Tagged: 韓國菜

0

【百味堂全新旗艦店推限定甜品 店中店歎韓式鐵板燒】百味堂.鐵及百味堂

以後食晏或晚飯都可以去百味堂喇!當然唔係叫你食雪糕食飽啦,因為佢喺尖沙咀新開嘅旗艦店增設「店中店」概念,首次收藏有韓式鐵板燒嘅百味堂.鐵及百味堂喺入面。聽日呢間店中店會正式營業,即刻睇吓有咩食先。 韓食之中一定有泡菜,加上熱辣辣嘅鐵板燒你會諗到咩呢?梗係韓式泡菜炒飯(HKD88)啦!香氣十足又酸酸辣辣嘅泡菜炒飯愈食愈開胃,配埋炸蓮藕片就更加香口。 仲有口味傳統啲嘅韓式香辣豬肩肉伴魷魚飯(HKD178),將韓式辣醬搽喺魷魚上面,加上醬炒過嘅豬肩肉係雙重滋味呀!不過呢款嘅飯底唔係泡菜炒飯,以免搶咗餸菜嘅味道。 想特別啲亦有加入韓式手撕麵片同水牛芝士嘅韓式海鮮火鍋湯(HKD168)。湯底落足蕃茄,感覺好西式。師傅煮湯嘅時候先即刻手撕麵片放入鍋,煮起會一粒粒咁,雖然唔似年糕咁煙韌,但都比一般嘅麵有咬口。而且火鍋湯都有唔少海鮮,鮑魚、扇貝、蜆同蝦,起鍋前再灑啲芝士喺面,令味道更加香濃。 講咁耐,說好的鐵板燒唔係得呢啲嘅。One Tray 套餐(HKD158起)有齊韓式傳統醃漬物、時令沙律配柚子汁、韓式麵豉湯配蒸蛋、韓式炒辣海鮮、泡菜炒飯之外,主菜有韓牛西冷扒伴雜菜、韓式燒豬肋骨、韓燒三文魚扒或豆腐扒咁多選擇。 呢款係最貴嘅韓燒西冷牛扒(HKD298),牛扒以蒜油煎香,再放喺以小熱鍋煮緊嘅洋蔥上面熱多一陣先上菜,令濃味嘅牛扒帶香蔬菜嘅香氣,又可以減低油膩感。為咗方便上班族都可以品嚐到,遲啲會提供Dosirak韓式餐盒外賣,都有齊湯、飯、沙律、小食同主菜㗎。 食完正餐梗係食甜品啦!做得旗艦店當然有本店限定口味,日本靜岡蜜瓜雪糕(HKD98)有唔少靜岡蜜瓜粒,每層牛奶雪糕之間仲有純靜岡蜜瓜打成嘅果汁,味道超清甜!不過按蜜瓜嘅時節,大約到十月中就冇㗎喇,想食就要快手啲。 另一款本店限定嘅係焦糖咖啡雪花冰(HKD128)。喺牛奶雪花冰面加上招牌牛奶雪糕,再唧啲焦糖醬都未夠,仲會配一杯甘香嘅焦糖咖啡俾你淋落去,入口就唔會太甜啦。如果想試另一款口味,就要去山頂旗艦店喇,嗰度會配紅豆醬代替焦糖咖啡。 仲有一款幾特別嘅甜品係兩間旗艦店都有,韓國紅豆粥(HKD38)喺兩間店內以韓式鐵鍋即煲,主要用紅豆同柿餅煮成,再唧上薯仔或栗子蓉。   百味堂.鐵及百味堂 地址:尖沙咀梳士巴利道18 號Victoria Dockside K11 MUSEA B111店及B225A 店 電話:5205 1327 營業時間:星期一至日:11:30-15:00,18:00-22:00,星期六、日:11:30-22:00

