Tagged: #金鐘

0

【香港港麗酒店餐飲優惠低至65折 Chill歎意式晚餐及自助餐】香港港麗酒店

近排各大酒店都有唔少優惠,去食嘢之前當然要research吓先啦。小編就發現香港港麗酒店Conrad Hong Kong有DBS信用卡餐飲優惠(唔包括貴賓卡同商務卡),就算去佢哋充滿情調嘅意式餐廳意寧谷,或者有勁多即煮美食嘅咖啡園食自助餐都有預訂Hungry Tuesday優惠,最平低至65折添,快啲趁呢機會獎勵自己啦! 1. 意寧谷招牌嚐味四道菜晚宴菜譜7折 喺酒店8樓嘅意寧谷有落地大玻璃眺望維港景色,可以喺咁浪漫嘅氣氛之下品嚐正宗意大利北部菜系夠晒氣氛。依家用DBS信用卡嚟食4道菜晚宴菜譜可以有7折優惠(優惠價HKD$621.6*/原價HKD$888*/位)。 鍾意海鮮嘅朋友記得點Capellini Con Astice,啖啖鮮味嘅龍蝦肉配上蕃茄汁煮天使麵,加埋羅勒幾香濃惹味㗎。想知埋其他菜式就記住留意預訂網站啦!   意寧谷 地址:金鐘道88號太古廣場香港港麗酒店8樓 電話:2822 5777 營業時間:星期一至六:12:00-15:00,18:30-22:30,星期日:11:00-15:00,18:30-22:30   2. 秋季自助晚餐 65折 想一餐食到唔同菜式梗係非自助餐莫屬,而喺酒店大堂低層嘅咖啡園就集合東南亞同傳統西方美食,同樣以DBS信用卡訂位都有晚市65折優惠! 自助晚餐啱啱換上秋日美食,除咗冷盤海鮮之外,仲有現煮嘅意寧谷芝士意大利燉飯配上即刨黑松露、香煎鴨肝配香梨、蘋果焗海鮮及意式芝士焗蠔等;糕餅主廚Billy Yuen亦為甜品區加入經典蘋果批、法式栗子白朗峰、焗南瓜焦糖布甸等甜點,記得留肚食甜品呀! 咖啡園晚市自助餐連無限暢飲指定汽水(DBS信用卡客戶專享65折自助晚餐優惠) 優惠期:11月6日至11月30日 原價:星期一至四:HKD738*/成人、HKD458*/小童(小童為6-12歲) | 星期五至日及公眾假期:HKD798*/成人、HKD478*/小童(小童為6-12歲) DBS信用卡客戶專享價:星期一至四:HKD479.70*/成人、HKD297.70*/小童(小童為6-12歲) | 星期五至日及公眾假期:HKD518.70*/成人、HKD310.70*/小童(小童為6-12歲)   咖啡園 地址:金鐘道88號太古廣場酒店大堂低層...

0

【KiKi麵x老巴剎廚房 冬蔭公VS星洲咖喱湯麵】茶米

主打台式料理嘅KiKi茶@茶.米又有新麵食喇!今次就同東南亞餐廳老巴剎廚房crossover,喺KiKi招牌日曬麵加入東南亞元素,創出三款期間限定麵食,供應到4月30日咋。拌麵同湯麵都有,即刻睇吓食邊款先! 呢款咁豐富嘅乾拌麵係泰式香草牛肉燥拌麵(HKD118),面頭啲牛肉燥加咗好多唔同嘅香料同香草煮,辣辣哋咁夠晒惹味! 跟住兩款湯麵都充滿泰國風情。泰式冬蔭蝦球拌麵(HKD128)入面嘅醬料係以冬蔭功醬混合泰國辣椒醬特製而成,聞落已經有好香濃嘅冬蔭功味,同鮮味嘅蝦球特別夾。 星洲咖喱雞絲湯麵(HKD118)個咖喱湯底夠濃稠,又有椰香味。加上雞絲吸晒湯汁嘅精華,令成碗麵加唔少分喎。 呢杯有雙層顏色嘅蝶豆花青檸蘆薈粒冬瓜茶(HKD35)會唔會夢幻咗啲呢?喺冬瓜茶入面加咗清甜嘅蘆薈粒同好fresh嘅鮮青檸,再倒入蝶豆花撞出夢幻嘅紫色,味道同賣相都一樣咁正呀。 唔好以為呢杯係普通嘅橙汁咁簡單,而係鮮橙青檸愛玉茉莉綠(HKD35),味道酸酸甜甜好開胃喎。   茶米 地址:香港金鐘金鐘道88號太古廣場1樓112號舖 電話:2117 5903 營業時間:星期一至日:11:00-22:30

