Tagged: 零食

0

【珍奶控人生必食甜點 精選6款韓台話題口味】人生必食

珍珠奶茶紅遍台灣、香港、韓國等地方,除咗飲料之外仲推出好多出其不意嘅珍珠奶茶創新甜點。小編精選6款喺台灣同韓國牽起熱潮嘅甜點零食,如果作為珍奶控嘅你仲未試過,快啲搵吓有冇代購幫到你啦! 台灣篇 皇族珍珠奶茶大福 呢個珍珠奶茶大福(約HKD16/4個)有三層,煙韌嘅麻糬外皮配搭奶茶豆沙內餡,而最內層就係黑糖珍珠粒。你可以室溫食佢軟糯嘅口感,想煙韌啲可以放入雪櫃凍食添。佢曾經喺香港7-11有售,你有冇錯過呀? 銷售點:台灣麻糬主題館   卡滋爆米花(珍珠奶茶口味) 睇戲必食嘅爆谷都可以整成珍珠奶茶味?一杯珍珠奶茶口味爆谷(約HKD13/80g)入面有2隻味,深色嘅係黑糖珍珠味,而淺色就係奶茶味。脆口嘅爆谷真係癲覆咗對珍珠奶茶煙韌嘅想像呀!。 銷售點:台灣7-11、康是美   珍珠奶茶酥 鍾意食鳳梨酥嘅朋友不如試吓珍珠奶茶酥(約HKD100/ 10包),佢外皮同一般鳳梨酥冇咩分別,內餡以珍珠奶茶調味,用冬瓜蓉混合椰果製成珍珠嘅口感。呢款傳統甜點加入新口味,都幾特別喎。 銷售點:台灣新東陽門市   黑糖珍奶雪條 黑糖珍奶雪條(約HKD26/4條)嘅外表完全係一枝冰凍咗嘅黑糖珍珠奶茶囉!以奶茶混合焙炒黑糖,濃味中帶啲焦香,再加上超級Q彈嘅珍珠,夏天食真心正! 銷售點:台灣全聯福利中心、萊爾富便利商店、OK便利商店   韓國 黑糖珍珠奶茶波波 韓國人氣零食黑糖珍珠奶茶波波(約HKD10/40g),係用厚厚嘅朱古力包住Q彈嘅黑糖珍珠,唔少食過嘅朋友都表示陣奶茶香味好濃郁,好似飲緊黑糖珍珠奶茶咁! 銷售點:韓國7-11、CU、GS25   黑糖珍珠奶茶味杏仁 韓國Tom’s Farm嘅堅果有好多種口味,連黑糖珍珠奶茶味杏仁(約HKD48/190g)都出咗喇!黑糖奶茶味朱古力包住香脆嘅杏仁,口感一流,啱晒鍾意甜食同果仁嘅朋友呀! 銷售點:韓國CU便利店   相片來源:104659、floral_floral_room、xiaoailovetaiwan、jessicaaa1007、livingconsultant、daveltk、yogisisfood、chocoduk_who、jyun791004、choo_permarket、busan_waboiso、bokhee.duck

