Tagged: 觀塘

0

【芒果燕窩下午茶載譽回歸 平歎十款矜貴鹹甜點】Angel & Devil

芒果係唔少人至愛,加埋養顏嘅名貴燕窩就更加難以抗拒呀!觀塘Angel & Devil人氣爆燈嘅「嚐芒﹒暮燕下午茶」終於再度登場。三層下午茶中嘅酥點都用咗鮮甜芒果同燕窩入饌,仲有加入黑松露、法國鵝肝等高級食材嘅鹹點,性價比夠晒高。呢個Tea Set聽日就正式推出,仲供應到4月尾添,仲唔book定位同情人、朋友歎下午茶?! 「嚐芒﹒暮燕下午茶」(HKD268/兩位用)喺三層架上都有成十款以芒果同燕窩做主題嘅鹹甜點,全部都一式兩份,仲配埋兩杯特飲,咁就唔使爭啦! 頂層之中嘅燕窩朱古力金寶焦糖燉蛋係Tea Set嘅一大賣點,咁多燕窩喺上面真係夠晒矜貴呀!軟滑嘅焦糖燉蛋加埋脆口嘅朱古力金寶,一啖入口食到豐富嘅口感層次。 中層集合咗四款賣相吸引嘅鹹甜點,有朵「菊花」喺面頭做點綴嘅芒果燕窩蘆薈椰子奶凍(左)層次分明,上面白色嘅係椰子奶凍,下面淡黃色嗰層當然係芒果味啦,兩者加埋都幾夾。而即叫即烘嘅芒果龍蝦意大利多士(前),面頭鋪滿芒果龍蝦沙律,龍蝦肉鮮嫩彈牙,連埋脆卜卜嘅多士一齊食就份外滿足喇。另外,仲有香煎法國鵝肝多士配芒果及燕窩,鵝肝煎到表面微脆,內裡軟滑,配埋芒果同燕窩食落清新唔膩;而芒果英式鬆餅配蜜糖香甜清新,都幾有特色喎。 除咗有燕窩之外,底層嘅黑松露燕窩露荀芝士撻仲加入咗濃香嘅黑松露,配合新鮮焗出嚟嘅芝士撻,呢款鹹點精緻不膩。同層仲有龍蝦春卷同雞肉芒果米紙卷添。 下午茶包埋兩杯自選特飲(念念不芒/樂而芒返),以芒果、菠蘿汁、辣椒、糖漿等特別調製而成,味道清新中帶點輕微嘅辣味,幾刺激喎。   「嚐芒‧慕燕下午茶」 供應日期:2月1日至4月30日 供應時間:星期一至日: 15:00-17:30 價錢:HKD268/兩位用 (另收加一服務費) Angel & Devil 地址:觀塘駿業街58號4樓Club East洞天 電話:3103 3808 營業時間:星期一至四、日:11:30-00:00,星期五:11:30-01:00,星期六:12:00-01:00

0

【團拜推介5大高質Party Room VR+極限運動一站式配套】

新年除咗周圍去拜年,仲要留啲時間約埋班friends去玩嘅。未諗到去邊好?不如搵間設備齊全嘅Party Room盡情咁玩啦!除咗有打機、唱K、Board Game、打牌、波波池呢啲設備之外,依家啲Party Room仲有好多估佢唔到嘅活動㗎!即刻介紹5間空間夠大又有特色主題嘅Party Room俾大家,等你哋成班老友鬼鬼做運動放吓電又得、瘋狂打卡呃like又得,仲有高科技新奇又刺激嘅體驗,實滿足晒你哋唔同嘅願望。   獨家首創冰上曲棍球體驗 呢間3500呎嘅Fun Fun Fun Party Room坐落荔枝角,北歐風設計嘅室內環境簡約舒適。除咗有300呎變色唱K波波池之外,最特別係有獨家首創嘅室內冰上曲棍球場!呢度仿照專業冰上曲棍球訓練場地設計,仲有齊成人同小朋友嘅裝備,嚟返場合家歡嘅冰上曲棍球體驗先。 而全港首創嘅六人對戰乒乓波同Nerf Gun海綿彈槍體驗都係呢度必玩嘅遊戲設備!   Fun Fun Fun Party Room 地址:荔枝角光昌街3號鴻昌工廠大廈7B 電話:6441 2443 營業時間:24小時營業 費用:HKD198/4小時、包無酒精飲品任飲 (20人起包場)     1:1真人版大富翁+旋轉木馬 又要IGable,又要好玩?長沙灣嘅Kowloon Party Room就啱晒你喇,分咗大富翁木馬房同酒吧風格房兩大類型。呢間大富翁木馬主題房就設置咗一個真人版嘅巨型大富翁,遊戲內容係香港版本,自然玩都玩得投入啲啦。 成班女仔聚會梗係要瘋狂影相打卡啦!呢度個粉紅旋轉木馬咁夢幻,真係少女心爆發呀。另外,仲有個藍白色大型波波池,兩種唔同風格都有,閏密相ready!  ...

