Tagged: 連登仔

0

【鐵板餐冇鐵板變膠碟上枱 食客報海關大家樂補鑊】食焦

鐵板餐冇鐵板係咩玩法呢?仲要個原因係因為間舖細,所以唔用鐵板上?呢個原因真係令人搲晒頭喎!大家樂嘅鐵板餐咁耐歷史,其實係唔少人嘅童年回憶添㗎,唔用鐵板上變咗做膠碟餐就真係完全唔係嗰回事啦! 理想與現實相差太遠,話說有網民去咗日出康城間大家樂分店,諗住食返個鐵板餐,點知換來膠碟餐,「早幾日係康城間大家樂食鐵板餐,夠膽死鐵板都無個,就咁俾隻膠碟你上,D肉就半暖,D汁同菜就凍,好難食……」最令人接受唔到嘅係廚房師傅嘅說法,「同個廚房講,佢竟然答我:因為間鋪太細,所以無鐵板,仲同我講有唔滿意就一係退錢一係換過第二樣……」 依家喺大家樂食個鐵板餐要成70蚊,冇鐵板上仲要咁難食,事主梗係嬲豬啦,難得嘅係事主老竇識得苦中作樂,仲同事主講「我老豆仲叫我當係all day breakfast咁食個觀感就fit晒!」不過事主都係氣難下,send咗投訴信去海關、消委會同大家樂,睇吓有冇違反商品說明條例! 未收到大家樂回覆,但係事主經過「膠碟大家樂」嗰陣,發現原先餐牌上嘅鐵板餐,已經下咗架喇,偷龍轉鳳換咗個「滋味扒餐」,即係冇鐵板嘅!而事主之後就收到大家樂嘅官方回覆喇,都係好官腔咁話,其實康城店一直都係冇鐵板餐嘅,只係嗰日員工疏忽上咗鐵板餐牌喎,跟住都有耍晒冧道歉嘅!咁大家以後要識路喇,要食真.鐵板餐,唔好再去康城大家樂喇!

0

【連登仔投訴找少錢唔俾返 收銀姐回應:規矩等埋數】食焦

遇到收銀找少咗錢,但係都冇得攞返,應該點做先好?有連登仔開po話有日lunch去咗調景嶺間翠河餐廳食晏,叫咗個三色蒸水蛋有蛋殼喺入面都算喇,仲要埋單發現收銀找少咗錢,「個餐$43 我怕太多散銀比左$55,跟住個收銀望都唔望就以為我比$50,直接找左$7比我,咁我本身另轉身諗住走,但feel到唔對路……」 呢位巴打仲將自己同收銀姐嘅對話打晒出嚟,簡單啲講,個餐43蚊,巴打俾55蚊,係要找返12蚊嘅,但係收銀找咗7蚊啫,佢擰返轉頭同收銀講,點知俾人話「總知你另(擰)轉左身就當走嫁啦,走左就唔會比返你」、「 總知宜家冇得比返你啦,如果我地今晚真係多左錢,咁你聽日黎拎返」! 結果巴打嬲到連嗰7蚊都冇要到嘅!巴打話po上網唔係想公審間餐廳同個收銀喎,只係想大家唔好貼錢買難受咁話!當然有唔少人回應佢,話佢做乜唔當場報警呀、食43蚊點解要俾人55蚊,更多人係話翠河根本就係難食,一早唔應該去喇! 小編打咗去調景嶺間翠河,接電話位員工原来就係當日位收銀姐,佢話:「如果個個擰轉背先話找少咗錢,個個係咁,我哋唔使出糧啦!我做收銀咁多年,遇過太多呢啲情況,嗰日嗰位係後生仔嚟嘅,我冇話係邊個錯,點都要等嗰晚埋數睇吓係咪真係多咗先,呢個係規矩!」 收銀姐就話當晚埋數,係多咗15蚊!「我只係話唔可以即場俾佢,要埋咗數先得!嗰晚係多咗15蚊,佢嗰7蚊係佢自己唔要俾返我嘅!(咁係咪有12蚊多咗會俾返佢?)我都話佢第二日嚟,我咪俾返佢囉!」巴打仲去唔去呢?

