Tagged: 韓國菜

0

【韓鍋夾本地水耕菜 即炒芝士鍋清新味】韓讚

銅鑼灣有唔少樓上餐廳,喺渣甸街嘅新商廈Aura on Pennington就有間以清新為主嘅韓國餐廳韓讚,除咗有好多蔬菜元素之外,亦保留傳統風味嘅菜式。 呢度設計充滿色彩,感覺好時尚年輕,啱晒後生仔女嚟。 韓潮春川芝士雞鍋(HKD278)同價可以揀黑豚肉,加HKD20可以轉牛仔肉。服務員會先幫你炒熟蔬菜、年糕同肉類先,淨係起鍋時嘅蒜香味小編已大叫肚餓喇!想要幾辣就炒嘅時候講,因為邊炒邊調味,今次落咗一半醬,辣度適中,始終韓國辣醬帶甜,唔會覺得噴火要飲水。炒到咁上下熟先落芝士就溶得啱啱好,包埋雞肉一齊食口感嫩滑又滿足。 大家有無發覺韓潮春川芝士鍋同雜錦海鮮鍋(HKD398)都好多蔬菜,仲好新鮮呢?餐廳選用本地水耕菜,所以絕對清甜新鮮。呢個大堆頭海鮮鍋,有新鮮大蝦、原隻韓國魷魚、韓國八爪魚、青口同蜆,材料非常豐富。微辣嘅韓式湯底滲透海鮮同蔬菜嘅甜味,亦令食材更加滋味。相比之下,海鮮鍋比芝士鍋無咁辣,味道鮮啲。 睇劇集成日見韓星食牛骨大蔥湯(HKD148),小編都唔執輸試一試。經過長時間熬製到奶白色嘅牛骨湯入口清甜,又有濃郁嘅牛味,真係可以當湯飲!牛肉煲到好腍但依然有咬口,仲有滑溜溜嘅韓國粉絲,完全食到正宗韓味呀! 韓國養生粥品之一嘅人參崧子雞粥(HKD88)一定俾到驚喜你,新鮮人參同紅棗令粥底可以用fresh嚟形容,綿滑香甜,好啱秋冬食。加上崧子同脆米增加雞粥口感層次。   韓讚 地址:銅鑼灣渣甸街66號Aura on Pennington 2樓 電話:2152 2883 營業時間:星期一至日:11:30-23:00

0

【韓國潮食殺入黃埔 冰豆漿冷麵消暑透心涼】韓宮

睇韓劇見啲餐廳食物份量都好重量級,黃埔嘅韓宮就由一位大韓媽媽主理好多大大份嘅韓國料理,除咗炸雞同芝士鍋之外仲有好多地道菜式,絕對可以俾你重新認識咩叫韓國料理。老闆娘為咗新menu仲專登飛返家鄉,將近期大熱嘅豆漿冷麵帶返香港添。 7月10日起餐廳仲有配合夏天食嘅新菜式同大家見面,快啲約定朋友一齊嚟啦! 好多時食沙律都怕得細細份或者好少肉會唔抵,但芥末海蜇豬手沙律 (HKD258)不論蔬菜同肉都係堅!勁!量!招牌豬手絲、爽口彈牙海蜇、鮮甜青瓜片、紅黃燈籠椒、蟹柳同蛋絲堆到成座山咁高,初時都怕芥末味嘅醬汁會好辣,但加埋柚子醬調和返,估唔到又甜又辣都可以係friend嚟㗎喎。 星級鮑魚石頭鍋飯 (HKD248)成塊面咁大碗,淨係4隻鮑魚同一大勺蟹籽已經值回票價啦!有埋秘製醬汁提鮮,飯又有少少焦香,滿足到由心笑出嚟! 小編勁愛蒜蓉柚子醬豬腩肉 (HKD228),完全唔會令你成口蒜頭味同埋一啲都唔辣,豬腩肉幾腍,連軟骨都可以咬埋吞落肚,仲一啲都唔肥,食多幾件都唔會有罪惡感,唯一要提提嘅係唔愛甜食的話就要撥走少少醬料。 冷麵食得多,好似呢度冰豆漿冷麵(HKD108)連冰上嘅就少有喇,湯底用韓國飛過嚟嘅豆漿煮成,唔會因為啲冰溶咗而變得淡口,清甜無油,成碗湯飲都得。溝埋黃豆粉會杰啲,但豆味會更加香濃,一啖麵一啖湯咁食係最好嘅食法,唔好就咁夾一撮麵咬呀。 部隊年糕芝士麵(HKD198)用返韓國嘅麵、年糕同魚糕片,煙韌彈牙到令人欲罷不能。而且辣醬同芝士比例啱啱好,唔會令你滯到食唔到其他嘢。 韓宮 地址:紅磡黃埔新村民兆街16號地舖 電話:2334 5567 營業時間:星期一至日: 12:00-23:00