0

【經典零食品牌大玩花臣 變奏版新品形象反轉】人生必食

有冇留意到平時食開嘅零食原來識得變身嘅呢?!各大零食品牌喺自家經典零食嘅基礎上,不時都會大玩花臣,為大家注入新鮮感。小編今次就幫零食控搜羅到一大堆創意十足、估佢唔到嘅變奏版零食新品,雖然大部分都未必可以喺香港買到,但Bookmark定,第時見到就記得買嚟試吓喇!   麥提莎朱古力脆餅 平時食嘅麥提莎都係一粒粒嘅,今次推出嘅新品就係一塊塊嘅麥提莎朱古力脆餅,好似將麥提莎壓扁咗咁, 食落既有濃郁嘅牛奶朱古力味,又咬到粒粒麥芽脆米,咁樣嘅新品就更有新鮮感啦!   銷售點:韓國7-11   Oreo「朱古力批」 Oreo嘅產品除咗喺內餡有唔同嘅變化之外,韓國7-11最近嘅新品仲喺餅乾嘅外層搞啲新意思。喺傳統嘅Oreo餅度淋上黑、白朱古力醬,俾朱古力封住成塊Oreo,將Oreo變成好似「朱古力批」咁,朱古力控就啱晒啦!   銷售點:韓國7-11   HERSHEY’S扭紋雪糕筒 人氣朱古力品牌HERSHEY’S經常推出唔少以自家朱古力做主題嘅食品,今次同樣喺韓國7-11就有得賣民款朱古力雪糕新品,朱古力同雲呢拿雪糕扭紋,啖啖都係品牌獨有嘅朱古力濃香。   銷售點:韓國7-11   日本波子汽水糖雪條 由細食到大嘅樽裝波子汽水糖應該大家都唔陌生,但呢款咁經典嘅糖最近就變身成冰品喇。淺藍色嘅雪條正正係熟悉嘅波子汽水味,由雪葩質地嘅外層包住入面較Creamy嘅內層,入面更內藏粒粒波子汽水糖添。   銷售點:日本便利店   明治阿波羅士多啤梨朱古力乳酪 明治其中一款經典零食「阿波羅士多啤梨朱古力」相信大家都唔陌生,原來已經推出咗50年喇!咁開心梗係要慶祝吓啦,最近特別推出阿波羅士多啤梨朱古力同款口味嘅乳酪新品。呢款限定嘅杯裝乳酪(約HKD15/2杯)貫徹朱古力同樣嘅組合,上層係酸甜濃郁嘅士多啤梨乳酪兼有果肉,下層就係幼滑香濃嘅朱古力醬,見到一定要試呀!   銷售點:全日本便利店同超市   原條繽紛樂雪條 放大咗嘅繽紛樂?!kinder推出嘅冰品其中有款十足十繽紛樂嘅樣,仲要係原條上,無論賣相同味道都非常相近,但就多咗一陣雪糕嘅冰涼感。同期亦有推出幾款以皇牌朱古力演變而成嘅雪糕冰品添! 銷售點:外地各大超市、便利店   Skippy花生醬雪糕 人氣花生醬品牌Skippy踩入雪條界,推出一系列Skippy花生醬主題冰品,更喺香港有得賣添!繼早前有花生醬朱古力雪糕批(HKD19.9)同特濃花生醬甜筒(HKD21.9),最近更有特濃花生醬雪糕三文治(HKD19.5)登場。三款雪糕都各有特色,食落都有唔同口感同風味㗎,但一樣嘅係佢哋嘅花生醬都同樣咁突出。梗係要拉埋身邊鍾意花生醬嘅朋友一齊試啦!...

0

【懶人必學6款氣炸雞翼 零食加持脆口度Up】氣炸師

食零食食到悶?其實可以用嚟整餸喎。今次花枝丸就教大家用香脆可口嘅零食炸雞翼!等大家喺屋企都可以整一啲平時冇諗過嘅創意料理,但又同零食一樣脆口兼惹味! 氣炸零食雞翼 材料與分量: 雞翼 – 6隻 熱浪 – 適量 魚仔餅 – 適量 花生魚乾 – 適量 三角薯片 – 適量 福字麵– 適量 童星點心麵 – 適量 粟粉 – 適量 雞蛋 – 2隻 鹽 – 適量 油 – 適量 做法: 1. 用清水沖洗或浸雞翼去雪味,然後倒咗啲水。用適量嘅鹽醃雞翼大約15分鐘,然後再用清水洗雞翼。 2. 用廚房紙將雞翼印乾備用。 3. 將零食捏碎或放入密實袋,用麵包棍將零食壓碎。 4. 先將氣炸鍋用200度,3分鐘預熱。 5. 逐隻雞翼依次序沾上粟粉、蛋漿同6款零食,然後盡量壓實。 6. 噴少少油喺雞翼表面就放入氣炸鍋炸200度8分鐘。 7. 反轉雞翼以同樣度數同分鐘炸埋另一邊就食得喇。

