如果想再開揚啲可以揀門口露天座位㗎。 依家有Tacos Happy Hours俾大家盡情咁食,逢星期一至四嘅15:00-19:00,所有Tacos都係HKD10件咋,咁抵試多啲唔同味都唔怕傷荷包。依幾款分別係Black Bean配芒果牛油果醬,Beef Barbacoa配莎莎芝士酸奶油,Lamb Barbacoa配芒果莎莎牛油果醬,Baja Fish配莎莎酸奶油,醬汁以果味或酸奶油製作唔同嘅酸甜醬夾返唔同嘅肉,好細心呀!佢地好貼心係菜單提示前3款有辣椒警號,唔食得辣嘅朋友注意喇。 混合墨西哥同美國特色嘅自家製Nacho Chips (HKD70)焗得好香脆,加HKD20仲可以升級有埋燒烤羊肉或牛胸肉其中一款,啲肉幾多汁,質地又腍,大人細路都啱食。 Buffalo Wings (HKD40/4隻)係美國特色菜式,肉質嫩滑,用咗秘製辣汁醃製,都真係幾辣下㗎。 有時牛扒大大件你未必食得落,但係切細佢放入漢堡飽就唔同晒。Cena (HKD95)夾左肉眼牛扒啖啖肉,而牛油果醬同沙律菜可以中和返煙肉同芝士嘅鹹味。 CENA 電話:2757 1020 地址:西貢沙咀街9號地舖 營業時間:星期一至日:08:00-00:00

0

【一家大細好去處!週末悠閒慢歎健康餐】Jaspas Restaurant

西貢比人嘅感覺就係一個好好玩好好hea嘅地方,星期六、日入去行一轉夠晒梳乎,但係帶埋小朋友同狗仔出街有時都幾麻煩。Jaspas Restaurant喺度開業已經21年,出面對住公園可以比寵物同小朋友玩,食物又標榜健康,Family Day去就啱晒啦。 餐廳室內裝修雅致舒適,地方算大幾有空間感,啱晒一家大細嚟到,小朋友坐唔定都唔怕郁下都撞到人。 想食得輕盈啲,呢個Toasted Fingers Chicken & Avocado(HKD100)就啱晒你啦。多士烤到好香脆,大量芝士加埋牛油果原隻切粒,食落啖啖都好柔滑又足料,再加埋雞肉口感嫩滑,味道更多層次。 如果鍾意食香辣惹味Pizza,呢個SOHO Pizza(HKD148)就啱晒你啦!上面有少少辣嘅雞,加埋焗過嘅薯仔、蘑菇、酸忌廉同甜椒,食落辣得嚟又夠晒惹味香濃,Pizza係人手即刻拉即刻整,薄得嚟好酥脆,鍾意食薄Pizza一定要試。 集合多種superfood夠晒健康,又帶少少地中海風味同印度風味嘅Breakfast Bowl (HKD120)入面有烚蛋、halloumi芝士、Kale Quinoa、Hummus同牛油果。食落味道清清地,唔會落好重味,啱晒注重健康嘅朋友仔去試下。仲可以配埋佢地嘅自製咖啡 Kim & Co慢慢歎添! Jaspas Restaurant 電話:2792 6388 地址:西貢沙咀街13A號地下 營業時間:星期一至日: 08:00-22:30

0

【印度風石窯燒雞!體現真正窯燒風味】Village Malaysian and Indian Restaurant

每次提到印度菜,都會令人聯想起咖哩同辣味。位於西貢嘅Village Malaysian and Indian Restaurant專門製作馬來西亞菜同印度菜,而且咖哩唔會太辣,無論你食唔食到辣都可以嚟到歎下地道印度菜!而且佢地仲有石窯,嚟到仲可以試到真正窯燒風味添! 黃色牆極具特色,加上掛畫,令人感受到異國風情。 嚟到又點可以唔食沙嗲呢?馬來拼盤(HKD168/大) 沙嗲醬充滿花生醬味,食落甜甜地唔會太辣,好容易入口。整個拼盤有齊雞肉串、蝦餅、春卷、洋蔥Bhaji同蔬菜咖哩角,款款都夠火候熱辣辣好香脆而唔會太乾身,仲可以蘸甜酸醬或者沙嗲醬慢慢食。其中一舊舊好似魔人布歐個頭形狀咁嘅係蔬菜咖哩角,除咗個形狀夠晒得意之外,熱辣辣但咖哩味又唔會太辣,係拼盤亮點。食印度菜其中一樣好難走得甩嘅就係食雞,特式香料雞(HKD98)就以先燒好咗嘅炸雞加入濃厚蕃茄牛油醬汁入面,再加埋香草,整個醬汁組合好微妙,如果鍾意蕃茄濃湯不可不試。 如果鍾意食辣,呢個串燒五香雞件(HKD98)已經去骨,混和辣醬放入石窯燒。食落雖然辣辣地但帶少少甜,經過窯燒雞肉仍然保持到嫩滑,如果加上檸檬汁會更顯雞肉鮮嫩。 一餐入面又點可以無菜呢?鹹魚炒芥蘭(HKD62),一上檯就散發鹹香,但食落唔會過鹹,亦唔會太粗硬,連唔鍾意食菜嘅朋友都話夠晒惹味。 Village Malaysian and Indian Restaurant 電話:2791 2525 地址:西貢普通道1E號地下 營業時間:星期一至四:11:00-15:00;17:30-23:00 星期五至日:11:00-23:00

