Tagged:

0

【90分鐘任食韓式青口煲 升級仲任歎特色酒】THE JOOMAK

鍾意去尖沙咀、食海鮮同飲酒嘅朋友要注意喇,THE JOOMAK又有新優惠!由4月16日至5月31日逢星期一及二(公眾假期除外),可以每位HKD298喺90分鐘限時任食青口煲優惠享用兩款新推嘅青口煲,仲會送你一客香脆炸蕃薯條,唔夠喉可以優惠價每位HKD30無限加點炸蕃薯條或薯條。 今次兩款新嘅青口煲都係走韓風,第一款係牛油馬格利青口煲(原價HKD268)。馬格利酒口感清新帶微甜,平時多數用嚟調配cocktail,今次將佢混合清香嘅蒜蓉牛油,變成韓式濃稠白汁煮爽滑紐西蘭青口,甜甜香香嘅味道令人想一食再食。 第二款係泡菜蕃茄青口煲(原價HKD268),用韓國師傅醃製最地道風味嘅韓式泡菜,加上蕃茄汁,調配成秘製韓式泡菜蕃茄紅醬汁煮紐西蘭肥美青口。最後灑上大量Mozzarella芝士,有少少拉絲效果,辣中帶鹹香嘅味道會忍唔住想啤一啤囉!所以呢個任食青口煲可以俾大家有Free Flow Plan飲品任飲優惠: 選擇一) 每人加HKD38,可以無限享用手調咖啡、果汁、汽水、朱古力同茶類。 選擇二) 每人加HKD88,可以任飲多款韓式Cocktails、紅酒、白酒、啤酒同無酒精特飲(例如花漾果茶)。 簡單介紹吓特別啲嘅飲品啦: 韓Shake(兩位用)有四款口味:藍莓薄荷、爆谷荔枝、青瓜梳打同柚子梳打。呢款飲品會跟埋套調酒器,有木樁、長鐵匙、糖漿、新鮮水果同酒等等,專業調酒師會教你點樣製作Cocktail,真係又食又玩。 MAKGEOLLI有原味、葡萄同士多啤梨,係朝鮮半島用米發酵而成嘅濁米酒,酒精含量大約6-8%,甜甜哋幾啱女士飲。 水果覆盆子紅醋 (兩位用)混合韓國梨汁、新鮮橙汁、青檸汁、薄荷葉同紅桑子果醋,再加入新鮮水果,甜蜜冰涼嘅感覺都幾啱依家飲。   青口煲優惠供應時期: 日期:2018年4月16日至5月31日 逢星期一及二(公眾假期除外) 用餐時限:90分鐘 供應時段:全日   THE JOOMAK 地址:尖沙咀廣東道17號海港城海運大廈3樓LCX 34號舖 電話:2111 0851 營業時間:星期一至日:12:00-22:30

0

【銅鑼灣黑毛豬盛宴 帶你走入西班牙大地】Gusto Restaurant & Bar

黑毛豬出名肉質軟腍,令一眾豬迷為之瘋狂,但係要搵到一間餐廳食到唔同部位嘅黑毛豬就一啲都唔易,依家去銅鑼灣嘅Gusto Restaurant & Bar就有計喇!Menu 7-8成都係黑毛豬,差不多將成隻豬由頭到腳,起皮拆骨俾你試多啲唔同花款。大廚Angelo話為咗更了解西班牙菜,佢去咗當地一個月試唔同餐廳煮嘅菜色添。 餐廳走簡約高雅路線,要情調有情調,要氣氛有氣氛,二人世界定成班人開餐,一啲都唔失禮。 前菜可以點煙燻生蠔(HKD88),一開蓋就好似仙境咁。咪以為兩隻一樣,係唔同款㗎!餐廳會按時節挑選生蠔,一般都以法國蠔為主,例如法國泡泡蠔。兩款以一隻淡味(放有豌豆苗做標記),一隻濃味去配搭。提提大家,新鮮生蠔唔使加茄汁㗎,咁你諗到佢幾新鮮啦! 另一款前菜黑毛豬肩肉沙律(HKD98)比想像中清新,肩肉燒到裡面仲係粉紅色,啱啱熟夠晒腍,好易咬開。水果同沙律菜都好新鮮,全部都勁清甜。 黑毛豬豬仔骨(HKD168)大火燒完再入焗爐,外皮脆脆哋,骨肉都幾易分離。最鍾意佢嘅炭香味,而秘製凍BBQ汁又唔會太甜,仲有微微辣味,勁香口。配埋沙律菜同脆炸薯條,佐酒一流! 風乾黑毛豬火腿5J(HKD98)選用24個月嘅黑毛豬,肉味夠濃又夠嫩,最神奇嘅係唔會好油,黠解?因為好多餐廳連埋肥膏俾你食,但Gusto Restaurant & Bar會片走佢,等食客真係品嚐黑毛豬嘅肉香。 黑毛豬豬腸拼盤(HKD198)都有分淡味至濃味,由幼食到粗就啱喇。配上烤薯仔、烤蕃茄、沙律、酸瓜同洋蔥BB,唔怕肉食太多啦。 鍾意食羊嘅朋友不妨試試伊比利亞無骨羊扒(HKD178),肉質鬆軟又唔會好羶,平時勁怕羶味嘅小編都接受到。   Gusto Restaurant & Bar 地址:銅鑼灣登龍街18號V Point 2樓 電話:3188 5002 營業時間:星期一至日:星期一至日:12:00-15:00;18:00-23:00

