Tagged: 長沙灣

0

【破格火車主題餐廳 Tasting Menu歎6款菜最吸睛】CHOO CHOO

長沙灣工業大廈、車廠雲集,好少人會選擇特登去嗰頭搵食。不過最近小編就見到順寧道嘅盡頭有間同周圍有少少格格不入嘅西式餐廳喎,就係呢間CHOO CHOO喇!裝修望落幾摩登吓,唔係好似工廠區格局喎。 一入到去就見到充滿歐陸風格嘅枱枱櫈櫈,枱上嘅餐牌好似一本旅遊手帳咁,打開又真係見到幾位老闆去旅行時候嘅相呀、車票呀等等,真係幾有真實感喎。一路揭住本餐牌,除咗睇到好多唔同款式嘅美食之外,仲感受到一陣出走嘅氣息。店名CHOO CHOO就係以舊式蒸氣火車行走時發出嘅「CHOO CHOO」聲而命名,餐廳格局佈置到好似火車車廂咁樣,好有feel。 牆上嘅顯示屏上見到嘅並唔係風景圖片,而係不停咁播「車窗外」嘅風景,開頭小編仲好奇究竟喺邊度搵咁多風景Source返嚟,點知原來全部都係老闆們親自去旅行嘅時候影㗎!幾位Partner結伴一齊去旅行其中一樣好重要嘅任務,就係搭長途火車Set Cam拍片。老闆話好想客人一路用餐嘅時候可以感受到嗰種好似去緊旅行嘅感覺,拍呢啲片聽落好簡單但其實真一啲都唔易㗎!老闆兼大廚之一阿Kei就話:「自己想做囉,做到自己想做嘅嘢就開心。可能中間有啲辛苦,但都係一個難得嘅經歷嚟。」 餐廳最近推出咗Tasting Menu(HKD388/每位),總共6道菜,包兩個頭盤、凍湯、兩個主菜同甜品。Menu係大廚阿Kei啱啱去完西班牙之後設計出嚟嘅,頭盤已經有風乾36個月嘅西班牙黑毛豬配溫室蜜瓜。Parma ham配蜜瓜是常識吧,呢個HAM鹹乾得嚟相當有咬口,配埋鮮甜多汁嘅蜜瓜簡直係Perfect Match!食之前點埋伴碟嘅蜜糖泡泡就更加夾喇! 另外士多啤梨凍湯亦相當特別,平時喺香港比較少機會接觸到凍湯。今次呢個凍湯除咗味道特別,賣相亦非常吸睛!一上碟就煙霧彌漫,仙境咁款喎!凍湯飲落杰杰哋,酸酸甜甜意外好味得嚟又開胃。湯嘅分量係兩人一小碗,唔怕分量太多飲唔晒啊。 不得不提係西班牙豬肋排(全橡級別)配香草甜薯,全橡級別意思即係隻西班牙豬由出世開始直到變成豬肋排之前都只係食橡果,咁樣會令到佢嘅肉質嫩滑、有陣獨特嘅榛子果香,由於長期食橡果為生嘅關係,呢種豬嘅脂肪會分佈成好似大理石紋咁。唔好以為肥豬肉就一定唔健康,全橡級別嘅黑毛豬脂肪主要係不飽和脂肪酸,所以營養價值同橄欖油差唔多,一啲都唔Heavy!豬肋排嘅底下舖滿甜蕃薯,有解膩效果。 除咗Tasting Menu包嘅主菜之外,阿Kei仲額外向小編推介一個Main Course,就係蒜香蝦意大利麵配風乾蕃茄龍蝦醬(HKD88)喇!一上枱就已經聞到陣陣嘅香味,蒜香蝦超入味,連蝦頭啲汁都要啜埋呀。意粉襯蕃茄龍蝦醬惹味得嚟,每一啖都食到一種異國風情。 當然唔少得食返個甜品啦,Winter Wish除咗樣靚之外味道都相當特別。小編以為面頭放咗塊類似蜂巢塊嘅物體就一定係有啲蜜糖味,點知原來蜂巢上橙色嘅點綴係熱情果醬,而雪人身體嘅組成則係乳酪雪糕;伴碟嘅白色雪狀粒粒就係急凍乾乳酪,配搭令人Surprise喎! 除咗Tasting menu包嘅Winter Wish之外,Gold Rush(HKD98)亦係Kei嘅獨家招牌甜品之一。望落好似係一嚿嚿硬繃繃嘅朱古力,但其實係慕絲蛋糕!食落有少少朱古力味,甜而不膩,分量小巧精緻,啱晒各位小鳥胃嘅女仔呀!左下角好似金箔朱古力嘅其實係啫喱,呢個甜品簡直衝擊小編視覺同味覺。Kei話呢個甜品係啟發自身為國際金融都市嘅「香港」,一眼望落去五光十色,非常之華麗璀璨,人人表面望落如鋼鐵甚至黃金咁無堅不摧,但其實內心都好柔軟,充滿令人驚喜嘅特點。真係好鬼有深度㗎啫,我Buy呀!你又Buy唔Buy呢?   CHOO CHOO 地址:長沙灣順寧道364-368號昌暉大廈地下1號舖 電話:3707 1034 營業時間:星期一至日:12:00-15:00;18:00-22:00

