Tagged: #過江龍

0

【日本過江牛肉丼飯$25起 鰻魚肥厚嫩滑有驚喜】Sukiyaすき家

每個人去日本其都有個必食food list,唔知你嘅list有冇牛肉丼飯呢?走高質親民價嘅Sukiyaすき家上星期正式過江嚟到旺角開店,即刻牽起排隊熱潮。呢度丼飯款式逾 40款,最平嘅細牛肉丼飯25蚊有交易;店內會按唔同時段推出個別款式,例如05:00-11:00就有早餐,15:00-00:00就有鍋物,連壽喜燒(HKD60)都有呀! 排隊嘅朋友注意,堂食同外賣分兩條隊嘅。堂食的話食低後按枱面嘅掣,店員會埋嚟幫你落單同提供水。 店內有兩幅畫,一幅係日本富士山,另一幅就描繪香港維多利亞港景色,係咪好有親切感呢?香港menu仲增設香港限定嘅雙拼款式,不過小編當日朝早十點嚟到未返齊貨,所以試唔到,不過都試咗其他款式,即刻睇吓邊款令你流口水啦! 牛肉元氣早餐(HKD29)啱晒鍾意有米氣嘅朋友,仲有齊前菜、味噌湯、牛肉同溫泉蛋拼秋葵,睇見都豐富呀!其中前菜本身係配漬物,但如果賣晒就有機會轉成泡菜,最終用料視乎當日食材而定。 用美國牛肉煮成嘅牛肉本身已經裝咗牛肉汁喺入面,但無論食邊款牛肉飯都好,想多汁就要落單時講埋,廚部會喺製作嘅時候直接加埋。想就咁夾滑嫩嘅肉配飯食又得,或者跟日本人食法,加少少豉油落溫泉蛋同秋葵撈勻後,連埋牛肉放晒落飯再撈埋一齊食亦得,咁樣口感會更加滑溜,仲不失日本蛋嘅香氣添;加上秋葵令呢份早餐增添一份清新感,唔覺得一早食肉會膩喎。 想惹味啲可以試吓泡菜燒肉丼(HKD48/M),牛肉輕輕煎過令肉邊有少少脆口同更加香,配埋爽口嘅泡菜就更濃味。 呢度雖然主打係牛肉,但估唔到鰻魚牛肉丼(HKD79/M)都令小編充滿驚喜!鰻魚厚肉冇骨,入口滑嫩有油香而唔會過肥,真係幾高質。 咖喱係日本人另一款傳統菜式,炸雞芝士咖喱(HKD62/M)雖然有兩隻辣椒,但入口只係比平時嘅日式咖喱辣啲,大部分人都食到嘅。撈式兩款芝士碎令咖喱杰啲,但芝士味唔算濃,所以唔會好膩。炸雞皮脆肉滑唔會太鹹,成碗嘅調味都控制得幾好。 飲品選擇唔多,但布甸宇治抹茶(HKD32)同布甸牛奶朱古力特飲(HKD29)嘅抹茶同朱古力味都好濃郁!牛奶味相對輕啲,布甸就非常滑溜,想有口感啲就唔好攪太多喇。   Sukiyaすき家 地址:旺角亞皆老街31號地下 電話:從缺 營業時間:星期一至日:24小時

