Tagged: 越南菜

0

【越式All Day Breakfast夠創意 椰青焗飯海鮮滿到瀉】Le Viet

想搵間坐得舒服、食物質素唔錯嘅越菜餐廳可以試吓Le Viet喇,餐廳推出咗充滿越南風味嘅越式全日早餐,同平時食開嗰啲All Day Breakfast好唔同㗎!餐廳近期仲喺旺角開咗新分店,今日等小編去睇吓有咩好食啦! 餐廳格調充滿越南度假風情,而且空間都幾大,有唔少座位。 話晒都係越南餐廳,連All Day Breakfast都有越菜特色!呢個豐盛全日早餐(HKD108)望落真係豐富,有一大碗越南雞粥、越式蒸粉包、多士、菜脯煎蛋,仲有好多杯唔同款式嘅食物,啱晒同小編一樣乜都想試吓嘅人!小編試咗碗雞粥,雞件分量都幾多,冇乜特別嘅調味之下都幾鮮甜,想濃味啲都可以加啲芫荽蔥花、肉鬆或者魚露。 食完碗粥其實都飽咗一半,好彩其他食物都細細份,可以逐樣試吓。最左邊係越式柚子大蝦沙律,大蝦夠爽甜,加咗酸酸甜甜嘅柚子入去好Fresh,下面啲蘿蔔絲嘅口感又爽脆,幾開胃;最右邊嘅係一款西式甜品焦糖燉蛋,焦糖面燒得夠脆,燉蛋滑得嚟好有奶香,不過就嫌佢太細杯,唔多夠喉囉! 全日早餐入面嘅越式蒸粉包係越南菜嘅餐前小食,除咗餡夠多,面頭仲放咗扎肉、乾蔥,蘸魚露嚟食真係好惹味! 嘩!呢款超載椰青焗飯(HKD103)真係同佢個名一樣呀!店員將成個椰青搬上枱嘅時候,小編真係嚇親,因為賣相都幾誇張吓,原個椰青上面放滿勁多海鮮同椰汁飯,再淋咗好澎湃嘅椰漿。焗飯分量超多又足料,應該起碼3個人share先食得晒。呢個椰青焗飯食落椰香味好重,出奇地同啲海鮮又夾到喎,不過味道上就會帶有少少甜味,如果鍾意椰香味嘅可以一試! 小編就好鍾意食呢道金不換白酒煮蜆配法包(HKD158)喇!隻隻蜆又大又飽滿,仲吸晒啲白酒同香料味,煮得好入味。食落都幾重金不換味,又夠鮮甜。煮過蜆嘅汁有好濃鹹香味,可以話係成道菜嘅精華,用跟埋嘅法包蘸汁嚟食就一流喇!不過呢道菜係旺角店嘅限定菜式嚟,想食就要去旺角喇。 想試返傳統啲嘅越南菜就可以嗌碗Pho嚟食喇,呢個特別火車頭(HKD78)除咗生牛肉之外,仲有牛丸、牛柏葉同牛腩,成碗湯粉都有濃郁嘅牛肉味!   Le Viet (旺角分店) 地址:旺角彌敦道636號銀行中心1樓101-106,108-109號舖 電話:2521 6322 營業時間:星期一至日:08:00-00:30  