0

【最新人氣文青café 5大打卡位hea足一日】治癒羔羊

小編身邊啲朋友成日都話深圳啲café好靚,打卡影相就最啱,又話啲嘢食都好好味,總之隔一陣就忍唔住北上一轉!其實想搵間靚café啫,唔係得深圳先有好選擇嘅,香港都有㗎! 長沙灣嘅治癒羔羊開咗一個月左右,逢星期六、日都總係爆晒場!就係因為餐廳有成超過十個打卡位,食物款式又好夢幻,重點係任你hea足全日都唔會趕你走喎,咁正,仲唔快啲捉埋男朋友過嚟一齊治癒吓! 治癒羔羊嘅老闆係兩位九十後女生。兩位老闆娘本身任職傳媒,做開女性資訊,所以對女人市場好熟悉,兩人又想創業,於是齊齊轉行開餐廳!用咗短短2個月時間籌備,真係好叻豬㗎!點解會叫做治癒羔羊?佢哋話因為大家都好鍾意「治癒」呢兩個字,可以帶俾人一個好放鬆好舒服嘅感覺;而「羔羊」就有兩個含義,因為佢哋大家一個姓高一個姓楊;其二就係因為羔羊嘅感覺好慢活、懶洋洋咁,同治癒呢兩隻字好夾。 治癒羔羊除咗係Café,店內仲有唔少服飾售賣,亦會定期開設workshop,好多元化! 環境以白色同木系做主題,雖然餐廳地方唔算大,但都唔覺有壓迫感。 餐廳宗旨想帶俾客人「懶、治癮、放鬆同慢活」,每個Corner同背景都可以影到好多靚相,每處都係打卡位呀!無論情侶、朋友定家人都好啱去慢活吓㗎! 餐廳設每位最底消費30蚊!當日小編叫咗人氣最高嘅焗薯,有三款選擇,分別係碎蛋、煙肉同菠菜。小編試咗烤芝士碎蛋焗薯 (HKD78),配沙律菜,車厘茄同茄汁豆,分量幾多吓!用咗薯味較重嘅美國薯,薯仔皮較厚身。先將薯仔焗熟,挖出來之後再打碎加入雞蛋同芝士,之後再釀返落薯皮內焗(當中芝士仲落得好重手),確保大家食到嘅每一啖都充滿住芝士拉絲,口感好滿足!另外值得一讚係薯皮上面加咗少少鹽調味,成個味道提升晒呀!即叫即製,所以大概要等15分鐘左右,不過小編認為絕對值得等,因為實在太好味喇! 薯蓉好均勻好綿密,而且一啲都唔膩,食多幾個都得呀! 焗三文魚撻(HKD78)係店內新出產品,配沙律菜同車厘茄。 撻皮焗到非常酥脆,唔想食太飽叫呢個分量啱啱好喇! 餐廳主打女生路線,唔少得粉紅色系甜品啦,打卡影相一流!玫瑰花千層蛋糕(HKD52)加咗自己調製嘅玫瑰醬同花瓣,賣相已經好靚,而且餅皮同忌廉都偏厚身,食落特別冰涼幼滑,啖啖都散發住玫瑰清香,甜度適中,一啲都唔膩呀! 特濃朱古力布朗尼 (HKD52)配香草雪糕,賣相吸睛不特止,入口一啲都唔乾身仲好濕潤, 一冷一熱連埋雪糕一齊食超正呀! Healing soda(HKD47),聽個名就知有幾治癒啦,賣相好夢幻!望落去見到啲顏色咁pink pink真係好有治癮feel!加咗粉色系冰(冰塊混入草莓汁、檸檬汁同波子汽水),少女必飲呀! Ocean soda(HKD45)係波子汽水味嘅梳打,飲落酸酸甜甜,雪糕融化之後,甜度更突出呢! 打卡位一,餐廳有嘢食仲有嘢賣,好似有唔少設計得好有特式又靚款嘅耳環,少女們一定心心眼呀!   打卡位二,店內充滿住家居feel,隨手一拍又係一張超自然嘅靚相喇! 打卡位三,呢個藤椅基本上係重點打卡位,隨時變身做model啦! 打卡位四,白色背景配埋小食,又係靚靚嘅配搭! 打卡位五,木系傢具又有旁邊嘅植物襯托,fit晒啦! 治癒羔羊 地址:長沙灣福榮街344-348昌發工廠大廈D座9樓8室 電話:6547 9375 營業時間:星期一至日:12:00-19:00