0

【美國Red Lobster銅鑼灣開業 香港限定避風塘炒龍蝦】Red Lobster

1968年喺美國開業嘅Red Lobster進軍香港喇!啱啱喺銅鑼灣開業,仲有三道香港限定菜式添;當然人氣嘅無敵海鮮大餐、美式蒸活龍蝦等招牌菜都可以喺度食到啦,即刻睇吓呢度嘅北美龍蝦有幾正啦! 店內嘅裝飾遍佈關於龍蝦嘅內容,例如牆畫、捕齜蝦竹籠、漁船設計等。二樓就設有VIP房,感覺都幾氣派㗎。 店內嘅龍蝦缸養住由直運來港嘅北美活龍蝦,客人點完龍蝦菜式可以拎起龍蝦影相添。 按傳統點菜後會免費送上車打芝士鬆餅,餐廳話15分鐘內品嚐係最好食嘅。熱辣辣又有車打芝士鹹香味,質感仲好鬆化,幾有空氣感㗎。 三款香港限定分別有前菜、主菜同點品,黃金炸大蝦(HKD48)就係其中一款。有西式嘅牛油香,亦有微微嘅鹹蛋香。 想試傳統菜式就有夏威爾椰子蝦(HKD38/3隻,HKD68/6隻,HKD128/12隻),大蝦入面夾有椰子肉片,加上面頭嘅菠蘿粒再蘸上酸甜嘅椰子醬汁,味道香甜微辣好開胃! 主菜之中,港式避風塘炒龍蝦(HKD358/1磅,HKD718/2磅,HKD1038/3磅)暫時都係香港獨有,將大量麵包脆脆加入避風塘菜式獨有嘅炸蒜之中,香口得嚟有中西合壁嘅感覺。呢碟用上1磅龍蝦,啱兩個人慢慢歎爽滑彈牙嘅龍蝦肉呀! 不過要數餐廳嘅鎮店菜式一定係無敵海鮮大餐(HKD318),呢道菜喺每間分店都係大賣㗎!一份有齊北美龍蝦尾、蒸煮雪蟹腳、招牌蒜蓉蝦、酥脆炸蝦,配雞尾酒特製醬汁同熱牛油醬,幾個人share食就啱晒喇,可以一次試勻唔同嘅鮮味。 大蝦三重滋味拼盤(HKD148)係小編嘅獨食推介,有脆炸蝦、即叫即整蒜蓉焗大蝦同龍蝦醬大蝦意粉,有齊開胃、惹味同傳統味道。而且意粉非常滑溜,食晒成份飽肚㗎。 想有啲肉落肚就要點海陸雙鮮(HKD298-368),當中有肉眼牛扒(7安士)、西冷牛扒(7安士)或牛柳(6安士)配龍蝦尾或串燒烤大蝦俾大家自選唔同組合。不過無論係烤龍蝦定係牛扒,火喉都啱啱好,滑溜有肉汁。 而香港限定嘅甜品就有珍珠奶茶為靈感嘅奶茶意式鮮奶凍(HKD38),甜而不膩可以一試。 想邪惡啲又有愛溢布朗尼(HKD78),大大球雪糕配上兩大件充滿果仁嘅布朗尼,夠晒兩個人食呀! 經典芝士蛋糕(HKD42)比想像中冇咁甜膩,配埋cream一齊食,口感更加滑添。   Red Lobster 地址:銅鑼灣Fashion Walk加寧街8號地下 電話:2261 2996 營業時間:星期日至四:11:30-22:00,星期五、六:11:30-23:00

