Tagged: 雞蛋仔

0

【台灣超人氣店回流香港 首推全港獨家心形雞蛋仔】THE WAFFLE CLUB

之前台灣有間超人氣嘅雞蛋仔店,吸引咗好多台妹專程去打卡,就係貪個雞蛋仔上面枝仙女棒夠晒浮誇又吸睛!呢間THE WAFFLE CLUB嘅老闆仲係港人,過江開店成功吸客,依家竟然回流返香港,最近將THE WAFFLE CLUB進駐元朗。老闆Isis話其實之前已經有唔少香港人去台灣店幫襯,個個都問佢幾時會喺香港開返間,終於依家時機成熟喇,Isis眼見台灣店開咗1年已經發展穩定,所以係時候回流再打仗囉! 最初選擇喺台灣開店,Isis話係想將香港嘅地道小食打入台灣市場,加上自己係個雞蛋仔迷,順理成章就開咗專賣雞蛋仔嘅小店。依家台灣店暫時交由台灣店員打理,Isis同拍檔就回流港店坐鎮,而香港店仲保持咗台灣總店嘅粉紅色主題,一樣咁fancy! 黑珠誘惑(HKD38),Isis話除咗上面嘅黑糖珍珠係自己煮之外,連雪糕都係自己調製,犀利呀!牛奶選用日本霧島牛奶,佢嘅糖度同脂肪度用嚟做雪糕係最啱數嘅,奶味香得嚟仲一啲都唔甜膩呀!雪糕有牛奶同奶茶味選擇,貪心啲要兩溝都得㗎。配埋宇治抹茶味雞蛋仔真係一絕呀! 棉花糖焦糖奶茶(HKD25),同樣係新出品。呢個造型吸睛嘅綿花糖,真係唔止雞蛋仔要浮誇,連飲品都要夠誇先得呀!不過影還影,啲棉花糖好快溶呀,影完幾張相好收手快啲飲咗佢喇!Isis話台灣人口味同香港人好唔同,港人唔鍾意太甜味,所以港店無論雞蛋仔定飲品都會降底甜度,照顧周到呀! 愛心雞蛋仔(HKD18)係全港獨有嘅心形雞蛋仔呀,製作過程非常複雜。開蛋漿、時間同溫度等都要控制得好好,唔係就做唔到外酥內軟嘅感覺。小編食完一嚿之後都忍唔住大叫好好食呀!外皮做到非常薄脆,咬到入面就軟熟又濕潤,好似雞蛋糕咁,口感100分!平時食開嘅雞蛋仔,有時得個脆字而入面係空心嘅,呢個就真係足料冇呃秤喇! 爆醬格仔餅(HKD25),將平時夾係格仔餅中間嘅醬做成餡料,好似雞蛋仔咁將啲餡料放係格仔餅入面,咬落去真係有爆漿效果,仲唔會漏到成手都係喎! THE WAFFLE CLUB 地址:元朗西菁街2號興旺樓地下1C號舖 電話:2617 9222/2617 9555 營業時間:星期一至四及星期日:12:00-21:30;星期五至六:12:00-22:00

0

【25蚊食到飽一飽 5蚊13粒魚蛋邊度搵?】平霸

放完個聖誕假,係咪食咗唔少好嘢?呢次平霸帶大家去一間小編由細食到大嘅舖頭,咁多年都冇乜加到價,真係平到講你都唔信呀!一講起將軍澳慧安園,街坊諗到嘅可能會係良記餃子,不過其實呢間楚塋小食都好好喎!有啲咩食?等小編教路啦! 楚塋小食價格全部都好平,專做學生哥生意,次次一到放學時段都排晒長龍,好受學生哥歡迎㗎!今次平霸用咗25蚊已經食到太飽喇!   5蚊      咖喱魚蛋(HKD5/13粒)你冇眼花,賣5蚊嘅魚蛋已經好少見,仲要有成13粒,好癲呀!雖然一定冇長洲大魚蛋咁好食,不過味道正正常常又彈牙,5蚊嚟講直頭超值喇! 4蚊 印尼撈麵(HKD4)留意返,佢嘅細撈都係賣4蚊咋,咁平應該得佢一間,另外大撈7蚊兩個,加大撈10蚊三個,又係平到黐線,一啲都唔誇張!有時糧尾10蚊就食到飽,窮人恩物仲唔係佢? 8蚊 朱古力味雞蛋仔(HKD8)最多人食呢個味,8蚊有雞蛋仔仲要唔係原味,小編好知足喇!啱啱整起入面熱辣辣,外脆內軟,同出面賣18蚊嗰啲有得揮㗎。好食好食! 8蚊 珍珠奶茶(HKD8)呢個雖然好平,不過味道就唔得喇,奶茶冇茶味,偏奶多,而且飲落有陣花香味,好奇怪,都幾難飲吓 ;而且啲珍珠勁軟淋淋,一啲都唔Q彈,呢個失水準喇! 平霸小評:今次帶大家食到小編細細個食開嘅舖頭,希望你哋都會鍾意呢啲平民小店啦!呢間價格係好平,但平得嚟又好食,絕對可以一試! 楚塋小食 地址:將軍澳毓雅里9號慧安商場地下A35號舖 《平霸》星期四食咩平嘢?歡迎各界報料。