0

【咖啡師一償心願開地舖 時令素cake鎮店之寶】素學堂

要搵到心水舖位開業真係唔易,好似Lucy COFFEE & FOOD就幾經轉折先開到地舖。老闆阿蛋同Sophie本身係咖啡師,最初只係租餐廳嘅咖啡吧沖咖啡,之後寄居喺朋友嘅手作市集。由於兩個人本身都好鍾意食食食,又覺得坊間有好多食物都唔知成分由來,所以佢哋就想自己推出低油、鹽、糖,比較優質嘅餐飲,於是喺荃灣工廈嘅樓上舖就開咗店!做咗四、五年之後,開地舖嘅心願冇變過,終於喺上個月大舖搬細舖兼落地喺長沙灣喇!舖頭細咗有冇唔開心?佢哋反而樂得自在喎,因為更容易控制食物質素,令客人食得滿足同開心先最重要咁話。食材方面一啲都唔馬虎㗎,酵母、麵包同醬汁全部都係自家調製,所有蛋糕都採用高級食材,好似日本蛋、高級橄欖油、法國牛油、有機椰棗同有機椰子油等等。咁用心整cake,小編要試多幾款先得喇! 除咗招牌甜點,蛋卷、蛋糕、撻之外,餐廳都有供應少量輕食,例如沙律、貝殼粉、自家製麵包、素食等等;飲品就有冰滴咖啡、手沖咖啡、拿鐵同茶飲等等,款式幾多元化。 純素芒果熱情果撻(HKD62/件)係小編最鍾意嘅,不過生果會按當造期而轉換。酥脆嘅撻底配自家製素杏仁餡,仲加入咗堅果喺入面幾好咬口;腰果忌廉好滑,甜而不膩 ,同芒果乾、新鮮熱情果同新鮮芒果粒好夾。 焦糖香料炒蘋果忌廉蛋糕(HKD68/件;HKD480/6吋)冇用蛋同奶,蛋糕依然鬆軟唔乾,口感亦唔油。兩層蛋糕中間搽咗自製素焦糖,再夾住用肉桂炒過嘅蘋果。外層就掃咗自製素忌廉,再放上自製蘋果乾,成件蛋糕甜度啱啱好,夠飽肚而唔會頂胃。如果想訂原個蛋糕,就留意Lucy COFFEE & FOOD嘅Facebook專頁啦,有訂購蛋糕流程㗎。 因為無花果季節就快完,原個蛋糕冇得訂,但件裝仲有機會食到,想試純素無花果黑莓撻(HKD68/件)就要快啲去喇!呢款都係用自製素杏仁餡,但就掃上意大利黑醋香料忌廉先鋪無花果乾,香甜中幾清新。 輕食之中又點少得沙律呢!貝殼粉沙律(HKD88)即叫即製,仲用咗大量Superfood,好似藜麥、牛油果、羽衣甘藍、青蘋果同車厘茄等等勁清新,都有飽肚感,好啱OL食。撈埋自家製亞麻籽沙律醬好濃厚,質感幾杰身,味道甜甜哋幾好喎。 想再飽啲仲有Lucy素漢堡配有機羽衣甘藍小沙律(HKD108)。漢堡包用全麥、苔麩同自培酵母製成,係好厚實嘅口感。素牛肉就用黑豆、糙米、藜麥、燕麥同菇菌煮成,同真牛扒嘅質感好似,但豆味香濃。配埋牛油果泥、新鮮蕃茄片、苜蓿同自家製亞麻籽素沙律醬同辣粉,惹味啲,唔食肉都吸收到蛋白質添。 Kale Smoothies(HKD68)用羽衣甘藍、牛油果、香蕉同椰子水整成。第一啖有微微清新草青味,然後香蕉同椰子嘅香甜味會慢慢滲出嚟。口感比奶昔杰身同飽肚,如果運動前後飲杯頂吓肚都得啫。   Lucy COFFEE & FOOD 地址:長沙灣保安道55號美寧中心地下C1舖 電話:5508 8318 營業時間:星期二至日:11:00-18:00(逢星期一休息)