0

【新派越菜店進駐美麗華 牛魔王首選火車頭湯河】Madam Saigon

尖沙咀美麗華廣場有越南菜餐廳Madam Saigon新登場,環境裝潢摩登,大大幅越南風味嘅牆畫已經好吸睛。餐廳喺傳統菜式上改良,提升鮮味同新鮮感,令味覺同視覺都享受到越式風味。 餐廳座位闊落,籐椅背坐得舒服又有越式feel。講咁多,睇吓有咩食先! 食越南湯河一定要有火車頭!Madam Saigon火車頭湯河粉(HKD88)嘅湯肉味比較重同深色,因為用咗大量牛骨、牛腩、花椒、八角、桂皮同香葉等材料熬足2日!香料味出嘅湯底,配上口感彈牙嘅巴西牛肩胛肉、牛丸、牛筋、牛肚同腩肉,仲唔係牛魔王必食首選? 海南雞配香茅菜飯(HKD98)將雞、蔥、蒜同薑一齊慢火煮一個鐘至七成熟,然後熄火浸泡到九成熟,再用凍水過冷河令雞皮更滑身,肉質更爽。雞本身已經夠油份,所以改咗傳統配搭雞油飯嘅食法,用健康啲又高纖啲嘅上海菜飯代替。 安南燒乳豬(HKD268)係以越南料理做藍本嘅自創菜式,選用越南乳豬、越南乳豬醃醬、洋蔥、茜芹、香茅、蒜頭同黑胡椒醃足3日。用先蒸後炸嘅方法烹調,外皮香脆又夠晒入味。配埋用新鮮番茜、橄欖油、醋同黑椒鹽自家製成嘅番茜醬,可以突出乳豬嘅味道同減輕油膩感。 鮮蝦幻彩雜果米紙卷(HKD88/6件)以蝦肉、生菜、火龍果、哈蜜瓜、芒果、奇異果同士多啤梨整成。為咗更貼近越南風味,連米紙都用越南貨。大廚仲將傳統嘅魚露改成自家製士多啤梨同奇異果醬汁,味道更加滑甜。加上手工製嘅糖藝品,靚到要相機食先囉。 飲品品質都要靚,左邊嘅越式滴漏咖啡(HKD48)就用陳豪咖啡品牌Blooms Roastery & Craft Tea嘅咖啡;右邊石榴姐(HKD79)用咗Bacardi冧酒、石榴汁、龍舌蘭糖漿、白醋、青檸汁同檸檬葉,甜中帶fresh嘅感覺都唔錯。   Madam Saigon 地址:尖沙咀彌敦道132號美麗華廣場1期低層地下B131號舖 電話:2808 4777 營業時間:星期一至日:11:30-23:00

0

【過江龍老字號定街坊店? 精選四大人氣越式生牛河】蔡瀾Pho、錦麗、香河越南餐廳、越軒牛肉粉專門店

泰國菜招牌係冬蔭功湯、新加坡係肉骨茶、台灣就係魯肉飯,咁越南菜招牌又係咩?梗係一碗令人回味嘅生牛河啦!最近一窩蜂咁開咗唔少越南菜餐廳,要試到餐廳嘅真功夫掂唔掂,生牛河自然係最好測試喇!要做到一碗好味嘅生牛肉河,湯底除咗要鮮甜濃味,牛肉更加要做到粉嫩幼滑,肉、湯、河、香料,每樣配合得天衣無縫先令人清晒成碗!點先食到一碗高質生牛肉河粉?今次小編集合咗四間唔同風格嘅越南餐廳,有新有舊、每間各有真功夫! 明星效應   蔡瀾Pho 蔡瀾曾經講過:「天下間喜歡吃東西的人,最終都會愛上一碗越南牛肉粉。」,所以佢行勻全球,喺墨爾本嘅勇記揾到最好食嘅越南粉帶俾大家。有勇記秘方,又有自家研發嘅河粉機,加上八成食材由越南同澳洲進口,蔡瀾Pho門面寫住「一生難忘的越南粉」,真係對自家出品好有信心咁喎! 生牛肉湯河粉(HKD88)有6-7片肉左右,湯好熱,影多幾張相就浸熟咗啲肉,想食到嫩啲嘅質感就要快手喇! 河粉機每日新鮮製作薄薄嘅越南河粉。由浸米、石磨磨成米漿再蒸熟、切割都係自家製作。河粉係小編食過之中最薄嘅,少少易斷啦,但真係幾爽滑㗎;而湯底就非常清澈同鮮甜,係有少少油嘅,如果加上附有嘅青檸汁同辣椒,味道會變得醒神,但要小心咬到辣椒會想噴火呀!另外仲有一杯芽菜同香菜都係俾你隨心加料,想食重味啲又得啫。 蔡瀾Pho 地址:中環威靈頓街15-25號UG樓 電話:2325 9117 營業時間:星期一至日:10:00-22:00   越南過江龍   錦麗 本身有接近50年歷史嘅錦麗喺越南好出名,最高紀錄試過一日賣出過三千碗牛肉粉,深受當地客人同遊客歡迎,更被《華爾街日報》評為「胡志明市最好吃牛肉粉」,唔怪得上年登陸香港開分店之後,經常都要大排長龍,仲有唔少星級名人食過都讚口不絕,係咪真係咁好食?等小編試吓啦! 錦麗生牛肉粉(HKD60),枱面印有一張越南粉食法嘅教學貼紙,依照指示嚟食,先飲一啖充滿濃郁牛味嘅熱湯,再將九層塔及香葉撕碎放入湯中,之後再加青檸汁、辣椒同芽菜拌勻,最後將粉同湯一齊放入口中,每一啖都充滿住濃郁嘅牛湯味,又真係幾正喎!湯底濃郁鮮甜,生牛肉軟腍幼滑,重牛味之餘亦鮮味十足。攻港短短一年時間,先後喺港九新界開足六間店,犀利呀! 錦麗(銅鑼灣店) 地址:銅鑼灣告士打道280號世貿中心3樓P311號舖 電話:2777 5388 營業時間:星期一至日:11:30-22:00   40年老字號   香河越南餐廳 港島區朋友仔,實知老字號香河越南餐廳。創辦人係越南華僑,因為一直鍾情越南粉,咁啱拍擋又曾經喺越南做過生牛河,所以就引用咗佢嘅配方,嚟到香港開越南餐廳,一開就開咗接近40年,因為味道較為傳統,除咗多香港人食,亦係唔少越南華僑嘅開飯食堂。 生牛肉河粉(HKD50),一碗生牛河會附上青檸同辣椒粒,想加薄荷葉、生芽菜同九層塔,就要問店員先有得加喇,唔使加錢嘅!生牛河一放上枱,已聞到陣好香嘅牛湯味,飲落口諗住會好濃郁,較為重口味,點知味道完全相反。負責人Rita話,原來係因為老闆娘本身唔鍾意重口味,希望啲湯以清甜為主,所以湯底只係用洋蔥、香料同牛骨嚟熬煮,所以湯底清甜又帶有淡淡嘅牛味,一啲都唔油膩! 牛肉真係超級大塊!差唔多有成半個碗咁大,生牛肉再浸一浸熱湯之後,肉質變到好粉嫩,一啲都唔會過老,配埋啖湯一齊飲真係牛味十足!Rita仲話其實加半嚿青檸汁同幾粒辣椒落去,已經好夠味,香葉唔需要加晒落去,只要加少少,調吓味咁先係最好食!每一條河粉都沾滿晒湯汁,變得更滑溜! 香河越南餐廳 地址:銅鑼灣波斯富街89號 電話:2576 2240 營業時間:星期一至日:12:00-23:00   親民價益街坊 ...

