Tagged: 豬手

0

【中環茶記變身可口可樂主題 可樂豬手軟腍富膠質】中環茶記

可樂迷可以出動又食又打卡喇!中環嘅中環茶記未來兩年變身做可口可樂主題,可口可樂公司仲提供唔少擺設俾佢哋裝飾餐廳添。當然仲有用可樂炮製嘅限定菜式,快啲睇埋落去揀定食咩啦! 店內有唔少打卡位,呢幅可樂樽砌成嘅牆係必定要影㗎! 牆上仲有唔少有歷史價值嘅真品,全部由可口可樂公司提供。 可樂炆豬手(HKD148)一般係普通碟上,鍾意淋汁有「滋滋」聲嘅記得落單講明要鐵板上喇。豬手用可樂、花椒、八角浸足24個鐘,再炆足兩個鐘!味道有甜但唔會好膩,反而肉質嫩中有咬口,好似食緊骨膠原咁。 鍾意食雞翼嘅朋友就有兩款可樂雞翼俾你揀。柚子可樂雞翼(HKD36/5隻)用新鮮柚子同雞翼加入可樂慢煮,上碟再加啲香甜嘅柚子蜜,酸酸甜甜幾開胃。 薑檸可樂雞翼(HKD36/5隻)就加咗薑同檸檬,雞翼慢火煮完再焗,相對味道濃啲同辣辣哋。 而所有套餐嘅餐飲都可以升級轉做可樂特飲(單點HKD25/跟餐加HKD12),一款係海鹽柚子樂,海鹽嘅鹹同柚子嘅酸令可樂本身嘅味道更加突出:另一款係青檸香茅可樂,微微嘅青檸同香茅味令味道更加fresh,仲有啲泰式嘅感覺添。 如果15:00打後嘅時間嚟,想飽肚又唔好太heavy,可以試吓星級常餐(HKD68),因為除咗有招牌沙嗲牛肉或厚切豬扒麵,仲包埋呢款分量十足嘅明治牛奶奄列山多士,跟餐轉埋可樂特飲一定大滿足啦! 明治牛奶奄列山多士仲有八款配料俾你自選兩款,由左至右,上而下分別有秋葵、五香肉丁、牛肉碎、蘑菇、日本木魚絲、蔥花、芝士同火腿,想清啲定邪惡啲由你話事。   中環茶記 地址:中環威靈頓66號裕榮大廈地舖 電話:2387 2002 營業時間:星期一至五:07:30-22:00,星期六、日:07:30-23:00

0

【將軍澳街坊熱捧宵夜檔 $17足料粉仔惹味又飽肚】平霸

唔知大家有冇食宵夜嘅心水推介呢?平霸今次就搵到喺寶琳街市入面嘅寶琳粉仔,最初老闆未開實體舖之前,主力做外賣,以往收到訂單就自己踩住架單車送外賣,係將軍澳之友嘅宵夜救星! 價錢平味道又好,成功俘虜一眾街坊,好多已經變成熟客仔,由踩單車年代幫襯到依家有實體店,可以話係寶琳街坊嘅集體回憶! 粉仔(HKD17)配料有蔥花、花生、豬油渣同菜脯,辣度可選唔辣至大辣。堂食分量算大碗,平霸叫咗BB辣,就咁睇唔覺有辣油喺面喎,但當你食咗一啖之後,啲辣就會慢慢滲出嚟,好刺激呀! 大家食嗰陣最好將所有配料都一次過放入口,同時品嚐到豬油渣嘅香味、爽脆嘅花生同惹味嘅菜脯,配埋煙韌彈牙嘅粉仔,口感非常豐富!重點係一定要飲埋啲湯,湯底濃而不稠,帶有微辣、味精又唔重,啖啖都好滿足呀! 除咗粉仔都有其他小食。辣味蜆肉(HKD10)有成10幾粒,蜆肉肉質肥美,味道鮮甜呀! 而且個辣汁唔係辣到噴火嗰種,唔食得辣嘅朋友都可以試吓喎! 酸辣無骨豬手(HKD10)嘅醬汁同蜆肉好大分別,明顯係泰式風味嘅酸辣汁,酸味更為突出,食落幾開胃喎!豬手肉質幾厚實仲要無骨咁方便,連埋豬皮大啖食,滿滿嘅骨膠原!   平霸小評:寶琳粉仔專做夜貓子生意,開到凌晨十二點半,就算OT都唔怕冇啖好食啦!小店一開門,已經有好多街坊過嚟落單,每個都起碼嗌兩碗以上,眼見老闆同客人都好似朋友咁,香港有時候就係需要更多呢啲充滿人情味嘅食店,希望小店長做長有呀! 寶琳粉仔 地址:將軍澳寶琳北路18號寶林街市PL86號舖 電話:9650 7563 營業時間:星期二至日:16:30 – 00:30(星期一休息) 《平霸》平食四方,歡迎各界報料。