0

【台灣冠軍牛肉麵香港連開兩店 湯濃肉腍必試火炙小牛膝】洪師父牛肉麵

一聽係過江龍,大家都會諗嚟到香港可唔可以保持水準先?洪師父牛肉麵為咗解決呢個問題,唔係用台灣食材咁簡單,而係將湯底、牛肉等用料喺台灣店煮好再冷凍包裝運嚟香港,保證唔會走味咁話喎,唔怪得神速就喺東涌同油麻地連開兩店啦。依家就即刻試佢哋嘅冠軍牛肉麵先。 五花牛腩(HKD88)係2007年牛肉麵節比賽—清燉冠軍,湯底好清澈,但味道幾濃,入口順滑。呢款有牛腩同牛小排,肉質軟腍易咬。麵條可以揀台式幼麵同粗麵,不過清湯就同幼麵夾啲。 組麴蕃茄麵(HKD88)係2008年牛肉麵節比賽—創意冠軍,唔講都唔覺原來以蕃茄融入湯底已經咁多年。再提提大家,所以湯底都係台灣煮好,再冷凍包裝運過嚟,所以啲蕃茄都係台灣貨!呢款味道幾香甜,但唔會好杰身,依然似到牛肉湯味添。同樣都有牛腩同牛小排,呢款配粗麵會吸味啲,而且放耐咗都只係厚少少,唔會勁發漲。 想試多啲配料又想特別啲,就要嗌攞到2010年牛肉麵節比賽—紅燒冠軍嘅唯吾獨專(HKD328),呢碗可以2-3個女仔食㗎!不過想抵啲一定係點二人套餐(HKD398),會包埋兩款自選台式小食同兩杯飲品。 泊埋五花牛腩即刻睇到size嘅分別!唔係淨睇湯碗,連肉都大嚿好多,而選用嘅部位都好刁鑽;好似牛腱只用兩邊尖尖,油脂少啲又有咬口;牛肚就用蜂巢牛肚邊最「Q」嘅位置,質感好爽彈:連牛筋都特別大條,但煮得軟腍,又唔會失去咬勁,平衡得幾好。 小牛膝同樣連埋炆煮嘅湯汁一齊包好冷凍,嚟到香港加熱同火炙。大家記得唔好掛住影相,最好一上菜就試咗湯先,因為小牛膝火炙過嘅味會慢慢滲落湯,變成另一種層次。 紅燒湯本身已經好濃厚,因為混合咗秘製三寶湯同小牛膝嘅湯,幾重牛味。想再有層次啲可以加少少辣椒油,因為入面加咗牛脂一齊煮,所以入面有真「牛油」㗎! 但最估唔到綜合鮮肉湯水餃(HKD42/牛湯底)都係包好先運嚟香港煮,高麗菜(右)就比青韭菜(左)口味清啲;飽得滯想解膩可以飲返杯檸檬薏仁水(HKD18)。   洪師父牛肉麵 (旺角店) 地址:油麻地彌敦道565-567號銀座廣場地下1號舖 電話:2838 3978 營業時間:星期一至日:11:00-22:00

0

【札幌人氣湯咖喱今日登陸尖沙咀 火炙雞髀配40級辣度湯底】Garaka Soup Curry Hokkaido

去得北海道嘅朋友都應該試過當地嘅名物湯咖喱 ,今日札幌人氣嘅Garaka Soup Curry Hokkaido就喺K11 MUSEA試業喇!試業期間嘅營業時間只係12:00-19:00,正式開業日期就要留意佢哋Facebook公佈喇;而且試業時期每款湯咖喱只會日賣30碗,賣晒就會提早收舖,依家就睇定想食邊款啦! 店舖唔係好大,但就好有日式食堂嘅感覺。 暫時先供應5款湯咖喱口味,可以自選0-40級辣度。日本就推介3度,認為係咖喱同辣度最平衡嘅味道。小編平時食譚仔3小辣,今次就試咗呢度4個級別嘅辣度: 1) 0度:係甜咖喱嘅味道,湯底雖然加咗豬、牛、雞嚟熬,但佢嘅甜會令你以為加咗大量蔬菜,所以撈飯唔覺得膩。 2) 3度:要細心啲先感覺到有微辣,比0度多啲層次。 3) 7度:6度起,湯底會由加辣椒粉轉成一種青辣椒,辣度明顯啲,接近譚仔3小辣喇。 4) 19度:小編都仲食到,唔會辣到要即刻飲水,不過咖喱味就近乎食唔到喇。而由20級開始,湯底會加埋死神辣椒,有冇朋友想挑戰呢? 雞髀野菜湯咖喱(HKD138)係日本No.1招牌菜,將煮好嘅雞髀火炙再放落湯,唔會好濃味。而且蔬菜款式好多,其實食完感覺好健康。加上湯底再同炒過嘅蔬菜一齊再煮熱,令味道同口感更加豐富。想配飯都有3個size,下圖嘅就係中size。 日本No.3招牌菜就係焙煎豚軟骨野菜湯咖喱(HKD148),配料其實大同少異;不過呢嚿咁大嘅豚軟骨油香十足,仲煮到幾軟腍,邪惡得嚟好滋味。 豚肉雜菌湯咖喱配三種特色芝士醬(HKD148)就係香港限定款式,豚肉會同湯底一齊煮,嗦味啲。而三款芝士煮溶之後要火炙,令佢嘅鹹香味更突出,但加埋湯又唔會覺得過鹹喎。 想light啲可以試15式時令野菜湯咖喱(HKD128),不是記住佢唔係素純㗎。蔬菜分別用炒、灼、炸三個煮法炮製,口感緊次豐富,呢款小婿編覺得配充滿牛油香嘅麵包會夾啲,仲可以揀配1-3個添。 自家秘製炸雞(HKD88)嘅雞肉幾大嚿同juicy,一件要分兩啖食,不過件數得5件就偏貴。 想再加配料都冇問題。 過咗試業期就會有更多湯咖喱口味選擇。   Garaka Soup Curry Hokkaido 地址:尖沙咀梳士巴利道18號K11 Musea 4樓401A號舖 電話:從缺 試業營業時間:星期一至日:12:00-19:00 正式營業時間:星期一至日:12:00-22:00(日期待定)...

