Tagged: 雪糕

0

【本地星級大廚八道盛宴 鮑魚和牛炮製限定餐牌 】Test Kitchen×Butler

間唔中想食餐好?依家機會嚟喇!Test Kitchen同Butler聯手推出一連三日嘅八道菜晚宴以「追憶・尋回最初的味道」為主題,兩位大廚親自炮製八道精緻好味又有故事性嘅菜式,啱晒識食嘅你啦。一次過食到用多款矜貴食材,究竟將鮑魚、鵝肝、M7和牛等整成咩菜式?小編喺度率先同大家介紹其中幾道菜先! 炮製今次盛宴嘅兩位本地星級大廚原來都大有來頭㗎,Test Kitchen主廚Devon Hou(圖左)入廚15年,已經喺唔同嘅米芝蓮星級餐廳任廚,尤其擅長於西班牙菜。而Butler大廚Ray Choi(圖右)同樣有十多年入廚經驗,曾到訪日本大阪嘅La Cime學藝,所整嘅料理充滿個人風格。 平時食香煎鵝肝通常都會好油膩,但呢道鰹魚配鵝肝就唔同喇,除咗將鵝肝煎香,更加入鰹魚、意大利五花肉湯;配合酸瓜同日本生薑,減退油膩感仲增加味道層次添。 杏鮑菇雞肉配鮑魚呢道菜式集三種和而不同嘅口感,加上魚肝醬,令成道菜嘅鮮味更加提升呀! 清淡嘅娃娃菜都可以做主角?呢款紅椒堅果醬配娃娃菜喺娃娃菜加上鹹檸醋同杏仁碎,配合自家製西班牙紅椒堅果醬,兩者味道相輔相成又醒胃。 以「雙蝦」炮製嘅意大利餃子自然鮮味十足啦!餃子加入紅蝦之外,再以日本櫻花蝦、羅勒油提味。 Fine dining又點少得精緻嘅甜品呢?其中一款就係茶味蕨餅配麵包雪糕,加入脆皮酥嘅麵包雪糕同蕨餅,質感豐富。另外,仲有蔥油帶子同黑蒜M7都一樣好惹味㗎,想試就咪錯過今次嘅限定menu喇!   “If We were in Charge”盛宴 地址:西環西營盤干諾道西 158A 號地下3號舖 舉辦時間:2020年2月27-29日 19:00 / 20:30 價錢:HKD1180/八道菜 (HKD480配搭紅白餐酒;HKD380配搭非酒精飲品) 購買門票:https://www.testkitchen.com.hk/devonray  

0

【營養師解剖五大冰品 100%水果棒健康度滿分】懶健康貼士

每個屋企嘅雪櫃到咗夏天一定有雪糕、雪葩或者雪條呢類冰品。雖然食得多凍嘢對身體唔好,但真係熱到好難頂,惟有揀質素好啲嘅冰品啦。註冊營養師Moses比較咗市面唔同製法嘅冰品,話你知邊種製作方法健康啲!   傳統美式雪糕(American Style Ice Cream) | 健康程度: 1 星 傳統美式雪糕嘅基本材料係奶油、牛奶同糖。呢啲係製造雪糕好重要嘅材料,因為牛奶同奶油嘅脂肪可以穩定雪糕嘅結構,令雪糕更加香甜同滑身。不過同時亦增加唔少熱量,而且奶油同牛油屬飽和脂肪,攝取過多會增加患心血管疾病嘅風險。 建議: 買之前先睇營養標籤,盡量選擇較低脂或少糖嘅牌子。 食迷你版雪糕控制分量,例如Dreyer’s Collection Mini一枝約137卡路里。   乳酪雪糕 (Frozen Yogurt Ice Cream) | 健康程度: 2 星 雖然聽落去乳酪雪糕好似比傳統雪糕健康,但唔好跌入呢個陷阱呀!因為乳酪雪糕用較多脫脂奶品,所以總脂肪比傳統雪糕較低,但係糖份會偏高,屬高糖食物。以一茶匙5克糖計算,每100毫升裡面已經有高達4茶匙糖份,導致熱量都偏高㗎。   雪葩 (Sorbet) | 健康程度: 3 星...