0

【樂富街市平價食好西 10蚊即開生蠔勁回味】街霸

九龍城有好嘢食就係人都知啦,其實喺附近嘅樂富區都有好多好嘢食㗎!除咗有一大個美食坊之外,街市入面一樣有驚喜㗎!今集街霸為大家介紹樂富街市好受街坊歡迎嘅兩間舖頭,就係一豚豬手同埋Oyster Station Snack & Oyster Bar!要食西餐?唔使去高級餐廳,街市都搞得掂喇,真係食好西呀呢次! 呢間一豚豬手位於街市入口位置,人流認真多呀!不過人來人往都阻擋唔到店員嘅熱情,小編停咗喺食物櫃前面考慮緊食咩嘅時候,店員已經不停推介佢哋最出名嘅豬手喇! 除咗招牌黑椒豬手(HKD58/細)之外,小編仲叫咗碟豬肋排(HKD35/細)。豬手同豬肋排係落單後即時切嘅,聽見店員同師傅講「攞嚿大嚿啲嘅!」,唔通驚小編唔夠食?哈哈!睇住師傅手起刀落,話咁快一盤豬手就落到小編手上喇! 其實仲有好多吸引嘅選擇㗎,例如滷水豬腳仔(HKD30/6件)、醬汁焗雞脾(HKD30/2隻)、麻辣雞翼(HKD30/8隻)等等,真係每日都可以加餸呀! 街市裡面多數都係外賣店,咁小編買完就當然要搵張櫈慢慢歎啦!(利申:小編都係第一次喺街邊食豬手同豬肋排……) 一打開個蓋就聞到陣煙燻嘅味道,我鍾意呀!份豬手大大盒,都幾重秤㗎!食落唔係平時屋企煮飯炆得好腍嗰種,完全係西式煮法,感覺用嚟送酒送白飯會好match!事關黑椒醃得豬手好入味,如果就咁齋食嘅話係會有啲啲鹹嘅。不過鹹豬手就係鹹㗎啦,好味咪得囉!你話係咪? 豬肋排係用蜜糖燒過嘅,好香好好味呀!以豬肋排嚟講都算多肉,唔會咬落去淨係得嚿骨咁,肉質都幾嫩,食完一條就想食第二條,停唔到口呀! 如果懶得煮飯又想平食好西嘅話呢(人總係咁大想頭㗎喇!),Oyster Station Snack & Oyster Bar呢度仲有得食10蚊隻優惠價嘅即開愛爾蘭生蠔,仲會送多2隻俾你,其中一隻仲係送正價嘅法國蠔添呀!所以小編叫咗6隻愛爾蘭蠔(HKD10/per),侍應再送多隻法國蠔(HKD原價58/per)同埋愛爾蘭蠔。依家60蚊食到8隻蠔,圍起上嚟7個半一隻咋!堅抵! 雖然唔使10蚊隻蠔,不過質素冇因為咁而下降。雖則話大隻呢,佢就真係唔算大隻,但就真係好夠海水味,同埋夠新鮮!其中有2-3隻係creamy嘅,其餘都以鮮甜為主。如果想平平哋食吓蠔又唔想喺屋企自己開嘅話,呢間的確係好唔錯嘅選擇。10蚊隻真係食返打幾兩打都唔算肉赤嘛!   街霸最愛:雖然豬手同埋豬肋排都好正,但以性價比嚟講10蚊即開生蠔毫無疑問喺呢集街霸脫穎而出,佢抵食嘅程度真係突破天際到會令我就算唔係住喺樂富會都專登走去幫襯。小編啱啱仲留意到原來喺其他地方有分店㗎,大家不妨去試吓! 一豚豬手 地址:樂富聯合道198號樂富廣場樂富街市405號舖 電話:2799 0799 營業時間:星期一至日:10:00-19:30 Oyster Station Snack & Oyster Bar 地址:樂富聯合道198號樂富廣場街市地下401-402號舖 電話:2549...