Tagged: 豬太郎

0

【新派點心人氣旺 爆醬黑超奶皇包呃like】 點饌

自從石門嘅京瑞廣場開咗好多新食肆,無論住喺馬鞍山定沙田,絕對都係一個福音,啱晒一家大細嘅就可以選擇點饌食新派點心,呢度除咗食物,連舖名都夠晒呃Like,快啲食完嚟「點讚」啦! 舖頭裝飾用咗大大小小嘅蒸籠,喺店外一睇就知係賣點心啦!舖位細細,但五臟俱全,嚟緊仲計劃開點心製作班,唔知道地獄小廚郎嘅豬小編又可唔可以成功整到點心呢? 睇落好似彩霞一樣嘅彩雲蝦餃(HKD32),食落啖啖蝦肉,三色餃皮由師傅親自操刀,一壓一推,每隻彩雲蝦餃都會有少少唔同,影相呃like話咁易。 食點心一定要食奶皇包嘅小編,點可以錯過大王流沙包(HKD38),帶住黑超勁有型。 一撕開帶有鹹香味嘅奶皇就湧出嚟,小編一試難忘! 霸氣十足嘅芒果芝士龍王酥(HKD68)用上龍舟擺盤,食落香酥味鹹,芝士令到龍蝦肉無咁乾身,夾埋外層嘅酥皮,口感好豐富! Cute爆造型嘅鳳梨小金雞(HKD38),即叫即焗,保證入口酥脆,入面嘅鳳梨起絲,食落清甜,一啖一隻,啱啱好! 好有古色古香感覺嘅陳皮燉雪梨(HKD28),食落除咗有淡淡陳皮香,仲可以原隻雪梨食埋落肚,清甜得嚟暖暖哋,啱晒冬天飲啦!   點饌 地址:沙田石門安群街3號京瑞廣場1期2樓237號舖 電話:5543 8541 營業時間︰星期二至日:11:00-21:00 (逢星期一休息)

0

【熱爆過江龍枕頭蛋糕 芝士味低調到食唔出】伏務台

上個月由大馬正式攻港嘅熱爆過江龍店占師傅,雖然最近停賣咗好多人排隊買嘅鹹蛋味枕頭蛋糕,但其實原味同芝士味一樣有唔少人支持。小編當日未夠10點去到,舖頭未開門已經有幾個人排緊隊,門口仲寫明每人限買兩盒,睇嚟真係好受歡迎喎! 原味枕頭蛋糕(HKD50) 新鮮出爐嘅枕頭蛋糕,以古早味做賣點,濃濃嘅蛋香,喺排隊嗰陣已經流晒口水。喂喂喂,點解無咗占師傅個Logo印喺個蛋糕面嘅?唔通開咗個幾月就偷懶?同聞落去一樣,食落都充滿蛋香,的確係好有細個食嘅紙包蛋糕味道,呢個高級版就更加鬆軟啊! 芝士味枕頭蛋糕(HKD60) 唔好懷疑自己睇錯台,因為伏嘅正正就係呢個好多港女都熱愛嘅芝士味!聞落去一樣蛋香撲鼻,仲見到有啲芝士喺底層度,不過就無流心啦!食落同原味枕頭蛋糕好似,只係有少少鹹味,芝士味低調到唔係好發現到。 睇真啲!其實啲芝士喺晒底層,要一啖食晒先覺得有少少味囉!真係太低調喇! 豬太郎點指兵兵 其實對枕頭蛋糕無特別情懷嘅小編,對於入口鬆軟呢件事已經好收貨,不過既然佢咁出名,都唔怕大家俾吓意見啩!唔知占師傅睇到豬太郎話佢伏,會唔會考慮吓芝士嘅分佈呢?   入伏點:占師傅 入伏價:原味/HKD 50;芝士味/HKD 60 中伏by #豬太郎 美術by #Mui Mui 攝影by #大肚Dum 《伏務台》星期一伏務大眾,歡迎各界報料。

