Tagged: 車仔麵

0

【藝人踩過界麵店愈開愈多 包辦港台西日熱門麵食】大茶飯、一君士多、麵麵店、FOODO、阿久根拉麵屋

好多藝人都殺入飲食界開餐廳做老闆,其中有唔少係開麵店添。小編盤點近期開嘅五間人氣明星麵店,間間都有特色,而且港、台、西、日嘅熱門麵食樣樣齊,睇埋落去就出發搵食啦!   黃美棋:大茶飯 View this post on Instagram 大茶飯開咗一個月啦❤️ 我真係覺得好感動好感恩🙇🏻‍♀️ 同大家分享當日開張嘅花絮先✨ . . Tube Top @rigbyandpellerhk Blazer @missselfridge Accessories @coach Heels @jimmychoo Nails @beaunail Eyelashes @glowin_beaute #經得起風浪先食得起大茶飯 #坐埋同一條船先可以齊上齊落 #將軍澳中心 A post shared by Meiki...

0

【太子街坊價車仔麵店 11餸大碗麵$30勁足料】平霸

車仔麵喺香港成街都係,呢間日昇車仔麵有咩咁特別?可以吸引到平霸注意嘅梗係因為夠平啦!呢間車仔麵喺太子已經做咗好多年,係好多街坊同學生嘅平價食堂,廿幾蚊食到三餸麵,30蚊仲食到11餸麵添,邊度搵呀? 麵店舖面比較細,擺咗一個車仔檔同飲品櫃,行到入去就見到有一排細枱俾食客坐,成間舖大概有6-7張雙人枱同埋兩張四人枱,右邊就係開放式廚房。環境唔算好寬敞,但以麵店嚟講都幾乾淨企理。舖頭啲店員阿姐態度幾好,見到有客人唔識劃點餐紙,仲好有耐性咁講解添。 最低消費係三餸一麵,定價只係6-7蚊一樣餸,加埋最平25蚊就可以食到捧住個肚走。平霸留意到一個抵食之選,呢款有11個餸嘅一品麵都只係30蚊。相比起坊間嘅車仔麵,嗌兩、三個餸都唔止呢個價啦。如果鍾意試多啲唔同嘅餸,點呢個一品麵就最啱喇!呢度啲車仔麵有得自選辣度同加腩汁,都係唔使額外加錢嘅。 咩都想試嘅平霸就揀咗呢碗一品麵 (HKD30)小辣加腩汁。熱辣辣嘅麵一送到嚟,聞到好香嘅辣味同少少嘅麻油香已經食慾大增喇,見到鋪喺面啲餸幾乎遮晒個麵底,感覺好豐富,比較特別嘅餸係豬皮、豬紅、雞翼尖同鳳爪,都係舖頭自製嘅。麵面頭有啲比較稠嘅就係佢哋秘製嘅辣汁,呢個辣汁唔會淨係得死辣,仲食到唔同嘅香料味,不過都真係幾辣,唔太食到辣嘅朋友仔記得提佢哋唔好加咁多喇。如果食唔到辣嘅,都可以加腩汁,個湯頭就香濃啲,唔會咁清。 個麵冇加底,分量都好夠。值得一提嘅係,好多茶記、麵店轉烏冬係要加錢嘅,但呢度係唔使㗎!呢啲細節位都令平霸加咗唔少分。呢個烏冬偏軟身,但唔會一夾就斷,口感尚算彈牙。 成碗一品麵有兩隻雞翼尖,啲雞翼尖應該用咗佢哋嘅咖喱汁去煮,入口比想像中辣,但個咖喱味幾濃,好入味,鍾意食辣嘅朋友仔就要試試佢喇! 呢隻鳳爪就炆得夠入味,有陣八角香味,都有少少辣,但就冇雞翼尖咁辣,幾啱平霸口味。雖然成碗得一隻唔係好夠喉,但勝在有其他餸搭夠,幾有新鮮感呢。 其實除咗頭先介紹嗰兩樣餸之外,成碗麵整體上真係唔錯,魷魚好爽口、豬皮好香麻油味、牛腩夠腍身,菜嘅分量亦算多,有3-4條左右,唔似其他車仔麵咁得嗰一、兩條伴碟。至於其他餸都不過不失,以咁嘅價錢真係超值喇!   平霸小評:依家喺香港連車仔麵都愈食愈貴,吓吓要四、五十蚊先埋到單,搞到有時想嗌多個餸都唔敢。好在呢間車仔麵店逆市做緊30蚊11個餸嘅大碗車仔麵,而且唔係得個平字,仲夠晒足料,食物質素認真唔差㗎,豬皮、雞翼尖同鳳爪呢啲餸入味之餘,款款都唔同煮法,平霸一定要俾Like佢吖! 日昇車仔麵 地址:太子荔枝角道82號地下 電話:2380 1068 營業時間:從缺