0

【韓國過江有機麵包重秤足料 椰子蕃薯包最受歡迎】Tardemah

韓國過江嘅有機麵包Tardemah唙尖沙咀開業一陣,令你一落K11 MUSEA B2樓層就聞到陣陣麵包香。佢哋暫時帶咗十幾款全有機麵包口味嚟香港,拎上手都幾重磅㗎,即刻睇吓有咩選擇啦! 想堂食都有位俾你坐㗎,亦可以帶外來飲品,不過記得自己清潔返。 因為店內冇自設工場,所以每款包都係賣晒就等第二日喇。艾草年糕方包(HKD78)係香港最受歡迎嘅口味,一推出就好快賣晒,店員話最好兩點前嚟買就比較有機會。不過睇見有咁多年糕、紅豆同栗子,小編都會想買囉。 椰子蕃薯布莉歐方包(HKD89)就係韓國暢通No.1,淡淡嘅椰香配上大大粒嘅栗子,口感一流! 所以最多嘅係有芝士入饡嘅口味,好似有咁大粒芝士嘅栗子忌廉芝士方包(HKD78/左)同南瓜忌廉芝士方包(HKD78/右),加熱食令芝士有半溶嘅口感仲正,亦更加香口。 想口感滑啲就有帶果香嘅野莓忌廉芝士方包(HKD71/左)同藍莓忌廉芝士方包(HKD71/右),但係呢兩款唔可以加熱。 鮮忌廉芝士雲石(HKD70/左)同朱古力雲石(HKD70/右)就係香甜啲嘅口味,亦比較接近平時食麵包嘅感覺,不過有機麵包煙韌好多! 想入口清新啲就有伯爵茶蔓越莓方包(HKD72/左)同優質公州栗子方包(HKD89/右)。唔止見到勁多粒蔓越莓,原來一個優質公州栗子方包有大約廿粒栗子㗎! 特別啲嘅有三款蘸醬麵包,蟹與蝦方包(HKD83/左)配泰式醬;拱佐諾拉蜜糖芝士方包(HKD84/中)配蜜糖;辣肉腸方包(HKD84)就配洋蔥醬。 買包送飲品嘅新開張優惠隨時會完,想順便飲埋香蕉奶或其他口味就快啲去喇。   Tardemah 地址:尖沙咀梳士巴利道18號Victoria Dockside K11 Musea B2樓223號舖 電話:從缺 營業時間:星期一至日:11:00-21:00