0

【搞搞新意推果漾炸雞 韓風鰻魚扒包芝麻葉】The Joomak

韓式炸雞冇人唔鍾意食,但食得多都想有新口味。尖沙咀The Joomak就特別喺四月至六月,推出果漾炸雞系列,每月轉一款充滿果香嘅炸雞。仲有新加入嘅韓風鰻魚系列同開胃大碗麵午餐,即刻睇吓食邊樣先! 今個月率毛推出嘅炸雞新味係巴西莓炸雞(HKD198),用巴西莓蛋黃醬為炸雞增添淡紫色,配上菠蘿乾、紅莓乾、穀物片同南瓜籽,酸甜又脆口喎。 下個月就係紅火龍果炸雞(HKD198),今次用上紅火龍果蛋黃醬,配上南瓜乾、南瓜籽同核桃,感覺健康啲。 最後係六月嘅白桃炸雞(HKD198),白桃蛋黃醬清甜唔膩,配埋紅莓乾、香蕉乾、楊桃乾同杏仁片,果香味更加濃郁。 如果你都係鍾意邪惡口味,仲有新加入menu嘅川香麻辣炸雞(HKD198)!先爆炒四川辣椒逼出麻辣香氣,再淋上韓式辣椒醬、辣椒粉同蛋黃醬,食完要跑幾日消耗返囉。 叫份炸雞,配埋啖啖肉嘅鰻魚就大滿足喇。韓式烤美洲巨鰻扒(HKD288)經過韓式炙烤,比日式蒲燒鰻彈牙爽脆啲,焦香味更加明顯。再用生菜同韓國常見嘅芝麻葉包住一齊食,解膩又可以食多啲喎。 想輕食啲可以揀鰻魚泡菜炒飯(HKD168),以日式鰻魚炒飯為基礎,加入酸辣清爽嘅自家製泡菜,令炒飯甜辣香口,開胃又過癮。 未到晚餐,想lunch食得清爽啲?呢三款大碗麵應該幫到你。大醬豆卜大碗麵配素清湯(HKD68/純素)、香辣豬肉大碗麵配泡菜湯(HKD82)同韓式牛肉大碗麵配雪濃湯(HKD88)都有湯俾你濕濕口㗎。   The Joomak 地址:尖沙咀廣東道17號海港城海運大廈3樓LCX 34號舖 電話:2111 0851 營業時間:星期一至日:12:00-22:30

