Tagged: 豆腐花

0

【廣東道街市懷舊荳品店 香滑豆花食出人情味】街霸

依家熱辣辣,想消暑可以會買杯珍奶降吓溫,但係間間都大排長龍,等得嚟都熱溶喇!加上之前又有報導話,一杯珍奶所含嘅熱量等於食咗兩碗白飯,唔怪得小編晚晚唔食飯都減唔到肥啦,原來致肥原兇係大家超愛嘅珍奶呀!想消暑其實唔一定飲珍奶嘅,今次街霸就係想話你知,去街市都有又健康又平嘅消暑選擇囉! 講起旺角,除咗朗豪坊同旺中之外,大家仲諗起咩?其實喺旺角廣東道一直有個好旺嘅街市,係一個舊式街市嚟嘅,全部都係鐵皮檔,賣嘅嘢就包羅萬有,上至生果下至小朋友底衫褲都有,感覺就好似北角春秧街街市咁,幾有風味㗎! 今次街霸就帶大家去廣東道街市嘅廖同合荳品廠,一行入去坐低就feel到好似返咗去七、八十年代咁,裝修同氣氛都瀰漫住懷舊味道呀! 街霸開頭以為嚟幫襯嘅多數都係公公婆婆,點知原來都好多後生仔喎,仲要個個都好熟架步,坐低就即刻叫碗凍豆花(HKD9)。豆花係即叫即潷嘅。枱上面會有黃糖提供,小編食豆花就最鍾意大大羹黃糖車落去㗎喇,咁先食得過癮嘛! 豆味重得嚟質地又香滑,豆花凝固嘅狀態控制得啱啱好呀!凍冰冰嘅豆花夾埋黃糖食落口又甜又解暑,重點係咩呀?豆類製品唔肥呀!食完成個感覺超fresh,價錢又抵,正! 如果餓餓哋想食啲熟食就可以試吓佢哋嘅煎豆腐(HKD12/4件),豆腐上面有魚肉釀咗喺上面,魚肉調味混和埋煎豆腐滿滿嘅豆味真係好好食,係一種好家常又樸實嘅味道。煎豆腐嘅質地係比較硬身嗰種,唔會話一夾就散晒,豆味超濃,皮脆內軟。12蚊4件,平均3蚊件,好抵呀! 話明係荳豆廠,梗係唔只得堂食嘅豆製品咁少嘢啦。除咗有賣布包豆腐之外,仲有賣釀好咗魚肉嘅煎豆腐、豆卜同埋炸豆腐添!夜晚唔知煮咩,買返屋企做餸就一流喇!另外豆漿(HKD9/杯)都好多人外賣,豆味好香濃,飲落唔會太甜,冰冰涼涼,夏天消暑一流呀! 喺呢度叫嘢食係唔需要落單嘅,基本上只要開口同店員姨姨講聲,下一秒就有食物送到面前。埋單只要同收銀姐姐講聲邊張枱,望一望數一數碗碟就知要收你幾錢喇!全間店充滿舊式人情味,好有老香港味道!下次去旺角又多個地方搵食喇!   街霸最愛:今集街霸最Like就係個凍豆花喇,街霸平時食豆花最怕一潷落去就散晒,須知道「原片豆花」同埋「豆花碎」係兩種唔同嘅感覺嚟㗎!廖同合嘅豆花滑得嚟真係一片片咁「片」喺個碗度,工夫雖然簡單但毫不馬虎,果然係一間開逾半世紀嘅荳豆廠呀! 廖同合荳品廠 地址:旺角廣東道1067號 電話:從缺 營業時間:星期一至日:07:00-19:00  

0

【荃灣街坊小店反通脹 5蚊豆腐花又平又好食】平霸

一講到美食天堂,其實荃灣都有好多正嘢食㗎!今次小編行吓行吓,見到呢間贊和豆品,全部豆腐花甚至雙拼都係賣5蚊一碗,真係見到都嚇一嚇呀,仲要冷熱同價添喎! 細細個食先係5蚊,依家想食到5蚊嘅豆腐花真係買少見少喇! 仲要超多口味選擇,荃灣居民好幸福呀! 綠豆沙豆腐花(HKD5),食落相當之清涼,綠豆沙好解暑、豆腐花又夠滑,熱天食返碗凍冰冰嘅豆腐花,真係透心涼呀!嗰日見到有好多食客都捧住碗豆腐花喺門口食,場面好搞笑!喺舖頭入面食呢,枱面上有黃糖同桂花汁,自己鍾意加幾多就幾多啦! 薏米白果豆腐花(HKD5),呢款係老闆誠意推介,老闆話超好食呀!小編本身好鍾意食薏米,簡直開正我嗰瓣,雖然整體味道偏淡咗少少,不過加咗黃糖之後,成個味道完全昇華晒,係超超超好食呀!唔會死甜,配合得剛剛好,高質豆腐花呀! 黑芝麻豆腐花(HKD5),未食之前都會驚黑芝麻會搶晒豆腐花嘅味道,但食落又ok,冇芝麻糊咁甜但又同豆腐花好夾,不愧為黑白配呀!當日有唔少食客都點咗呢味呢! 香滑淨芝麻糊(HKD7),真係充滿芝麻味呀!入口香濃,又唔會有一粒粒,非常順滑㗎!食完之後芝麻味仲停留喺口中,超級正!   平霸小評:今次難得行行吓街見到寶,當然要同大家分享吓正嘢啦!呢間小店又平又抵食,簡直係性價比爆燈呀!小店嚟講非常良心價了,街坊記得幫襯多啲呀! 贊和豆品 地址:荃灣荃興徑6號昌泰大廈地下5A舖 營業時間:星期一至日:11:00-00:30 《平霸》平食四方,歡迎各界報料。