0

【25年經驗用心烹調 大歎西貢生猛海鮮宴】Big Fish Seafood and Grill

間中入去西貢鬆一鬆,當然唔少得去大刷海鮮!就咁睇名都知Big Fish Seafood and Grill就係其中一間大賣海鮮餐嘅食肆,無論海鮮拼盤抑或意粉同飯都應有盡有,想食鮮甜海鮮就要一齊同小編去睇睇! 睇到個帳篷都知有海鮮食啦,除咗可以喺室內坐低慢慢食,仲有歎下露天風味添。 室內裝潢雅致,落地玻璃門透入自然光,加上石牆,令人感到自然舒適,坐低慢慢食餐飯就最歎啦。 招牌香燒海鮮拼盤(HKD398)拼盤包括新鮮生蠔、帶子、原隻老虎蝦、青口、沙甸魚、魷魚各三件,仲有埋薯條!樣樣食材夠晒新鮮,每種海產嘅鮮甜一次過試晒。最開心係有埋脆炸厚切薯條,食完一輪海鮮,仲可以食埋薯條夠晒香口! 仲有賣相同樣討好又多料嘅海鮮雜錦飯(HKD218)材料包括魚柳、蝦、青口同腸,樣樣食材都大大舊,尤其係蝦,極為鮮甜爽口。至於米飯質感較為煙韌,索晒海鮮嘅鮮甜味道,食落口感同海鮮亦好夾! 除咗海鮮之外,都有肉類嘅選擇㗎!安格斯肉眼扒(12oz)(HKD298)牛肉味道濃郁,食落肉汁豐富略帶彈性,仲可以揀落黑椒汁或者蘑菇汁。配菜有焗薯同新鮮蔬菜,食完豐腴嘅牛肉之後再食可以帶嚟清新感覺。 Big Fish Seafood and Grill 電話:2751 9177 地址:西貢灣景街18號地舖 營業時間:星期一至日:11:00-23:00

0

【西貢點止得海鮮!體驗正宗英國菜】The Cabin Café & Restaurant

好多人都鍾意間中入下西貢,感受一下悠閒慢活感覺。The Cabin Café & Restaurant店面純白設計,再加上餐廳外面懸掛嘅旗仔,非常吸睛!原來佢地主要做英國菜,一齊去睇下美食英倫風係點啦! 餐廳隔離有playroom,有小朋友嘅話可以帶班嘩鬼去咗玩先,然後大人再入The Cabin慢慢食返餐傾下計,簡直係一站式超貼心服務。 估唔到The Cabin個格局又真係有啲似船艙喎!再配埋藍色白色餐檯同餐椅,感覺更加點題。 蘭開夏郡燉羊肉配焗馬鈴薯(HKD215)羊肉先以紅酒同白蘭地炆過夜,去除羶味,同時令肉香更濃郁。煮嘅時候再配以洋蔥同紅蔥頭焗薯仔,感覺更加香甜。廚師刻意將薯仔切成片狀,確保薯仔口感能夠保持略帶爽口感覺,與已經炆到腍身嘅羊肉非常配合。 英式鄉村農舍焗牛肉批(HKD175)牛肉本來已經帶點嚼勁,配上混有蕃茄同茄膏嘅薯蓉,簡簡單單已經十分惹味香口。 英式漁夫焗海鮮批(HKD215)集合多種海鮮,包括三文魚、青衣魚、蝦同蜆喺入面,配搭薯粒增加菜式口感。最後再配上由牛油、奶、麵粉同白酒製成嘅白汁,顯得海鮮份外美味鮮嫩。 干邑燒焗英式豬腩肉伴薯蓉配蘋果醬(HKD225)選用西班牙豬腩肉,豬肉層次分明,一層層入口鬆化唔會糊口,咬落有肉汁,感覺非常Juicy。再配埋蘋果醬感覺清新,中和腩肉油膩感。 如果大家係想去悠閒鬆一鬆,佢地嘅西式甜品全部都係自家製㗎,不失為一個tea time好選擇! The Cabin Café & Restaurant 電話:2412 3183 地址:西貢普通道183C號地下 營業時間:星期一至日: 12:00-23:00 星期三休息