0

【母親節慰勞媽咪食餐好 早午晚餐精選推介】Wooloomooloo Steakhouse、普慶餐廳、竹日本料理

下星期就係母親節喇,大家諗好食咩未呢?間間餐廳都推母親節餐,小編都睇到頭暈,不過有幾間唔錯,分別係Wooloomooloo Steakhouse尖東分店豐富嘅早午餐、佐敦普慶餐廳嘅冰涼下午茶同銅鑼灣竹日本料理嘅尊尚晚餐,睇啱就book枱喇。   四道菜早午餐 Wooloomooloo Steakhouse尖東分店喺5月11至12日供應母親節早午餐(HKD325/位),唔係灣仔店冇,只係覺得呢邊嘅menu更加大眾化,連爸爸都可以一齊餵飽。 頭盆可以三選一,有配檸檬汁、辣椒汁同香蔥紅酒醋嘅即開生蠔三隻;以火箭菜、芒果甜酸醬同檸檬芥末汁襯嘅烤猪腩肉;用羽衣甘藍、羅馬生菜、墨西哥脆片配鯷魚汁整成嘅大蝦帶子沙律。食完咁開胃嘅頭盤,就會有龍蝦湯,會食到粒粒龍蝦肉㗎。 主菜同樣三選一,菠菜瑞可達芝士意大利雲吞配意式蕃茄醬伴有芝麻菜沙律同巴馬臣芝士碎;煎得香口又嫩滑嘅焗海鱸魚柳就配有橄欖醬、油封車厘茄、炒薯仔同菠菜沙律;想肉食啲就有燒澳洲牛柳,會配上奶油松露薯蓉、炒野菌同烤鮮露筍伴紅酒汁。 甜品就二選一,玫瑰意式奶凍襯咗野莓,而白朱古力慕絲就配覆盆子果凍同玫瑰。   Wooloomooloo Steakhouse 地址:尖沙咀麼地道66號尖沙咀中心UG17-18及G7-8號舖 電話:2722 7050 營業時間:星期一至日:11:45-00:00   酒店雪糕下午茶 普慶餐廳即日起至9月30日,喺週末同公眾假期15:15-17:15推出Mövenpick雪糕火鍋下午茶自助餐(HKD228/位),同媽咪行完街嚟回氣抖抖就啱晒啦。 呢個下午茶可以食到Mövenpick十款口味嘅瑞士頂級雪糕,有冧酒提子、意式芝士蛋糕、焦糖燉蛋、朱古力碎等,黑白朱古力火鍋仲係無限添加!另外有20幾款配料添,包括多款新鮮水果、曲奇餅、蛋糕、蛋白脆餅、棉花糖同迷你貝殼蛋糕等等,媽咪食完一定甜入心呀!   普慶餐廳 地址:佐敦彌敦道380號香港逸東酒店B1樓層 電話:2710 1901 營業時間:星期一至日:06:30-21:30   懷石料理晚餐 晚餐一定係全日最貴嘅一餐,母親節更加要請媽咪食豪啲啦。竹日本料理喺5月12日當晚推出母親節懷石料理(HKD1380/位),精緻嘅菜式配上富日本風味嘅高級環境,作為全日行程嘅終站夠晒完美。咁呢個價啲咩?即刻睇睇部分菜式啦! 前菜先嚟酥皮焗龍蝦蘑菇湯,香濃幼滑嘅質感已經好開胃。 其中配菜有櫻花豆腐、帆立貝伴山葵、煮鮑魚伴海膽及三文魚籽、櫻炸蝦丸,精緻到唔捨得食囉。 土鍋蟹飯伴海膽、漬物就係睇得見嘅鮮味!想知成個餐係點就睇menu啦: 竹日本料理 地址:銅鑼灣恩平道28號利園二期地下G01號舖...