0

【觀塘新開平價素食自助餐 $48任食近50款素菜】素街

最近觀塘新開咗間叫素街嘅素食自助餐,以本地街頭小食做主題,提供午市、下午茶同晚市嘅素食自助餐俾大家。平霸梗係揀最抵嘅下午茶自助餐啦,HKD48食到近50款食物喎,仲唔使加一添,即刻睇吓有咩種類先! 門口已經清楚列明唔同時段嘅收費,全日都冇加一服務費,下午茶時段(HKD48)俾你食足60分鐘;如果想食得豐富啲,晚市會出最多款食物。講返下午茶時段先,開始前十分鐘門口已經有唔少人等緊入座。平霸本來擔心緊唔知要排幾耐,但係一到兩點半就一次過俾晒咁多人入去,基本上唔使點等位。 店內嘅裝潢以香港街景為主題,門面掛有霓虹燈,牆上又有唔同嘅街景,喺咁有香港本地特色嘅環境下食住各種街頭小食,都幾有feel喎。 中間一張大長枱嘅Buffet Bar擺滿近50款食物,入面有湯品、前菜冷盤、炸物、小食、粉麵飯等,仲有糖水甜品同生果添,都幾豐富吖,單係冷盤都有十款咁多。 前菜可以拎碟沙律食吓先。沙律吧有6款配料俾你自己撈,除咗沙律醬之外,亦提供油醋汁。 呢度有唔少懷舊小食俾你任食,例如甜脆米通、鬆軟嘅白糖糕、馬拉糕、砵仔糕,連懷舊蝦多士都有素食款式。 比較特別嘅有黑松露炒蛋刈包,會放喺蒸籠度keep住reheat,所以食嘅時候仲暖笠笠,夠軟熟。 仲有唔同嘅小炒,呢款炒土豆絲酸酸辣辣咁幾惹味,但略嫌油膩咗啲。 想食得飽啲嘅,都有多款粥粉麵飯俾你揀,紫薯粥仲加咁蕃薯,都煲得幾腍,入口比較清淡健康;黑椒炒螺絲粉加咗唔少蔬菜;而茄汁焗素豬扒飯入面嘅豬扒就用咗菇代替,加咗味道香濃嘅芝士,係含蛋奶素菜式,口感又同平時嘅焗豬扒飯幾似喎! 餐後梗係以甜品收尾啦,呢度有有椰汁芋頭西米露同、紅糖老薑蕃薯糖水、雜果涼粉同生果,最重要係全部都幾足料。 側邊嘅飲品吧有幾款飲品,不過水果茶同檸檬薄荷葉水入口都好淡,而羅漢果茶同紅棗桂圓茶就比較清潤。 食完記得攞返自己用過嘅餐具去分類回收呀。   素街 地址:觀塘駿業街56號中海日升中心1樓B號舖 電話:3188 3094 營業時間:星期一至日:11:45-16:00,18:00-21:30