0

【100蚊包場連嘢食 新推趣爆雞蛋仔】Cafe Golden

石硤尾賽馬會創意藝術中心匯集咗好多有心嘅藝術家,咁餐廳都自然要俾個heart出嚟啦。Cafe Golden就設計咗唔少特別食品,最抵係HKD100就可以包場,喺度慶祝生日或求婚都唔錯㗎。 餐廳環境開揚,裡面仲有個懷舊區俾大家參觀。 首先介紹新推嘅抹茶味招牌雞蛋仔(HKD68),熱辣辣嘅雞蛋仔外脆內軟,配滑滑嘅cream、士多啤梨同抹茶雪糕都幾大份。唔同嘅質感加埋一齊,真係味蕾反轉再反轉。 好多食客都推介龍蝦汁蟹肉帶子意大利麵(HKD108),滿滿嘅龍蝦汁包住啲意粉好夠味,煎過嘅蟹肉同帶子都香噴噴。呢個Dinner Set配埋帕瑪火腿黑醋沙律,飲品可以揀果汁、手搖冰茶或紅茶,選擇都幾多。 輕食推介雞翼拼盤(HKD68),呢三款雞翼最特別係釀糯米飯,口感煙韌又啖啖肉。 趣致嘅富士山(HKD48)外形小巧幾得意,呢個蝶豆花同豆乳嘅組合好清甜。 時節飲品就有洛神花玫瑰茶(HKD44),可以開胃消滯。   Cafe Golden 地址:石硤尾白田街30號賽馬會創意藝術中心1樓05室 電話:2408 8255 營業時間:星期一至日:11:00-22:00

0

【點醬食係咩玩法?估佢唔到嘅搞鬼雞蛋仔】滿屋雞蛋仔

經典街頭小食雞蛋仔,近年除咗進化到有唔同味道之外,仲有埋餡!將軍澳呢間來自香港品牌滿屋世界滿屋世界 (Fullhouse World) 嘅滿屋雞蛋仔 (Fullhouse Egglet)就大賣輕食同得意商品,仲將主打嘅雞蛋仔進化再進化,有埋醬比你蘸!佢仲好有心思,粒粒雞蛋仔都有埋得意人仔樣,2男2女一共4款,係一家人嚟㗎!喺馬來西亞店仲創出咗日賣 500 底嘅紀錄添呀! 舖頭仔裡裡外外都係得意公仔,成個家族有爸爸 Thomas、媽媽 Tracy、囡囡 Tiffani 同埋囝囝 Tony,係咪好得意呢? 雞蛋仔都係用佢地一家四口個樣嚟整㗎,連爐具個模都係佢地嘅得意人樣嚟! 登登登登,雞蛋仔出爐就會見到佢地啲人頭仔啦!呢度一共有5款口味雞蛋仔,包括有:原味(HKD16)、綠茶味(HKD18)、花生味(HKD18)、朱古力味(HKD20)同蜜糖薑味(HKD20)。個餡可以揀紫菜、肉鬆、Oreo、彩虹糖同朱古力粒5款入面其中1款,每款都係加(HKD3)就可以試啦!佢地每個月仲會推出限定口味,好似章魚燒雞蛋仔咁,想食一定要留意啦。 搞鬼嘅除咗雞蛋仔嘅外形之外,你仲可以揀埋個醬蘸嚟食!芒果、士多啤梨、朱古力、拖肥同蜜糖芥末醬免費揀1款。夠晒多配搭又新奇!穩穩陣陣可以叫個朱古力味雞蛋仔再加朱古力醬,雙重朱古力味啱晒所有朱古力迷! 除咗雞蛋仔,佢地仲有其他野賣!好似呢個蛋香味好濃郁嘅蛋撻(HKD8),外形一樣都咁得意,大人小朋友睇到一樣都咁開心啦。 滿屋雞蛋仔 電話:2715 0292 地址:將軍澳貿業路8號新都城中心一期2樓254-255號舖 營業時間:星期一至日:11:00-22:00