0

【意廚炮製頂級配搭 野生白松露盛宴食得高貴】Nicholini’s

黑松露乜乜乜食得多,今次試吓白松露啦!香港港麗酒店嘅Nicholini’s,意籍主廚Riccardo Catarsi就炮製咗頂級白松露宴。來自意大利嘅野生白松露,盛產喺秋冬季節,加埋主廚嘅廚藝,完美拍檔啦! 酒店選用嘅野生白松露,來自意大利布埃蒙地區Alba小鎮呢個王者出品地,當地土質肥沃,係對生長環境要求極高嘅白松露嘅理想成長地。白松露香氣濃郁,集泥土、麝香、菇菌、蒜香同芝士等獨特氣息於一身,主廚今次以新鮮白松露入饌,搭配時令食材,夠晒頂級呀! 牛油慢煮波士頓龍蝦(HKD680),配上地中海蘿蔔同芹菜根,特色海鮮濃湯鋪上原片新鮮嘅白松露,龍蝦肉嘅熱力將白松露嘅幽香揮發,聞死人呀! 慢煮小牛柳伴抱子甘藍、豬頰肉(HKD650),牛柳肉質非常幼嫩,搭配牛肝菌、羊肚菌、雞油菌同矜貴嘅白松露等,再混合野生蘑菇味道,成個味蕾被菌香填滿,香氣十足。 鮟鱇魚火腿卷(HKD650),將清甜嫩滑嘅鮟鱇魚用薄薄帶鹹香嘅特級Culatello火腿片卷起,再輕輕用慢火煎至金黃色,鮮味同鹹香相輔相成,油潤嘅質感更加將白松露嘅香氣帶出。 和牛薄切伴香煎鵝肝(HKD580),配雞油菌、白松露,薄切嘅和牛牛味濃郁,配上軟滑鵝肝,兩者味道完美融合。 白朱古力榛子白松露芭菲(HKD280),選用鮮甜嘅車厘子作點綴,帶出白松露嘅幽香,加埋果仁香氣同香滑忌廉,入口順喉幼滑,滋味無窮! 食物除咗可以單點,餐廳由即日起至12月期間仲會提供四、五至六道菜嘅白松露嚐味晚餐菜譜,最平食四道菜都只係1588蚊咋!呢個白松露套餐咁抵食,仲唔快啲去試吓!   Nicholini’s 地址:金鐘金鐘道88號太古廣場港麗酒店8樓 電話:2521 3838 營業時間:星期一至六:12:00-15:00;18:30-22:30;星期日:11:00-15:00;18:30-22:30

