Tagged: 銅鑼灣

0

【鬼怪風日式燒肉放題店 任食高質和牛拼盤回本】燒鬼

食日式燒肉都可以玩味十足的話,非呢間銅鑼灣新開嘅燒鬼莫屬喇。餐廳以日本鬼怪傳說做主題,大走暗黑古怪風。最平嘅日式燒肉放題(HKD298)就已經任食超過10款來自鹿兒島同宮崎嘅高質和牛燒肉,其中更有罕見嘅腹脅肉;而且有多款魚生刺身、一系列日式料理都係任食,可以話CP值爆晒燈呀! 店內無論喺裝潢設計、食物細節上都加入唔同嘅暗黑鬼怪元素。不過暫時只做晚市,記得提早預約就唔怕摸門釘啦。 呢度嘅日式燒肉放題會供應超過10款來自鹿兒島同宮崎嘅A4和牛燒肉,其中必試呢款牛鬼拼盤。拼盤內有8款和牛部位俾你到唔同口感同味道層次,包括前胸肉、胸腹肉、上小排肉、橫隔肌、腹脅、中腹肉、內側腹肉同上肩肉。牛肉部位會視乎日本時令限定而轉換,身為食肉獸嘅小編望到都流晒口水呀! 其中市面上少有嘅腹脅肉都喺拼盤內可以搵到,呢款肉靠近牛大腿根側嘅牛五花肉部位,每隻和牛只有8-10公斤腹脅肉,所以特別矜貴㗎。牛肉嘅雪花紋理均勻,味道比其他五花肉清爽,入口充滿牛味但竟然一啲都唔膩! 如果想再滋味啲,可以升級加配熊本F1肉眼或西冷(各HKD100),包保你有燒牛扒嘅感覺呀!不過唔使擔心淨係得牛肉,放題都有上等美國牛肉、豬肉、雞肉、海鮮同蔬菜俾你任點嚟燒烤㗎。 醬料可以提升燒肉嘅惹味程度,餐廳就準備咗三款自家製醬汁,有用咗大量京蔥加埋日式醬油整成嘅蔥油醬(左)、惹味嘅辣味噌醬(中)同埋比較清新嘅蘋果柚子紅酒燒汁(右)任你蘸。 雖然係燒肉放題,但都一樣有各款鮮味嘅魚生刺身。 其中鰹魚同埋用芥末漬蠑螺嘅蠑螺鬼都係比較少見嘅刺身款式。 另外,仲有柚子醬油和牛壽司、明太子醬帶子炙燒壽司、枝豆、泡菜豆腐、日式泡飯等日本料理都可以任食,試勻全部真係捧住個肚走呀!   燒鬼 地址:銅鑼灣駱克道459-461號The L. Square 9樓 電話:2856 0226 營業時間:星期一至日:17:30-23:30 價錢: 星期一至五:HKD298 (17:30-19:30)、HKD388 (19:30-21:30)、HKD348 (21:30-23:30) 星期六、日:HKD308 (17:30-19:30)、HKD398 (19:30-21:30)、HKD358 (21:30-23:30)