0

【越式小店打響名堂 正宗口味招牌Q1麵】第一郡

第一郡英文就叫Q1,去過越南胡志明市嘅都知道,第一郡Q1就係最繁榮嘅中心點。第一郡嘅總店喺深水埗,係好多人食過都大讚嘅越南餐廳,憑住正宗越南菜儲落一班熟客,總店舖位細細依然人潮不斷!老闆娘容姐係越南華僑,來到香港開店,梗係想將自己拿手嘅家鄉菜發揚光大啦! 容姐仲話知道好多熟客都來自港島區,所以去年尾決定開分店嗰陣,就諗到選址天后,等港島食友們唔使過海都食到喇!兩間店menu大部分一樣,而且天后店環境比較闊落,客人坐得舒服啲,唔使再咁逼喇! 順化牛?米線(HKD65),天后店新出品,呢味米線喺越南同生牛河一樣咁出名㗎!香港反而比較少地方食得到,口感同生牛河好唔同,材料有豬手、牛同扎肉,睇落以為好重口味,事實係完全相反,湯底非常清甜,帶有淡淡嘅香茅味;由於一滴味精都冇落,所以成碗湯飲晒都冇問題!牛?有三大塊,肉味濃得嚟仲好有咬口,食厭咗生牛河可以試吓呢款喎! Q1麵(HKD65)用咗海鮮湯底,飲落鮮味十足!全碗麵以海鮮為主,有帶子、魚肚、冬菇同蘿蔔等,相對嚟講比較清淡,而魚肚每一塊就超大嚿,又爽又滑溜,冬菇煮到入晒味,香氣誘人呀! 蟹膏蕃茄湯檬(HKD50),招牌菜之一,湯底酸酸甜甜好開胃!超級足料有蕃茄、扎肉,蟹膏、豆卜同豬紅,食完大滿足呀!小編覺得蟹膏最特別,外表有啲似鬆糕,其實係用咗蛋加蟹肉、蟹膏整成,非常濃郁嘅蟹膏味,再索埋湯汁嘅濃味,真係一試難忘! 越式麵包(HKD40),小編食完一啖之後,真係想日日都食喎!入面有滿滿嘅肉鬆、扎肉、青瓜、醃菜、鵝肝醬同埋自家醃嘅豬肉,法包外層爽脆,麵包唔會硬崩崩,加上醃菜酸味味好開胃,令人食到停唔到口,小編力推呀! 牛油果沙冰(HKD30),其實只係用咗牛油果而整成嘅沙冰,牛油果味道非常濃郁,飲落反而似奶昔多啲。牛油果甜度啱啱好,基本上係每個食客嘅必飲呀! 班蘭綠豆糕(HKD13),價錢夠晒平!因為製作需時,所以每日只限量50個,好快就賣晒!無添加色素,咬落煙煙韌韌,配埋中間一層綠豆蓉,入口香滑綿密,作為飯後甜品簡直一流! 第一郡 地址:天后威菲路道6號地下B舖 電話:3997 3782 營業時間:星期二至日:11:00-21:00(星期一休息)