0

【7-11六大精選新品速遞 花生醬雪糕杯+台茶爆谷】7-Eleven

日韓台便利店成日出唔少吸引嘅新品,有時有得睇冇得食都幾冇癮囉……今次就等小編推介一啲喺香港全線7-Eleven近期推出嘅新品俾大家啦!有唔少仲係獨家發售,睇啱就落街買喇喂。 優先發售 天仁茗茶出品嘅兩款新口味爆谷依家喺7-11優先發售喇。香芋珍珠奶茶味爆谷(HKD24)以天仁茗茶上等阿薩姆紅茶,加上濃郁嘅奶醬同香芋,芋香十足。而黑糖鐵觀音薑茶味爆谷(HKD24)就以天仁茗茶上等台灣鐵觀音,加入黑糖薑茶,食落有淡淡嘅黑糖薑味,夠晒特別。唔好以為爆谷就會好熱氣、好油膩,佢哋嘅爆谷用咗非基因改造嘅粟米粒、以冇油氣炸嘅方式整成,好味又健康,天仁茗茶粉絲絕對唔可以錯過呀! 獨家發售 Skippy花生醬雪糕杯(HKD20)登場喇!Skippy繼前排出完雪條同雪糕批之後,今次再下一城,出埋雪糕杯俾你可以慢慢潷嚟食。招牌花生醬口味嘅香濃雪糕質地幼滑,同藍色包裝嘅花生醬一樣加入花生碎粒粒,有唔同層次嘅味覺衝擊。你話點可以唔試呢?! 呢款ANDEICO香蕉雪條(HKD18)入面真係有香蕉果肉㗎,成分入面有24%係香蕉果汁同果肉,味道香甜唔膩仲幾清爽添。 新品發售 KitKat粉絲就一定要試吓佢哋新出嘅球型朱古力。左邊嘅紅莓果仁朱古力(HKD15)同右邊嘅紅莓果仁紅寶石朱古力(HKD15)都內藏大量堅果同紅莓乾,層次豐富又唔會太甜。不過紅莓果仁紅寶石朱古力味道酸甜啲,唔知係咪因為用咗少見嘅紅寶石可可豆呢? 期間限定 卡樂B又出新品喇!左邊嘅Jagabee芝士煙肉味薯條(HKD20/5小包)嘅芝士味唔算好濃,但鹹香嘅層次控制得幾好。而無辣不歡嘅朋友仔就要挑戰吓右邊嗰款卡樂B 4倍蒜辣味薯片(HKD18/2件),今次除咗增加辣度之外,仲有啖啖蒜香添。 韓國直送 想Keep Fit所以食少啲零食?咁韓國直送嘅ACHIM雞胸肉(HKD18/原味、煙燻味)就最啱你喇,以原塊雞胸整成,味道香口之餘仲有豐富蛋白質;而且仲有以雞胸肉整成嘅ACHIM雞胸肉腸(HKD17.5/原味、香辣味)俾你揀。兩款都係一開即食,用嚟煮麵或做餸都得,夠晒方便。

0

【日本傳統駄菓子彩色外表似啫喱 實測口感激似膠水!】伏務台

今次小編喺零食舖發現咗呢款外表勁似麥芽糖嘅日本零食,有四種味之餘,啲色一睇就feel到陣伏味飄出嚟,梗係即刻買嚟同大家一齊開心share啦! 雖然店舖寫呢款糖做「威路自製糖漿」,但其實係駄菓子「ねりあめ」(讀音:Neiame),佢係一款平價日本傳統糖果,又可以俾小朋友玩吓嘅零食。透明嘅糖漿附帶木棒俾你攪拌用,因為打啲空氣入糖漿會令佢嘅硬度同口感慢慢改變。想硬啲就攪耐啲。佢除咗係包裝零食之外,如果去日本都有機會喺祭典市集搵到,不過今次小編就喺味之誘惑發現佢,就買嚟試吓啦!ねりあめ(HKD4.9/1個)有波子汽水、士多啤梨、蘋果同檸檬四款味。 未攪之前就咁試味,點知佢睇落杰杰哋,入口就覺得好膠,黏黏笠笠咁。 至於味道方面,波子汽水味係最伏嘅只有極少汽水味同甜味;士多啤梨味雖然擁有嚇人嘅紅色,不過係四隻味之中甜味調得算好,亦冇咩藥水味;而蘋果味同檸檬味就有淡淡嘅香精味,好似甜嘅膠水……但其實四隻味都好淡,冇乜佢所講嘅味道。 跟住按返佢嘅建議食法,用大約3-4分鐘將駄菓子打到變白色,口感係比一開始就咁食好啲,但都係入口即溶,味道就冇變。 最後用港式麥芽餅食法試吓會唔會冇咁伏。小編同同事夾咗成排克力架餅乾,一試之下有餅乾中和,黏笠感覺冇咁出,算係入到口,但就失去咗食糖果嘅感覺囉。難得搵到個入到口清晒伏物嘅方法,唔係次次咁好彩㗎。   小編伏氣:3星 入伏點:味之誘惑 入伏價:$4.9 / 1個 中伏by #MOMO 美術by #MOMO 攝影by #MOMO、大食積 《伏務台》歡迎各界報料。