0

【素葷共融韓式素菜 回味激罕紅火龍果雪糕】素學堂

青衣城有咩新嘢食?新登場有全場唯一嘅韓式素食店BOBSANG樸生!第一個特別之處係素葷共融,因為一間舖分咗兩邊,左邊嘅Green.素食只供應全素自助餐、右邊則係素葷都有得食嘅單點餐廳。雖然素葷人士可以同枱食飯,但餐廳嘅爐頭就分開素食同葷食,等素食嘅你可以放心享用;其二就係餐廳所有用上芝士嘅菜式,都只用Daiya呢個素食界聞名嘅素芝士品牌,即使冇牛奶都有好濃郁嘅芝士味,唔係靚貨都唔俾你食囉! 餐廳開12:00,但未夠鐘就有食客等緊開餐喇! 小編今次選擇單點素菜,所以安排咗喺餐廳右邊位置,都幾多位㗎。呢度樓底夠高冇壓迫感,木系裝潢亦令人感覺幾放鬆。 外形趣怪嘅牛蒡凍豆腐(HKD65/原味)用咗九龍城老字號公和荳品嘅豆腐呀!豆腐質感厚實之中好細滑,豆味濃郁。原味以紫菜碎同芝麻醬拌勻一齊食,提升味道層次。加埋面頭炸到香脆可口嘅牛蒡絲,鹹鹹哋好正。想刺激啲可以試泡菜味(HKD65)、清新啲有萵筍味(HKD68)添。 炸腐皮芝士卷(HKD66/素泡菜)係其中一款用咗Daiya嘅菜式。以腐皮包住素泡菜、青瓜、甘荀、醃蘿蔔、牛蒡同素芝士炸成,香脆程度係一咬層腐皮已經散落喺碟度喇!點埋韓式甜辣醬就更惹味,如果想轉成葷菜可以揀泡菜牛肉(HKD68)或泡菜豬肉(HKD66)。 以芋頭、冬菇、紫椰菜同甘筍切絲煎成嘅四蔬韓式煎餅(HKD94),用無蛋奶素粉漿製作㗎。爽口清新,都幾飽肚喎! 主食點少得自選韓國撈麵呢,主料可以自己選配,呢款係素豬炒泡菜配麵(HKD68),另外有大醬豆卜(HKD58)。以菇菌類仿豬肉嘅口感,非常神似,一咬爆汁添;配埋柚子豉油汁,香得嚟酸味味,特別開胃。 不得不提自家製軟雪糕杯(HKD58),除咗冇奶類成分,仲有激罕見嘅紅火龍果味呀!味道清香唔會太甜,感覺幾輕盈;仲配有藍莓、士多啤梨等鮮果同甜醬穀物球,心理上冇咁罪惡感。 蜜桃玄米綠茶(HKD48/左)味道清淡中有微微米香,再以碟豆花混合出天然藍調,感覺更加清涼。想消暑啲亦可以試青瓜西柚冰茶(HKD48/右)。 雖然小編冇食自助餐,但都影俾大家睇睇。款式唔算勁多,但都算新穎。   BOBSANG樸生 地址:香港青衣青敬路33號青衣城一期119B舖 電話:3105 9836 營業時間:星期一至五:12:00-22:30;星期六、日及公眾假期:11:30-22:30

0

【全港首間炭烤韓燒 頂級1++韓牛運到】柞木炭家

韓燒係好食,但食得多都會覺得好油膩,令人想食又有啲卻步。不過依家唔怕喇!旺角以日韓做主題嘅新地標T.O.P開咗全港首間炭烤韓燒柞木炭家,以柞木炭網燒嘅肉唔單止鎖住肉汁Juicy啲,亦唔會有鐵板燒嘅油膩感呀! 開飯梗係要食埋環境,木色格局令人好relax,座位都好闊落,行入啲仲有露天位㗎。 店員會先介紹唔同部位嘅肉有咩分別,俾你更易揀到想食嘅口感。餐廳選用嘅韓牛都係1+或1++嘅頂級全羅道南韓牛,仲會按食材或時節轉換牛肉部位添。 菜單選擇都幾多,燒肉、海鮮、主食、Lunch Set等等加埋有過百款。 韓牛肋眼上蓋(HKD328)咁靚嘅雪花係咪好少見呢?因為好多地方都將牛肋眼上蓋切到細細嚿咁,好似柞木炭家原條上真係極少!原條燒兩邊一陣先剪開,2-3分鐘左右已經食得喇!牛肋眼上蓋嘅肉好軟腍,油脂比例亦啱啱好,入口非常Juicy!輕輕咀嚼啲油脂好似化開咁! 牛脷嘅爽口都吸引到唔少人,但唔同切法都會令口感轉變,牛舌三吃(HKD228)就可以一次過食到爽、腍、脆三種口感。大家最熟悉嘅韓國醬料可能係大醬,但原來韓國人燒烤都好鍾意點熱辣辣嘅鹹魚醬,仲會擺埋喺爐上面一直燒住,燒咩肉都可以點,大家可以喺度試到,嗰種鹹香feel有啲似蝦醬㗎! 厚切濟洲黑毛豬梅肉(HKD158)雖然冇韓牛嘅油香,但肉質都好鬆軟,燒起嚟唔會比韓牛差㗎!而且有黑椒輕輕調味過,燒完就咁食都好夠味。 雞肉拼盤(HKD128)一雞三味,圖左邊開始係泡菜味,唔會好辣;黑椒海鹽味清啲,肉味會明顯啲;秘製燒汁甜中帶鹹幾惹味。肉好嫩滑,就算失手燒耐咗啲都唔會好乾。 一定唔少得有泡菜啦!成棵俾你自己剪,就咁食又得,燒熱食仲更軟熟入味呀! 主食中嘅柞木雪濃湯飯(HKD128)又食得又吸睛添!唔好影太耐相呀,唔係就浪費咗以牛骨同牛內臟煲12個鐘嘅雪濃湯㗎喇!趁熱淋熟大肉片,配埋大量蔬菜,清甜嘅湯飯都啱夏天食! 另一道柞木韓牛飯(HKD158)選用上乘嘅1++厚切韓牛粒,色澤嫩紅,油花分明,入口甘香鬆化。石鍋飯配咗蘿蔔絲、冬菇絲、青瓜絲、韓國生雞蛋等拌飯配料,再淋上自家特製嘅韓式拌飯醬,口感豐富仲好飽添! 有選擇困難嘅朋友可以參考吓Dinner Set。提一提,泡菜都係成棵上,不過影相要靚就轉小碟囉。 等唔切晚餐都可以試Lunch Set,一樣好吸引㗎。   柞木炭家 地址:九龍旺角彌敦道 700號 T.O.P 5樓 501舖 電話:2619 0868 營業時間:星期一至日:11:30-23:00

