Tagged: 韓國

0

【首爾必食海產店歎盡各式鮮味 現抓活貝+巨型海鮮鍋】首爾海產店

去得韓國,除咗韓牛就一定要食海鮮!咁首爾有咩必食海產店?睇埋落去就知蒸盤、炸海鮮、海鮮鍋、醬油蟹等有咩選擇啦。 1. 日韓Fusion木盤蒸海鮮 View this post on Instagram 신선한 바닷속맛과 초원으 소고기맛이 어우러진 #츄라우미 나혼자산다 성훈편에 방송되었던 편백찜 스페셜세이로무시 먹으러가자!!! 상암점의 특징 #루푸탑 이 있어 새로운 분위기를 만끽 할 수있답니다. #강남맛집#역삼역맛집 #역삼맛집 #역삼동맛집 A...

0

【韓國甜品過江龍旗艦店 限定特飲×夢幻蛋糕】LE BREAD LAB

韓國人氣少女心甜品店LE BREAD LAB(르브레드랩),以草莓奶油捲做主打甜品。上年12月先喺尖沙咀開舖,依家話咁快就喺銅鑼灣開旗艦店喇。咁值得慶祝,所以將韓國人氣蛋糕款式帶埋過嚟,好似彩虹系列同熔岩蛋糕系列,仲有香港限定特飲添!加埋店內浪漫甜美嘅粉色裝潢咁夢幻,快啲約閏蜜一齊去打卡high tea啦。 彩虹系列有三種蛋糕,包括造型小巧精緻嘅小彩虹蛋糕(HKD198),兩個人食啱晒。 想大個啲可以揀彩虹雲朵蛋糕(HKD428),切開雪白嘅忌廉就見到六色彩虹喇。 還有選用皇牌草莓嘅彩虹草莓蛋糕(HKD468),果肉香甜多汁實令你一試難忘。 熔岩蛋糕系列(HKD158/4吋裝,HKD398/6吋裝)都係呢度人氣之選,一切開蛋糕,裡面嘅漿好似岩漿咁流出嚟㗎!宇治抹茶流心熔岩蛋糕製作講求用料,將宇治著名丸久小山園嘅「又玄」同古川製茶嘅「朝日」等多款嚴選抹茶粉混合,令蛋糕呈現抹茶原有嘅翠綠色澤同獨特香氣,味甘而清幽。 咖啡流心熔岩蛋糕就用咗LE BREAD LAB自家新鮮咖啡液製成,咖啡香氣齒頰留香。 伯爵茶流心熔岩蛋糕以著名英國品牌Twinings伯爵茶同其他紅茶調配而成,茶味清香。 香港限定特飲有左邊嘅草莓多多(HKD46)以草莓醬混合乳酸菌同檸檬汁。右邊嘅檸檬小姐(HKD46)以新鮮檸檬為主,消滯醒神。   LE BREAD LAB 地址:銅鑼灣波斯富街108-120號寶榮大樓地舖 電話:從缺 營業時間:星期一至日:10:00-22:00

0

【韓迷朝聖食買玩 GD cafe隊啤歎cupcake】食焦

上星期BIGBANG隊長G-DRAGON(GD)現身「濟州神話世界」,係佢當兵前最後一次出席公開活動,為佢自己嘅「親生仔」GD cafe「Untitled,2017」進行開幕儀式。咁重要日子梗係逼爆現場啦,GD同所屬嘅YG老闆楊賢碩進行打手印儀式,GD咖啡店正式開張,亦為「濟州神話世界」呢個娛樂城開咗個靚頭彩! 其實唔止V.I.P(BIGBANG粉絲)緊張,旅客同食客都一樣咁期待㗎,事關「濟州神話世界」除咗俾粉絲朝聖,仲有唔少食店,可以一次過滿足晒食買玩三個願望!當日有份去朝聖嘅V.I.P同小編講,雖然GD入咗cafe招呼完客人無耐就閃走咗,但係cafe入面一樣有唔少GD嘅精心傑作㗎! 為咗要趕喺GD入伍前開幕,依家cafe暫時只係得啤酒同咖啡呢啲飲品供應,開幕當日見到嗰啲靚靚cupcake其實要到3月中先真正有得賣。睇得唔食得,但係見到啲cupcake嘅賣相都靚過人,照估計正式開賣嗰日肯定好搶手!咁一支GD啤酒賣幾錢?圍起要成百蚊港銀一支,抵唔抵?唔問啦,去得嘅就覺抵俾㗎啦! 隊吓啤飲吓咖啡,仲有乜做?梗係要兜返個round先夠滿足啦!cafe入面有兩大朵郁得嘅巨型花,又紅又黃好大朵好壯觀,現場仲有唔少紀念品賣,開幕嗰日賣嘅紀念品好似襟章咁,就即刻賣斷晒喇! 食cupcake未夠飽肚點算?又唔怕啫,因為「濟州神話世界」除咗GD cafe之外,仲有YG社長楊生打骰嘅其他餐廳,又有西餐又有烤肉,咁當然最有話題梗係GD cafe啦!

