Tagged: 貓山王

0

【Holly Brown推貓山王Gelato 吸睛美人魚新品迎夏日】Holly Brown

榴槤一進入當造期,連人氣甜品咖啡店Holly Brown都推出全新貓山王Gelato!加重三倍榴槤分量,俾一眾榴槤迷過足癮呀!唔食榴槤都唔緊要,佢哋仲有一系列嘅夏日限定甜品,其中靚靚嘅美人魚雪糕窩夫啱晒打卡呃like。晚市仲有加38蚊任食手工炒雪糕嘅超抵優惠,仲唔滿足晒你所有願望?! 身為榴槤嘅忠實粉絲,夏天真係好難抗拒冰凍嘅榴槤雪糕!呢款新出嘅貓山王Gelato(HKD100/杯)將新鮮貓山王加入雪糕,分量仲比坊間嘅榴槤雪糕加多三倍榴槤肉,打成香濃綿滑嘅Gelato。不過呢款口味得中環分店先有,仲係每日限量外賣50杯! 望落咁靚咁夢幻嘅天藍色美人魚系列甜品,梗係要打卡呃like啦!左邊呢杯美人魚Crazy Shake(HKD128)將鮮忌廉唧喺淺藍色嘅奶昔上面,再加上美人魚白朱古力同銀色糖果做裝飾。而右邊嘅美人魚雪糕窩夫(HKD68)亦有差唔多嘅裝飾,放喺粉藍嘅雲呢嗱意式炒雪糕上面,叫邊款都同樣吸睛呀! 估唔估到呢款咁cute cute嘅甜品係咩嚟呢?原來佢係荔枝角分店獨賣嘅日式花嫁果子梳乎厘班戟(HKD238),面頭鋪滿日本傳統手工製嘅花嫁果子三盆糖,入面就係淋咗士多啤梨果醬嘅原味班戟,鬆軟又充滿蛋香。 除咗全新系列嘅吸睛甜品之外,依家至8 月31日仲推出夏日限定優惠添!只要喺中環分店嘅晚市時段點任何一款正餐,就可以upgrade享用All You Can Eat雪糕放題(加HKD38),可以食盡十三款意式炒雪糕(原價HKD68)同美人魚系列炒雪糕。咁抵食,快啲叫埋朋友一齊去瘋狂食雪糕啦!   Holly Brown – 中環店 地址:中環士丹利街22號地下 電話:2869 9008 營業時間:星期一至六:07:30-22:00,星期日:09:00-19:00 Holly Brown – 荔枝角店 地址:荔枝角長順街15號D2 Place二期地下1號舖 電話:2371 2826 / 2371 2225 營業時間:星期一至五:09:30-22:00,星期日:09:00-22:00

0

【榴槤控注意!新開café!必飲一嚿貓山王跌落奶】榴槤BB

夏天一到,代表食榴槤嘅季節又到喇!榴槤控快啲出嚟啦!依家喺觀塘有間新開嘅榴槤café,除咗有榴槤食,仲有唔少榴槤飲品,真係包你食到「榴槤」忘返呀! 榴槤全部都係泰國同馬來西亞嘅果園新鮮運送,嚿嚿都好好食㗎! 一嚿貓山王跌落奶(HKD48),基本上係必飲,最受客人歡迎嘅一款呢!簡單啲講即係榴槤奶昔,入面用咗榴槤蓉,40g貓山王果肉同牛奶造成,飲落非常之濃郁,仲可以食到一絲絲果肉添呀,超級滿足! 貓山王芝士雲頂炭燒烏龍茶(HKD38),面頭嘅奶蓋唔止芝士咁簡單,當中加咗榴槤蓉同貓山王果肉,用咗鳥龍茶做底,可能因為榴槤加埋啲奶蓋一齊,所以唔會搶晒鳥龍茶嘅味道,小編十分推薦啊!有時候唔想食晒成嚿榴槤咁膩,試吓飲呢個就啱晒,食到果肉之餘都唔怕膩啦! 貓山王焦糖脆奶荼(HKD38),用咗台灣紅茶,面層再用火槍燒成一層焦糖脆脆,飲落有少少焦香,又帶有淡淡嘅榴槤味,唔好諗住榴槤加入台式飲品度會好奇怪呀,其實相當有驚喜,出奇地夾呢!榴槤控真係唔好錯過喇! 榴槤品鑒盤(HKD148)入面有齊五款榴槤,由淺味食到濃味。第一嚿由名種食起,包你試晒唔同榴槤嘅味道,最後一嚿先食貓山王呀!小編最愛金包同貓山王,味道真係錦密得嚟仲好香濃呢,而且好creamy,貓山王仲帶有些少酒香,令人回味無窮呀! 榴槤BB 地址:觀塘敬業街65-67號敬運工業大廈2樓B號舖 電話:3708 8732 營業時間:星期一:12:00-19:00;星期三至日:12:00-19:00(星期二休息)

0

【「好好肉」得返2粒仔肉 沙田榴槤黑店多客中招】食焦

呢個時候唔少榴槤控都出動,諗住趁當造嗒返啖又香又濃嘅榴槤肉!不過遇著啲生果檔衰黑心,專入渣貨就真係黑仔喇!好似有網友喺沙田瀝源邨檔生果檔,210蚊買咗兩個榴槤,買嗰陣店員仲話「好好肉」,點知返到屋企一開,五瓣肉有三瓣係冇嘅,另外兩瓣只係得返2粒肉仔,係一毫子咁大嘅肉仔喎!唔嬲就假啦! 嬲還嬲,都要影咗相先,跟手落去檔嘢度嘈啦梗係,點知檔主竟然唔肯退貨!苦主留言「仲話我地(哋)搵佢錢(笨?),因為越來越多街坊圍觀才最後退了$100!」。網友喺群組po咗事發經過同張得2粒肉仔嘅榴槤相,原来有唔少街坊都瀨過嘢喎,呢間生果店個朵已經臭晒喇! 有網友留言話「果間不嬲都係黑店嚟㗎喇!好耐之前幫佢買榴櫣點知揀個生嘅唔熟返到屋企先知呀!然後落去搵佢話佢比(俾)個唔熟嘅榴櫣我,然後老板(闆)好串咁話唔熟咪返屋企蒸熟佢囉!」嘩,咁樣叫個客返去蒸熟佢都得?又真係離譜啲喎! 再睇返黑歷史,其實兩個月前喺另一個群組都有人中招,又係呢間呀!呢位苦主係買咗一個400蚊貓山王,返到屋企一開發現啲肉又黑又灰,仲要出晒水!當然店主又係唔肯換又唔肯退錢啦,只係話下次買就計返平啲喎!試問仲邊有下次呀?睇嚟呢間店真係好唔掂,榴槤似乎仲係中招嘅重災區添,下次仲肯幫襯佢,記得當場開咗榴槤先喇!