0

【韓式素食你又食過未?人氣炸雞店推$198放題】THE JOOMAK

THE JOOMAK一向以新派韓食出名,最近佢就同Green Monday合作,等素食朋友都可以食到創意十足嘅韓風美食,仲要係放題添呀,韓式素放題你試過未呢? 由即日到6月30日,逢星期三(公眾假期除外),THE JOOMAK會推出90分鐘素食放題嘅優惠(HKD198/需加一),當中有成十幾款韓式素菜,包括韓國水梨卷、素芝士南瓜甘筍熔岩包同韓式甜辣素炸雞等,仲可以加(HKD88)任飲多款韓式調酒及無酒精飲品等。 小編試咗水果覆盆子紅醋,微酸嘅果汁味,攪勻咗再飲啲甜味出晒嚟。 素芝士南瓜甘筍熔岩包(需於訂位時預留),素包塗上牛油烘烤食落更加香脆可口,因爲無蛋嘅關係,比一般麵包更鬆軟,而且南瓜香甜,每款配料點上南瓜芝士漿後味道更多層次。 韓國水梨卷入面嘅食材清爽香甜,係飽肚清新之選呀! 素炸雞食落似足食緊真炸雞咁,外脆內軟而且質感腍滑,再加埋甜辣醬,同真炸雞一模一樣呢! 羽衣甘藍煎餅,煎得好香口,味道絕對唔草青更加唔會苦,杞子散發出嘅甜味非常特別,配埋特色醬汁,微酸會更加開胃,減輕油膩感。 紫薯素芝士薯條,同普通薯條唔同嘅係用咗甜薯,所以有天然嘅甜味,加咗紫薯粉甜甜哋,不過因為配甜蕃薯,所以唔會好怪,仲有素芝士醬可以點,食落就鹹鹹哋! 奇亞籽素奶凍 (需於訂位時預留),有士多啤梨味、韓蔘蜂蜜同芝麻味,奶凍冇用到魚膠粉,都可以做到奶凍嘅厚實口感,因為落咗椰汁,所以更加香滑。個人最鍾意士多啤梨味,喺椰奶入面混入士多啤梨果醬,甜絲絲,仲有食用嘅玫瑰花做裝飾,少女心十足呢;而芝麻味就放上大量芝麻碎,味道非常香濃,最後韓蔘蜂蜜因為有蜜糖而帶有柑甜味,減少咗人蔘嘅苦味,而椰奶入面仲有奇亞籽,膳食纖維非常高呢! THE JOOMAK 地址:尖沙咀廣東道3-27號海港城海運大廈3樓LCX 34號舖 電話:2111 0851 營業時間:星期一至日:12:00-22:30

