Tagged: 雞翼尖

0

【藍田新開平價外賣店 $12激抵雙拼冬蔭功湯麵】平霸

平霸嘅中學年代,好鍾意去藍田匯景廣場掃街,貪佢多食店,價錢又平,係學生哥嘅天堂! 最近平霸重遊舊地,平價小店一樣咁多,行行吓發現161麵大阪站,密麻麻嘅餐牌掛晒出嚟,行過都忍唔住望多兩眼,有齊小食、飲品,麵食甚至零食,包羅萬有,不過就冇得堂食,只有外賣,唔係住附近嘅朋友仔可能要邊行邊食喇! 餐牌上面有個冬蔭功湯麵(HKD6),撈麵賣6蚊唔出奇,冬蔭功湯麵都係呢個價,搞到平霸心思思想食啦!話就話係「下午茶滋味」,不過店員話其實冇特定分下午茶時段,只要有食客order,咩時段都係6蚊,嘩,堅抵呀! 麵就同普通公仔麵冇乜分別,口感算彈牙,不過小編低估咗佢嘅辣度,冬蔭功味酸得嚟辣度一啲都唔嘢少,食完第一啖麵之後,差啲辣到噴火咁滯!雖然愈食愈辣,但都忍唔住會食唔停口喎,即係辣得有魔力啦!呢6蚊抵俾呀! 唔想淨係食麵咁寡,仲有冬蔭功扎肉/雞絲湯麵(HKD12),本身諗住各嗌一碗,點知店員話可以一碗有齊兩款餸,變咗雙拼都係收12蚊價錢咋喎,又覺得抵咗喇! 眼見餸料都幾多,不過雞絲就變咗雞肉,雖然幾大嚿,但就有少少嚡身; 而扎肉就有兩大塊,味道ok,食落幾爽口,12蚊有兩餸一麵,仲想點先? 除咗麵食,仲見到有個花雕蒜香雞翼尖(HKD20/15隻),雖然就咁睇個賣相好似麻麻,但成兜裝滿晒雞翼尖真係好滿足囉,成15隻鋪到滿,每隻雞翼尖又沾滿蒜蓉,食落仲帶有淡淡花雕酒香,雞翼尖好嫩滑,不過略嫌辣味有少少蓋過咗蒜香味,如果蒜蓉味再濃啲仲正! 平霸小評:呢間161麵大阪站,價錢平得嚟味道又唔差,簡簡單單兩餸一麵都只係12蚊就醫飽個肚!嚟緊開學,學生哥快啲mark定呢間小店,放學食返碗冬蔭功湯麵啦! 161麵大阪站 地址:藍田匯景廣場5樓89A號舖 營業時間:星期二至日:11:00-20:30(星期一休息) 《平霸》平食四方,歡迎各界報料。

0

【10蚊15隻雞翼尖 大嚿炸雞套餐食肥你】平霸

話說小編上次同朋友行行吓街,咁啱見到有間小食店啲雞翼尖10蚊有成15隻,心諗咩料!平到咁都有㗎咩?即係一隻先6毫子咋喎,傻的嗎?再睇真啲,原來呢間小食店其他嘢都一樣抵食喎!有好嘢,平霸小編梗係要益吓大家啦! 今次呢間鴻興寶小食店喺調景嶺嘅街市入面,有少少尋寶feel不過都算易搵嘅!小編嗰日下午時段去,好多嘢食都已經賣晒,我估應該係中午學生放飯,所以好多都沽清,犀利犀利。 雞翼尖(HKD10),唔到收錢嗰刻,小編都唔信真係10蚊有15件雞翼尖呀!炸好之後會再落鹽做返少少調味,開頭食會覺得有啲啲鹹,但食落又覺得ok喎!有成15隻咁多,慢慢食都唔過份。 韓式炸雞套餐(HKD30),可自選粉麵,再加大約五、六嚿炸雞,仲要包埋飲品。小編叫咗炒烏冬,可惜就麻麻哋喇,食落口覺得自己似食緊油多啲,食完覺得好口乾,真係太油啦!不過佢嘅炸雞又幾好食喎,同埋都算大嚿,即叫即炸,啲皮炸到金黃色,食落口一啲都唔嚡,加埋醬汁好食喎!衰在都係油太多啦,食多兩嚿就出事,不過如果炸雞癮起,食呢個係絕對可以㗎! 平霸小評:今次食物質素雖然唔算高質,不過又真係好平嘅,如果少番啲油膩感就更好喇!買嗰時都有幾多學生哥幫襯,有時放學口痕買返包雞翼尖,10蚊搞掂啦! 鴻興寶小食店 地址:將軍澳彩明街1號彩明商場一期1樓彩明街市CM59號舖