0

【觀塘新開零食店加購優惠 1蚊特別版可樂搶手零食區】平霸

觀塘呢間新開嘅零食店零食到家,喺開實體店之前,網店已經運作咗一段長時間,仲儲落大批零食迷嘅支持添。除咗有好多平價嘅特色零食之外,最近仲做緊1蚊零食加購優惠添,而且買滿100蚊仲有95折。吸引到平霸上門,睇吓佢啲零食係咪真係咁平先! 舖頭唔算大,左右兩邊都排滿零食,中間擺咗一列貨架,感覺零食嘅款式算幾多,有唔少零食喺出面真係冇乜見過。一入門口行前就見到個放滿各式飲品嘅雪櫃,舖頭賣嘅嘢,由零食、杯麵、禮盒、飲品到酒類都有,幾齊全。 各款特別版可口可樂(單價HKD13.9)個包裝真係好靚,買返去儲都抵吖。依家買夠HKD138,仲可以用1蚊加購。 1蚊加購嘅零食唔只係特別版可樂,選擇仲有好多。不過記得1蚊加購嘅零食成日都會唔同㗎,有興趣嘅朋友仔可以留意住佢哋嘅專頁喇。 有冇人同平霸一樣都好鍾意呢款黃金濃湯粟米球(HKD2.8)呢?但係成日開咗一大包又食唔晒,而呢款細細包有得食嚟過吓口癮就啱啱好,咁平真係買多幾包都唔心痛吖! 8蚊都唔使就買到大包裝嘅粟一燒(HKD7.9),好多零食店都做唔到呢個價錢。 韓國魚乾50片裝(HKD88),呢款魚乾平霸去韓國旅行都好鍾意買返嚟食㗎,喺韓國買嘅價錢同呢度都係差唔多咋,以後唔使喺韓國抬返嚟,喺呢度買咪得! 細細個成日食嘅芥辣味太郎魚柳60片(HKD58),芥辣味又係冇得輸,依家可以一大盒咁買返去慢慢回味喇,除返1塊都唔使1蚊。 返工返到攰,真係要買定幾罐咖啡喺office看吓門口。各款咖啡(HKD4.5)都係一個平價嘅選擇。   平霸小評:今次平霸精選咗啲自己覺得幾抵嘅零食同大家分享,雖然唔係話平得好誇張,但勝在零食款夠特色又多優惠。如果就咁買幾件過吓零食癮,單價都算係親民㗎喇,但係諗住間唔中入吓貨,一次過掃多啲嘅話,加埋唔同嘅折扣同優恵就夠晒平喇,慳慳埋埋可以掃多幾款零食!除咗以上推介嘅零食,平霸仲見到唔少好食又好玩嘅禮盒都好吸引,價錢仲比乜乜物語平一大截添,嚟緊聖誕新年買嚟送禮又多一個選擇,零食迷快啲去尋寶啦!   零食到家 地址:觀塘開源道54號豐利中心2樓208室 電話:3704 7878 營業時間:星期一至五:11:00-19:30,星期六至日:12:30-17:00