0

【粵菜放題$278起任食片皮鴨 送奄仔蟹+花膠響螺雞湯】利寶閣

一講放題就好似得日本菜,但粵菜都一樣吸引㗎。有廿一年烹調傳統粵菜嘅利寶閣,佢哋全線五間分店都有「任食2小時高級京菜」(HKD278起),有超過五十款即叫即做嘅中菜俾你任食。每位成人仲額外送三道滋味菜式添,分別係清蒸、雞油花雕蒸或油鹽焗嘅野生時令奄仔蟹、花膠響螺雞湯同原隻鮑魚花菇。唔賣關子喇,即刻睇吓有咩正斗菜式啦! 地方都算闊落,唔使迫住坐埋一齊。 花膠響螺雞湯雖然係送嘅,但一樣落足料!用砂窩長時間燉煮雞隻,味道鮮甜潤喉又養生。 奄仔蟹有清蒸、雞油花雕蒸或油鹽焗三個煮法,想味道特別啲就梗係揀用雞油花雕蒸,以酒香突出蟹嘅鮮味吖嘛。 原隻鮑魚花菇就似平時飲宴嘅口味,食埋就即刻進擊任食款式喇。 五十幾款食物唔知點揀好?當然有啲必食嘅回本菜式呢! 京式片皮鴨(上環分店除外)皮脆肉嫩,配搭青瓜、京蔥、京醬用餅皮包起嚟食,有油香又唔會過肥。 上環分店期間限定嘅西班牙伊比利亞黑毛豬叉燒都係必食之選!呢種黑毛豬食橡木果實為主要食糧,肥瘦適中而且肉味香甜濃郁啲㗎。 香脆又多肉汁嘅脆皮燒腩仔簡直係香港人最愛,肉同脂肪肥瘦相間,表面又燒到甘香脆口,令人想一食再食! 如果鍾意食涼菜,一定要試花雕醉蝦同流心醉蛋。兩款都用花雕酒浸泡冷藏最少一晚,每啖都係香濃嘅酒香。 中菜都有甜品㗎,傳統嘅拔絲香芋同冰糖葫蘆唔係成日食到,當然要過吓口癮啦!   「任食2小時高級京菜」 供應時間: 星期一至日及公眾假期:18:00-22:00(自選2小時) 價格: 星期一至四: 成人HKD278/位(兩位起) 小童HKD139/位* 星期五至日及公眾假期: 成人HKD298/位(2位起) 小童HKD149/位* 其他收費: 按原價HKD488收取加一服務費: 成人HKD48.8/位,小童HKD24.4/位 *1米以下小童免費   利寶閣  地址:尖沙咀彌敦道100號The ONE 17樓 電話:2870 1488 營業時間:星期一至日:11:00-15:00,18:00-23:00

0

【紅黑米即製健康高纖腸 觀塘石磨腸粉米香味濃】鳳鳴石磨腸粉

唔少人早餐都鍾意食腸粉,小編都唔例外,喺腸粉度加入唔同嘅材料就有唔同嘅風味,日日食都唔厭啦!小編知道觀塘有間新開嘅石磨腸粉店,即刻去試吓啦!呢間鳳鳴石磨腸粉用每日新鮮自家石磨嘅米漿整腸粉,石磨嘅好處係可以完整啲咁保存米嘅營養價值,腸粉就更原汁原味、更健康。除咗平日常見嘅白米腸,舖頭仲自創咗紅米同黑米腸添!紅米同黑米嘅纖維比白米多好多,以紅米同黑米磨漿整腸粉就更加有益喇。 「鳳鳴」即雞啼,意味住朝早嘅意思,舖頭希望打造一個健康早餐嘅概念。除咗早餐,其他時段都有唔少食客幫襯,舖頭地方唔大,可以選擇外賣或者立食。為咗支持環保,如果自備餐盒或用碟嘅每份腸粉仲會平1蚊添! 店員會先喺一格櫃桶蒸爐搽上油預熱,等一陣就倒上米漿,再加入唔同嘅配料攪勻,先放入爐蒸熟。由於蒸腸粉嘅蒸爐好似一格格嘅櫃桶,所以呢種腸粉又有「櫃桶腸粉」之稱。 呢款石磨蔥花蝦米腸(HKD19) 加雞蛋(+HKD3)用咗普通嘅白米漿整,加入蔥花、蝦米同雞蛋。雖然材料唔多,但已經有唔同嘅香味同口感,所用嘅蝦米比坊間嘅Size大,好有蝦嘅鹹香味,而且成碟腸粉有蛋香味,食到唔同嘅口感,冇咁單調。淋上舖頭煮過嘅豉油,同腸粉好夾又唔會過鹹。豉油仲會一直熱住,淋落去嘅時候就唔會整凍咗啲腸粉,好貼心呀! 用紅米漿整成嘅紅米羅漢齋腸(HKD23) 加栗米(+HKD3)有淡淡嘅紅色,仲可以見到有啲紅米嘅纖維。羅漢齋腸有冬菇、紅蘿蔔同木耳喺入面,再加埋粟米,成碟嘅顏色好豐富,賣相都幾討好。食落冬菇香味最出,仲有栗米嘅清甜味,蘿蔔絲同木耳絲口感好爽脆。 呢款顏色咁深嘅就係以黑米漿整成嘅黑米雞蛋豬肉腸(HKD25) 加蟲草花(+HKD5)喇!黑米腸喺坊間真係好少見,可能有唔少人見到佢咁黑嘅賣相會有啲抗拒,但黑米嘅纖維係三種米入面最高嘅,營養價值亦相對高。咁高纖嘅黑米通常要石磨兩、三次先會滑身,整出嚟嘅黑米腸都會見到明顯嘅黑米纖維,食落都幾滑身,仲有陣黑米嘅獨特香味添! 腸粉可以隨個人喜好加上炸蒜、辣椒、芫荽同芝麻。如果鍾意食辣嘅朋友仔一定要試吓呢度嘅辣椒乾,仲有個石磨俾客人自己磨辣椒粉,磨過嘅指天椒味會更香更出。不過提醒返,呢度啲辣椒真係幾辣㗎!   鳳鳴石磨腸粉 地址:觀塘開源道68號觀塘廣場地下G34號舖 電話:2488 6928 營業時間:星期一至日:08:00-19:00  