0

【努力不懈堅持正宗 藍帶大廚呈獻法國佳餚】 Oui Oui Bistro

付出努力堅持夢想未必會成功,但努力不懈一定係成功必要元素,只要一日唔放棄,每堅持多一分鐘就會多一個成功機會。開業2年嘅Oui Oui Bistro位於長沙灣 ,由法國藍帶大廚主理,一直堅持製作正宗法國菜,保留法國菜精緻同用心,以大眾化價錢呈獻精緻法國菜餚比大家。 原來法文Oui Oui意思解作「係,係」,呢一句係大廚喺法國學廚嘅1年半入面應主廚成日講嘅,店主刻意用佢嚟做餐廳名,有深厚嘅意思。餐廳以黑色皮梳化配木檯,牆上掛有店主搜羅返嚟嘅碟做裝飾,裝潢簡單而不失型格。 Signature Egg Benedict(HKD128) 呢度嘅Egg Benedict係佛羅倫斯做法製成,真係夠晒特別!自家製嘅蛋黃醬入面有菠菜同蛋,味道好清新。平時食開多數都會配鬆餅,但係呢個製法係配多士,入口感覺柔軟,滲出陣陣蛋香。 賣相好精美呀!Seasonal Lobster(HKD時價),擺住大大隻波士頓龍蝦。意大利飯仲用咗龍蝦頭製成湯汁再煮飯,粒粒米飯都吸收晒濃郁龍蝦汁!想食呢個龍蝦,仲可以揀配意大利飯或者扁意粉添! Truffle Cabonara(HKD148)係呢度嘅招牌Cabonara,意大利煙肉味道好香濃,醬汁混和咗忌廉、芝士同檸檬。食果陣再將蛋刺穿,入口非常滑溜,感覺香馥豐厚。 Paris Brest(HKD88)感覺有少少似泡芙,甜品表層先焗過。裡面夾住柚子Custard,上面再加自家製雲呢拿雪糕,配埋新鮮藍莓同紅莓,不單止樣夠靚,輕輕嘅甜味,散發住浪漫氣息,真係殺死人啦! Oui Oui Bistro 電話:2411 1668 地址:長沙灣福榮街512-518號依時大廈地下A舖 營業時間:星期二:18:00-22:00;星期三至五:12:00-15:00; 18:00-22:00;星期六、日及公眾假期:12:30-16:00;18:30-22:00 逢星期一休息(公眾假期除外)