0

【瘋狂拉絲火焰Show 全港芝士迷攻陷將軍澳】 say cheese

將軍澳愈嚟愈多小家庭居民,充滿歡樂溫暖形象嘅say cheese,係一間用意大利芝士攻城嘅西餐,除咗有得食,價錢仲好相宜,最緊要係分量夠,地方又闊落,同屋企人或者朋友聚會都唔驚唔夠飽!經過出餐位仲可以見到預熱上菜嘅芝士,非常吸引! 用40公斤帕爾瑪芝士燒住嚟炒嘅火焰卡邦尼意粉(HKD98),喺出餐嘅位置上演火焰表演,好精彩㗎!炒出嚟每啖意粉都同芝士完美融合,非常香濃嘅芝士味! 用墨魚汁炒嘅鮮魷魚墨魚汁意粉(HKD98),加多HKD20仲可以有雙重芝士添啊!食完棚牙黑「黑忟忟」,一家人嚟到,小朋友一定食同玩都一樣開心,仲有新鮮爽口嘅鮮魷魚,大大份勁抵食。 朋友聚餐一定啱食嘅雜錦小食拼盤(HKD118),有齊芝士粒、魷魚、雞翼同薯條,分量都唔少㗎,小編仲以為新出咗細塊薯餅,原來係炸芝士,食落外脆內軟,絕對抵食! 見到門口咁多款Mövenpick嘅雪糕已經好心動嘅小編,揀咗呢款野莓狂想曲蜜糖多士磚配Mövenpick士多啤梨雪糕(HKD78),用Cream cheese將多士磚堆疊成一座小山,一啖一件脆卜卜嘅多士,再食啖香滑又唔膩嘅雪糕,勁歎! say cheese 地址:將軍澳唐德街9號將軍澳中心 1樓173號舖 電話:2343 0868 營業時間︰星期一至日 11:30-22:30

0

【將軍澳限定menu 勁揼本原隻龍蝦吐司】 Mukia Japan Toast

將軍澳中心餐廳愈開愈多,上個月開張嘅Mukia Japan Toast,啱啱好喺正轉角位,舖頭唔算大,不過就好受附近返工一族嘅支持,一件日式吐司都夠晒分量,做lunch都無問題。 舖仔細細,但就感覺好休閒,即叫即整嘅Toast就喺正食客面前製造,絕對乾淨企理。 每日限量15份嘅原隻龍蝦吐司(HKD112),每日原隻拆肉放喺烤香咗嘅麵包上面,仲有香甜嘅蘋果薯仔沙律,口感更加清甜。 分量都好夠,建議2-4人買兩款,咁咪可以share,又試多啲啦! 同樣係將軍澳限定嘅日式芥末醬和牛什菌吐司(HKD79),有香軟嘅和牛片,微辣嘅芥末醬為吐司生色不少,夾埋煎蛋同爽口嘅什菌菇,又出乎意料地幾夾喎! 有拉麵又有小食嘅極尚‧海老多士定食(HKD118),仲可以配埋指定咖啡,和牛片一樣嫩滑唔會咬唔爛,湯底仲係每朝用豬骨熬製,鮮甜味美! 小編就揀咗補十幾蚊差價嘅鮮果乳酪草莓沙冰(HKD38),勁大杯,入面有西瓜、哈密瓜同士多啤梨,Topping嘅乳酪同沙冰配合得啱啱好,酸甜嘅口感,啱晒少女有得飲有得打卡。 Mukia Japan Toast 地址:將軍澳唐德街9號將軍澳中心地下G92號舖 電話:3586 3600 營業時間︰星期一至日 10:00-22:00