0

【機票錢都慳返 弘大人氣吉列牛登陸旺角】吉列牛忌廉烏冬專門店

喺首爾弘大超受歡迎,成日大排長龍嘅吉列牛忌廉烏冬專門店Kobekyu,早排喺香港開設第一間海外分店。大家嚟到除咗可以食到大熱嘅吉列牛,仲有好多好野食㗎,一齊跟埋小編去試下啦! 餐廳地方闊落,有成60個位,可以約埋啲朋友仔坐低慢慢燒一大餐。 嚟到點可以唔試韓國大排長龍嘅吉列牛定食(HKD148),份量十足㗎,有成24件咁多!每件嚟到外層脆卜卜,而內裡粉紅,要自己再煎多2-3秒。咁就食到酥脆表層同帶有少許濃香肉汁嘅嫩滑牛肉啦!最後仲可以點佢地嘅Wasabi秘製醬汁或者特調沙律醬嚟食,提起牛肉香味添。另外仲有個套餐有埋名物咖喱忌廉烏冬,店主建議大家先唔好攪拌,分開食出食材嘅層次感會更加好味㗎。 喺呢個拉絲年代,又點可以唔試Kobekyu秘製蛋卷(HKD68) 嘩,小編目測自己拉絲拉到有成8cm咁長,差唔多有手掌一半!Mozzarella芝士加埋蛋嘅嫩滑,入口即融,幾乎被芝士蛋汁融化! 夏天熱辣辣最想食凍冰冰嘅野,呢個雪冰冷麵(HKD62)用咗湯底製成冰再擺入湯度,就算啲冰點樣融法都唔會令味道變淡。再加埋大量椰菜、紅蘿蔔、洋蔥同生菜,更加有清爽嘅感覺!食落唔肥膩,啱晒夏天。 Kobekyu牛油蜜糖單骨雞翼(HKD65)雞翼整得好香口,除咗有蜜糖同牛油嘅香氣之外,仲散發陣陣蒜香。加上佢係單骨雞翼食起上嚟好方便,鍾意仲可以加埋檸檬汁,令雞肉更嫩滑,味道更清香添! 吉列牛忌廉烏冬專門店 電話:3705 9965 地址:旺角彌敦道726號17樓 營業時間:星期一至日:12:00-15:00;17:30-23:00