0

【中環賣Pho秘方入靚貨 蔡瀾:盡力做到最好】蔡瀾Pho

追求美食嘅蔡瀾又加入餐飲大軍喇,進註中環嘅蔡瀾Pho有咩特別?因為蔡San將佢行勻全球,喺墨爾本嘅「勇記」揾到最好食嘅越南粉帶俾大家。有「勇記」嘅秘方,又有自家研發嘅河粉機,加上八成食材由越南同澳洲進口,蔡San今次真係準備充足。不過口味嘅嘢始終人人唔同,問蔡San點睇,佢話:「我已經盡力做到最好!」。既然係咁,講多無謂,試食最實際! 有蔡San就一定有靚女,上星期四開幕當日蘇玉華同黃宇詩都去捧場。 大門位置以吧枱為主,可以睇到廚房運作,再行入去同樓上嘅座位都算闊落。 河粉機每日新鮮製作薄薄嘅越南河粉。由浸米、石磨磨成米漿再蒸熟、切割都係自家製作。睇完機就食麵喇! 生牛肉湯河粉(HKD88)係越南粉麵嘅招牌,有6-7片肉左右,但湯好熱,影多幾張相就浸熟咗啲肉,想食到嫩啲嘅質感就要快手喇!河粉係小編食過之中最薄嘅,少少易斷啦,但真係幾爽滑。 湯底非常清澈同鮮甜,係有少少油。如果加上附有嘅青檸汁同辣椒,味道變得醒神,但要小心咬到辣椒會想噴火呀!另外仲有一杯芽菜同香菜都係俾你隨心加料。 想包羅萬有就食特別牛肉湯河粉(HKD128)啦,有生牛肉、金錢腱、牛腩、牛筋、貝殼牛肉丸、銅錢牛鞭花同牛柏葉,可以食齊6樣餸;而越南牛肉粉(HKD68)就只可以自選其中兩款餸,睇吓想食多定食少啦!  紅油酸辣湯檬(HKD68)應該係為香港人而設,你敢唔敢試呢?唔食牛嘅朋友都有其他選擇㗎: 香茅烤豬頸肉春卷撈檬(HKD68)大約有半份香茅烤豬頸肉同兩條春卷,其實都幾抵食,睇埋小食價錢你就知點解。 香茅烤豬頸肉(HKD58)燒到面頭有啲焦香,但內裡嫩滑爽口有肉汁,酸辣汁唔算好辣,幾惹味! 越式炸春卷(HKD48)炸得好香脆,又唔會硬崩崩。餡料好豐富,有蘿蔔絲、木耳、粉絲、蟹柳同肉碎,全部粗幼度都差不多,可見師傅都用心製作。甜酸汁味道適中,減退春卷嘅油膩感。 香芒凌波魚米紙卷(HKD48)非食不可呀,米紙好薄皮,口感軟熟。包住大量新鮮蔬菜、脆脆同芒果,令味道清甜啲,唔覺炸魚好熱氣。 炸嘢停不了,黃金蝦扒(HKD78)都算彈牙,但蝦味唔算好突出。 越南多色冰(HKD28)有啲驚喜,啫喱口感軟滑之餘,仲有紅豆同類似玉米嘅配料,令到成杯飲品點睛之處係落咗炒香嘅花生呀!啜一啖椰奶味慢慢滲出嚟,甜度適中好OK! 等緊嘢食冇乜細藝?枱面有檸水俾你自己斟。其實所有食物嘅味道都幾平衡,唔會有一樣特別搶味,鹹、甜、辣等味道都啱啱好。   蔡瀾Pho 地址:香港中環威靈頓街15-25號地舖 電話:2325 9117 營業時間:星期一至日:08:00-00:00