0

【倫敦名店Avobar下星期一試業 牛油果大餐健康吸睛】Avobar

來自倫敦嘅人氣牛油果主題餐廳Avobar下星期一就正式喺尖沙咀K11 Musea開業喇,呢間亦係佢哋倫敦店以外第一間海外店!香港店嘅牛油果料理同倫敦一樣秉持Superfood嘅清新健康概念,而且擺盤夠晒精緻添,即刻介紹吓佢嘅特色牛油果菜式俾你啦! Avo Bun Burger牛油果特色漢堡係呢度嘅招牌菜!用咗成個去核牛油果代替漢堡包皮,再以一塊用紅扁豆同蕃薯蓉搓成嘅自家製特色薯餅代替漢堡扒,而且加咗椰子香草醬做調味,成個配搭都好夾㗎。 而特別版嘅牛油果漢堡有Avo Lobster Burger,同樣以原隻去核牛油果做漢堡包皮,裡面就夾住一大嚿龍蝦肉!酸酸甜甜嘅熱情果芒果醬汁仲加咗少少辣椒,刺激你嘅味蕾呀! 呢款Smashed Chilli Avo嘅特別之處係用咗連皮嘅原塊蕃薯片取代麵包做多士,冇咗多士嘅脆身反而變得好有咬口。蕃薯超香甜,上面搽滿淡綠色嘅牛油果醬,仲有特製嘅椰子醬汁,聞落好似乳酪味咁好開胃。 Beetroot & Vermicelli Salad嘅賣相好特別,有一大堆炸米粉疊到山咁高,連埋底下嘅紅菜頭片、牛油果粒同生菜一齊食,口感豐富。 呢個好似All Day Breakfast咁嘅其實係The Ultimate Avo Toast,中間用牛油果皮裝住嘅係以牛油果肉、檸檬汁同橄欖油等特製嘅牛油果醬,旁邊仲有Avo Lime Jam同橄欖油等等俾你蘸多士一齊食。而鮮黃色嗰個係薑黃粉水煮蛋,都可以夾埋多士一齊食。 小編就特別鍾意食Pasilla & Mushroom Risotto!呢道Risotto煮得夠入味之餘,香煎鱈魚肉軟腍食落又冇骨,油香均勻令個Risotto味道更香濃creamy。 Brownie就食得多,加咗牛油果嘅Brownie小編都係第一次食。Choc Avo Brownie係呢度嘅招牌甜品,喺朱古力口味嘅Brownie入面有唔少牛油果肉,所以食落個口感濕潤之外,仲有牛油果嘅軟滑。朱古力味香濃又有淡淡嘅牛油果香,又幾有驚喜喎!   Avobar 地址:尖沙咀梳士巴利道18號K11 Musea...