0

【謀殺少女心!韓式人氣棉花糖炸雞】YadlliePlate

韓國多達50多間分店嘅手工炸雞專門店YadllieChicken,喺香港已經有一間分店啦!香港店名YadlliePlate,選址旺角兆萬中心,嚟到香港仲有香港獨有特色食物,例如乳酪窩夫炸雞,棉花糖作料炸雞等等,全部都係香港人而設,而且仲會聆聽客人意見調整口味,一齊去睇下有幾特別! 餐廳氣氛甚佳,感覺好舒適。 嚟到YadlliePlate又點可以唔試下造型出位又好食嘅棉花糖作料炸雞(HKD168)呢?YadlliePlate出名比起坊間炸雞更為脆身薄皮而入味。原來Yadllie好講究用料同製法,除咗使用韓國進口雞、醃料之外,仲會將雞用20多種天然材料做成嘅醬料醃製48小時。等雞件入味後更會再等10小時瀝乾水份,再用人手喺雞件輕輕撲上韓國進口嘅薄乾粉,只為求雞件蘸上嘅炸粉更加薄身!咁係因為雞件上面嘅炸粉越厚身,出嚟就只食到大量油份同炸粉,雞嘅鮮味就會被蓋過,所以越薄越有雞味、越薄脆!到炸製雞件嘅步驟,就會使用韓國雙重高壓油炸技術將雞件炸到金黃香脆! 香港分店當然唔少得香港先有嘅特色食物!包括有乳酪窩夫炸雞(HKD178)同棉花糖炸雞(HKD168)。雞件總共有5個辣度可以選擇,揀最辣嘅5星後悔級,挑戰成功仲會有一份獎品添!今次唔係好食得辣嘅小編一於試下棉花糖炸雞!就咁睇樣,棉花糖漲卜卜圓沽碌咁擺喺炸雞上面真係好可愛,謀殺所有少女心呀!然後店員就會用火槍將棉花糖燒呀燒,燒到棉花糖由軟綿綿一個波,變成一條條甜絲絲黏住炸雞。食嘅時候就會感覺到又甜又辣,棉花糖嘅甜味輕輕中和咗雞件嘅辣味,好容易入口,雞件又豐富多汁脆皮,真係好好食呀! 手抓飯(HKD88)材料有紫菜、蟹籽同芝麻。特別之處係你點咗之後會有韓國店員喺你面前將米飯同各種食材搓成一球球,總共有12球咁多,粒粒圓沽碌都幾得意㗎!食落會滲出紫菜同芝麻香味,同加上蟹籽粒粒脆卜卜嘅口感,米飯煙煙韌韌,食落真係好夾! 香港有好多唔同種類嘅街頭小食,其實韓國都一樣㗎!想一次過食晒幾款韓國小食?首爾街頭小食盤(HKD188)就啱晒你喇!裡面有齊多款韓國人氣小食,包括有年糕、魚餅、雞蛋同埋炸物。係咪一次過滿足晒你多個願望呢? 食嘅時候,魚糕串同年糕吸晒甜辣秘製醬汁,食落甜甜辣辣又煙韌,混合半溶芝士更煙韌濃郁!另外仲有脆卜卜炸物,口感好豐富! 小食類小編好推介大家試試脆炸雞腎(HKD68),每一日廚師都會將每一件雞腎嘅筋逐一去除,確保食落嘅口感唔韌,好用心㗎!雞腎唔韌得嚟好香脆,配埋粒粒脆炸青陽辣椒,鍾意食炸物嘅朋友一定會好鍾意! 甜品有三款雪冰可以選擇,包括韓式拌飯雪冰(HKD88)、韓式黏糕雪冰(HKD68)及草莓雪冰(HKD68),款款都各有特色。最後小編決定試試韓式黏糕雪冰。冰上面鋪上滿滿一層黃豆粉,裡面夾住黏糕同埋杏仁脆片。黏糕煙煙韌韌,沾上黃豆粉感覺更幼滑。至於下面嘅雪冰,因為加咗煉奶,混合一齊食感覺又香又甜,配埋黃豆粉同杏仁片感覺更香,又有卜卜脆口感! YadlliePlate 地址:旺角西洋菜街1號兆萬中心11樓 電話:2360 0233 營業時間:星期一至日:17:00-00:00