0

【觀塘半自助晚餐6主菜任揀 $468先歎香烤乳豬回本】Walter Bistro

喺觀塘想食自助餐?近近哋可以去新開嘅觀塘智選假日酒店入面嘅Walter Bistro,雖然晚餐係半自助餐(HKD468/位,有加一收費),六款主菜任揀一款之外,一樣有齊冷盤海鮮、生蠔、刺身、熟食同甜品㗎,依家等小編帶你現場直擊啦! 呢度座位寬敞,中途見到有客人推埋BB車入嚟,店員都搵到位幫客人「泊車」添。唔講咁多喇,試咗兩個主菜先啦! 法式香烤乳豬伴薯蓉及小甘筍(二人份)用西班牙豬配法式做法,用啤酒、紅白酒同香草等材料醃一晚,再慢煮4個鐘兼拆骨。上枱前再燒脆個皮,肉味非常之香濃軟腍。 香煎帶子伴野菌芝士黑松露醬意大利飯嘅日本帶子好大隻,啖啖肉呀。煎到外面金香,內裡緊緊熟,嫩滑又juicy。平時食意大利飯好怕滯,但呢款牛油味唔重,加埋法國黑松露醬同蔬菜粒,味道反而幾清香。 每位都會送一客燉湯,日日唔同款。小編當日試咗蟲草花膠雞湯,燉到好出味又鮮甜,潤吓喉嚨好鬼正。 飲完湯就去自助餐區開戰喇,雖然範圍唔算好大,但數數吓都有接近五十款食物,依家睇吓重點有咩啦。冷盤海鮮有長腳蟹腳、波士頓龍蝦、翡翠螺、熟蝦同即開生蠔。生蠔主力揀法國蠔,不過生蠔勁多人食,所以每位每次限攞3隻,令每位食客唔使等太耐。 沙律前菜都有唔少選擇,煙三文魚、Bellota Ham、芝士等等都可以裝滿一碟慢慢食。 壽司刺身區都有好幾款,6-7款壽司都大大件㗎,旁邊仲有冷麵,小小位置又營造到日本菜小區喎。 熱食有4款左右,會視乎當日食材加多一至兩款,近乎日日轉菜式,都幾花心思。當日最驚喜係有蘋果金寶,見到已經即刻想食喇! 嚟到甜品喇,除咗蛋糕、桂花糕、焦糖布甸等等之外,旁邊仲有果盤同意大利雪糕㗎!   Walter Bistro 地址:觀塘巧明街97號智選假日酒店1樓 電話:6900 0502 營業時間:星期一至日:18:00-21:30