0

【$2.9罐可樂1蚊包薯條 彩虹懷舊士多激罕平】平霸

話說平霸上次去完鑽石冰室,行過隔離無意中見到呢間成興行,雖然招牌唔算太顯眼,不過入面買嘅嘢都好平㗎! 今次小編就用咗30蚊買足12樣嘢有飲有食,真係超級抵啦!快啲睇吓小編買咗啲咩啦! 嚟張大合照俾大家睇吓買咗啲咩先! 飲品篇  zero cream soda同新出嘅coca cola zero都係(HKD2.9),真心喺香港未見過有咁平嘅汽水買!而2.9系列仲會有埋芬達、西柚、檸檬+C同檸檬可樂等選擇。 大盒包裝嘅陽光飲品(HKD3.5),又係從來都冇見過有咁平嘅大包裝飲品買三個半囉,小編見到都O晒嘴呀! 其他嘅細包裝飲品仲平(HKD2.5),細包裝選擇就會多啲,有維他奶、蘋果綠茶、菊花茶、解茶同蜂蜜檸檬茶等。 薯片篇  泰國薯條(HKD2),入面有埋包茄醬俾你,細細包,又好似真係食緊薯條咁喎! 合味道叻沙味薯片(HKD5),呢個係大包裝嚟,新味嚟講仲要賣5蚊又係平到黐晒線,小編點忍得手,買! 一蚊雞系列 寶貝薯條(HKD1),店員話啲零食一蚊包嗰陣,我聽完都吓咗聲,咁即刻買返包先!其實同泰國包薯條好似,過吓口癮又得啫! 爆炸糖(HKD1),簡直係兒時回憶,好耐冇食過,同細細個買個價一樣啊! 大發鱈魚香絲(HKD1.2),又係細細個必食零食之一,童年回憶滿滿呀! 平霸小評:今次咁啱行過見到呢間士多,估唔到入面有咁多平嘢買,一班街坊愛死佢啦真係!大家如果去開彩虹邨影相,一定要嚟呢間士多幫襯吓,真係超抵呀! 成興行 地址:彩虹青楊路11號彩虹邨金碧樓27號地舖 《平霸》平食四方,歡迎各界報料。

0

【品客推波子汽水味嚇人 芥末牛扒味超唔夾】伏務台

品客薯片耐唔時就會出啲特別新口味「整蠱」吓大家,今次竟然係波子汽水味(HKD12.9)同和風芥末牛排味(HKD12.9)!唉,波子汽水味真係聽見都伏,不過小編最有實驗精神㗎喇,即管試吓係咩味先! 一打開膠蓋就聞到……一陣酸酸甜甜嘅怪味,的確係有波子汽水味嘅,但係呢陣味唔應該喺薯片筒入面傳出嚟囉!見到身邊同事擰晒頭嘅囧樣,正所謂「我不入地獄誰入地獄」,小編身先士卒啪返一塊先啦。 嗰種味真係難以用筆墨形容,只可以話佢都冇違反到商品說明條例嘅。因為塊薯片上面啲粉真係,好,波子汽水。小編咬落塊薯片度,完全控制唔到自己臉部嘅肌肉,似食咗酸梅乾嘅超人咁,今次真係中晒伏。 打完大佬就試吓個名相對上冇咁伏嘅wasabi牛排味啦,一打開竟然聞到一陣熟悉嘅味道,係咩呢……吖!係煙肉味珍珍薯圈呀,細個成日圈喺手指上扮戒指嗰款呢!嗯,呢款聞落個味係正常嘅,個心都定啲! 雖然聞落去就冇乜芥末味,不過食落口就feel到有喇,不過小編就覺得同牛味唔太夾。食落口兩種味好似分開咗咁,怪怪哋;同埋食落口同珍珍薯圈係同一款肉味,不過有少少唔同嘅係品客呢款薯片嘅味道足以傳千里,如果你想喺office食或者上堂自私食就要小心啲喇! 小編伏氣:雖然wasabi牛排味的確冇波子汽水味咁伏嘅,但都係一款完全唔值得回購嘅零食!薯片呢家嘢真係可以有更好嘅選擇,大家想試伏時就諗真啲喇!話時話,波子汽水味依家仲有大半筒,有冇勇士想認領…… 品客  和風芥末牛排口味洋芋片 入伏點:惠康 入伏價:HKD12.9 品客  彈珠汽水口味洋芋片 入伏點:惠康 入伏價:HKD12.9 中伏by #肥仔文 美術by #mui mui 攝影by #肥仔文 《伏務台》星期一伏務大眾,歡迎各界報料。    