0

【灣仔月街歎茶新驚喜 茶味甜品口感勁正】BASAO tea

喺灣仔咁繁忙嘅地區點樣搵到寧靜嘅一片天空?小編最鍾意去月街行一轉喇!行入盡頭有間充滿日劇小店feel嘅茶店BASAO tea,係茶葉品牌BASAO嘅首間茶店。門口種咗植物,坐低飲杯茶吹吹風即刻有種慢活嘅感覺。呢度除咗茗茶之外,仲有用茶製成嘅甜品,令大家更能夠體會茶嘅味道同變化。如果想了解多啲,又可以同店內茶師交流心得,分分鐘就咁chill成個下晝。 遇著有陽光透入,令到成間店嘅懶洋洋感覺更加升溫。事不宜遲,即刻試吓甜品先! 自家製茶蛋糕卷有兩款,直接用入饌嘅茶葉起名。煙燻小種(HKD36)個名改得真係冇錯,入口真係有陣煙霧嘅感覺㗎!味道幾濃郁,但並冇過甜。外層蛋糕用咗竹炭,咬落有好輕微脆脆嘅籽咁,不過同煙燻小種嘅茶味幾夾。如果想配茶,建議大家揀濃味嘅款式,例如岩茶同單叢烏龍茶,會冇咁易互相蓋過對方嘅味道。 清香淡雅啲就有阿里山烏龍(HK36),如果配茶可以揀大吉嶺霖吉雅莊園春摘,成熟度比夏天採摘嘅茶葉輕啲,帶花香味,成個配搭好lady添。 水晶茶凍(HKD26)都係用咗阿里山烏龍茶,不過茶味比蛋糕卷濃啲。口感似蒟蒻,一件一啖已經有啲難開口講嘢喇。 龍井雪糕(HKD38)咪睇佢白雪雪,味道係食緊濃縮龍井咁。龍井採自第一塊芽第一塊葉,好幼嫩,炒青製成茶葉之後好似脆片咁食得,加埋核桃灑喺雪糕面幾增加口感㗎。 睇住茶師即場泡茶,令人更加期待。大吉嶺霖吉雅莊園夏摘(HKD58)係全世界第一隻紅茶,亦係一隻煙燻紅茶,味道帶果香又濃味啲。茶師會沖泡兩壺俾你自己慢慢飲,仲會用熱水先洗過茶杯,有少少功夫茶嘅感覺。 呢度都有新派又健康嘅茶飲,加入氮氣嘅氮氣冷泡茶(HKD58)有機會每日轉唔同茶底;外形好似啤酒有層泡,感覺好清爽。 抹茶牛油果鮮打特飲(HKD65)用咗抹茶、牛油果同豆奶嘅配搭,帶住清新嘅蔬果香氣。質感厚實有啲似奶昔,飲完都飽飽哋。 想帶茶葉同茶具返屋企都可以即場選購,唔知點揀就問茶師意見啦。   BASAO tea 地址:灣仔月街17號地下 電話:2952 3313 營業時間:星期一至日:11:00 – 20:00