0

【赤柱尋獲高質親民美食 巷中歎正宗泰越料理】赤柱中泰美食餐廳

放假想悠閒啲,不妨去赤柱市集內街後巷嘅赤柱中泰美食餐廳。呢度別具風味,師傅係泰國人、老闆娘係越南人,所以佢哋嘅泰、越菜式都好正宗,食品種類仲好多添! 午餐日日唔同,出菜速度快,環境仲好開揚闊落,有二人至十幾人嘅座位。 泰式豬手飯(HKD50)去咗骨,好方便!豬手分量都幾多,配埋酸菜同滷水蛋,口味幾清新。 青咖喱豬肉飯(HKD56)偏甜,椰子味比較重,但好開胃囉!豬肉入味又有咬口,撈飯食真係忍唔住想添飯! 紅咖喱牛肉飯(HKD56)相對青咖喱辣啲啲,牛肉好嫩滑,煮得啱啱好。 越南式火車頭湯河(HKD52)有新鮮牛丸、牛肉、牛筋、牛柏葉同牛腱 ,加埋超清甜湯底,可以一路食一路飲湯! 辣湯海鮮湯烏冬(HKD52)可以揀辣湯或清湯,但小編就推介辣湯喇,因為配埋海鮮嘅鮮甜真係perfect match!加上烏冬吸收晒辣湯嘅味道,好濃郁! 泰式小食拼盤(HKD108)有豬頸肉、蝦餅、春卷同無骨鳳爪,絕對滿足有選擇困難症嘅朋友!豬頸肉煎得好香脆可口,日日賣斷市㗎!蝦餅都係小編個人推介,相比出面食嘅更加彈牙有口感!仲有呢度嘅晚餐主打泰越式私房菜,可以按你嘅喜好或由廚師發辦。   赤柱中泰美食餐廳  地址:赤柱赤柱大街52-56號地下 電話:2813 7998 營業時間:星期一至五及日:07:30-17:30(星期六休息)

0

【豪裝新派fusion越南菜 火車頭金邊粉夠霸氣】宿宿醉

講到話去中環搵食,係咪通常會覺得啲餐廳貴價又食唔飽?咁又唔使話次次都要食最豪嘅,偶然行一次中間路線都得啫!好似呢間新餐廳宿宿醉最新開咗喺中環,主打fusion越南菜,有正宗越南粉食又有西餐,價錢就中間價位,而且質素非常唔錯喎!飲完酒快啲約埋三五知己嚟宿宿醉食返碗pho解吓宿醉啦! 特強宿醉製法式火車頭金邊粉(HKD188)聽個名都夠晒霸氣,分量仲大到嚇死你,可以2-3人share食。入面有牛柏葉、即炸油炸鬼、安格斯牛肉、牛坑腩、牛筋丸同埋越南虎蝦,認真多料!湯底仲熬足12個鐘,絕對無加牛精同味精,唔怪得飲上口清清哋又夠鮮甜啦! 澳洲連骨杜拉格斯肉眼扒(HKD368)唔想淨係食pho?冇問題,呢度仲有好多唔同嘅扒食,好似呢個連骨杜拉格斯肉眼扒就啱晒啲食肉獸,成塊扒煎到好香又夠juicy,輕輕鬆鬆清晒冇難度。 法式燒東海龍蝦尾法包(HKD178)呢個法包最有驚喜呀!原來入面係搽咗鵝盰醬同蟹膏醬,仲用咗兩隻龍蝦,所以食落啖啖肉!唔止咁添呀,入面仲特登加咗金不換,食落更加有越南風味。 越式自家製蔗蝦 (HKD48)唔好以為呢個大路小食好普通喎,入面啲蝦膠全部係自家手打㗎,再加埋啲香葉,食落好彈牙呀! 宿宿醉 地址:中環閣麟街37號祥興商業大廈6樓 電話:3427 3718 營業時間:星期一至六:12:00-22:00(星期日休息)