0

【觀塘新開零食店加購優惠 1蚊特別版可樂搶手零食區】平霸

觀塘呢間新開嘅零食店零食到家,喺開實體店之前,網店已經運作咗一段長時間,仲儲落大批零食迷嘅支持添。除咗有好多平價嘅特色零食之外,最近仲做緊1蚊零食加購優惠添,而且買滿100蚊仲有95折。吸引到平霸上門,睇吓佢啲零食係咪真係咁平先! 舖頭唔算大,左右兩邊都排滿零食,中間擺咗一列貨架,感覺零食嘅款式算幾多,有唔少零食喺出面真係冇乜見過。一入門口行前就見到個放滿各式飲品嘅雪櫃,舖頭賣嘅嘢,由零食、杯麵、禮盒、飲品到酒類都有,幾齊全。 各款特別版可口可樂(單價HKD13.9)個包裝真係好靚,買返去儲都抵吖。依家買夠HKD138,仲可以用1蚊加購。 1蚊加購嘅零食唔只係特別版可樂,選擇仲有好多。不過記得1蚊加購嘅零食成日都會唔同㗎,有興趣嘅朋友仔可以留意住佢哋嘅專頁喇。 有冇人同平霸一樣都好鍾意呢款黃金濃湯粟米球(HKD2.8)呢?但係成日開咗一大包又食唔晒,而呢款細細包有得食嚟過吓口癮就啱啱好,咁平真係買多幾包都唔心痛吖! 8蚊都唔使就買到大包裝嘅粟一燒(HKD7.9),好多零食店都做唔到呢個價錢。 韓國魚乾50片裝(HKD88),呢款魚乾平霸去韓國旅行都好鍾意買返嚟食㗎,喺韓國買嘅價錢同呢度都係差唔多咋,以後唔使喺韓國抬返嚟,喺呢度買咪得! 細細個成日食嘅芥辣味太郎魚柳60片(HKD58),芥辣味又係冇得輸,依家可以一大盒咁買返去慢慢回味喇,除返1塊都唔使1蚊。 返工返到攰,真係要買定幾罐咖啡喺office看吓門口。各款咖啡(HKD4.5)都係一個平價嘅選擇。   平霸小評:今次平霸精選咗啲自己覺得幾抵嘅零食同大家分享,雖然唔係話平得好誇張,但勝在零食款夠特色又多優惠。如果就咁買幾件過吓零食癮,單價都算係親民㗎喇,但係諗住間唔中入吓貨,一次過掃多啲嘅話,加埋唔同嘅折扣同優恵就夠晒平喇,慳慳埋埋可以掃多幾款零食!除咗以上推介嘅零食,平霸仲見到唔少好食又好玩嘅禮盒都好吸引,價錢仲比乜乜物語平一大截添,嚟緊聖誕新年買嚟送禮又多一個選擇,零食迷快啲去尋寶啦!   零食到家 地址:觀塘開源道54號豐利中心2樓208室 電話:3704 7878 營業時間:星期一至五:11:00-19:30,星期六至日:12:30-17:00