0

【親民街頭食店 享受韓國美食真滋味】Haru Haru

香港人生活節奏急促,一日24小時似乎都唔夠用,呢間位於佐敦南京街嘅Haru Haru,就連個店名都令人聯想同時間有關,Haru Haru譯作「一日一日」。店舖大部分食材均由韓國入口,廚師亦係由韓國人主理。高級質素,但係價錢相當親民,一大碟泡菜炒飯只售HKD45!最適合同好友叫滿一檯食物,一邊吃飯,一邊喝啤酒,享受一頓韓風宴! 小編話你知啦,Haru Haru嘅老闆就係藝人譚淇淇,佢更會不時出現喺餐廳。想撞到佢就要去試下啦! 泡菜炒飯(HKD45)上檯陣陣香濃泡菜味撲鼻,聞到都已經流曬口水。加上蛋汁拌炒飯粒口感更香滑。另外可自行配上香蔥同紫菜,增添風味。 韓國料理必食菜式之一,人參雞湯(HKD118)湯頭濃郁,真材實料。雞肉非常嫩滑,人參味香濃但又唔會嗆,適合冬日飲碗暖下身。 小編就最愛食部隊火鍋(HKD188)啦。貪材料十分豐富,選擇夠多。湯底香濃,每樣食材都非常惹味,令人欲罷不能! Haru Haru 地址:佐敦南京街6C百達大廈地下A2-A3號舖 電話:2751 9900 營業時間:星期一至日: 12:00-00:00

0

【人情味濃厚 真正韓國人主理住家料理】韓宮

自從地鐵黃埔站開通後,去黃埔覓食更方便,小編時不時都會去轉黃埔食好西。黃埔地鐵站A出口,一出去就會見到韓國餐廳韓宮。由一家韓國人經營,將韓國傳統美食帶到黃埔,去黃埔想食返餐正宗韓國菜,呢度係唔錯嘅選擇。 餐廳除咗有炸雞、燒肉外,仲有多款韓國地道菜式選擇, 每款菜式份量都大大份,想食多啲菜式就要約埋一大班朋友啦! 芝士排骨(HKD238)芝士同排骨嘅比例係一半一半,就算唔加芝士排骨都好JUICY。 芝士控當然會將成塊排骨浸入芝士漿,拉絲無難度! 韓式豬手 (Queen Size HKD198, King Size HKD298) 食豬手最驚無從入手,呢個豬手已經預先拆咗骨,好細心呀。夾塊豬手肉再點韓式醬再生菜包住食,入口一啲都唔肥膩,仲可以補充到骨膠原。 Half Half Combo(HKD188) 一共有六種口味炸雞,你可以喺入面自由選擇兩款,小編就揀咗甜酸炸雞同原味炸雞。一上檯已經聞到好濃郁嘅雞味,甜酸炸雞唔會太辣,適合不嚐辣又想食韓國甜酸炸雞嘅朋友。另外,原味炸雞唔會比醬汁蓋過咗雞肉味道,再配上蜜糖芥末醬味道更佳。 韓宮 地址:紅磡黃埔新村民兆街16號地舖 電話:2334 5567 營業時間:星期一至日: 12:00-23:00

0

【尋找正宗韓國滋味 麼地道隱蔽韓燒】ChumChum味

尖沙咀韓國街有好多韓國餐廳就係人都知啦!其實麼地道都有一間韓國餐廳ChumChum味,食物好有水準,又夠晒私隱度,同成班朋友吹水傾下計好舒服㗎! 韓式炒粉絲(HKD80)雖然係炒,但係一啲都唔油,味道調得剛剛好,除咗食得到少少鹹味,仲食得到每樣食材嘅鮮味。豬肉、蘿蔔絲、菇、洋蔥、菠菜每樣都新鮮爽脆。粉絲有彈性,入口彈牙煙韌。就算係唔識揸筷子嘅小編都唔怕夾到斷晒! 八爪魚沙律(HKD138)小編極力推介!整個沙律配搭好出色!所有食材都好新鮮爽脆,尤其係士多啤梨好爽脆鮮甜,藍莓好甜,每一啖都有水果鮮甜味爆發出嚟。加埋八爪魚新鮮有彈性爽口實肉,同埋新鮮到脆卜卜嘅沙律菜,配上微酸嘅沙律醋,一次過帶出食材鮮甜味。 西冷(HKD145)睇住牛肉慢慢燒,肉汁慢慢滲出嚟,真係等到流晒口水!入口嘅時候牛肉肉汁非常豐富,入口較實肉,慢慢咀嚼更會發現牛肉味道香濃。 特級牛頸肉(HKD250)牛肉脂肪分佈好平均,肥瘦好均勻,鮮紅牛肉加上雪白脂肪,望到都知道好食!將牛肉一塊塊擺去燒嘅時候仲散發住濃濃牛肉香味呀!可能係先天條件好脂肪分佈平均,呢款牛肉入口質感柔嫩,但係仍然可以保持到少少彈牙嘅口感,食落牛肉味道濃郁,仲有豐富肉汁添! 超級醃製牛肋骨(HKD188)可能係一早已經醃製好嘅關係,牛肋骨嘅肉質比較腍,有入口即溶嘅感覺。醃料配搭非常得宜,牛肉味道除咗加倍惹味之外,仲食得到牛肉鮮味,帶有輕輕甜味。 韓式醬油炸雞(HKD178)呢款醬油炸雞口感十分酥脆,一咬落去完全唔會感覺到黏稠,值得一讚嘅係佢亦都唔會鬆散,咬落去唔會雞皮四散,論論盡盡嘅小編都無食到一身都係。甜甜地嘅醬油味道加上香脆芝麻,令香味加倍香甜。雞肉質感嫩滑,食完一件又想食多件! ChumChum味 地址:尖沙咀麼地道37-41號港匯廣場17-20 & 31-34地下 電話:2363 1100 營業時間:星期一至日:12:00-00:00