0

【主題Café首創刺蝟導賞團 老闆:大家唔好棄養呀!】KURI CAFÉ

鍾意小動物嘅朋友相信對貓狗Café應該都唔陌生,最近九龍灣就開咗全港第一間刺蝟主題KURI CAFÉ,Café以自助點餐形式運作,入面好多刺蝟圖案嘅小擺設,另外亦有刺蝟精品俾大家選購。 用餐區隔離有個Home of Hedgehog(刺蝟之家),大家可以預約導賞團,會有專人同大家介紹關於刺蝟嘅小知識,可以有機會同小刺蝟近距離接觸,但要留意嘅係,刺蝟嘅性格比較細膽,大家探望佢哋嘅時候唔好太興奮呀! 首先同大家介紹吓Café嘅食物先,小編點咗一杯熱鮮奶咖啡(HKD28)。每杯咖啡上都有可愛嘅刺蝟圖案,真係唔捨得飲呀! 呢個芝士白汁海鮮焗飯(HKD58/包$25飲品)面頭鋪滿芝士,一潷起就成塊芝士扯起晒,好邪惡呀!海鮮有蜆肉、蟹柳同魚柳等等,口感幾豐富! 食完正餐就點返個甜品先。哪裡有彩虹告訴我(HKD40),總共有七小球唔同口味嘅雪糕,再加上彩虹糖針同七彩棉花球,色彩超繽紛,令人心情好愉快。雪糕上仲插有刺蝟嘅小卡片,少女心大爆發! 鮮果繽紛窩夫(HKD50)亦好吸晴,有兩大球雪糕同埋伴碟生果,主角窩夫質感比較鬆軟,食落有微微嘅空氣感,唔會食到成口粉咁。夾埋雪糕同朱古力漿一流呀!50蚊大大份,仲可以支持到佢哋收留被棄養刺蝟嘅刺蝟之家,小編覺得值喎! 刺蝟之家除咗作導賞團用之外,亦係一眾小刺蝟休息嘅地方,刺蝟區內有恆溫暖風機,保持24-29°C。為咗保護刺蝟,導賞團期間要乖乖哋安靜聽講解,眼看手勿動呀。老闆Kenneth話近年香港愈來愈多人養刺蝟,不過棄養個案亦非常多。佢自己之所以開始養刺蝟亦係因為見到有人棄養,出於同情心下收養。開Café除咗係一圓自己嘅創業夢之外,更希望可以分配更多時間照顧呢班「小朋友」。搞呢個導賞團係完全唔收費嘅,用意係想大家可以喺領養刺蝟前先了解呢班小生命,再考慮係咪有時間同心機去照顧佢哋。 Kenneth話多數決定養刺蝟嘅人都係因為覺得「好可愛」,但其實養刺蝟有好多學問,而刺蝟亦唔同貓貓狗狗咁會好主動同大家玩,佢哋比較細膽,同時又係夜行性動物,所以好鍾意匿埋喺暗嘅地方。食物方面除咗食刺蝟糧之外,亦需要食活蟲去補充蛋白質同所需營養;同時佢哋嘅大小二便非常頻繁,所以經常需要清理㗎!小編聽完之後真係覺得照顧佢哋需要非常有責任心同愛心呀,大家如果有興趣想養刺蝟,不妨先去KURI CAFE了解吓先,應該會有幾多收穫!   KURI CAFÉ 地址:九龍灣牛頭角道3號得寶商場地下T104A號舖 電話:9297 9821 營業時間:星期一至日:12:00-22:30

0

【情人節要甜蜜蜜! 限定甜品4大閃光彈】THE CAKERY、GODIVA、Häagen-Dazs、FEATHER & BONE

情人節又到喇!又係考驗各位有另一半嘅朋友心思嘅時間喇,小編今次同大家精選咗4間有情人節限定甜品嘅舖頭,等大家可以甜蜜蜜咁過一個放閃情人節!   粉紅夢幻甜品  THE CAKERY 如果你嘅另一半係行公主風路線,年年18成個少女咁款嘅話,小編就推介THE CAKERY喇!簡約嘅白色設計加埋色彩繽紛嘅Cupcakessss真係望到都少女心大爆發呀! 呢個紅鶴造型蛋糕淨係個名都夠晒夢幻,叫做My Princess(HKD688),完全表達到你視對方如珠如寶嘅重視。加上吸睛外表,同另一半打個靚卡再慢慢分享Creamy蛋糕,Sweet爆! 如果2個人食成個蛋糕太Heavy,可以選擇靚靚又輕盈嘅Cupcake,再加個迷你版Flamingo Cupcake Topper(HKD30),啱晒女仔嘅雀仔胃。 如果情人節當日真係咁不幸陪唔到對方,又唔想送花咁行嘅話,呢個情人節特別版嘅Organic Sugar Cookies(HKD388/Set)就可以幫你寫晒你想講嘅甜言蜜語,對方每食一塊都感受到你濃濃愛意,人唔到都冧爆喇!   THE CAKERY(利園分店) 地址:銅鑼灣利園二期124號店 電話:2816 1838 營業時間:星期一至六:10:00-19:30;星期日及公眾假期:10:00-19:00   心心造型冧爆 GODIVA 如果你另一半係朱古力控,咁小編覺得GODIVA嘅情人節限定朱古力禮盒係不二之選! 今年GODIVA為情人節推出咗呢個以Cupcake為主題嘅The Fairy Cakes Collection,Cupcake造型嘅朱古力賣相好可愛,呢個情人節心心相印巧克力禮盒(HKD425)用粉紅色拱形鐵盒包裝,內有4粒限定版朱古力-抹茶慕絲黑巧克力、香草餅乾味慕絲牛奶巧克力、黑巧克力慕絲黑巧克力同草莓巧克力醬白巧克力。食完4粒朱古力仲可以留返個靚靚鐵盒,正! 另外如果想同眾多摯愛分享嘅話,情人節巧克力心形禮盒11顆裝(HKD455)同情人節巧克力禮盒17顆裝(HKD485)既有傳統GODIVA朱古力同埋限定版Fairy Cake,分量夠多同朋友分享零舍Warm!   GODIVA...