0

【6吋厚!正到爆!大胃王最愛8層餡料漢堡】Fast Taste

食Burger最緊要梗係要皮脆餡多又爆汁,聽聞長沙灣有間Burger款款都勁大個,最勁果隻仲有成8層餡料,超大個超足料!為食小編梗係要即刻介紹比大家啦! 店內裝修以黑、橙同磚牆大混搭,帶點型格,啱晒食快餐。 嗱嗱嗱,嚟到千祈唔好亂咁嗌野食!因為個個Burger都超級大個!小編見佢menu咁多野都好似好好食咁,就叫咗個最多餡嘅公司漢堡(HKD99)試下,嚟到見到佢超巨形都有少少驚!牛肉超級Juicy,加埋煙肉、黑松露炒蛋、煙肉、火箭菜、蕃茄同雙重芝士,一咬落去即刻爆晒汁!跟漢堡再配埋薯格,真係大滿足呀! 士多啤梨汁燒豬仔骨(HKD75/半份)酸酸甜甜,味道啱啱好,豬仔骨食落唔會乾同痴牙,值得一試! 炸魚薯條(HKD60)炸魚內裡仍然保持嫩滑,外層脆卜卜,薯條入面嘅薯仔肉豐富,大大份同朋友慢慢食,呢個價錢都幾抵! Fast Taste 電話:9123 3262 地址:長沙灣元州街482-492號金碧閣地下4號舖 營業時間:星期一至日:12:00-22:00

0

【今晚啤一啤 長沙灣最好hea掟鏢聖地】Overtime

放工之後帶住輕鬆心情去同朋友飲返杯傾下計就最梳乎!Overtime位於長沙灣,係呢一帶比較少有嘅清吧,嚟到除咗有大電視之外,仲有6部鏢機任你掟、任你飛!想靜靜傾計又得,想點玩都得! 酒吧裝修以木同磚為主,希望有別於一般大家對酒吧「黑媽媽」嘅印象,營造出英倫風。 酒吧除咗要夠大地方傾下計之外,最緊要有埋大電視,嚟到可以睇下波、會下班花生友! 成日都有人講呢邊無乜野玩,唔講唔知呢度有6部鏢機,係附近地區之中最多鏢機玩嘅酒吧之一,都幾多人嚟呢度練鏢㗎! 店主推介Guinness Draught(HKD69/杯)(Happy Hour)苦得嚟帶甘,而且無咁多氣,唔想飲到成肚氣可以試下。 招牌炸魷魚鬚(HKD58)炸得好酥脆,唔會一舊舊粉團,用嚟佐酒一流。成班人你一句我一句,食下食下好快就無晒。 肚餓嚟到都唔怕無好野食!日式燒一口牛(HKD68)醬汁食落甜甜地好得女仔鍾意,加埋芝麻同蔥,口感更多層次,不過最緊要都係味道啱晒送酒,嚟到有得飲有得食有得玩! Overtime 電話:2866 2722 地址:長沙灣順寧道47號嘉寧閣地下B舖 營業時間:星期一至日:17:00-03:00

0

【真正炭燒和牛!長沙灣品味高質居酒屋】M9日式牛排燒肉店

香港人一方面好想幫襯小店,一方面又好怕小店品質無保證,其實有好多小店都係秘寶,只係大家習慣於行清一色嘅商場舖頭,未有緣品嚐到小店嘅好。位於長沙灣嘅M9日式牛排燒肉店,一行入去就從裝修佈置感受到濃濃日式小店情懷,再加上店員服務態度親切,令小編印象深刻。更加估唔到嘅係,仲可以食到真正嘅炭燒和牛非常有風味,估唔到喺呢一區都會有品質咁高嘅居酒屋,一齊跟住小編去睇睇。 雖然舖頭仔細細,但大大話話都收埋差唔多30款唔同嘅清酒,大家嚟到可以慢慢揀自己鍾意嘅口味,話唔定仲可以試到新口味你鍾意添。 海鮮壽喜鍋(HKD238) 五款海鮮包括:大虎蝦 、大蜆、烏賊、仙貝同廣島蠔。以新鮮蔬菜同北海道葛絲做底,湯底調配到甜甜地,更突顯每樣食材嘅鮮味,沾上湯底之後更加鮮甜。既食到湯底甜味,海鮮又夠晒新鮮爽甜,讚! 特級刺身拼盤(HKD288) 拼盤入面有紅蝦、吞拿魚、深海池魚王、三文魚、海膽同赤貝,逢星期四、五、六都由日本直運,鍾意食刺身一定要試下真正日本刺身厚切嘅滋味!除咗拼盤呢啲既定嘅刺身種類之外,佢地仲會入一啲好刁鑽嘅刺身,好似八角魚、秋刀、沙甸等等刺身,數量有限,鍾意獵奇嘅你一定要去試下啦! 特選和牛西冷(HKD388) 唔好以為小店品質未必有保證,呢碟和牛一出場就超級香噴噴,食落嫩滑,牛肉味道香濃!原來佢地嘅牛肉都係正宗日本和牛,再加埋用真正炭燒方法燒肉,唔怪得燒牛肉香氣咁香濃。而且無乜用調味料醃製加工,只配以海鹽,比大家飽嚐和牛原汁原味同炭燒風味。 雜錦天婦羅(HKD138)一份天婦羅入面有蝦、茄子、秋葵、冬菇同南瓜,炸漿估佢唔到咁酥脆又唔會厚粉,材料都算新鮮足料。食落啖啖都係食材爽脆嘅感覺,而唔係腍滋滋粉團,值得一試。 M9日式牛排燒肉店 電話:5115 9000 地址:長沙灣順寧道26號地下4號舖 營業時間:星期一至日:12:00-14:30;18:00-23:00 星期三:休息