0

【Omakase大廚:坐喺度冇用㗎 轉攻到會上門即製壽司】滝壽司

新嘅抗疫措施之下想食好啲可以點?外賣到會不失為一個好選擇,但大廚都上埋門就真係唔使落廚,坐低等食就得。人稱朱師傅嘅甄啟量係銅鑼灣高級Omakase滝壽司嘅老闆兼主廚,見疫情爆發就即刻推出廚師發辦到會服務(HKD1900位/兩位起),大約15道菜主打高級嘅壽司Omakase,當中都會有刺身同熱湯。咁同堂食有咩分別?等師傅話你知啦! 朱師傅會將用具、醬料、準備好嘅食材包好入保凍箱,當中一定有枝消毒劑! 安坐家中都可以超近距離睇師傅即席握壽司。 「了解清楚客人想食咩,有啲咩唔食得之後,我哋會預先準備好食材,佔嘅空間唔多,俾一張枱我就夠㗎喇。不過本身餐廳做Fine Dining形式,所以有啲菜式嘅整治比較複雜,但去客人屋企就未必整到,例如煙燻嘅效果,但食材一定係用返堂食嘅品質,只係製作方法要改變吓;另外就係熱煮嘅菜式都唔可以好堂食咁隨意整,因為我哋都唔會搞客人嘅廚房,但都會問可唔可以俾我哋熱返個湯呢啲簡單嘅步驟。」依家就介紹幾款可以出現喺廚師發辦到會服務嘅菜式啦! 充滿魚籽嘅白飯魚刺身加入來自日本嘅「太陽蛋」蛋黃同醬汁後味更更甘香,口感仲特別爽喎。 大家都知靚嘅滷味都用「萬年滷水汁」煮先好食,但示來鮑魚汁都可以好似滷水汁咁留起重用㗎!呢味北海道蝦而鮑魚先用鐵盒盛載蒸熟,將當中嘅汁水混入已經留起4年、不斷重用嘅特製鮑魚汁,然後將蒸熟嘅蝦而鮑魚放入去浸泡製成,味道仲帶有海水嘅鹹鮮味添。師傅話呢款鮑魚夠大隻同密度高,可以製作成溏心乾鮑,唔怪得入口有少少溏心黏黏哋嘅質感啦。 平時將紅肉熟成就聽得多,但刺身都可以咁整你又知唔知?寒鰤魚壽司以乾式熟成嘅方法處理,令肉質軟滑又更甜,唔講仲以為係即切嘅新鮮刺身添。 同樣熟成過嘅藍旗大拖羅壽司起埋筋膜,入口爽滑亦唔會太肥膩,不過原來拖羅嘅肥美程度同養殖方法有關。「全養殖方式嘅魚食油脂高啲,因為缺乏運動吖嘛。但半養殖嘅始終喺海游過,肌肉會多啲,不過我哋熟成過又會令肉質軟返,口感又會唔同啲。」 滝壽司用嘅金目鯛都係經日本搵嘅靚貨,熟成過嘅金目鯛壽司火炙後魚皮會脆啲,灑上自家生曬再炒嘅烏魚子粒,香口又不失魚嘅鮮味。   滝壽司 地址:銅鑼灣開平道1號Cubus15樓 電話:2782 0010 營業時間:星期一至日:12:00-15:00,18:00-23:00

0

【師大燈籠滷味登港排長龍 30多款配料自由組合】燈籠滷味

等到頸都長,終於等到燈籠滷味香港店開始試業喇!落戶銅鑼灣登龍街嘅燈籠滷味係繼台北師大夜市本店之後嘅首間海外分店,將夠晒地道嘅台式滷味引入香港,有成30多款配料俾你自由配搭㗎。比起本店,香港店嘅款式更加多元化,除咗有加熱滷味之外,亦有唔同嘅台式小食、飲品同芋圓,即刻睇吓邊款最吸引你啦! 食過嘅都知,呢啲台式加熱滷味類似港式車仔麵,可以依照個人喜好自由揀唔同嘅滷味配料。但如果太多配料令你花多眼亂嘅話,香港店都好貼心咁set咗唔同嘅套餐,有師大人氣配料組合、滷汁滷味精選同有營素食選擇,有選擇困難症都唔使怕!呢度堂食免收加一服務費,不過每人最低消費HKD30。 一大碗滷味有唔同配料擺喺你面前,未食先滿足呀!呢碗「吃你滷味」套餐(HKD56)嘅配料大部分都係用滷汁滷過嘅,仲會配一個自選麵底添。 呢個套餐一共有5種配料,包括滷豬大腸、滷豬腱肉、滷豬耳、滷雞腎同高麗菜,全部都滷得好入味,而且各自有唔同咬口;加埋高麗菜同冬粉嗦晒啲滷汁,咁嘅配搭一流呀! 想有唔同嘅配搭,就要揀「自由是個好東西」(HKD10起)喇!你可以自選唔同配料(每款HKD9-12不等),再包一款自選麵。 大豆皮(HKD10)同米血糕(HKD10)都係台式滷味必食之選,一樣非常入味。除咗呢兩款之外,亦有唔少食材都由台灣直送,配合埋台灣本店以多種中藥材秘製嘅滷湯真係原汁原味呀! 食台式滷味,識食梗係要點王子麵(+HKD2)啦!佢嘅麵質同平時食開嘅公仔麵有啲唔同,不過為咗迎合大眾口味就特別將麵底煮得腍身啲。 除咗滷味之外,呢度有香脆地瓜條、台式香蒜腸等台式小食,嗌午市套餐加HKD12就可以加配其中半份喇。 而呢款綜合芋圓(HKD28/凍)暫時只有晚市供應。有齊芋圓、地瓜圓、紅豆、珍珠等配料;芋圓雖然夠軟腍,但略嫌冇乜芋頭味。 套餐亦可以加配各款飲品,呢度有四季春同桂花烏龍兩款自家製冷泡茶(加HKD13),而汽水(加HKD8)都有台味嘅蘋果西打同黑松沙士。   燈籠滷味 地址:銅鑼灣登龍街39號地舖 電話:2581 2223 試業時間:星期一至日:12:30-17:00、18:30-22:00