0

【冬日限定粉紅甜品勁吸睛 大推芭菲士多啤梨滿瀉】L.D.K by Ufufu Cafe

講到話食梳乎厘班戟,來自日本九州嘅過江龍L.D.K by Ufufu Cafe,大家應該都聽過,舊年登陸香港之後,極速已經開咗3間分店,最近仲進駐埋港島區,喺銅鑼灣開咗新分店,真係港九新界都有佢份喎!全線仲推出咗期間限定嘅冬日料理同甜品,其中甜品系列更以當造士多啤梨做主題,餐廳用嘅士多啤梨全部來自日本,小編當日食嘅就係日本佐賀縣產嘅士多啤梨。即刻睇吓有咩好食先! 喺世貿中心三樓嘅新店舖面都幾大,成間餐廳嘅裝潢同其他分店都差唔多,都係以日式木系為主,俾到客人一種簡約舒適感覺;入面座位都幾多,環境幾寬敞。 小編等唔切喇,要即刻介紹呢個期間限定嘅士多啤梨甜品系列先!梳乎厘班戟一直係餐廳嘅招牌,新系列嘅其中一個甜品就係呢款草莓招牌班戟(HKD168),班戟上面淋咗啲半凝固嘅淡忌廉,再放咗新鮮嘅士多啤梨做點綴,連旁邊嘅士多啤梨果醬入面都有啖啖果肉㗎,加埋個士多啤梨雪糕更有層次感。 望住呢個震騰騰嘅梳乎厘班戟,小編真係覺得好幸福呀!話晒都係招牌甜品,質素實有返咁上下,班戟夠鬆軟之餘,上面啲淡忌廉又夠晒Creamy,夾埋士多啤梨一齊食好Match。如果鍾意食甜啲仲可以落埋個楓糖漿落去,咁就更Sweet Sweet喇! 提起Ufufu,即刻會諗起佢哋嘅芭菲系列!今次期間限定甜品入面都推出咗兩款士多啤梨嘅芭菲,呢款特盛草莓芭菲(HKD198)成個杯面都鋪滿晒士多啤梨,砌成一朵花咁,仲灑上糖霜,好有冬天氣氛;而裡面就有士多啤梨雪糕、啫喱、忌廉、士多啤梨果醬、吉士醬同埋脆米,好豐富呀!士多啤梨果肉令成杯芭菲變得好清新,食多幾啖都唔覺膩呀。但係特盛呢款咁大杯自己一個真係未必食得晒,同朋友仔開心share就啱啱好。另外,精選草莓芭菲(HKD128)入面啲料都同呢杯差唔多,但分量就會細啲,冇咁多士多啤梨。 草莓法式多士(HKD168)賣相都好吸引㗎!兩大嚿烘到咁金黃嘅多士上面放咗士多啤梨同雪糕,顏色咁搶眼,睇見都想食呀! 呢件日本草莓蛋糕(HKD48)有慕絲、啫喱同海綿蛋糕幾種口感,層次好分明,中間層啫喱酸酸甜甜咁,士多啤梨味好出,又唔會太甜。 除咗甜品,餐廳仲推出咗幾款期間限定嘅冬日菜式。呢款係咪好似平時食開嘅芝士焗龍蝦呢?其實呢款西京焗龍蝦配鮭魚味噌意粉(HKD168)就係結合咗西日元素,靈感來自芝士焗龍蝦,但喺龍蝦面頭嘅並唔係芝士,而係日本嘅味噌,同樣有鹹香,但食起上嚟味道有別於一般嘅芝士焗龍蝦;意粉加咗味噌、牛油汁同三文魚煮成,幾入味。 成碗豚肉生羌燒撈烏冬(HKD88)有滿滿嘅豚肉片,呢啲豚肉先用醬油同薑汁醃過再炒香,個撈烏冬汁都會用返同樣嘅生薑燒汁,再加上溫泉蛋同雜菜,味道會再濃郁啲。   L.D.K by Ufufu Cafe(銅鑼灣分店) 地址:銅鑼灣告士打道280號世貿中心3樓P303-303A號舖 電話:3421 1286 營業時間:星期一至日:11:30-22:30