0

【完全唔match童星麵 芬達提子味伏到爆】伏務台

大家覺唔覺得,有時候啲零食出嘅所謂新口味,真係會令你腦洞大開,估都估唔到係咩味,幻想都無用呀!今次小編行過味之誘惑,見到有兩款古怪口味零食,當然要買嚟試吓有幾伏啦!中過咁多次伏,呢次好似遇到大佬了! 童星芬達橙汁味脆麵 HKD9.9 一見到個包裝都知出事!個公仔仲要笑笑口咁望住你,又真係吹佢唔脹嘅。一打開個包裝,啲芬達味已經湧晒出嚟,食到落口,成件事好唔match,好似夾硬嚟咁喎。雖則橙味已經冇提子味咁怪,但食到落口真係頂唔順,又鹹又甜真係搞唔掂!今次小編都要認輸喇。 童星芬達提子味脆麵 HKD9.9 食完橙味,到呢個超伏嘅提子味喇,口感係難食超多,食落膠膠哋咁,好欣賞佢有提子味,但放返落其他食物度應該會更好!最慘係你食完一條,嗰陣提子味都久久不能散去,好難頂啫! 小編伏氣:今次真係睇小咗呢個童星牌脆麵嘅威力,估唔到真係難食到咁!每個同事食完第一句都不約而同講咗句:「好伏呀」!嗱,冇做馬㗎,期待下次嘅伏嘢,唔知可唔可以超越芬達脆麵呢?伏還伏,不過搵到伏嘢又真係幾有成功感嘅,歡迎大家向小編挑機,齊齊搵伏嘢! 入伏點:味之誘惑 入伏價:童星芬達橙汁味脆麵 HKD9.9;童星芬達提子味脆麵 HKD9.9 中伏by #愛吃的旅人 美術by #Mui Mui 攝影by #愛吃的旅人 《伏務台》星期一伏務大眾,歡迎各界報料。

0

【媽!好_辣呀! 6種激辣薯片大檢閱】6種辣味薯片

18禁薯片爆辣係人都知,究竟坊間仲有無邊種辣味薯片可以同佢抗衡或者個辣味超正超好味,唔食會執輸呢?今次小編搜羅咗6種唔係大家由細食到大嘅辣味薯片比大家做一個比較,一齊睇下有邊隻啱你啦!辣度評級參考:熱浪1星,珍珍辣味薯片1星 18禁痛辛咖哩薯片(HKD158) 辣度:★★★★★★ 一眾小編食到紅都面晒,仲要有幾個身體支持唔住,食到胃痛!唔怪得個包裝寫明「痛辛」,真係無錯,簡直係地獄級別! 桃哈多 暴君薯片 – 辣油味(HKD10) 辣度:★★☆☆☆  呢包寫明係辣椒油味,味道真係十足辣椒油咁嘅味,薯片入面混有芝麻,口感似薄Pizza,無乜薯味。 卡樂B 新加坡香辣螃蟹味薯片(HKD8.5) 辣度:☆☆☆☆☆ 聞落有蟹味,但係食落一啲都唔辣,反而都幾甜。試咗幾塊都唔覺得辣,0星是我給的。 卡樂B香辣薄餅味薯片(HKD8.5)辣度:★★☆☆☆ 薯片屬於厚身同埋硬,無乜pizza味,亦唔似得普通pizza味咁惹味開胃。食完之後會有陣陣香辣味喺喉嚨慢慢散出嚟。 MACKIE’S of Scotland 辣椒薯片(HKD12.9)辣度:★★★☆☆ 超濃香草味,食完成個口都係超強香草味同少少麻辣嘅感覺,薯片偏向厚身但係脆口。 湖池屋辣味薯片(HKD12)辣度:★☆☆☆☆ 一擺入口即時諗起熱浪!只係呢包薯味濃啲,帶少少甜味。 不過脆口指數就唔及熱浪,因為質感比較厚硬,唔會係咁食、係咁食、食唔停口。 伏務建議:18禁薯片同其他香辣味薯片根本係2個次元,食之前記得食定胃藥呀! 入伏點:祥華食品批發公司、MarketPlace、零食大王、金田井