0

【Red Lobster新推午市套餐 $78起歎龍蝦醬大蝦意粉】Red Lobster

銅鑼灣嘅龍蝦專門店Red Lobster最近平日11:30推出抵食午市套餐,HKD78起就食到佢哋嘅海鮮名菜!套餐包埋餐湯同清新檸檬茶一杯(冷或熱飲),主菜一共7款,除咗龍蝦手工薄餅(HKD98)、松露芝士蘑菇手工薄餅(HKD98)、焗波士頓龍蝦尾配特製椰子薑飯(HKD158)之外,仲有由招牌菜演變嘅午餐添,快啲睇吓邊款啱食啦! 店內嘅裝飾遍佈關於龍蝦嘅內容,例如牆畫、捕齜蝦竹籠、漁船設計等,仲有大大個龍蝦缸添! 加勒比烤蝦(HKD108)係主餐牌其中一道菜,依家放埋喺午市套餐俾大家揀。惹味又唔會太過heavy,啱晒輕食嘅OL。 金黃香脆嘅夏威夷椰子蝦配芒果莎莎醬(HKD98)係呢度其中一道招牌菜,大蝦入面夾有椰子肉片,加上面頭嘅菠蘿粒再蘸上酸甜嘅椰子醬汁,味道香甜微辣好開胃㗎。 想多重滋味可以又有烤三文魚配大蝦(HKD168),啖啖肉又有油香,配埋爽口大蝦可以一次食到兩款海鮮啦。 而鍾意食意粉嘅朋友一定要試大蝦意粉配龍蝦醬(HKD78)!龍蝦醬汁令意粉非常滑溜,加埋爽口大蝦鮮味又唔會過鹹。 想清爽啲亦有蒜香檸檬炒蝦意粉(HKD88),蒜香嘅惹味配上酸酸哋嘅檸檬汁,加上香草、蕃茄仔同少少芝士碎,味道層次夠晒豐富。   Red Lobster 地址:銅鑼灣Fashion Walk加寧街8號地下 電話:2261 2996 營業時間:星期日至四:11:30-22:00,星期五、六:11:30-23:00