0

【騷.味濃新蒲點 潮吹本土手工啤】騷

實現夢想之餘,俾埋空間其他人追夢,成件事浪漫到暈。幾個80後青年喺尖沙咀開餐廳 —— 騷,將自己學到嘅廚藝同調酒技術變成事業,同時支持本地手工啤酒同Live Band。 呢度有廿幾款手工啤酒俾大家揀,差不多每晚都有Live Band Show。聽出耳油想一展歌喉?上台一齊唱啦! 吉列蝦(HKD48)炸得好香脆,配埋鹹鹹地嘅秘製蒜蓉芝士醬,惹味指數瞬間提升。 夏季限定嘅煙鴨胸青瓜配蜜糖芥末(HKD58)會清啲,厚身又熱辣辣嘅煙鴨夾新鮮青瓜片同沙律菜一齊食,清新唔油膩。蜜糖芥末醬用咗黃芥末,唔會好重味,少少甜幾開胃。 Mini Burgers(HKD98/3pc)雖然話係mini,但係都要好幾啖先可以ko佢。手打嘅豬肉漢堡扒加咗少少洋蔥,令味道再香啲甜啲。 主打嘅Cocktail個名已經好得意,左邊係菩提老祖(HKD108)檸檬汁糖水、力嬌酒(Liqueurs)、蘋果酒(Cider),甜啲啱女仔飲。右邊本地薑(HKD108)用肉桂粉、新鮮薑片、檸檬汁同雲尼拿糖水配薑味啤酒,令薑嘅辛辣味更加突出又唔會乸喉,好啱要Gur吓條氣嘅時候飲。   騷 地址:尖沙咀諾士佛臺9號冠福中心9樓904室 電話:6847 2018 營業時間:星期一至日: 17:00-02:00

0

【一試難忘再試投降 極上磯煮鮑魚飯釀鵪鶉】醉胡爐

同朋友聚會都想揾啲可以他他條條咁食、飲到唔同嘅酒、唔限時又坐得舒服嘅高質餐廳。尖沙咀醉胡爐啤酒、清酒、白酒等等嘅酒都有,成班friend有咩要求都搞得掂。菜式方面仲有法日菜可以揀,價錢仲非常合理添。 一入門口就見到好多大大細細,好似蒲公英外形嘅吊燈,氣派得嚟又有少少浪漫。 和風蟹肉松露酥皮卷(HKD88)自家製嘅酥皮好薄好脆,一咬啲蟹肉就爆出嚟,好足料,松露嘅香味都慢慢散發出嚟。 小編極度推介磯煮鮑魚飯釀鵪鶉(HKD228),法國鵪鶉拆骨後釀入鮮鮑汁煮嘅珍珠米、磯煮鮑魚粒、姬松茸同素翅等材料,鮮味到爆燈!鵪鶉用鮮鮑汁掃喺面再烤焗,肉質非常嫩滑,仲香氣撲鼻添。配埋新鮮蔬菜,可以清一清味覺。 原板海膽燴意大利飯(HKD228)嘅馬糞海膽輕輕燒過,有淡淡焦香。配用蟹肉忌廉汁炒嘅野菌意大利飯唔會覺得膩,撈勻一齊食鮮味得嚟好creamy。 醉愛老婆芝士餅(HKD48)嘅tiramisu餅底加入酒調味,香濃幼滑。想有啲咬口又可以加埋老婆餅粒一齊食,雙重享受。   醉胡爐 地址:尖沙咀柯士甸路20號保發商業大廈地舖 電話:2606 2106 營業時間:星期一至日: 11:00-01:00

0

【味蕾最高享受!九龍城巧手上品居酒屋】Sakaya

Sakaya位於九龍城獅子石道,食物以串燒為主,主打雞、和牛同埋海鮮。選材上乘講究,全部都由廚師精心巧手製作,簡單如燒蠔亦都會嚴選北九州蠔,加上自家製醬汁配搭,處處盡見心思。餐廳環境幽靜,講究情調,最適合同朋友一齊把酒聊天! 店外放滿日式碗碟同酒樽,再加上木製外牆,喺泰國菜館滿街嘅九龍城令人眼前一亮。 餐廳室內燈光較暗,想同朋友靜靜地傾計非常適合! 北九州燒生蠔(HKD68/隻)採用北九州蠔,肉質非常鮮甜,入口軟滑。再加上自家製醬汁,鮮嫩多汁,令人欲罷不能! 白露筍黑豚串(HKD38/串)  採用黑豚肉捲白露筍,口感清爽唔會膩,白露筍吸收咗黑豚肉嘅肉汁,配上沙律醬更加有入口即溶嘅感覺。 雞掌心(HKD45/串)以人手切出雞掌心,工序十分繁複,非常考驗廚師手藝。雞掌心脂肪均勻,燒完之後香氣四溢,雞皮金黃香脆而雞肉柔嫩多汁,加上size啱啱好一口一件,真係好食到停唔到口! Sakaya 地址:九龍城獅子石道15號地下 電話:2382 6988 營業時間:星期一至日:12:00-15:00;18:00-23:00