0

【無麩概念 敏感人士福音! 日式小店米粉班戟咩料?】蜜庵本膳

尖沙咀赫德道多酒吧係人都知,但都有啲小店誕生㗎!好似最近就有間新嘅日式小店開咗喇,呢間蜜庵本膳個名有啲繞口咁,究竟有咩特別意思呢? 原來「庵」喺日本古時係解作俾人聚集嘅地方,有啲似我哋今日嘅Café,可以俾一班人慢慢食個tea,chill吓hea吓咁。「蜜」字解作甜品,成個名嘅意思就係提供甜食嘅地方。老闆Jacky同Kimi兩個都喺日本留學過一段時間,深受日本飲食文化所薰陶,於是決心將日本無添加,less is more嘅健康飲食概念帶返嚟香港。最招牌就係米粉班戟喇! 咩叫米粉班戟?同前排Hit爆嘅梳乎厘班戟完全唔同,呈扁平早餐熱香餅狀,但係質感更加鬆軟,咬落好似食咗一啖棉花咁,軟綿綿感覺好治癒呀!班戟層層疊至4-5塊高,每一啖都食到質感超高嘅鬆軟班戟! 可可香橙米粉班戟(HKD108)     一般班戟會用麵包製作,而米粉班戟用嘅係北海道粟米粉,因此對麵包成分「麩質」敏感嘅人士都可以放心食用!雖然用日本進口粟米粉嘅成本相對高昂,但係Jacky話覺得都係值得嘅!「有次一個媽媽帶住個幾歲大嘅小朋友嚟食班戟,傾傾吓先知原來個小朋友係對麩質敏感,所有麵粉製品都唔食得。咁你都知啦,小朋友梗係鍾意食麵包呀、蛋糕嗰啲嘢,佢哋喺出面係冇得揀。個媽媽話係專程嚟,就係為咗想個小朋友可以第一次食到班戟。咁我覺得可以令到大家有多一個選擇,成件事其實係幾有意義嘅。」 和王牛漢堡咖喱米粉班戟(HKD188) 通常我哋食班戟多數都係食甜嘅多,不過Jacky就話原來日本都好流行鹹食班戟㗎!呢個招牌和王牛漢堡咖喱米粉班戟就係用熊本產100%A5和王牛,佢哋牛肉係受官方嘅「JAくまもと肉牛銘柄推進協議会」規管,所以質素真係有返咁上下㗎!和牛漢堡係屬於手打牛肉嘅狀態,咬落啖啖肉,肉味超濃配埋特調嘅微辣日式咖喱,整體味道相輔相成,連伴碟嘅配菜都唔hea㗎,紫薯乾、蕃薯乾同蕃茄乾都係自家製。 除咗米粉班戟嘅idea係源自日本,佢哋自家製嘅糖水都係inspired自日本傳統嘅甜湯。香港糖水就有紅豆沙啦,其實日本都同樣有紅豆類嘅糖水,只係質地、味道同配料都非常之唔同。十勝紅豆甘酒甜湯裡面有糰子、蕃薯仔、栗子同黑豆,十勝紅豆獨有嘅濃郁甜香味,加埋甘酒嗰種微微發酵嘅米香味,好OK喎!另外左手邊嘅種子島安納芋姜蜜甜湯就比較冇咁甜,薑味頗重,成碗嘅重點就係種子島安納芋,味道甜如甘蜜,香港唔係度度有得食㗎!種子島係喺鹿兒島縣嘅一個小島嶼,生產嘅安納芋數量唔多,所以其實都幾罕有㗎! 食物原材料樣樣都用日本嘢,咁成本咪好高?「其實我哋定價都……唔算平嘅,不過都希望大家會理解我哋用嘅料全部都係日本嘢,所以價錢方面可能會相對比街外嘅餐廳貴少少。」不過小編覺得其實佢哋做嘅每一樣嘢都好花工夫,同埋真係好有心機去提供一個健康啲嘅新選擇俾大家。作為小店要堅持無添加製作真係唔容易,因為工序同成本同用現成貨完全唔一樣,大家記住去支持吓喇!   蜜庵本膳 地址:尖沙咀赫德道8號地下A號舖 電話:2461 0888 營業時間:星期一至日:12:00-22:00