0

【新開共享空間設魚素餐飲 植物肉入饌推低碳料理】The Green Room

餐餐大魚大肉好重負擔?依家就介紹呢間最近喺銅鑼灣新開嘅The Green Room俾大家啦!由發展共享空間嘅WeWork同餐飲品牌Leading Nation合作,打造以健康素食同可持續發展餐飲做主題嘅多用途活動空間。等你享用舒適嘅共享空間,同時可以食到輕盈、冇負擔嘅魚素餐飲。 想食頭盤沙律,就有The Green Room Salad(HKD75)同Quinoa Salad(HKD75)兩款健康之選。前者主要用時令蔬菜入饌,再配合有迷迭香、百里香同意大利橄欖油等香料混合而成嘅油醋汁,夠晒清新!而後者呢款藜麥沙律就用咗秘魯100%有機白藜麥加埋芒果、車厘茄同紅洋蔥,面頭仲有嫩滑彈牙嘅本地虎蝦做點綴添。 呢味並唔係普通嘅肉醬意粉咁簡單,而係以「未來肉」整成嘅Impossible Bolognese(HKD115)。所謂「未來肉」即係主要以大豆製成嘅植物肉,代替傳統整肉醬嘅牛肉,但原來賣相同味道都同真肉好似,絕對呃得到人!但食落就比真肉無咁膩,亦冇咁大負擔。 Butter Lobster(HKD350)用咗原隻龍蝦燒烤而成,再以特製嘅沙沙醬汁淋喺面頭。醬汁混合咗鮮蕃茄粒、橄欖油同菠菜碎,突出返龍蝦嘅鮮味添。 嚟到呢度必食Spinach Ricotta Ravioli(HKD120),即叫即做嘅意大利雲吞以菠菜、乳清芝士、日本流心蛋做內餡,配埋檸檬牛油忌廉汁,一切開就有蛋黃流出,夠晒香滑兼IGable呀! 手製薄餅都係呢度嘅特色菜之一,呢兩款薄餅嘅餅皮都係用意大利麵糰經8個鐘發酵而成,口感煙韌有咬口。經典嘅Margherita(HKD95)面頭落咗意大利新鮮水牛芝士同自家種植嘅羅勒葉;而Norway(HKD120)就放咗挪威煙燻三文魚同半熟蛋做配料。 飯後甜品有Caramelized Apple Flambe(HKD55),喺忌廉下面嘅焦糖蘋果有濃郁香料味;做法類似蘋果金寶,但加咗冧酒再用火微微炙燒,將淡淡酒香滲入蘋果當中。 Pancake Stack(HKD75)就加咗野莓同有機蜜糖,班戟蛋味濃郁,簡簡單單嘅甜品都夠晒滿足。 除咗嘢食,呢杯由著名調酒師John Nugent親自調製嘅Berries & Spice(HKD65)有紅黃漸層效果,仲加入五香粉、小豆蔻等唔同香料,喺蔓越莓梳打主調下略帶薑味,飲落幾醒胃。   The Green Room 地址:銅鑼灣謝斐道535號Tower 535 26樓 電話:3689...

0

【OL恩物鬧市速食燉湯 炒滑蛋醬油飯+惹味小食】嘗粵

行街除咗shopping,梗係要掃街啦。喺銅鑼灣SOGO最近開嘅嘗粵唔止有小食,仲有燉湯同炒滑蛋醬油飯,可以單點或配成套餐,真係要飽又得,要過口癮亦得。 難得喺SOGO搵到間偏中式嘅料理店,睇嚟SOGO都想帶啲新感覺俾大家。 呢度有4款燉湯,其中一款係期間限定,依家就有當造嘅西洋菜陳腎湯(HKD62),清甜潤喉又足精。而OL必似嘅一定係杏汁白肺燉湯(HKD62),奶白湯色飲落夠晒潤。如果平時lunch亦可以喺度買套餐(HKD88),跟1 款燉湯同1款醬油飯㗎。 炒滑蛋醬油飯(HKD38-42/單點)有火炙叉燒、火炙美國肥牛同雞柳三款俾你揀。小編就試咗火炙叉燒,入口幾似配拉麵嗰種叉燒,而且火炙後迫咗啲油香出嚟,都唔錯喎。加上日本米醬油飯撈咗日式醬油同麻油,味道更加鹹香有咬口。 金沙脆魚皮(HKD38)係即叫即撈,有大量鹹蛋黃醬但唔會過鹹,而且擺得耐都依然脆口! 日式炸魚豆腐(HKD38/6件)有明顯嘅魚肉嘅鮮同豆腐嘅甜,炸完入面都幾juicy。 櫻花蝦咖喱魚蛋(HKD28/3粒)就用咗大粒又彈牙嘅長洲大魚蛋;咖喱汁唔算太辣,但落咗櫻花蝦就多份微脆同鹹香嘅層次。   嘗粵 地址:銅鑼灣崇光百貨地庫B2層35號店 電話:2831 8850 營業時間:星期日至四:10:00-22:00,星期五、六及公眾假期前夕:10:00-22:30