0

【住家清湯底拉麵榮登米芝蓮 多賀野過江必食醬油味】多賀野拉麵

喺東京有唔少人龍店,以清湯底聞名,仲米登米芝蓮嘅Takano Ramen多賀野拉麵都係其中一間,佢哋首間分店兼海外店上月喺尖沙咀K11 Musea開始試業。總店由一對日本夫婦主理,佢哋將由住家製作嘅清湯底拉麵帶到大家面前,而且呢個住家味道仲攞咗四屆米芝蓮,仲喺日本食評網Tabelog曾經取得3.99高分!依家佢哋嘅招牌麵食嚟到香港,麵款同總店一樣,但加咗飯類、小食同甜品,即刻睇吓有幾正啦! 多賀野拉麵總店負責人高野夫妻對出品好有要求,雖然將湯底同製麵技巧傳授俾香港店兩位師傅,但佢同先生每隔半年都會嚟香港監察品質。 店內環境好有日本風格,仲貼心咁設有屏風間格,為單獨嚟嘅食客增添私人空間。 製麵師傅依家每日約製作兩至三轉麵條,仲時不時拎起麵條度尺,務求保持同日本一樣嘅品質添。 麵嘅密度幾高,但口感仲係彈牙,亦唔會好易發脹。 先試相對淡味啲嘅粟國塩味拉麵(HKD128),湯底好清唔多油,但係用咗日本粟國出產嘅高質鹽嚟烹調,味道其實幾鮮味又唔會死鹹,飲晒都冇問題。 而最招牌梗係多賀野醬油拉麵(HKD128),湯底用上雞肉、雞骨、豬骨、豬軟骨、薑蔥蒜、魚乾等材料熬煮,出餐前再撞落單即煲嘅鰹魚乾精華湯汁,令清湯底都有香濃味鮮嘅效果;配料同粟國塩味拉麵一樣有火炙叉燒、香滑嘅溏心蛋同紫菜。如果想湯底再特別啲,可以將叉燒喺湯浸一陣,會有少少火炙味帶落湯度㗎! 佢哋嘅辣麵同一般嘅濃湯唔同,口味傾向中式少少。芝麻辛辣拉麵(HKD138)味道唔係好辣,加咗芝麻醬汁只係令湯杰啲啲啫,入口依然順滑。配料除咗火炙叉燒,仲有肉粒增加口感。 酸辣擔擔麵(HKD138)係香港大廚鍾意嘅口味,同樣唔係太辣,但酸酸哋嘅味道令人覺得好爽!而且加咗啲炒過嘅榨菜幾特別,配麵或肉一齊食更加爽口添。 豚鴨沾麵(HKD168)嘅湯底用上鴨肉、鴨骨、雞、蜆、菇等材料熬煮再撞鰹魚乾精華湯,只係比醬油味鹹少少,但食完加湯飲埋都唔會太鹹。 沾麵麵條粗啲,但湯底唔係杰身,所以唔會好掛湯。 想試小食的話,不妨點大隻又嫩滑嘅自家製吉列炸蠔(HKD78/3件),或見到一絲絲蟹肉嘅自家製蟹肉薯餅(HKD68/3件)。 呢度仲有山形果汁、汽酒同波子汽水(各HKD48/枝)同果味濃郁嘅雪葩。其中柚子雪葩(HKD68)比較甜啲,菠蘿雪葩(HKD68)就好清新。   多賀野拉麵 地址:尖沙咀梳士巴利道18號K11 Musea 2樓220號舖 電話:2881 8331 營業時間:星期一至日:12:00-22:00