0

【素葷共融韓式素菜 回味激罕紅火龍果雪糕】素學堂

青衣城有咩新嘢食?新登場有全場唯一嘅韓式素食店BOBSANG樸生!第一個特別之處係素葷共融,因為一間舖分咗兩邊,左邊嘅Green.素食只供應全素自助餐、右邊則係素葷都有得食嘅單點餐廳。雖然素葷人士可以同枱食飯,但餐廳嘅爐頭就分開素食同葷食,等素食嘅你可以放心享用;其二就係餐廳所有用上芝士嘅菜式,都只用Daiya呢個素食界聞名嘅素芝士品牌,即使冇牛奶都有好濃郁嘅芝士味,唔係靚貨都唔俾你食囉! 餐廳開12:00,但未夠鐘就有食客等緊開餐喇! 小編今次選擇單點素菜,所以安排咗喺餐廳右邊位置,都幾多位㗎。呢度樓底夠高冇壓迫感,木系裝潢亦令人感覺幾放鬆。 外形趣怪嘅牛蒡凍豆腐(HKD65/原味)用咗九龍城老字號公和荳品嘅豆腐呀!豆腐質感厚實之中好細滑,豆味濃郁。原味以紫菜碎同芝麻醬拌勻一齊食,提升味道層次。加埋面頭炸到香脆可口嘅牛蒡絲,鹹鹹哋好正。想刺激啲可以試泡菜味(HKD65)、清新啲有萵筍味(HKD68)添。 炸腐皮芝士卷(HKD66/素泡菜)係其中一款用咗Daiya嘅菜式。以腐皮包住素泡菜、青瓜、甘荀、醃蘿蔔、牛蒡同素芝士炸成,香脆程度係一咬層腐皮已經散落喺碟度喇!點埋韓式甜辣醬就更惹味,如果想轉成葷菜可以揀泡菜牛肉(HKD68)或泡菜豬肉(HKD66)。 以芋頭、冬菇、紫椰菜同甘筍切絲煎成嘅四蔬韓式煎餅(HKD94),用無蛋奶素粉漿製作㗎。爽口清新,都幾飽肚喎! 主食點少得自選韓國撈麵呢,主料可以自己選配,呢款係素豬炒泡菜配麵(HKD68),另外有大醬豆卜(HKD58)。以菇菌類仿豬肉嘅口感,非常神似,一咬爆汁添;配埋柚子豉油汁,香得嚟酸味味,特別開胃。 不得不提自家製軟雪糕杯(HKD58),除咗冇奶類成分,仲有激罕見嘅紅火龍果味呀!味道清香唔會太甜,感覺幾輕盈;仲配有藍莓、士多啤梨等鮮果同甜醬穀物球,心理上冇咁罪惡感。 蜜桃玄米綠茶(HKD48/左)味道清淡中有微微米香,再以碟豆花混合出天然藍調,感覺更加清涼。想消暑啲亦可以試青瓜西柚冰茶(HKD48/右)。 雖然小編冇食自助餐,但都影俾大家睇睇。款式唔算勁多,但都算新穎。   BOBSANG樸生 地址:香港青衣青敬路33號青衣城一期119B舖 電話:3105 9836 營業時間:星期一至五:12:00-22:30;星期六、日及公眾假期:11:30-22:30