0

【熱辣辣足料石頭鍋飯】首爾

出到旺角周圍都係大型商場,成日食嚟食去都係嗰啲,了無新意,仲要等位,真係好攰呀!想食一餐平平地,乾淨得嚟有啲質素唔通真係咁難?放心!小編最近搵到位於旺角通菜街嘅韓國菜餐廳首爾,除咗價錢合理、環境理想、食物質素仲幾好添!大家去到旺角食飯又多一個選擇啦! 海鮮蔥餅(5.5吋)(HKD40)蔥餅質感好香脆,一啲都唔油,食落有少少煙韌但感覺好香口。上面嘅蝦好爽甜,加埋烤過嘅蔥香味同埋芝麻,令整個蔥餅更香,入口更惹味。 傳統石頭鍋飯(牛肉)(HKD69)一共有三種口味可以選擇,包括烤肉(HKD65)雞肉(HKD65)同牛肉(HKD69)。飯的配料有芽菜、磨菇、粟米、紅蘿蔔、牛肉片,中間有一隻窩蛋同埋伴有少許辣醬。石鍋飯拎過嚟嗰陣好熱,仲有聲有煙!牛肉十分足料,配料亦非常豐富。整碗飯唔太硬,將窩蛋同牛肉混和,米飯吸收咗肉汁之後更加香!飯粒偏腍但有嚼勁,底層有香脆飯焦,若混和一齊食用,軟中帶硬,口感更豐富!如果鍾意食辣嘅朋友仲可以另外再加辣醬添。 獨家秘製烤肉豆腐鍋--泡菜鍋(配飯)(HKD65),可以選擇配手打烏冬加(HKD9)或者唔配飯(-HKD2)。鍋入面材料有蕃茄、泡菜、烤肉(韓式豬肉)、豆腐、蛋同粉絲。泡菜鍋嘅湯底辣度適中,味道好香辣。裡面嘅豆腐好嫩滑,吸收咗湯汁好入味。蕃茄同泡菜嘅配搭亦好夾,突顯出湯底嘅酸辣但輕輕帶有新鮮蕃茄嘅鮮甜味,整個配搭一流呀! 食飽飽想飲返杯?唔怕,餐廳有提供韓國燒酒㗎!除咗有原味真露燒酒(HKD58),仲有柚子味燒酒(HKD58)同蜜桃味燒酒(HKD58)添!另外再有提供其他酒精類飲品大家可以睇睇喎! 首爾 地址:旺角通菜街21號地舖 電話:6287 6376 營業時間:星期一至日:11:30-23:00 首爾石鍋燒 地址:旺角通菜街1M-1T號華發大廈地下C舖 電話:2809 4938 營業時間:星期一至日:11:30-23:00