0

【三大日本過江龍天婦羅丼飯 金子半之助質勝天丼抵食】金子半之助、天吉屋、天丼

日本過江龍天婦羅丼飯次次登陸香港都牽起陣熱潮,近排唔少朋友仲問小編金子半之助、天吉屋同天丼邊間好食啲,所以即管嚟個大比拼啦!以5星為滿分,睇吓脆漿、天婦羅款式、CP值同變化度四方面,佢哋邊間跑出先。   金子半之助 金子半之助現時只有三款丼飯,而每款丼都有六款天婦羅。包括2隻鳳尾蝦、以墨魚粒同干貝製成嘅雜錦海鮮餅、溫泉蛋、海苔同小青龍(荷蘭豆),最後一款先會唔同。呢碗招牌嘅江戶前天丼(HKD138)就配咗25cm超長穴子魚天婦羅,視覺夠晒震撼之餘都幾飽。天婦羅外脆內嫩,juicy又夠水分,唔會好快就軟腍腍。醬汁方面鹹甜度適中,而天婦羅用高純度芝麻油炸會加咗味,基本唔使再落醬汁。加上佢哋用咗特別嘅丼碗保溫,食到咁上下啲飯都仲暖。而解膩小菜都好有驚喜,因為一般嗁漬物都好酸,但呢度嘅漬牛蒡好清甜;海帶伴薑就相對酸辣啲,但有一淡一重味嘅選擇幾貼心。   脆漿:★★★★☆ 天婦羅款式:★★★☆☆ CP值:★★★★☆ 變化度:★★☆☆☆ 總分:13星(總分20星)   金子半之助 地址:葵涌興芳路223號新都會商場1樓107-108號舖 電話:2661 8212 營業時間:星期一至日:11:30-22:30   天吉屋 天吉屋嘅前菜沙律可以無限添加,五款丼之中嘅天婦羅都會有啲唔同,最多嗰碗有十款㗎。香港限定軟殼蟹丼(HKD158)嘅軟殼蟹都幾多,有5、6嚿,都算大件啖啖肉;仲有用皇帝菜同櫻花蝦整成嘅什錦炸物、茄子、南瓜同溫泉蛋做配料。如果想食飽啲,呢款落單嘅時候,可以追加白飯(加HKD15)。但係脆漿幾快腍,加上主角軟殼蟹肉本身都係軟腍,所以口感冇平時嘅天婦羅咁脆口,會有啲油膩感;不過佢其他丼之中嘅黑虎蝦肉質好爽口彈牙,三間之中佢嘅蝦最出色。醬汁本身鹹少少,可能因為師傅淋得幾多,撈勻都可以唔使再加。不過其他丼飯之中,天幕御膳(HKD148)可以有三個食法,例如變成茶漬飯;而天吉雙品(HKD108)仲可以一份有齊飯同烏冬,配搭變化會多啲。   脆漿:★★☆☆☆ 天婦羅款式:★★★★☆ CP值:★★☆☆ 變化度:★★★☆☆ 總分:11星(總分20星)   天吉屋 地址:旺角朗豪坊11樓25-29號舖 電話:3105 0986 營業時間:星期一至日:00:00-22:30(22:00截單)   天丼 天丼最平嗰款丼飯只係HKD49,當食個Tea都ok,所以真係冇得同佢鬥CP值。而且喺丼款、天婦羅款式同麵款都係三間過江龍入面最多,有時仲會推出期間限定添。呢款海老穴子天丼(HKD82)係呢度最貴同最天婦羅嘅丼飯,配咗黑虎蝦、長穴子、本菇、蟹柳、南瓜、四季豆同紫菜。佢嘅脆漿唔算厚,亦唔會勁快腍,但金子半之助嘅畫花會幼細啲,所以相比之下佢嘅穴子輸個馬鼻啦。佢嘅飯幾多吓,所以醬汁唔夠撈到落底;可以免費追加醬汁,但建議唔好加太多,如果唔係會鹹咗啲。...

0

【K11 MUSEA開幕雲集首次過江美食 文華雞飯+韓國魚糕搶先開】K11 MUSEA

K11 MUSEA終於正式開幕喇!呢個樓高十層嘅尖沙咀新商場可以話係最熱門嘅美食集中地,當中有日、韓、英、法、新加坡等地嘅人氣餐廳首次嚟香港開海外店添。大部分都將會喺9、10月同大家見面,亦有幾間喺8月率先開業,即刻睇吓啦!   多間國際過江龍首度襲港 文華海南雞飯Chatterbox Café 想食馳名嘅文華海南雞飯,依家唔使飛去新加坡,過幾日喺香港都食到喇!新加坡文華酒店旗下嘅Chatterbox Café喺K11 MUSEA嘅新店即將開業,呢度主打一系列新加坡地道菜式,最經典嘅就梗係佢哋嘅文華海南雞飯啦,仲有原個椰子雪糕都好吸引㗎。 開業日期:9月6日 (B110號舖)   韓國魚糕專賣店「三進魚糕」 韓國熱門嘅街頭小食之一,魚糕都同樣打入呢度。呢間三進魚糕可以話係創造咗魚糕嘅全新境界!入面賣超過60款唔同嘅魚糕食品,除咗有傳統嘅魚糕串之外,仲有包咗餡嘅魚糕球、魚糕炸物等等,快啲去K11 MUSEA試勻佢哋啦! 開業日期:已開業   韓國人氣麵包店Tardemah 呢間Tardemah係超有人氣嘅韓國麵包烘焙店,賣好多唔同種類嘅手工麵包。佢哋嘅爆餡芝士包、Oreo忌廉包、韓國年糕包等等都好有特色,有唔少來自世界各地嘅捧場客㗎,唔知香港店會唔會好似韓國店咁大排長龍呢? 開業日期:9月10日   牛油果主題餐廳Avobar 來自倫敦嘅人氣牛油果餐廳Avobar開咗短短一年就迅速冒起,嚟緊9月中就會喺呢個新商場開香港首間分店,仲係佢哋第一間海外店添。話明以牛油果做主題,呢間餐廳由鹹食、甜點到飲品,幾乎全部都加入牛油果元素。其中牛油果漢堡、流心蛋牛油果多士、牛油果果昔等等都係呢度嘅招牌菜,一眾牛油果控記得去朝聖喇! 開業日期:9月16日 (B201號舖)   東京拉麵人龍店「多賀野」 同樣喺香港開設首間海外分店嘅多賀野依家已經開始試業喇。香港分店嘅食材都由日本直送,舖頭亦自設製麵工場自家製拉麵。熱賣嘅鴨肉沾麵、粟國鹽味拉麵等招牌菜喺呢度都食到㗎。 開業日期:試業中 (220號舖)   法國烘焙麵包店Gontran Cherrier Gontran...