0

【夏天消暑打卡名單 必食8大日韓泰冰品】想甜嚐甜、Yadllie Plate、青花

熱辣辣夏天,唔食返吓啲冰品透心涼點得呀?小編今次就推介8款分屬日韓泰嘅特色冰品,消暑之餘又可以打個靚卡,認住佢哋呀! 日式冰品 講起日式冰品呢,大家可能會諗起卡通片成日見到嘅草莓刨冰,即係一大杯冰再喺表面淋上草莓醬汁,諗起都流口水呀!呢個同樣充滿日本風情嘅荔枝玫瑰花之水滴(HKD56),個名改得咁唯美,之唔係日本好hit嘅水玄餅囉!睇見都透心涼呀!老闆話要做到晶瑩剔透都下過唔少工夫㗎!見到成碟藝術品咁真係唔捨得食呀! 夏天唔少得食雪糕,倒轉乳酪雪糕每隔1-2個月就會轉口味,keep住帶新鮮感俾大家,今次係菠蘿口味,好fresh呀!每款口味都由老闆親自製作,絕對只此一家!另外亦有好少見嘅榴槤心太軟-榴槤嚐甜配乳酪雪糕(HKD52),用嘅係D24靚榴槤,流出嚟嘅榴槤流心完全俘虜榴槤控呀! 除咗適合一眾「榴槤痴」嘅D24榴槤嚐甜之外,阿華田心太軟(HKD52)同埋紫心甜薯(HKD50)都好正㗎!阿華田味超濃郁,細個嘅感覺返晒嚟呀!唔知遲啲會唔會有埋好立克味呢?話晒阿華田同好立克都係好朋友嚟㗎嘛;另外紫薯心太軟亦相當唔錯,紫薯粒粒軟硬適中,甜得嚟好fresh,適合唔鍾意食太甜嘅朋友呀! 呢間甜品店由80後店主Elvis一手包辦,由研究新款式、製作甜品到收銀執枱佢都親力親為,舖頭細細但每一個細節都睇得出佢熱愛自己嘅工作,餐具、紙巾同擺設都毫不馬虎㗎,連舖頭design都自己包辦埋,超勁呀!Elvis話自己原本只係一個返朝9晚5嘅文員仔,有一日忽發奇想要開間舖,然後就著手準備。「想做就做」唔係咁易㗎,見佢做到自己熱愛嘅事,小編覺得好熱血呀!大家經過不妨幫襯吓喇! 想甜嚐甜 地址:黃大仙蒲崗村道73號富佑大廈地舖 電話:3956 4744 營業時間:星期一至日:13:00-00:00   韓系冰品 韓式甜品大家會諗起咩呢?小編第一時間諗起曾經喺韓國明洞食過嘅韓式黏糕雪冰(HKD68)喇!黏糕嘅質感有啲似平時食開嘅麻糬咁,不過就再煙韌啲同埋有咬口啲,另外鋪喺面嘅黃豆粉同埋少少焦糖醬,忍唔住食完一啖又一啖嘅邪惡冰品呀! 呢款草莓雪冰(HKD68)真係分量十足呀!士多啤梨鋪滿咗成個刨冰,好豪爽呀!望落都已經覺得好fresh喇!士多啤梨食落口一啲都唔酸,啖啖刨冰都食到士多啤梨肉,好幸福呀! 小編偷偷哋話你哋知……其實呢度嘅炸雞同埋豬肋排都好好食㗎,大家下次可以喺呢度食完正餐再試埋呢兩個韓式冰品,咁就夠晒圓滿啦! Yadllie Plate 地址:旺角西洋菜街1號兆萬中心11樓 電話:2360 0233 營業時間:星期一至日: 17:00-00:00   泰潮冰品 講到泰式甜品又點可以冇芒果糯米飯呢?不過呢度嘅芒果糯米飯(HKD78)加咗蝶豆花,所以係藍色㗎!雖然食落就同普通糯米嘅味道一樣,但係賣相就夠晒特別喇!另外芒果亦切得非常薄片,一嚿芒果配一啖糯米飯,加埋秘製嘅椰漿,泰式風味真係爆晒出嚟呀!仲用咗風乾嘅椰子脆脆伴碟,香口得嚟好清新,正! 除咗傳統泰式甜品,作為一間講究食物藝術嘅餐廳,亦推出咗比較創新嘅甜品-焦糖爆谷花生芭菲(HKD58)。面頭嗰啲唔係棉花糖,竟然係龍鬚糖呀!夢幻得嚟好特別呀!甜甜嘅龍鬚糖夾埋花生芭菲食超match!忍唔住一啖啖咁食到停唔到口,呢個新派泰式甜品掂呀! 除咗甜品耍家之外,佢哋啲泰菜都好正㗎,大家下次去試嘅時候可以食埋飯慢慢歎甜品,正呀! 青花 地址:旺角奶路臣街17號The Forest 1樓107-108號舖 電話:3468 2558...