0

【90分鐘任食韓式青口煲 升級仲任歎特色酒】THE JOOMAK

鍾意去尖沙咀、食海鮮同飲酒嘅朋友要注意喇,THE JOOMAK又有新優惠!由4月16日至5月31日逢星期一及二(公眾假期除外),可以每位HKD298喺90分鐘限時任食青口煲優惠享用兩款新推嘅青口煲,仲會送你一客香脆炸蕃薯條,唔夠喉可以優惠價每位HKD30無限加點炸蕃薯條或薯條。 今次兩款新嘅青口煲都係走韓風,第一款係牛油馬格利青口煲(原價HKD268)。馬格利酒口感清新帶微甜,平時多數用嚟調配cocktail,今次將佢混合清香嘅蒜蓉牛油,變成韓式濃稠白汁煮爽滑紐西蘭青口,甜甜香香嘅味道令人想一食再食。 第二款係泡菜蕃茄青口煲(原價HKD268),用韓國師傅醃製最地道風味嘅韓式泡菜,加上蕃茄汁,調配成秘製韓式泡菜蕃茄紅醬汁煮紐西蘭肥美青口。最後灑上大量Mozzarella芝士,有少少拉絲效果,辣中帶鹹香嘅味道會忍唔住想啤一啤囉!所以呢個任食青口煲可以俾大家有Free Flow Plan飲品任飲優惠: 選擇一) 每人加HKD38,可以無限享用手調咖啡、果汁、汽水、朱古力同茶類。 選擇二) 每人加HKD88,可以任飲多款韓式Cocktails、紅酒、白酒、啤酒同無酒精特飲(例如花漾果茶)。 簡單介紹吓特別啲嘅飲品啦: 韓Shake(兩位用)有四款口味:藍莓薄荷、爆谷荔枝、青瓜梳打同柚子梳打。呢款飲品會跟埋套調酒器,有木樁、長鐵匙、糖漿、新鮮水果同酒等等,專業調酒師會教你點樣製作Cocktail,真係又食又玩。 MAKGEOLLI有原味、葡萄同士多啤梨,係朝鮮半島用米發酵而成嘅濁米酒,酒精含量大約6-8%,甜甜哋幾啱女士飲。 水果覆盆子紅醋 (兩位用)混合韓國梨汁、新鮮橙汁、青檸汁、薄荷葉同紅桑子果醋,再加入新鮮水果,甜蜜冰涼嘅感覺都幾啱依家飲。   青口煲優惠供應時期: 日期:2018年4月16日至5月31日 逢星期一及二(公眾假期除外) 用餐時限:90分鐘 供應時段:全日   THE JOOMAK 地址:尖沙咀廣東道17號海港城海運大廈3樓LCX 34號舖 電話:2111 0851 營業時間:星期一至日:12:00-22:30