0

【中村藤吉$80套餐唔掂 飯糰怪味麵豉湯冇味】伏務台

抹茶嘢一向受歡迎,凡係新出抹茶乜乜乜,抹茶控就一窩蜂咁衝。今次小編就去咗金鐘太古廣場嘅京都過江名店中村藤吉,之前網友已經話佢啲雪糕好食,不過啲熱食就冇乜好評喇!好,小編決定試吓金鐘店限定嘅丸十茶香飯糰套餐啦,套餐總共有4款可以選擇,有兩款唔同口味嘅飯團,如果想要食齊飯糰、麵豉湯、茶類同抹茶啫喱,就要點最貴嗰個「月」餐試喇!橫掂都係,小編就點咗呢個喇! 由於舖頭比較細,基本上只for外賣嘅,尖沙咀店先有堂食嘅甜品供應囉!除咗雪糕同埋飯糰套餐之外,呢度仲有啲茶葉、茶包嘅套餐可以買返屋企慢慢沖,另外仲有賣啲抹茶副產品,例如抹茶朱古力同抹茶蛋糕等等。 丸十茶香飯糰套餐「月」(HKD80),包括抹茶鹽煎茶山椒魚乾海苔飯糰(嘩,好似好足料咁喎)、一杯自選茶(中村茶、覆蓋茶、玄米茶、煎茶、煎茶莖茶同埋莖焙茶)、迷你抹茶啫喱、同埋一碗本田麵豉湯。買完之後店員問使唔使幫我泡茶,定係我自己拎茶包返去再沖嘅時候我先驚覺,原來套餐包嗰杯茶係茶包嚟㗎……呢個價錢但飲茶包茶?小編表示有啲失望囉! 呢個抹茶鹽茶山椒魚乾海苔飯糰,個名就夠晒長同埋好有gimmick咁喇,但係一打開張包裝紙,點解成個飯糰都係得啲一點點似調味料嘅嘢,當初小編仲天真地以為咬落去中間可能會有餡啦,諗住起碼都有一兩條魚乾仔食到啩,點知呢,原來係一個山椒魚乾海苔碎嘅飯團,即係呢,就算你咬幾入想搵吓有冇魚乾本人呢,都係搵唔到㗎!感覺就好似食鰻魚手卷,你梗係expect有原條鰻魚啦係咪?點知打開原來得幾粒仔鰻魚咁失望囉!同埋好老實講,飯糰味道係有少少怪嘅,淡味得嚟又有陣煎茶味,另外有一兩啖咬到係有少少辣辣哋,但同整體嗰種淡淡嘅茶味完全唔match,亦食唔出有魚乾喺入面!簡單啲講,冇,下,次! 至於呢個麵豉湯嘅賣相同我哋一般飲開嘅都有啲出入,面浮起嗰幾嚿發晒脹嘅嘢,我都唔知點形容好,個樣真係好伏囉!聞落去唔係好覺有麵豉味,等我撩吓裡面有咩材料先! 其實佢有兩款可以揀嘅,分別有腐皮同豆腐,我就揀咗豆腐。咁佢都有幾嚿豆腐同埋嗰啲發晒脹嘅……腐皮?其實佢發脹到我都唔係好分到佢係咩嚟,有啲似豆卜類嘅嘢啦,但就冇平時飲麵豉湯會有嗰啲海帶喇,同埋個麵豉湯竟然完,全,冇,麵豉味。小編飲到頭都側埋,開頭以為係自己未攪勻啦,但攪極都係咁喎! 經歷完頭先嗰兩款伏食,我對享負盛名嘅抹茶啫喱都開始有啲懷疑喇!佢將底層嘅啫喱同topping嘅抹茶蓉同埋丸子分開咗,應該係出於外帶食品品質保證嘅考慮嚟嘅,呢點算係幾貼心。咁我就先將佢哋撈返埋一齊先。 試吓嚿啫喱先,咦,係幾爽滑嘅,但就冇甜味,只有綠茶嘅甘香味。將啫喱同抹茶蓉撈勻後就覺得味道剛剛好,抹茶蓉嘅甜味同埋啫喱本身嘅茶甘味都真係幾夾。試埋粒丸子,食丸子最驚就係佢極黐牙又淋坺坺咁。好在呢次算得上係好食,煙韌得嚟唔黐牙!好啦,招牌抹茶啫喱總算交足貨! 甜品都食埋,係時候飲埋杯茶喇。小編揀咗呢個莖焙茶,用熱水浸泡嘅茶呈黑色,顏色望落感覺「好蓉」。飲落口第一啖都幾順口,但吞嘅時候就有一種澀味湧出嚟。呢款茶俾我嘅感覺就唔太好,一來是茶包茶,二來佢澀得嚟完全冇嗰種解膩感覺,又唔似綠茶有種清爽感,感覺就係單純嘅澀。如果大家真係要試唔該揀吓其他喇,仲有5款可以試嘅,好飲記住話俾小編知!   小編伏氣:其實80蚊食個飯糰仔真係連女仔都唔係好飽,即使想貪得意試吓都可免則免喇!反而試完呢個set我比較對佢哋嘅甜品有信心,起碼抹茶啫喱我係懷住愉快嘅心情食完㗎!真係寧願佢哋專心啲,淨係做抹茶甜品算喇! 丸十茶香飯團套餐「月」 入伏點:中村藤吉金鐘店 入伏價:HKD80 中伏by #肥仔文 美術by #mui mui 攝影by #肥仔文 《伏務台》星期一伏務大眾,歡迎各界報料。