0

【本地牛角包店兼賣意粉+薄餅 酥脆曲奇禮盒買二送一】Crostini Bakery & Cafe

本地牛角包品牌唔少都有高質出品,好似Crostini Bakery & Cafe就每日製作三次牛角包以確保新鮮品質。不過佢嘅曲奇、蝴蝶酥同蛋糕你又試過未呢?而且部分分店仲有意粉、薄餅等熱食添。銅鑼灣旗艦店款式最齊全,今次就等小編試吓佢牛角包以外嘅食物,睇吓有咩正嘢先! 雖然以牛角包起家,但佢嘅曲奇同蝴蝶酥都幾出色,想試多啲口味就一定要揀禮盒裝喇!至尊曲奇禮盒(HKD238/45塊)有咖啡杏仁曲奇、紅莓棒子曲奇、南瓜籽熱情果茶曲奇、海鹽朱古力伯爵茶曲奇同牛油曲奇同玫瑰蝴蝶酥。有牛油香又唔會太乾身,而且每款口味都做得幾出,甜度亦控制得啱啱好,連續食幾塊都冇問題。 如果你係蝴蝶酥迷就更加要試至尊蝴蝶酥禮盒(HKD238/45塊),蝴蝶酥每層都搓得好薄,脆口又唔會太硬,而且有芝士、玫瑰、黑芝麻、玉桂、茉莉同原味6款咁多。今個月仲推出賀年優惠,1月6日起全線兩款禮盒可以自選口味買二送一! 想輕巧啲亦有單味細盒裝(HKD32/12塊),做小禮物或自私食又得。 小編發覺呢度嘅蛋糕外表比實際甜,唔嗜甜嘅朋友都可以一試。其中幸福橘子(HKD46)以雲呢拿慕斯包住清甜嘅柑橘果凍、柚子cream同海綿蛋糕,食完感覺又令人幾滿足喎。 想感覺貴氣啲?試吓呢個喺朱古力脆皮噴上食用金粉嘅金蕉流行(HKD52)啦!佢有一個甜甜嘅外表,但入面嘅香蕉蓉反而令層層疊嘅香蕉朱古力cream、朱古力蛋糕同朱古力脆皮珠帶陣清新香氣,又唔會太甜膩。 熱食方面薄餅套餐同埋配迷你沙律嘅意粉套餐都算抵食,另外會跟杯熱飲。呢個即焗嘅輕型三文魚薄餅(HKD89/8寸)落足料,煙韌嘅厚批上鋪滿鹹香又大塊嘅煙三文魚,配上三色芝士碎、車厘茄、黑水欖、火箭菜同蜜糖芥末醬,同平時食嘅pizza一樣有肉感但唔油膩,一個人當lunch食都幾飽。 估唔到香蒜大蝦炒意粉(HKD138)會有少少鑊氣,蒜蓉、紫洋蔥等材料炒過嘅香氣令意粉更惹味。蝦肉爽口彈牙,如果可以辣啲就更好喇。另外點咗杯凍抹茶咖啡(HKD46)試吓,宇治抹茶嘅甘味同咖啡幾融合,不過唔攪勻啲cream就飲會偏酸。 最後如果想食埋佢嘅麵包(HKD14-20),記得捕實每日18:00後有買二送一優惠呀!   Crostini Bakery & Cafe旗艦店 地址:銅鑼灣勿地臣街1號時代廣場7樓728-729號舖 電話:3105 9923 營業時間:星期一至日:11:30-20:30 供應意粉及薄餅分店:時代廣場店、杏花新城店、荷里活商場店、泓富廣場店、逸瓏坊商場店、新港城中心4期店 供應薄餅分店:時代廣場店、杏花新城店、荷里活商場店、K11店、泓富廣場店、九龍灣國際展貿中心店、上水中心店、連理街店、九龍貿易中心店、千色匯一期店、荃灣廣場店、青衣城店