0

【打邊爐都有得撈起 開年飯福袋好意頭】四季文昌 Coco Kitchen

無論公司定朋友之間嘅開年飯,一定要食啲意頭嘢嘅!火鍋店四季文昌就有一系列開年食品同大家一齊慶祝,撈起、和牛拼盤、黑松露福袋等等美食,俾大家打邊爐都多啲新意。 文昌賀年齊撈起(HKD268)鮮味十足,以每日新鮮直送嘅挪威三文魚刺身做主角,肉質細嫩鮮美;仲有海鮑片絲、哈蜜瓜絲、青瓜絲、甘荀絲、薄脆、魚仔同炸花生,8款食材寓意風生水起、年年有餘! 黑松露鮮蝦福袋(HKD88)以日本油揚做皮(即是炸腐皮豆腐),混合黑松露同鮮蝦肉後釀入福袋。咬開福袋會有一股黑松露香氣湧上嚟,爽口多汁嘅蝦肉令人更加開胃。 七彩芝士流心丸(HKD108)係全人手打嘅新鮮丸子,分別用上墨魚、士多啤梨、黑松露、墨汁、芒果、紫薯同斑蘭做成,裡面再釀入香濃芝士粒,爆芝嘅美味係芝士控唔可以錯過㗎! 過節點都有樣豐富啲嘅食物先夠開心,和牛獻瑞拼盤(HKD398)有齊日本同澳洲嘅高質和牛!拼盤有油花較豐富嘅日本佐賀和牛牛肩肉、嫩滑無比澳洲M9和牛牛肩肉、有嚼口嘅安格斯牛頸脊、加拿大牛舌粒同安格斯牛粒5款咁多,一次滿足愛牛人士嘅「肉」望! 黃金滿屋(HKD68)係賀年限定推介火鍋配料,將即叫即炸嘅油炸鬼釀入每日以新鮮蝦肉打製嘅蝦滑,面頭再鋪滿橙黃色嘅飛魚子,集香脆同彈牙於一身,又係好滋味!   四季文昌 Coco Kitchen 地址:旺角荔枝角道33號百匯軒地下及1樓全層 電話:2499 2700 營業時間:星期一至日:11:30-00:00 尖沙咀分店 地址:尖沙咀金巴利道35號金巴利中心地下A及B舖 電話:2778 7955 營業時間:星期一至日:11:30-00:00

0

【Cute爆雪人綠茶火鍋 坐鞦韆浪漫迎聖誕】Seoulmate Cafe

Seoulmate Cafe喺西環嘅時候已經好多人專程去食,依家搬咗去銅鑼灣仲方便添。佢哋嘅甜品、韓式菜同西式菜都好別緻,每款菜式嘅用料同配搭都好有心思。 餐廳坐滿可以容納大約100人,有部分係露天茶座,掛滿晒燈飾好有情調,仲有鞦韆餐椅添。呢度仲有個小高台,試過有客人book場搞生日會、婚禮同歌迷聚會㗎。 聖誕梗係食大餐啦,芝士波波火鍋配龍蝦伊麵(HKD538)最令人驚喜嘅除咗選用原隻活波士頓龍蝦煮,肉質夠晒鮮味爽口之外,炸過嘅伊麵口感好得意,外面有少少煙韌,中間就好似棉花糖咁彈吓彈吓。芝士火鍋都用咗幾款煮成,有伊文度芝士、車打芝士、巴馬臣芝士粉等等,味道唔會好鹹同濃味,感覺唔算膩。 以為個餐咁就完咗?梗係未啦,仲配有麵包粒、韓式炸雞、巴馬火腿、腸仔同蔬菜,兩個人食都幾滿足㗎。 另一個係少女心推介,綠茶白朱古力雪人火鍋(HKD168)成個聖誕老人咁,一定係相機食先。火鍋嘅綠茶味濃,雖然配咗白朱古力,但唔會極甜。雪人造型嘅棉花糖同雪米糍、士多啤梨精靈、泡芙、麵包同朱古力卷,作為飯後甜品真係好豐富! 仲未夠?推介多個K爆米餅同雪糕配柚子芒果(HKD58),每層脆卜卜米餅之間都有柚子醬,配埋芒果肉同雪糕,真係心都俾佢融化呀! 綠茶拿鐵烤自家製棉花糖(HKD54)係呢度招牌熱飲之一,層棉花糖都幾厚,趁熱飲會容易啲食晒層棉花糖。綠茶味比火鍋嘅淡啲啲,但已經好夠味。   Seoulmate Cafe 地址:銅鑼灣駱克道491-499號京都廣場4樓 電話:2104 6788 營業時間:星期一至日:12:30-23:30