0

【食物多款又有酒飲!長沙灣日式放題極速回本】東京一番

想食放題唔洗下下都去旺角銅鑼灣鬧市,長沙灣都有一定水準放題存在。呢間位於長沙灣永基商業大廈嘅東京一番,食物種類選擇多,最緊要夠新鮮,且價錢相當吸引,行親民街坊路線。無論平日或者假日都係一個 gathering 好地方。 餐廳係樓上食堂,由一樓行上嚟一眼見曬,環境十分寬敞,座位頗多,另設有包廂可以十幾個人一齊食放題,都幾開心。 食放題點少得壽司,雖説係食放題,但件件壽司都唔求其,魚生同飯比例正常。三文魚、油甘魚、黑松露鯛魚、鰻魚、花之戀都有得揀,呢度花之戀深得小編喜愛,三片厚切三文魚包住小飯糰,面層滿滿蟹籽,入口飽滿又有口感。 刺身有十幾款選擇:三文魚、油甘魚、甜蝦、赤貝、鮑魚片點多幾轉都食唔厭,時令油甘魚味道清甜,仲有甘香油脂味,鮑魚片口感爽口唔韌。 除咗刺身、壽司之外,天婦羅亦係食放題必點類別:虎蝦、茄子、鮮冬菇、秋葵都有。粉漿唔會太厚,剛炸起入口香脆鬆化,虎蝦更加係大大隻! 食完生冷野可以食返啲熟食,鐵板燒即叫即炒就最合適啦,大家可以試試一口牛,肉質鮮嫩富口感,油脂分佈平均,牛味濃郁。食到咁上下可以飲返杯清酒、梅酒,呢度嘅清酒、梅酒係任飲嫁,真係好少有。 如果你都仲係覺得唔夠喉,可以加HKD68就可以任食磯煮鮑魚同生蠔,當然仲有得飲白酒。 依家仲有優惠活動,只要19:30前離座或者21:30後入座並Like Facebook Page & Share,第二位就有得半價!另外,正價時段兩男一女組合去食放題,仲可以一人免費。 午市只供應定食 晚市放題 星期一至四 19:30前離座  成人(HKD188)/ 長者(HKD158) / 小童(HKD88),正價時段  成人(HKD198),21:30後入座  成人(HKD188) 星期五至日19:30前離座  成人(HKD198)/ 長者(HKD158) / 小童(HKD88),正價時段  成人(HKD218),21:30後入座  成人(HKD198) 東京一番 地址:長沙灣青山道156-162號永基商業大廈1樓 電話:2811 8248 營業時間:星期一至日:12:00-15:00 /  17:30-23:00