0

【Mr. Steak生蠔和牛自助餐 聖誕升級加推傳統美食】Mr. Steak

食開Buffet都知,銅鑼灣嘅Mr. Steak Buffet à la minute有生蠔、多款海鮮、韓美日牛肉壽喜燒同鐵板燒,仲有即製心太軟,CP值夠晒高。嚟緊由12月16日起至12月31日,更特別推出一系列聖誕主題食物,聖誕烤火雞、蜂蜜煙燻烤火腿呢啲傳統應節食物就梗係唔少得啦,仲有大量聖誕甜品俾你歎呀 ! 自助餐必食嘅生蠔同海鮮喺12月當然會有啦,呢度通常會提供兩款即開生蠔,而海鮮山就有波士頓龍蝦、長腳蟹、紐西蘭青口、藍青口、翡翠螺、花蟹、鮮蝦等,選擇夠晒豐富。 自助餐另一焦點就係任食韓美靚牛壽喜燒喇,另外喺第二節嘅晚市自助餐同星期六、日午市自助餐仲有同和牛鐵板燒添,簡直係食肉獸嘅雙重享受呀! 除咗自助餐本身嘅招牌菜之外,仲會由12月16日開始加入聖誕元素。慶祝聖誕節梗係要有聖誕烤火雞食啦,除此之外,仲有古羅馬式烤乳豬、普羅旺斯烤羊架、美國安格斯帶骨燒牛肉同蜂蜜煙燻烤火腿4款切肉俾你揀,充滿聖誕氣氛又啱晒食肉獸啦。 去到甜品時間喇!餐廳為今年聖誕節設計咗一系列聖誕主題蛋糕、甜品,最具標誌性嘅就有朱古力樹頭蛋糕、用泡芙推砌嘅飄雪泡芙山,仲有萬眾期待嘅火焰雪山添。 當然唔少得招牌嘅即焗Warm Chocolate Cake,仲可以請師傅幫你寫上心意句子,自訂啱你心水嘅甜品。 聖誕自助餐由今個月16日開始,12月31日更會增設Super Buffet(22:30-01:00),俾大家食住自助餐倒數迎接新一年。有興趣嘅朋友仔可以留意返上面嘅12月自助餐價目表,mark定日子就即刻訂位啦!   Mr. Steak Buffet à la minute 地址:銅鑼灣告士打道280號世貿中心6樓 電話:2881 5757 營業時間:星期一至日:12:00-14:30、17:00-22:00

0

【美國Red Lobster銅鑼灣開業 香港限定避風塘炒龍蝦】Red Lobster

1968年喺美國開業嘅Red Lobster進軍香港喇!啱啱喺銅鑼灣開業,仲有三道香港限定菜式添;當然人氣嘅無敵海鮮大餐、美式蒸活龍蝦等招牌菜都可以喺度食到啦,即刻睇吓呢度嘅北美龍蝦有幾正啦! 店內嘅裝飾遍佈關於龍蝦嘅內容,例如牆畫、捕齜蝦竹籠、漁船設計等。二樓就設有VIP房,感覺都幾氣派㗎。 店內嘅龍蝦缸養住由直運來港嘅北美活龍蝦,客人點完龍蝦菜式可以拎起龍蝦影相添。 按傳統點菜後會免費送上車打芝士鬆餅,餐廳話15分鐘內品嚐係最好食嘅。熱辣辣又有車打芝士鹹香味,質感仲好鬆化,幾有空氣感㗎。 三款香港限定分別有前菜、主菜同點品,黃金炸大蝦(HKD48)就係其中一款。有西式嘅牛油香,亦有微微嘅鹹蛋香。 想試傳統菜式就有夏威爾椰子蝦(HKD38/3隻,HKD68/6隻,HKD128/12隻),大蝦入面夾有椰子肉片,加上面頭嘅菠蘿粒再蘸上酸甜嘅椰子醬汁,味道香甜微辣好開胃! 主菜之中,港式避風塘炒龍蝦(HKD358/1磅,HKD718/2磅,HKD1038/3磅)暫時都係香港獨有,將大量麵包脆脆加入避風塘菜式獨有嘅炸蒜之中,香口得嚟有中西合壁嘅感覺。呢碟用上1磅龍蝦,啱兩個人慢慢歎爽滑彈牙嘅龍蝦肉呀! 不過要數餐廳嘅鎮店菜式一定係無敵海鮮大餐(HKD318),呢道菜喺每間分店都係大賣㗎!一份有齊北美龍蝦尾、蒸煮雪蟹腳、招牌蒜蓉蝦、酥脆炸蝦,配雞尾酒特製醬汁同熱牛油醬,幾個人share食就啱晒喇,可以一次試勻唔同嘅鮮味。 大蝦三重滋味拼盤(HKD148)係小編嘅獨食推介,有脆炸蝦、即叫即整蒜蓉焗大蝦同龍蝦醬大蝦意粉,有齊開胃、惹味同傳統味道。而且意粉非常滑溜,食晒成份飽肚㗎。 想有啲肉落肚就要點海陸雙鮮(HKD298-368),當中有肉眼牛扒(7安士)、西冷牛扒(7安士)或牛柳(6安士)配龍蝦尾或串燒烤大蝦俾大家自選唔同組合。不過無論係烤龍蝦定係牛扒,火喉都啱啱好,滑溜有肉汁。 而香港限定嘅甜品就有珍珠奶茶為靈感嘅奶茶意式鮮奶凍(HKD38),甜而不膩可以一試。 想邪惡啲又有愛溢布朗尼(HKD78),大大球雪糕配上兩大件充滿果仁嘅布朗尼,夠晒兩個人食呀! 經典芝士蛋糕(HKD42)比想像中冇咁甜膩,配埋cream一齊食,口感更加滑添。   Red Lobster 地址:銅鑼灣Fashion Walk加寧街8號地下 電話:2261 2996 營業時間:星期日至四:11:30-22:00,星期五、六:11:30-23:00