0

【爆趣氣球沙律 韓式café食得又玩得】小火焰韓式咖啡餐廳

咪以為韓國淨係食炸雞,呢間喺觀塘嘅小火焰韓式咖啡餐廳,以韓國菜做基礎而設計咗好多新款嘅Fusion菜,仲帶咗幾款韓國新派料理,無論主菜定甜品都可以滿足到你個胃呀!成間鋪都播住韓國流行曲,迷妹絕對心花怒放,用咗螢光橙色嘅唔知又係應援緊邊隊人氣組合呢?無論室內室外,座位都好足夠,多幾個朋友一齊食都無問題啦! 大廚介紹嘅呢款水牛芝士氣球沙律 (HKD128),係由細細嚿嘅水牛芝士充氣而成嘅,佢哋仲話可以last到24小時!呢款沙律將材料分開幾份,要食啲咩大家隨便揀! 有無人都見過呢款瘋狂打卡嘅雪糕筒黑松露芝士扁意粉 (HKD78),食嗰陣都好疑惑點解個雪糕仲未溶嘅?原來係cream cheese嚟,撈落個扁意粉度仲會更加香滑。 同朋友食嘢點可以唔嗌個拼盤樣樣試啲,小火焰拼盤 (HKD168)有齊晒薯條、豬肋骨、雞翼同餃子,一次過滿足晒你所有願望。啲薯條仲要係小編最愛嘅波浪形厚薯條,正! 又到咗少女打卡位嘅雪山班戟 (HKD78),將蛋白打成霜狀,再淋上糖漿,連埋班戟一齊食,蛋白霜食落好似綿花糖,但又唔會有食咗都唔知嘅感覺,仲可以自己揀落幾多糖漿,咁就唔驚甜得滯啦。 小火焰韓式咖啡餐廳 地址:觀塘觀塘道410號觀點中心1樓1號舖 電話:3549 6060 營業時間︰12:00-22:30

0

【韓鍋夾本地水耕菜 即炒芝士鍋清新味】韓讚

銅鑼灣有唔少樓上餐廳,喺渣甸街嘅新商廈Aura on Pennington就有間以清新為主嘅韓國餐廳韓讚,除咗有好多蔬菜元素之外,亦保留傳統風味嘅菜式。 呢度設計充滿色彩,感覺好時尚年輕,啱晒後生仔女嚟。 韓潮春川芝士雞鍋(HKD278)同價可以揀黑豚肉,加HKD20可以轉牛仔肉。服務員會先幫你炒熟蔬菜、年糕同肉類先,淨係起鍋時嘅蒜香味小編已大叫肚餓喇!想要幾辣就炒嘅時候講,因為邊炒邊調味,今次落咗一半醬,辣度適中,始終韓國辣醬帶甜,唔會覺得噴火要飲水。炒到咁上下熟先落芝士就溶得啱啱好,包埋雞肉一齊食口感嫩滑又滿足。 大家有無發覺韓潮春川芝士鍋同雜錦海鮮鍋(HKD398)都好多蔬菜,仲好新鮮呢?餐廳選用本地水耕菜,所以絕對清甜新鮮。呢個大堆頭海鮮鍋,有新鮮大蝦、原隻韓國魷魚、韓國八爪魚、青口同蜆,材料非常豐富。微辣嘅韓式湯底滲透海鮮同蔬菜嘅甜味,亦令食材更加滋味。相比之下,海鮮鍋比芝士鍋無咁辣,味道鮮啲。 睇劇集成日見韓星食牛骨大蔥湯(HKD148),小編都唔執輸試一試。經過長時間熬製到奶白色嘅牛骨湯入口清甜,又有濃郁嘅牛味,真係可以當湯飲!牛肉煲到好腍但依然有咬口,仲有滑溜溜嘅韓國粉絲,完全食到正宗韓味呀! 韓國養生粥品之一嘅人參崧子雞粥(HKD88)一定俾到驚喜你,新鮮人參同紅棗令粥底可以用fresh嚟形容,綿滑香甜,好啱秋冬食。加上崧子同脆米增加雞粥口感層次。   韓讚 地址:銅鑼灣渣甸街66號Aura on Pennington 2樓 電話:2152 2883 營業時間:星期一至日:11:30-23:00