0

【$300包早午晚宵夜 連登仔開箱法國軍糧】食焦

軍糧有乜食?仲要係法國軍糧喎!同法國大餐分別幾大呢?有網友就親身解開咗呢個傳說中嘅謎喇!有連登仔最近嘅開箱文,唔係零食,係開箱法國軍糧,一大箱有齊全日早午晚餐,仲連埋下午茶添!都幾大分量㗎,其他網友睇完都話想食添! 一大盒法國軍糧要幾錢?呢位連登仔就話用咗三百蚊港銀買返嚟喇!先由早餐開始,一包朱古力味燕麥片,一沖開水即食得,試食報告係「好香好濃朱古力味,但係太甜,幾漏下(吓),加埋啲好滯既(嘅)燕麥,一包夠頂成個上晝!」 午餐又係點?就係一罐雞肉蝦仁意粉,有埋迷你金屬爐具俾你,網友話同其他國家軍糧係無火煮食有所不同喇!呢個意粉做午餐嘅試食報告係「好香蝦油味、味道真心唔差,有意粉屋水準!」其他網友見到都留言話食得過喎! 午餐有意粉食,以為晚餐仲豐富?錯晒!晚餐原来只係得幾包餅乾仔同埋啲墨西哥卷餡料,餅乾分咗甜味同鹹味,大部分網友都話齋睇就覺呢個晚餐好唔吸引,分量咁少點會夠飽!嗰幾塊餅乾再配埋啲餡料嘅試食報告就係「口感極差,好硬,完全唔脆!」就咁睇,午餐贏啦! 唔夠飽咩?仲有小食㗎!有茉莉花茶啦、能量飲品,仲有啲水果啫喱條,其實可以當宵夜咁食啦!網友仲話傳說中嘅法國軍糧,係要用六箱美軍單兵野戰口糧先換到一箱返嚟㗎!網友留言又問喇,咁中國軍糧又點呢?有人回應話難食到一個點、有人就話以軍糧嚟講算係咁,尤其係個羊肉飯配個香辣醬先係精華喎!

0

【網民發起罷食行動 雲桂香:有人想搞大件事】食焦

事緣係上星期連登有個po寫住「連登仔齊心罷食雲桂香」,搞到要罷食咁激?原来係因為之前,喺大埔廣場間雲桂香發生失火事件,有事發在場嘅食客事後喺網上講返,嗰晚店內廚房冒煙,食客驚有危險,準備逃生之際,店員竟然鎖上玻璃門,叫客人「埋咗張單先」!就係咁,引嚟網上熱烈討論,雲桂香被圍插,俾網友鬧「火燭都掛住做生意」、「收錢緊要過途生」等等留言,於是乎,就出現咗呢個「罷食po」! 網友仲嬲到話唔止罷食大埔廣場嗰間,係要全線罷食雲桂香先得!一場「火」愈燒愈勁,變埋場公關災難,事發三日後,到咗上星期二夜晚,雲桂香先喺公司fb專頁「雲桂香米線專門店」出po道歉,「本公司向當晚的食客及公眾道歉」,仲話當晚係由於插頭短路發生冒煙,員工喺危機處理確係有不足咁話。網友當然唔收貨,繼續留言鬧返夠本! 道埋歉都似乎得唔到原諒,小編打咗去出事嗰間雲桂香,店長黃小姐話:「冇火燭,只係有個插頭燒咗,短路跟住冒煙啫,唔係火燭!消防員嚟到檢查完處理咗就走啦,一定冇火燭!」係咪有店員鎖門叫人埋咗單先好走?「冇鎖門!係個樓面冇乜經驗,佢唔識點樣處理。有客人見到廚房冒煙,驚有事想走,咁個樓面就同佢講『你食完就埋單先』跟住有個客就話『火燭都掛住收錢』」 店長話嗰晚冇火燭亦都冇鎖門,「其實係發生喺一、兩分鐘之間嘅事,我喺廚房出嚟已經見到佢哋走,嗰晚枱枱客都冇俾到錢就走!」問佢有冇諗過引嚟咁大反應,佢話:「係一、兩個人想搞大件事啫!」知唔知網友發起罷食雲桂香行動,店長話:「我哋依家日日都咁爆場,冇得呃人㗎!」 連日嚟咁多網友鬧爆,問佢有冇諗過向網友道歉,佢話:「我唔識呢啲嘢(網上)、我冇睇!咁我哋公司都道咗歉,已經放咗上網啦!」搞到咁大劑,再問佢驚唔驚呢個罷食行動,店長話:「我哋做熟客生意多!」