0

【排隊排到喊 長沙灣人氣居酒屋】味道樂居酒屋

日本最出名嘅食店除咗壽司店,一定係居酒屋。平日放咗工之後,三五知己約埋去居酒屋放鬆心情,舒緩一日嘅辛勞。味道樂居酒屋店主特意將日本居酒屋文化帶嚟香港,希望香港人都能夠有一個減壓同埋放鬆心情嘅地方。 餐廳木製特色牆擺滿日本唔同類型嘅酒同埋日本海報,整間店舖充滿和風感覺。 由餐廳嘅小細節,好似枱面嘅小擺設,都突顯到店主嘅心思,對一事一物都一絲不苟。 一夜干燒的鯛(HKD178) 整得好食絕對唔容易!日本做法以鹽醃魚,魚肉偏鹹口感實淨,配搭清酒或啤酒一流。一夜干經過處理之後,透過一晚軟燥,將肉身多餘水分去除,魚嘅油份濃縮,加倍呈現出魚嘅獨特風味。一食落去,魚嘅油份好重,味道偏鹹,加上燒烤香味,非常適合配搭清酒,風味獨特令人一試難忘。 蟹膏醬燒北海道帶子(HKD138) 選用4隻珍寶北海道帶子,微微煎至金黃色。金黃色嘅帶子放上蟹膏同大蔥,三種食材混合埋異常合拍,底下以雜菌做底,吸收曬上面食材嘅精華。 特盛九品料理(HKD388)賣相精緻,絕對係呃LIKE之選,但唔好以為只係呃LIKE就唔好食。九品料理一共有三款魚生飯同六款小吃,分別用唔同盛器裝住,全部各有特色。三款魚生飯入面個樣最靚、最好味嘅「三文魚子甜蝦蓉飯」,三文魚子非常鮮味!「炭燒鰻魚飯」原始炭燒味道都唔錯,而「火灸左口魚裙邊飯」不得不提,左口魚經過火灸油香滿佈。六款小食有「牛蒡」、「青瓜芥末八爪魚」、「炸軟殼蟹」同「熒光魷魚漬」,各有特色。而「炸三文魚鱗」炸到乾身,感覺唔膩,六樣小食中最推介「脆炸魚片」,薄而微脆少鹹。餐廳會不定期改變九品料理嘅菜式,不時就會帶比你驚喜! 黑蒜黑豚肉卷(HKD48) 豚肉燒得香脆,而且上面佈滿黑蒜,味道更為濃郁。 煙肉荔枝卷(HKD48) 煙肉本身咸香味重,但加上荔枝,甜味中和咗整體味道,令層次更為昇華。 嗌咗咁多小食、串燒同佐物,最好就配埋店內麒麟生啤(HKD52),真係人生一大樂事。 味道樂居酒屋 地址:長沙灣元州街498號青華閣地下C舖 電話:2989 1128 / 6121 5113 營業時間:星期一至六:12:00-15:00; 18:00-23:00 星期日:18:00-23:00

0

【每隻至少1.5磅!加拿大直送龍蝦盛宴】Mama Burger & Lobster

鍾意食龍蝦嘅朋友要留意啦!小編最近發現到一間餐廳,專門做龍蝦料理,唔止大賣全隻新鮮龍蝦,仲大賣龍蝦包!大大隻龍蝦,隻隻都鮮甜實肉,加上餐廳做得咁專門,梗係要試試啦! 餐廳裝潢型格,室內佈置用上紅、白、藍,三種顏色,令人不其然諗起法國。牆上嘅畫作加上搞鬼塗鴉,令人心情加倍放鬆。 想食出龍蝦嘅鮮味,不妨試試全隻新鮮龍蝦(HKD288)。食落龍蝦非常鮮甜,完全無冰鮮味。原來龍蝦每日由加拿大新鮮空運到港,而且每隻龍蝦仲至少1.5磅重添,真係真材實料㗎!小編身邊好多朋友仔都怕食龍蝦會食到周身污糟,唔駛怕!餐廳會提供圍裙,大家可以慢慢嘆龍蝦。 全隻新鮮龍蝦卷(HK288)大大隻嘅鉗,簡直係XXXXL特盛級別!龍蝦肉好豐富!由加拿大新鮮空運到港嘅龍蝦,輕輕煮熟之後混合多種醬汁調味,夾入已經烤香嘅麵包之中,非常惹味。麵包輕輕烘過外脆內軟,龍蝦肉感豐富,吃下去啖啖肉,口感極之滿足! Mama Burger & Lobster 地址:長沙灣昌華街49號昌暉大廈地下6號舖 電話:3956 5440 營業時間:星期一至六:12:00-00:00 星期日:12:00-23:00