0

【慢煮48個鐘 超屈機越南五花肉麵包】越南麵包

九龍城有一間越南麵包,打正旗號專賣越南麵包,Burger大家就食得多啦,食落酸甜微辣滋味、層次感豐富嘅香脆越南麵包喺香港唔算常見,嚟到又點可以唔試下越南麵包風味呢!  室內裝潢走自然柔和路線,大家可以坐低慢慢歎,店主話佢開店原因都係因為好鍾意越南菜,煮得好開心,同時都希望大家嚟到可以開開心心食返餐。 嚟到又點可以唔食佢地嘅生招牌越南麵包呢?呢個慢煮五花肉麵包(HKD92)用越式煮法去整,用椰青水去慢煮48個鐘之後先至再加焦糖煎一煎上色,食落舊肉腍得嚟好香,再加埋青瓜、芫茜、自家製牛油同秘製醬汁同酸辣汁,真係好惹味!加上越南麵包特式夠晒鬆脆,食呢個包酸辣之中又帶啲啲甜味,層次真係好豐富! 聽聞慢煮可以將食物嘅油份迫晒出嚟,食落唔會覺膩之餘又可以食到超軟腍口感。呢個越式焦糖炸豬手(HKD158)豬手以73°C低溫慢煮20個鐘,差唔多煮足一日!食落又真好腍唔油膩,感覺骨膠原爆晒棚!再加埋焦糖味道好香甜! 脆炸雞翼幾時都咁給力,引死人!呢度嘅蒜蓉牛油雞翼(HKD92/5隻)外皮唔止超級酥脆,蒜香味道仲爆晒燈,未拎到上檯已經聞到蒜香味已經超級香濃!雞肉仲保持到肉汁同口感鮮嫩,食落好入味,有陣陣香茅味道! 提起越南咖啡總令人諗起滴漏咖啡,呢度當然都有提供越南滴漏咖啡(HKD32)比大家解解越南癮!呢杯咖啡香味濃郁醇厚,略帶苦澀回甘,大家嚟到一定要試試。 越南麵包 電話:2360 2883 地址:九龍城龍崗道49號地下 營業時間:星期一:休息 星期二至日:12:00-22:00 星期一如是公眾假期照常營業

0

【越嚐越滋味 荃灣地道越南菜式】嚐越

講起越南菜,你可能會諗起生牛河、生春卷、越式蝦沙律,但你食悶咗未?嚐越除咗有傳統地道越南菜式,仲引進一啲你少見嘅菜式,保留咗最地道正宗越式風味之外,仲豐富越南菜式,令大家都可以品嚐到更精緻越南菜。 新分店裝潢有所不同,設計行悠閒田園路綫更貼近越南風格。原木裝飾配搭綠色植物充滿熱帶風情,喺柔和燈光下用餐,猶如置身戶外田園中,格外舒適。 去過越南食過椰汁糕、飲過椰青水,但古法燒椰青大蝦(HKD138)又真係未試過,嚐越將越南高級餐廳菜式引入,讓大家都可以唔洗去到越南先食到呢道傳統特別菜式。廚師挑選了越南入口原個椰青,先倒出椰青水與越南大蝦一併烹煮,再將椰青水同大蝦放回原先椰青内,加入香菜。上檯後微火慢煮至陣陣鮮甜味散出。經大蝦一併烹煮後嘅椰青水更清新鮮甜,令人齒頰留香。 想食返啲開胃菜,蕃茄蟹肉湯檬(HKD68)就滿足到你啦。湯底每日煲足3個鐘以至鮮甜,加上自家手打鮮蝦丸同越南扎肉,成個湯檬花盡心思又足料,食落除咗品出越南地道風味仲有一份令人暖入心嘅人情味。 水晶香芒軟殻蟹米紙卷(HKD68)晶瑩剔透嘅米紙包住香甜芒果同軟殼蟹,配料仲有檬粉、青瓜絲同生菜,餡料豐富。入口軟殻蟹鬆脆帶些許芒香,加上配菜青瓜絲同生菜更爽脆清新。 越南另一個必試就係越南咖啡,呢個越式雞蛋咖啡(HKD38)經改良後別有一番味道,餐廳考慮到食用安全問題,喺蛋黃加入煉奶加熱打成蛋黃醬。 再倒入高溫越南咖啡,底部蛋黃醬唔會同滴漏出黎嘅咖啡溶合咗,反而分隔開。 最後再加入打至起泡嘅蛋白,將蛋黃同咖啡搞均就可以好好品嚐啦。口感相當順滑,面層蛋白有點似梳乎厘,味道獨特又不失傳統越南咖啡嘅苦澀味,每日都要飲咖啡人士可以去試下啦。 另外,由3月1日開始仲有優惠活動,只要Like 嚐越 Facebook,即可以優惠價HKD30買河內生牛肉湯粉(HKD55),每日限量換購50碗咋,想食就要快啦。 嚐越 地址:荃灣眾安街荃灣千色匯1期1樓1023號舖 電話:2320 2632 營業時間:星期一至日: 11:30-22:30