0

【素食車仔麵2大名牌 砂鍋上菜+素喇沙湯底】素學堂

車仔麵唔係肉食者專利,今次小編介紹兩間喺素食界無人不知嘅車仔麵小店,唔知引唔引到肉食者一試呢?觀塘嘅滕王閣以砂鍋出名、荃灣嘅素悅軒就款式特別。事不宜遲,即刻睇小編試食報告啦! 工廈小店 滕王閣 素友一致好評嘅滕王閣,前身係喺北角廣受歡迎嘅麵店,葷素都有得食,但因為加租就搬去觀塘工廈。 湯底有8款咁多,不加任何添加劑同味精,有辣有唔辣。麵款有米線、米粉、薯粉、闊條薯粉同自家製拉麵,同平時嘅車仔麵選擇好唔同。 小編當然試佢出名嘅砂窩湯麵(HKD30)啦,蕃茄湯底(加HKD3)鮮茄味十足,仲要有蕃茄粒,濃得嚟唔係茄膏整,真係唔會口乾零味精,配煙韌手打拉麵一流呀!餸揀咗三款,自製酸齋(HKD7/4-5件)微酸夠醒胃,都幾大舊;蘿蔔(HKD8/2件)勁大件,清甜無渣。 自製猴頭菇丸(HKD7/2粒)重量十足,食落彈牙,菇味好鮮甜。呢鍋已經扣底都好大碗,勁抵食!   滕王閣 地址:觀塘觀塘道436-484號觀塘工業中心第4期10樓B號舖 電話:5427 7888 營業時間:星期一至日:11:00 – 20:00   巷中清泉 素悅軒 全素嘅素悅軒喺荃灣兆和街海晴軒旁一條唔起眼嘅小巷,舖面唔大,三張枱容納十幾人。老闆何生年前接手咗老婆個姨媽嘅呢間素食店,以前因姨媽篤信佛教,每日會派發100個飯盒,依家冇宗教信仰嘅佢唔想老友記失望就繼續派,仲怕唔夠派,將免費飯盒增加到120個添。 呢度主力賣車仔麵同三餸飯,何生由新加坡回流返香港,所以車仔麵除咗舊有嘅湯料醬汁之外,仲加入喺新加坡帶返嚟嘅素喇沙同素肉骨茶湯底。 一坐低餐都未點,何生就送上熱辣辣冇味精靚湯。 3餸湯麵(HKD43)配米線同喇沙湯底,掛麵吸汁好正。喇沙湯底可以揀大、中、小辣。呢個小辣接近譚仔5小辣,滿滿嘅香葉味勁惹味囉。 自製素叉燒幾可亂真,有啲燒味嘅燒烤感覺同甜味;用麵筋整嘅自製素牛腩連牛腩脂肪都模仿到,啫喱口感有嚼勁。紫菜滿滿一堆,未食已經好開心,勁豐富囉! 炸薯片(HKD8/加一餸)一客3大塊,有手掌咁大。重點係即叫即切即炸,絕對新鮮足料。   素悅軒 地址:荃灣兆和街25號海晴軒15號舖 電話:3486 4428 營業時間:星期一至日:12:00 – 21:00