0

【識食雞一定去觀塘街市 百里香午市爆場一雞難求】街霸

相信喺觀塘返工嘅朋友都知道駿業街街市多嘢食,其中一間lunch time長期見唔到龍尾嘅餐廳就係呢間百里香喇!每次行親過去都見到打晒蛇餅,人氣超旺! 行到上一樓經過海南雞餐廳就會見到有百里香嘅易拉架,最好就等店員阿姐帶你入座,因為多人等位好易有拗撬呀!等阿姐決定就最公平喇! 百里香最出名一定係百里香皇牌燒雞1/2隻配燒烤醬跟脆薯皇(HKD45),有錢都唔係咁易食到㗎,事關呢隻燒雞超受歡迎,要打定電話留定先可以確保有雞食呀!由於百里香午市長期爆場嘅關係,所以佢哋有「早鳥」同埋「下午茶」優惠,如果午市12點3前埋單,或者下午2點3之後入座,每個餐可以減5蚊。如果Lunch Time係Flexible嘅朋友其實幾抵㗎!不過都係嗰句啦,記住朝早打定電話留雞呀!   喂,街市咋喎,要打電話預訂咁滯,有冇咁誇張呀?就係咁誇張!10個幫襯嘅客人有11個都係叫呢個皇牌燒雞,45蚊食到半隻雞,雞髀位滑溜得嚟雞皮仲有陣微焦嘅煙燻味,點埋燒烤醬就perfect喇!另外薯皇亦夠晒足料,點埋茄汁食就正喇。燒雞配薯皇真係不敗配搭,唔怪得咁多人食啦! 如果食唔到燒雞,好多人都會退而求其次叫呢個百里香墨西哥BBQ煙燻豬絲漢堡飽(HKD45),雖然冇燒雞咁受歡迎,但其實都幾高質㗎!呢個漢堡飽嘅精華就係夾喺入面嘅煙燻豬絲,究竟係咩豬絲呢?豬頸肉絲?普通肉絲?NO NO NO!係豬手絲呀!咬落個包一啖,發覺入面嘅豬手絲幾Juicy喎!本身豬手就已經好入味同好腍,再沾滿BBQ醬,加埋個包嘅質感係偏向煙韌嘅,非常唔錯! 入面嘅豬手絲都幾足料㗎,塞滿晒個漢堡飽。另外配菜同燒雞一樣都係薯皇,Burger襯薯皇,大滿足啦!   街霸最愛:雖然豬絲漢堡飽都好食,不過今集最愛都係皇牌燒雞!因為真係冇乜地方40幾蚊食到半隻雞,仲要係高質㗎喎,邊度搵呀?雞肉又嫩又滑,夾埋自家嘅燒烤醬真係冇得輸,再整個薯皇,返工嘅日子食到一個令人超滿足嘅Lunch,夫復何求! 百里香 地址:觀塘駿業街67號熟食市場1樓44號舖 電話:6708 2851 營業時間:星期一至五:11:00-16:30;星期六:11:00-16:00

0

【中西日意多國素菜大集合 必食暖笠笠素肉骨茶鍋】素學堂

以為食素好齋好悶?原來一樣可以搞到你選擇困難症發作㗎!好似觀塘嘅一心素食,就係以多國素菜為賣點,啱晒鍾意乜都試吓嘅貪心鬼呀!餐廳座位闊落又夠光猛,環境舒適程度令人好滿意呀!一心素食除咗下午茶出晒名又平又好食之外,單點菜單嘅選擇真係多到數唔晒,可以食勻中西日意唔同素菜,加上全部菜式都唔會加任何五辛(如蒜、洋蔥等), 今次就等小編睇吓咁多選擇嘅多國素菜有咩食啦! 屬於中式含蛋嘅賽螃蟹(HKD68),店員話好多客人食過都讚好!唔單止賣相似模似樣,連味道都好似正宗賽螃蟹咁喎!果然有廿幾年中菜經驗嘅師傅出手唔講得笑呀! 牛油果雜菜意式燴飯(HKD62),含奶嘅燴飯食落好creamy,味道一啲都唔寡,牛油果味唔算好出,小編本身唔太食牛油果但食完又覺得幾好味喎! 壽司卷物定食(HKD70),純素壽司顏色鮮豔奪目,大人同小朋友都啱食。定食附有蕎麥麵,亦都可以轉冷蕎麥麵,配日式時令前菜、沙律和凍熱飲品,午餐好多人叫呢個㗎! 依家呢種天氣啱晒食火鍋呀! 天氣凍梗係要食返啲鍋物暖身啦!惹味麻辣鍋(HKD25)同素肉骨茶鍋(HKD32)就啱晒喇!今次重點推薦素肉骨茶鍋,湯底又香又夠味! 想大堆頭啲可以按自己喜好選揀,素肉丸類、餃子類、豆腐蔬菜類同菇菌類加埋至少有成60款!唔想諗嘅就可以選擇什錦蔬菜盤(HKD294/4人分量)。另外,小編今次仲試咗唔少新款菇菌類添喎,有黃金菇、黃耳、黑牛肝菌、鮮黑皮松茸、秀珍菇、鮮冬菇同鹿茸菌,有好多都係小編第一次見同食嘅菇!估唔到菇都有咁多選擇同咁好味,配素肉骨茶鍋一流! 左邊嘅檸檬雪梨汁(HKD24)同右邊嘅菠蘿哈密瓜汁(HKD28),兩杯果汁都係新鮮即榨,無添加糖,健康清新又好飲! 最後點少得甜品呢!朱古力布朗尼(HKD24[圖上])同芝士蛋糕(HKD24[圖下])都係含蛋奶素款式,材料無任何動物成份,布朗尼偏甜啱哂鐘意食朱古力嘅朋友,而芝士蛋糕唔會太甜同膩,食完正餐不妨一試!食完咪咁快走住呀!門口仲有小賣部㗎!小食選擇都算多,仲有飲品同乾糧可以買走㗎!   一心素食 地址:觀塘鴻圖道 30號鴻圖樓3樓 電話:2494 9492 營業時間:星期一至日:11:30-22:00