0

【即試新出Mocha味薯片 又苦又鹹唔知似乜】伏務台

作為辦公室嘅微塵,平時最多做嘅就係喺Office食零食同薯片,前排卡樂B新出嘅朱古力同咖啡味薯片都洗咗豬太郎Facebook大半版,一於決定買嚟試吓! 呢個冬天,卡樂B推出咗兩款期間限定嘅薯片,分別係「朱古力味薯片」同「咖啡味薯片」,一齊睇吓豬太郎對兩款薯片有咩睇法! 「朱古力味薯片」 紅色包裝嘅朱古力薯片,一打開嗰吓朱古力味好香濃,不過啲薯片「黑忟忟」,睇落就唔多靚,咬落去都有朱古力味,不過食多兩塊朱古力味都無算好重。始終都係走唔甩平時鹽味薯片嘅感覺,鹹味就多過朱古力味! 「咖啡味薯片」 藍色包裝嘅咖啡味薯片,打開香過朱古力味喎!有淡淡哋嘅咖啡味,色水就似返平時嘅薯片,都叫做正正常常。唉!食落就出事,入口覺得好苦澀,但食落又鹹鹹哋, 好似食炸燶咗嘅薯片咁! 豬太郎點指兵兵 冬日限定推出嘅呢兩款薯片,有啲唔知佢想點喎!朱古力味都仲得到同事欣賞,但咖啡味就真係唔使搞咁多嘢啦,就算豬太郎跟住包裝兩隻味一齊食,都唔覺得似Mocha味囉!   入伏點: 7-11 入伏價:HKD 13.5 中伏by #豬太郎 美術by #Mui Mui 攝影by #大肚Dum 《伏務台》星期一伏務大眾,歡迎各界報料。

0

【蒜頭狂迷指定餐廳 甜品計「蒜」都咁夾 】Mad for Garlic

呢間喺銅鑼灣時代廣場充滿韓風嘅意大利菜,用咗重口味嘅蒜頭串聯成本menu,由前菜到甜品都無一倖免。由12月15日到1月1日就可以食到Mad for Garlic嘅聖誕套餐,即刻睇吓呢場「蒜」術大戰有幾重口味! 大玩韓風講氣氛嘅Mad for Garlic,入到去就見到歐陸酒窖式嘅卡位設計,好似去咗旅行咁好feel,地方寬闊,仲有半開放式廚房,可以見到廚師製作過程,小編特別鍾意! 造型得意嘅MFG特色蒜蓉包塔,睇落無從入手?唔使怕,侍應會幫你壓平切開,等客人可以細件啲咁食,好貼心啊! 睇落以為只係普通白湯?梗係唔係啦,呢款蒜香薯仔濃湯除咗有薯仔嘅甜味,仲有淡淡蒜香,湯嚟啫!食落唔會太重味,因為主菜先係重頭戲啊! 想要重口味嘅千祈唔好錯過熱板烤MFG招牌蒜頭山肉眼扒,捉緊時間喺熱辣辣嘅鐵板解決呢塊充滿蒜片嘅嘅肉眼扒,切開一小塊配埋大啖蒜片,成個口腔都充滿蒜味。 唔想咁重口味,可以揀蒜香扒石斑配香煎帶子,一樣走唔甩嘅蒜味,但配上味道淡啲嘅石斑,蒜頭就做咗個調味嘅作用,再加上煎到啱啱好同時外脆內軟帶子,想揀邊樣就跟你口味啦! 用無辜表情望住你食嘅蒜頭香蕉朱古力醬薄餅配自家製雲呢嗱雪榚,意想不到嘅配合!以蒜味配合香甜嘅香蕉,小編就會將一啖雪糕放上薄餅度,然後放晒入口,就唔會覺得啲朱古力醬太過甜啦!   Mad For Garlic Christmas Menus MFG特色蒜蓉包塔 蒜香薯仔濃湯 (兩客) 凱撒沙津 伴焗南瓜及脆芝士 熱板烤MFG招牌蒜頭山肉眼扒 或 蒜香扒石斑 配香煎帶子 蒜頭香蕉朱古力醬薄餅 配自家製雲呢嗱雪榚 供應期限︰12月15日到1月1日 價錢︰HKD688 (兩人份)   Mad For...