0

【老闆回流元朗開店尋根 秘製咖喱醬汁魚蛋】M8香港咖哩魚蛋專門店

元朗最近新開咗間M8香港咖哩魚蛋專門店,小編當時心諗:「咖喱魚蛋可以有幾專呀?」,於是懷著一個疑問嘅心情同朋友去試吓喇。 入到舖頭之後覺得環境比想像中乾淨企理,而且係比較新派嘅裝潢,同想像中賣車仔麵呀魚蛋嗰啲街舖嘅風格完全唔一樣。咁啱撞正老闆都喺度,一於問吓老闆有咩好推介啦。 老闆:「我哋呢度最耍家就係咖喱魚蛋(HKD12/6粒)喇,我哋個咖喱汁係自家調配嘅,用咗十幾廿樣香料調配而成,絕對冇味精㗎!」 同老闆傾咗幾句,覺得佢真係好nice呀!原來老闆之前喺外國做餐飲生意,中西餐都有涉獵,更係北京成都咖喱名店EGGO嘅主理人,老闆話有唔少明星都去過北京店捧場,「房祖名呀、阿嬌都間唔中嚟㗎,覺得最nice都係發哥(周潤發),佢咁紅都毫無架子,客人問佢介唔介意合照,佢係完全冇問題嘅!」 咖喱魚蛋呢啲咁平民咁貼地嘅小食,小編好奇點解老闆會用呢樣小食做招牌菜。「最簡單嘅先係最重要嘅,我喺外國返嚟之後,去過啲連鎖店呀、出面嗰啲小食店食嗰啲魚蛋,真係完全唔得,一嚿粉咁。」點解又要開喺元朗玩「隱世」呢?「因為自己本身係元朗原居民,都算係一種情意結啦,想返嚟自己成長嘅地方開店。」 小編事不宜遲試食吓係咪真係咁耍家先,爽口、彈牙不在話下,直頭食到魚味呀喂。我哋成日話魚蛋魚蛋,但都幾乎忘記魚蛋其中一個應該有嘅成份係魚呀。就好似墨魚丸你會expect佢有墨魚咁,魚蛋都應該要有魚肉喺裡面先算係一粒好嘅魚蛋㗎嘛!食魚要有魚味,食魚蛋都要有魚味呀!問到佢哋嘅魚蛋係咪自家製,老闆就話:「我哋都係搵廠訂嘅,不過就唔係香港嘅公司,而係一間新加坡嘅廠。大大話話都試嘅廿幾三十間廠先搵到真係滿意嘅魚蛋。」叫得做專門店,果然是專業的。 小編亦單點咗咖喱蘿蔔(HKD8)同埋咖喱豆腐(HKD9),去一間食店睇佢哋整食物嘅心機,最好就係搵啲要時間煮嘅菜式,咁就可以知道佢哋對食物嘅要求去到邊。今次蘿蔔上枱嗰陣色水唔錯,睇落似幾入味。食落口果然冇令我失望,咖喱汁完全同蘿蔔融為咗一體,超match呀! 跟住試埋個豆腐,其實食豆腐最怕就係佢只得個表皮有汁,裡面淡茂茂咁。小編咬咗第一啖之後發生咗一件小悲劇,就係我件白tee冇啦!我真係估唔到佢會爆,汁。仲要真係爆嗰隻,超級入味,超好食!呢個豆腐我俾滿分呀! 重頭戲嚟喇,雖然舖頭叫咖喱魚蛋專門店,不過其實都賣車仔麵(HKD42/三餸)嘅。湯底同醬汁選擇方面都可以見到老闆真係有心機㗎!醬汁分以揀咖喱汁或者五香汁,另外湯底就可以揀蝦膏湯或者大白菜清湯喇!今次小編就試咗佢哋嘅4餸咖喱撈麵,呢度嘅撈麵仲會送一碗大白菜湯解辣添,好貼心啊!個湯超鮮甜,老闆話係絕對冇味精嘅!「呢兩款湯都係細個我屋企成日都會飲嘅,希望大家可以食住魚蛋飲住湯咁感受到童年回憶同埋家嘅感覺。」 咖喱撈麵通常係啡黃色係咪?不過當小編撈勻佢嘅時候,撈撈吓變咗紅色嘅?唔通有辣椒醬收埋咗喺碗底?原來老闆話鹼水麵嘅PH值同咖喱汁撞埋會產生「化學反應」,係會變成紅色㗎!哦,原来如此!不過話時話,個咖喱汁真係有啲辣,如果平時食開BB辣嘅朋友可能要準備定一大杯水喇! 食完麵飲完湯,最後有杯凍檸茶做終結,好圓滿呀!小編平時都算去得多小店,不過呢間就真係俾到surprise我喇!強烈建議大家得閒去試吓!   M8香港咖哩魚蛋專門店 地址:元朗教育路54-66號順發大樓地下F號舖 電話:2476 0923 營業時間:星期一至日:11:00-01:00