0

【銅鑼灣新開四款口味抵食麻辣燙 $37三餸大碗麵辣度任加】平霸

各位麻辣控注意!平霸發現到銅鑼灣新開咗一間湯火功夫麻辣燙,任揀三個餸再加麵底嘅大大碗麻辣燙都係37蚊,仲有唔同湯底揀,聽落都幾抵食喎。以後唔使等齊人去食麻辣火鍋,獨食都有多一個好地方喇。 呢度環境幾開揚,座位都唔少,仲有一行吧枱俾獨食嘅客人。入到嚟會先派一張點餐紙,俾你自選想食嘅嘢,一碗一張。 呢度嘅麻辣燙湯底有四款,包括招牌麻辣燙、蕃茄湯底、泰式冬陰功湯底同冇湯嘅經典麻辣拌。任揀兩款素菜加一款推薦肉類再加埋麵底嘅麻辣燙全部劃一HKD37。如果想食得豐富啲,就可以照價再加唔同嘅餸。無論係餸定麵底都有幾多選擇喎,單係麵底都足足有八款咁多。 即刻嗌碗招牌麻辣燙配紅腸、金菇、油麥菜(HKD37)試吓先!店員上餐時,俾平霸第一個感覺係好大碗!麵量係好多嘅,大食啲都夠飽㗎。金菇同油麥菜分量正常,而紅腸就有四塊,不過喺晒湯入面,要食食吓先發現到。 佢哋嘅麻辣湯底係自家調製,嗌咗小辣嘅湯底唔係好紅,但就有好濃嘅麻辣香。 呢度嘅紅薯粉比較幼身,好快嗦晒啲麻辣湯。嗦晒湯汁嘅薯粉食落特別入味,不過腍咗啲。 唔想食湯麵嘅就可以嗌呢款經典麻辣拌(HKD37),今次就試吓滷水雞翼、海帶同薯仔片三種配菜。麵底就揀咗雲南米線,分量同樣好多。除咗自選嘅配菜之外,仲有花生、芝麻、蔥花同秘製醬料俾你自己撈嚟食。 滷水雞翼成隻都係焦糖啡色,滷得好入味;佢本身冇辣味,但沾到拌麵嘅辣醬又估唔到幾夾喎。 每張枱仲有麻椒油、辣椒油同醋俾你任加,咁樣你想要幾麻幾辣都得啦!如果覺得太辣,可以加啲醋中和吓。 不過呢度係冇套餐嘅,想飲杯酸梅汁(HKD16)解吓辣就要散嗌喇。呢杯酸梅汁嘅梅味濃郁但偏甜,有大大粒話梅喺面,解辣一流!   湯火功夫麻辣燙 地址:銅鑼灣謝斐道482號兆安廣場地下4-6號舖 電話:2148 6788 營業時間:星期一至日:11:00-23:00