0

【潮食過十款惹味醬汁 深水埗巷仔新開串燒店】弄.燒

「弄」喺國內係指後巷嘅意思,位於深水埗橫街同後巷嘅呢間日式串燒店弄.燒就好符合喇!店中以七種基本醬汁,再混合出十幾款唔同口味嘅醬汁,用日本嘅燒肉方法,一邊燒一邊調味,希望食物嘅調味達到最理想嘅效果。 舖仔細細五臟俱全,顏色簡約清新,仲有攬枕俾客人坐得舒服又可以享受到食物,小編都擔心食完會一身燒肉味,不過店主就話佢哋全店係參考日韓燒肉店嘅抽風,咁就唔使驚會成身油煙味啦! 喺多款醬汁嘅串燒當中,最令小編心動嘅就係鮮燒白鱔《照燒汁》(HKD68),白鱔皮脆肉嫩,味道香甜,仲要經廚師好細心咁挑走細骨,食落啖啖肉;仲有一直都唔敢食嘅肥腸,燒香調味之後風味十足,口感仲好彈牙添。 大大隻嘅原隻鮮燒魷魚《薑蔥醬油》(HKD58)好抵食,店主就話呢款男女老幼都鍾意,唔少男客人都會將醬汁淋晒,貪佢濃味又夠香;而女客人就鍾意邊食邊點汁無咁鹹。 淨係食肉嫌太單調?咁就要試吓茶漬飯《鰹魚綠茶帶子》(HKD60),鮮甜帶子配上充滿茶香嘅飯,帶有少少鹹味又唔會搶走茶香,小編好滿意!淋茶之後記得要快手食,唔係就會變泡飯㗎喇! 食太多肉不如又嗌啲生果清一清,有別於常見嘅燒菠蘿,呢度加咗調味變成鮮鳳梨《辣椒、糖燒》(HKD18),入口帶有微辣,食落酸酸甜甜,令人食唔停口。 喺串燒店食甜品,一般通常都係得雪糕之類,不過喺弄.燒就可以揾到大大粒嘅燒棉花糖《紅莓粉》(HKD28),鍾意食甜嘅小編當然唔會錯過! 弄.燒 Backstreet Yaki 地址:深水埗福華街178A地下 電話:3996 9377 營業時間:星期一至日 1200 – 1500 ; 1800 – 2200

0

【平價歎日本直送魚 店主勢要攻入米芝蓮 】 口口口

就咁睇以為亂碼出唔到字,喺西環嘅口口口,其實係代表一個品字,食物有品質、廚師有品質同時食客都一樣有品。最特別嘅係每次嚟到口口口,就算嗌一樣嘅餸,店主兼廚師阿威都會有新嘅設計,充滿新鮮感。 80後嘅阿威由開髮廊轉行開餐廳,依家訂立目標一年後要打入米芝蓮,可以話係好大決心喎!開業2個月以嚟已經吸咗唔少客,店主阿威仲話想打造一個深夜食堂,同客人互相分享故事。座位雖然唔多,但正正就拉近咗同食客之間嘅聯繫。 以慢煮形式保留魚嘅鮮甜同嫩滑嘅東洋四重奏(HKD150),用咗日本直送嘅油甘魚、金目鯛、紅魚同鯖魚。小編一向最驚係食鯖魚好易有腥味,呢次一試,除咗無腥味,慢煮方便保持濕潤,口感仲好結實。 嗌親牛肉飯都知,牛肉乾晒乃兵家常事,呢款日本熊本牛肉粒粒飯 (HKD60) 除咗牛肉夠晒Juicy,仲帶有少少微辣,白飯都用返日本米,從一而終嘅日本菜,價錢咁貼地,仲唔快啲去試! 一路炒一路聞到香味嘅日式石斑海膽炒飯 (HKD60),飯同海膽嘅組合就經常出現啦,店主加入咗石斑,食落更加帶出石斑嘅鮮甜。小編食嗰陣仲用紫菜包住啖飯咁食,食落又有啲似手卷,不過店主次次擺盤都唔同,唔知下一次又有乜驚喜呢? 甜品一樣夠晒free style,日本抹茶雪糕蛋糕 (HKD30),一次過滿足你三個願望,底層係原味蛋糕,夾層用咗雪到硬晒嘅忌廉,最後用唧嘴將抹茶雪糕放係頂層,口感豐富仲平衡咗忌廉本身嘅甜膩。 口口口 地址:西環屈地街32號地下 電話:6680 1337 營業時間︰星期一至日 11am-9am(星期二休息)