0

【26蚊抵食什錦麵 咖喱湯底惹味超足料】平霸

平霸搵食,終於食到元朗喇!今次小編搵到呢間許祥昌食店,主打嘅係車仔麵。 除咗可以自選餸菜,原来最受歡迎係佢哋嘅什錦麵,入面有成八款餸咁多㗎,真係大件夾抵食呀! 細什錦麵(HKD26/細碗),其實細什麵都可以自選餸嘅,不過小編懶得諗食咩,就梗係直接交俾店員決定啦!上到枱,細碗嘅什錦麵已經好足分量,絕對夠飽呀! 就咁睇,有成八款餸咁多喎,好似小編呢碗就有豬皮、蘿蔔、魚蛋、雲吞、豬腸、豆腐、豬紅同雞翼尖,真係好足料呀!小編最愛佢嘅咖喱湯底,帶有少少辣,惹味又開胃! 椰果西米(HKD15)用咗椰汁+西米+雜果+鮮奶,15蚊嚟講都算平吖!西米有成大半杯㗎,口感就偏軟腍,入口一大堆好爽呀!飲多幾啖其實又好似椰汁西米露咁,不過又唔會話好甜,都幾特別! 平霸小評:今次呢間許祥昌食店,小編表示非常滿意!除咗26蚊就食到好足料嘅什錦麵之外,店員服務仲非常好,見小編坐到咁逼仲主動幫我轉位,好細心喎!大家經過元朗不妨也試試吧!好食又親民呢! 許祥昌食店 地址:元朗擊壤路17號順發大廈地下B舖 營業時間:星期一至日:10:00-22:00 《平霸》平食四方,歡迎各界報料。

0

【35蚊12餸激抵車仔麵 多到滿瀉大碗夾好食】平霸

今次平霸輪到車仔麵喇,小編搵到呢間喺觀塘宜安街街市入面嘅德興車仔麵,35蚊有齊12樣餸,平到黐線啦,仲要每樣餸都有成3-4件,而且係好食㗎喎!大碗夾好食,邊到搵呀? 大招牌麵(HKD35)指定12款餸,有A餐同B餐揀,啲餸會有少少唔同,小編就揀咗A餐,有魚蛋、大腸、韮菜餃、豬皮、豬紅、紅腸、 生菜、蘿蔔、炸芝心雲吞、墨魚丸、豆卜同雞翼尖,真心超多餸,勁滿足呀!一路食嘅時候都keep住有客人入嚟,都幾多人幫襯。 味道方面,小編最鍾意佢嘅墨魚丸,炸芝心雲吞同埋雞翼尖。墨魚丸非常之彈牙,唔會話淋晒好似食緊粉漿咁;炸芝心雲吞呢個勁有驚喜呀,本身諗住炸雲吞放咗落麵度又會整到淋晒,但呢個又幾ok喎,而且餡料超飽滿,勁正!最後好欣賞佢嘅雞翼尖係醃到入晒味,一啲都唔馬虎呀。 平霸小評:今次呢間德興車仔麵整體嚟講小編俾4個心心。車仔麵餸多唔馬虎,真係好大方成碗都滿晒,重點係服務態度超!級!好!店員姐姐態度好友善,支持平民小店,簡直係糧尾飯堂,絕對值得一試! 德興車仔麵 地址:觀塘宜安街1號A宜安街街市 電話:6676 5583 營業時間:星期一至日:06:30-20:00

0

【潮食Fusion車仔麵】Noodies

西營盤一帶尤其係第三街真係宇愈來愈旺,想搵到好野食真係好容易!一向覺得食車仔麵都係頹頹地,油麵米線米粉咁樣,menu上面更加唔會見到英文。除左例牌中式麵之外,仲有齊星馬泰日韓越嘅麵同湯底,想點配搭都得,係咪好新奇呢。門面仲大大隻字標榜無加味精添! 麵店細細間,但座位尚算舒適。 話得係車仔麵就當然有得俾你自由配搭點剔都得啦!基本兩餸麵$46碗,如果再追加標準餸就$6,升級餸好似廣島蠔,帆立貝,糖心蛋就加$12款 留意黑板上面會有每日精選。 如果著住淺色衫驚自己食得太興奮彈烏糟件衫,可以用餐廳提供嘅紙圍巾,好貼心嫁! 有選擇困難症嘅你都唔洗怕!餐牌都有已經set好左嘅麵,唔洗慢慢揀。 由於我都係有選擇選難,一於試個人氣之選!有芝士嘅叻沙湯底你食過未?原來都夾到嫁播! 天氣咁熱,食返個夏日冰之選就perfect啦!有冰鎮薯粉同冷麵醬油做湯底,食落好refreshing!可能我食得慢,d冰一融左醬油味道變得比較淡。如果要食依款麵唔好食得太慢呀! Noodies 西環西營盤第三街56號福滿大廈地下E舖 星期一至日: 11:00-21:30