0

【日本金賞天丼過江葵芳插旗 招牌天婦羅25cm穴子魚】金子半之助

喺日本連續五屆攞到日本全國天丼金賞嘅金子半之助有幾好食?唔使去日本試嘅,因為佢喺葵涌新都會商場開業喇。暫時香港店會供應三款親民價招牌丼飯,其中一款仲有25cm超長穴子魚天婦羅添,即刻帶大家睇吓呢間帶江戶傳統味道嘅名店有幾正啦! 店內用上傳統日式裝潢,望向開放式廚房仲可以睇住師傅即製天婦羅,未食都已經聞到陣陣香氣。 炸天婦羅用上高純度芝麻油,喺炸嘅時候已經令食物「上味」。製成後淋上由江戶時代開始傳承三代,以純天然大豆製成嘅秘製醬汁,味道鹹甜適中,如果唔係重口味人士都唔使另加醬汁。而為咗令食客品嚐到熱辣辣嘅丼飯,丼碗以江戶時代嘅佐賀有田燒陶瓷工藝製作成空心底部,仲放入保溫櫃令丼碗保持暖笠笠添。 所有丼飯都有六款天婦羅,每碗會有2隻鳳尾蝦、以墨魚粒同干貝製成嘅雜錦海鮮餅、溫泉蛋、海苔同小青龍(荷蘭豆),最後一款先會唔同,所以簡單選擇想食嘅天婦羅「主角」就知邊碗啱你喇。呢碗超人氣江戶前天丼(HKD138)就以25cm超長穴子魚天婦羅,一上枱就帶嚟視覺震撼。為咗保持品質,未炸嘅穴子魚要達到指定長度同克重先會選用;不過上枱後放耐咗會變得稍硬同縮水,所以相機食先嘅朋友唔好影咁耐喇。 上天丼(HKD118)就用上鱚魚,肉身比穴子魚薄啲,細食啲嘅朋友會覺得冇咁頂肚。不過咪以為咁就唔啖啖肉,因為雜錦海鮮餅嘅墨魚粒同干貝都幾大粒,炸完仲好濕潤彈牙。 天丼(HKD98)就用上厚用嘅舞菇,兩大件咬落幾juicy兼爽口喎。如果食到咁上下覺得膩,可以食每個丼飯都跟嘅清甜漬牛蒡同海帶伴薑解膩。 雖然見到溫泉蛋好想篤爆佢,但店員教食到一半先撈蛋汁就可姒以試兩到種風味嘅飯底喇。 臨尾飲杯麥味超重嘅Suntory Beer The Premium MALT’s(HKD28/350ml)就爽晒,呢款比平時嘅日本啤酒濃味好多㗎!   金子半之助 地址:葵涌興芳路223號新都會商場1樓107-108號舖 電話:2661 8212 營業時間:星期一至日:11:30-22:30