0

【黃埔必試滋味越菜】早安越南

越南菜酸酸甜甜,炸物夠香口惹味,湯河夠晒滑溜,間中諗起都想食返餐!最近小編搵到一間位於黃埔美食坊嘅越南餐廳--早安越南,裝潢別有格調,食物品質又高。齊齊跟住小編,體驗下越食越滋味嘅感覺啦! 餐廳裝潢較為型格,用色以暗色調為主,配以搶眼黃色櫈,非常吸引視線。 平時小編都幾鍾意食軟殼蟹,鍾意佢外皮鬆脆,連埋蟹肉蟹膏入口感覺飽滿,唯一一個缺點係較易令人覺得膩。如果同小編一樣鍾意食軟殼蟹但係怕膩怕滯,就一定要試下越式軟殼蟹米紙卷(HKD78)啦!米紙卷嘅外皮非常薄,入口完全唔黐咀,薄薄嘅米紙卷包住生菜,再包住炸過脆卜卜嘅軟殼蟹;然後再配埋生菜、青瓜、紅蘿蔔絲等等蔬菜,入口感覺非常清新而唔膩。 小編身邊好多大朋友都鍾意食黃金蝦,鍾意意頭好賣相好,入口又香口惹味。唯一最麻煩就係一食就好易爆Quota,既然決定要爆,梗係要爆得抵啲、食得好啲!大家可以試下越式黃金中蝦(HKD118),沾上咸蛋黃嘅中蝦,入口好爽身帶鹹香,蝦肉入味,賣相好金黃靚仔,即使係比家中長輩偷食一兩隻都好值得。 無論去到邊,身邊都仲會有一個雞翼控,雞翼嘅魔力真係不容忽視!如果想食酥脆可口嘅風味,試試蒜蓉牛油雞翼(HKD60)啦!炸漿唔厚身入口唔會過硬,加上蒜蓉粒粒,口感好豐富,入口除咗酥脆之外仲帶少少蒜香惹味,難得嘅係仍然保持到雞肉嫩滑汁豐! 唔知食乜好?梗係揀越式特選大拼盤(扎肉/炸蝦餅/蒸粉包/香茅雞翼/春卷) (HKD148),入面包咗五種食物,樣樣都好有特色!扎肉清清地帶香,入口感覺滑溜。炸蝦餅外皮脆脆地,蝦肉十分之彈牙,同一般食嘅蝦餅唔同,入口比較薄脆唔會膩,又好爽口!至於蒸粉包,佢入面係包住鮮蝦同埋豬肉餡料,十分足料,外皮煙煙韌韌,再加上蔥蒜,十分惹味。香茅雞翼外皮好脆,香茅味好香,size都算大,食落啖啖肉又有肉汁。春卷亦炸得非常香脆,餡料多多,蘸上不同醬汁更有不同風味。整個拼盤好值得一試! 平時食濱海,腦入面都會聯想起紗布……小編叫咗碟越式豬頸肉濱海(HKD68),竟然係一束一束卷好,排列整齊放好蔥蒜,非常有心思,十分驚喜!食法同生菜包一樣,都係用生菜包住濱海、豬頸肉同蔬菜,蘸上醬汁慢慢食。因為豬頸肉燒得剛剛好,非常爽口彈牙。 鍾意食湯粉嘅朋友必定要試下生牛肉湯河 (HKD58),剛上檯嘅時候,牛肉非常鮮紅,脂肪分佈平均。湯汁將牛肉慢慢灼熟,令牛肉唔會過熟,入口非常嫩滑!加上河粉好滑又幼身,帶有少少韌力,唔會一夾就碎晒,食落啖啖都好彈牙滋味!另外餐廳仲會提供青檸同辣椒等配料,等你可以調較最適合自己嘅口味! 三色冰(HKD34)椰汁味好香濃,飲落粒粒好豐富又帶點幼滑。餐廳好細心,啫喱大細剛剛好,唔會塞住支飲管。一路飲一路慢慢咬都幾過癮。 早安越南 地址:紅磡德安街7號黃埔花園8期黃埔美食坊1樓115號舖 電話:3152 2866 營業時間:星期一至日:11:30-22:00