0

【北京全聚德師傅駐場 超抵食5斤重片皮鴨】 古琴雅苑

每年都總會有鋪癮同屋企人食餐片皮鴨,有得自己包嚟食,夠晒參與感啦!喺灣仔開咗個零月嘅古琴雅苑,主打正宗北京填鴨,仲有唔少特色淮揚菜,啱晒同屋企人食,不過記得早啲訂位,因為真係好爆場㗎! 以典雅取代傳統中式嘅裝修,顏色明亮之餘仲覺得好清新,成間舖都以四人枱為主,地方闊落,絕對夠位睇到烤鴨片皮嘅畫面。 古琴雅苑嘅北京填鴨 (HKD328隻) 一推出嚟,濃郁嘅香味撲鼻,差啲忍唔住流口水,師傅利落嘅刀法,將全隻5斤重嘅烤鴨片成108片。配菜除咗青瓜,京蔥,仲有香甜嘅哈密瓜,食落好清新。醬汁都唔例外,搞搞新意思,有新款嘅蜂蜜黃莓醬,配合鴨肉,味道更香。 一次過滿足晒一家人願望嘅精美四小拼 (HKD168)有齊揚洲水晶肉、拍開洋黃瓜、花雕醉雞同雞絲粉皮,成日心大心細唔知揀咩就唔好錯過啦!揚洲水晶肉食落唔油膩而且入口香滑,醉雞肉質嫩滑芳香,想試晒就梗係嗌拼盤最抵食。 用自家蔥油調製嘅開洋蔥油拌麵 (HKD78)係小編新嘗試,對蔥味卻步嘅小編對呢款拌麵停唔到口,除咁青蔥,仲有蝦乾提味,咬落蝦香仲增加咗麵嘅口感。 古琴雅苑 地址:灣仔皇后大道東202號QRE Plaza 19樓 電話:2351 0528 營業時間︰星期一至日11:30-15:00;17:30-23:00

0

【限定火雞薄餅 薑餅人陪埋你過聖誕 】PizzaExpress

成日推出新menu嘅PizzaExpress,喺聖誕節又有限定新款啦!由2017年12月1號至2018年1月1日嘅聖誕限定餐牌,仲唔快啲約實朋友仔,一齊試吓咁有聖誕氣氛嘅火雞pizza同意粉啦! 去到時代廣場嘅PizzaExpress,坐喺透光大玻璃窗旁邊,仲有可以睇到pizza製作過程嘅開放式廚房,平時兩人枱都擔心太逼,喺呢度完全唔使擔心呢個問題。 用咗意大利藍芝士、煙燻芝士再加上水牛芝士配嘅焗芝士沾醬(HKD65),令到意大利藍芝士味道無咁重,仲帶微微嘅燻香,用圓碌碌嘅麵包頭沾起,一啖一件細細嚿啱晒嘴形。 將紅莓同蕃茄醬嘅酸甜口味融埋一齊嘅迷迭香火雞薄餅(HKD153),係今次聖誕套餐嘅主角之一,要好好掌握時間同時又保持火雞嘅嫩滑嘅質地,以為冇乜特別嘅松子仁,其實令到薄餅更有香氣,咬落仲好有口感。 除咗薄餅有火雞,意粉都唔執輸,用咗白酒忌廉汁煮成嘅白汁火雞蝴蝶粉(HKD133),以辣椒同迷迭香為火雞增添風味,呢款蝴蝶粉仲係小編今次嘅最愛啊! 好多朋友聖誕都會食返個蛋糕慶祝吓,呢款雪山椰棗蛋糕(HKD88),薑餅人夠晒可愛就唔使講,暖笠笠嘅椰棗蛋糕,食過先知,PizzaExpress好貼心咁將蛋糕嘅頂穿咗幾個細窿,等中間嘅蜜糖乳酪醬流入去,味道更加融洽! 聖誕限定餐牌 頭盤 焗芝士沾醬 聖誕凱撒沙津 主菜 迷迭香火雞薄餅 西西奧里芝士薄餅 白汁火雞蝴蝶粉 南瓜菠菜芝士卷 甜品 肉桂蘋果撻 雪山椰棗蛋糕 二人套餐 包括一款頭盤、兩款主菜、一款甜品同飲品兩杯; 四人套餐 包括兩款頭盤、三款主菜、兩款甜品同飲品四杯 兩個Set都可以同原有餐牌mix and match!咁多選擇,約多啲朋友嚟試多幾轉啦!   PizzaExpress 地址:銅鑼灣勿地臣街1號時代廣場食通天12樓1203號舖 電話:2506 0688 營業時間︰星期一至日11:30-22:30