0

【野生北海道大閘蟹 HKD388食足料蟹宴】東海飲食集團

日本野生食材出口嘅規管一向勁嚴格,北海道石狩川係日本唯一嘅野生大閘蟹生長地,東海飲食集團今年就入咗呢度嘅大閘蟹貨喇。小編去金鐘分店食,仲係限量供應!俾個貼士大家,每個星期初或者去灣仔新鴻基分店都比較易訂位。 呢度好開揚,午時會多人啲,想靜少少可以嚟食晚市。 清蒸北海道野生大閘蟹有五両重,肉質清甜彈牙,蟹膏都算多,但同陽澄湖大閘蟹比係少啲啲。野生品種嘅殼比較硬同厚,都係用返剪刀拆蟹好啲,小編食到後尾手指表示攰。 生拆蟹粉蒜蓉包都幾新穎,熱辣辣嘅蟹粉搽喺微微蒜香嘅法包上面,令蟹嘅鮮甜味更濃郁。 鮮味蟹粉小籠包都係用石狩川大閘蟹整,裡面只有蟹肉同蟹粉(冇豬肉),兩粒小籠包已經用咗一隻蟹,真材實料,份量十足! 蟹宴餐唔止呢三款,俾個menu大家睇睇啦: 計吓數蟹宴餐本身唔貴,係考啲手力拆蟹啫,絕對食得過。   東海薈 地址:金鐘添美道1號中信大廈5樓 電話:2877 2211 營業時間:星期一至日:11:00-15:00,18:00-23:00

0

【頂級牛肉漢堡燒住上 萬聖節限定火爆晚餐】BRICK LANE

萬聖節唔一定要扮鬼扮馬,身為一個吃貨當然係去食返個萬聖節大餐最開心啦!小編推薦你去BRICK LANE食佢哋限定推出嘅萬聖節餐,好過落蘭桂坊同人逼餐懵又無啖好食啦。 Halloween Menu(HKD328/位)又型又靚,不論環境同食物都做到好有氣氛。每set有4個course同雞尾酒,主菜可以三揀一: 最受大家歡迎一定係最超級吸睛嘅火焰頂級美國牛肉漢堡!一上菜即刻倒啲151落個包上面,啲火瞬間包圍晒成個包,呢一刻就係最神聖「相機食先」時刻,全檯人都拎起個相機話影相,就連隔離檯見到都想影埋一份呀。 唔食牛嘅朋友可以揀西班牙黑毛豬柳,做得好juicy。餐廳仲別出心裁用針筒裝住個汁,但小編建議你小心啲,太大力會噴到成檯都係,會變成血案現場啊! 素食朋友都唔怕,食個南瓜茄子意大利飯都好應節,所有細節都做得一絲不苟,抵讚! 主菜都咁吸引,前菜同甜品都唔執輸㗎。 南瓜本身都夠晒應節,重要係有蜘蛛網花紋嘅南瓜忌廉湯添。 鬼臉柚子田園沙拉,雖然唔係太恐怖,但都算有心思啦。 飲品可以選擇有酒精嘅西柚雞尾酒或者無酒精嘅香橙雜飲,味道清新。 甜品係可愛南瓜撻,細細件唔怕太飽!   BRICK LANE 地址:灣仔港灣道23號鷹君中心二樓 電話:2363 2500 營業時間:星期一至五:09:00-23:00;星期六、日:10:00-23:00

0

【夏末限定口味】Triple O’s

Triple O’s嘅漢堡一向都係即叫即做,不含防腐劑同人造色素,務求大家食得新鮮同健康。今次推出新口味,除咗新鮮,仲有埋新鮮感添呀! 新口味限定漢堡--芝士蘑菇雞肉漢堡(套餐$89;單售$62)。漢堡以香烤去皮無骨雞胸肉、新鮮蘑菇同香滑芝士做餡,配上爽脆生菜、新鮮蕃茄和特製醬汁,每一啖都充滿新鮮感! 除咗新漢堡,仲推出咗椰子奶昔(單售$39),呢款奶昔融合咗椰子奶油、椰子絲同雲呢拿味雪糕,香滑嘅椰香味啱晒夏天消暑,配埋芝士蘑菇雞肉漢堡一齊食好夾呀。 呢個期間限定係由即日起至9月9日,想試新口味嘅朋友要留意啦! Triple O’s 金鐘 地址:太古廣場金鐘金鐘道88號太古廣場二座LG1地庫009號舖 電話:2873 4000 營業時間:星期一至日10:00a.m.-10:00p.m. 灣仔 地址:香港灣仔港灣道25號海港中心1樓121店 電話:2519 3000 營業時間:星期一至五08:00a.m.-09:00p.m. 星期六、日及公眾假期11:00a.m.-08:00p.m.