0

【平食高質扒啱晒食肉獸 重量級斧頭扒大過塊面】Mini Friday

成日聽到人哋話去高級扒房食斧頭扒好正咁,不過礙於價錢關係(通常都要成千蚊一位),小編到依家都未朝聖過。今次就想為大家介紹一個可以平食高質斧頭扒嘅地方,Mini Friday係一間多國菜餐廳,餐牌上嘅選擇相當多元化,大廚想做到精緻而又合理嘅收費,令大家唔使一定要捱貴價先食到正嘢!現場仲有音樂表演添,聽住歌食扒,幾Chill喎。 今次為大家介紹精選四人套餐(HKD1438/斧頭扒餐),依家有88折,即係大概HKD1222再加一,每人俾350蚊就食到呢個超豐富嘅Set。包頭盤(10選4)、餐湯、主菜(5選一)、副菜(8選2)、甜品(2選1)同餐飲4杯。 頭盤可以10選4,真係幾多選擇,每個人都可以揀到自己心水菜式再Share!小編覺得頭盤分量剛剛好,每人都一定食到唔使爭!味道方面水準平均都幾高,黑松露炒野菌真係超香黑松露味呀!而且水牛城雞翼亦相當入味,誠意滿分。 餐湯有意大利雜菜湯或者是日餐湯可以揀,通常一紅一白咁啦,一個雜菜湯另一個就會係忌廉類嘅湯。今日小編試呢個南瓜忌廉湯,幼滑得嚟超有南瓜味,非常濃稠。感覺應該係用咗新鮮南瓜磨蓉再隔渣,南瓜味香濃得嚟又幼滑,小編Like爆呀! 呢塊斧頭扒來自美國,有成公斤重㗎,唔怪得拎起大過塊面啦,超重量級呀!小編覺得呢個分量如果係女仔Gathering嘅話可能要6個人先食得晒,4個人可能太飽喇!因為接住落嚟仲有副菜同甜品,要留少少肚呀! 通常出街食扒遇到最普遍嘅情況係「廚師心中嘅五成同你嘅五成唔一樣」。不過呢度食就冇呢個煩惱喇,因為佢哋將斧頭扒表面烤熟後,會提供一個迷你烤爐俾你自己燒,咁就可以解決一個朋友想食生啲、一個朋友想食熟啲嘅煩惱啦,乜都自己話事,食幾多成熟都得呀! 食完主菜已經要捧住個肚腩喇,不過見到副菜都好吸引,繼續努力啦!羊架分量比想像中大,一客有三大塊。羊架上枱時呈半熟狀態,切開可以看到顏色粉嫩,而且味道不羶,感覺好新鮮!卡邦尼意粉嘅溫泉蛋好出色,配埋醬汁口感超Creamy! 甜品有兩款可選,分別係原隻低脂水蜜桃或者菠蘿雪葩。頭先食完咁多肉,其實有一定嘅油膩感,而呢個雪葩就正正可以幫助解膩同消滯。用咁Fresh嘅甜品嚟做呢餐飯嘅完結真係好貼心! 至於餐飲同樣有非常解膩嘅選擇,除咗一般咖啡、茶之外,可以用半價選購任何飲品四杯。小編就揀咗水果茶,都係貪佢解膩!水果鮮甜唔澀,睇嚟係用新鮮嘢喎!另外如果大家3日前預約嘅話就可以免費升級為Moctail或者Cocktail,大家記住早啲預約喇! 除咗斧頭扒之外,4人餐其他選擇都有88折㗎!Happy Friday帶埋朋友一齊嚟試吓,一定有驚喜!   Mini Friday 地址:觀塘興業街4號 The Wave 3樓 電話:3705 9174 營業時間:星期一至五:12:00-16:00;18:00-00:00;星期六至日:12:30-16:00;18:00-00:00 (優惠期由即日起至2018年12月10日)