0

【韓式賀年菜應吓節 食完煎餅嗒返杯米酒】SSAL BORI SSAL

聽日就大年初一喇,喺韓國「年糕湯」係韓國人嘅賀年意頭菜式,主打韓國米酒 (Makgeolli)嘅韓式餐廳SSAL BORI SSAL,仲有全新韓國菜式同首次推出全港獨有嘅韓國米酒拼盤,真係聽到都覺得吸引呀,韓食迷唔好錯過喇! 韓國煎餅拼盤 (HKD198)煎餅係其中一款喺韓國常見嘅賀年菜式。韓國人會製作體積較細嘅煎餅,方便大家分享。SSAL BORI SSAL就跟返呢個傳統,集合6款韓國招牌煎餅,組成拼盤,分別有原條青椒煎餅、韭菜煎餅、韓式牛蒡煎餅、泡菜煎餅、綠豆煎餅同特別為香港新年製作嘅鮮蝦煎餅,代表「哈哈大笑」嘅意思。 炸原隻人參雞(HKD189)人參雞湯就飲得多,炸人參雞又食過未?將傳統韓國人參雞同韓式炸雞合併,用預先浸好咗嘅糯米、人參片、紅棗同少量嘅蒜放入原隻雞中,再用真空低溫嘅方式煮6個鐘;之後再將人參雞原隻放入油中炸到個皮脆卜卜。上菜用燒熱嘅鐵板裝住,撕開雞腔,糯米飯同湯汁慢慢流出,口水都流埋! 辣豬肋骨湯鍋 (HKD230)睇落好簡單但做法都幾複雜㗎!要將豬肋骨肉浸凍水約1個鐘,再將豬肉骨連洋蔥、胡椒粒、大蒜同月桂葉喺沸水煮約30分鐘,咁樣可以有助去除豬肉嘅臊味;之後再將豬骨、馬鈴薯、洋蔥、招牌醬汁、青蔥同韓國紫蘇籽一齊熬煮30分鐘,最後加埋韓國芝麻葉就完成,味道當然唔使多講,超級正呀! 最後點少得重頭戲韓國米酒拼盤 (HKD138)韓國Makgeolli主要分為「生」同「熟」米酒兩大類。兩者再分為「有味」同「純味」兩種。「生」嘅韓國米酒保存期只有一個月;而今次SSAL BORI SSAL首度推出呢個韓國米酒拼盤,等客人可以一次過品嚐到6款唔同款式同口味嘅韓國米酒,機會非常難得。 SSAL BORI SSAL 地址:尖沙咀金巴利道78號金輝閣地下B舖 電話:2736 8444 營業時間:星期一至四:12:00-15:00;17:30-23:00;星期五至六:12:00-15:00;17:30-01:00(星期日休息)

0

【檸茶味激鬥楓糖漿味 港韓大熱薯片比拼】試食

對於豬太郎嚟講,薯片好唔好食,最緊要係會唔會放入口就無咗,食落似空氣咁就唔掂啦,一定要塊塊都沾到味粉,夠脆得嚟又唔會炸到燶晒。如果佢主打健康嘅,就要睇埋會唔會食到成手油啦! 唔講咁多廢話,快啲睇吓最近兩款新出嘅薯片,有香港(珍珍凍檸茶味薯片)同泡菜國新品(楓糖漿味牛油薯片),到底邊樣好食啲? 1.香港珍珍凍檸茶味薯片 第一位佳麗係討論區熱話之一嘅香港珍珍凍檸茶味薯片(HKD13.5),明明價錢差唔多,但拎上手都知比起楓糖漿味牛油薯片重手,淨重都有成110g,希望唔好一開全部都碎晒。咦!聞落都有檬茶味,但要講到凍檬茶味,唔通要放入雪櫃凍凍哋咁食? 薯片有薯仔味就唔使講啦。今次用咗檸檬紅茶精華,但食落鹹味多過甜,檸茶味無聞落去咁明顯,要食到檸茶味可能就要大啖大啖放入口先得! 今個月25號正式喺7-Eleven優先發售,有興趣嘅朋友仔就留意啦! 2.Haitai楓糖漿味牛油薯片 第二位佳麗係早兩年Hit到爆嘅蜜糖牛油味薯片嘅後代,終於喺呢個秋天又返嚟喇,今次仲有新花款,將蜜糖轉咗做加拿大嘅楓樹糖漿,變身做楓糖漿味牛油薯片(HKD15)!喺包裝方面,Haitai都有啲花心思,用咗啡紅色同楓葉做邊框,好有秋天嘅感覺。 拎上手,都幾輕身,但薯片都唔會碎晒咁過分,比起珍珍明顯完整又大塊,睇落雖然無咩色水,但一打開就聞到好香牛油同蜜糖味,連豬太郎啲同事都大讚好香好吸引呀!改名換姓之後,牛油味明顯無舊版咁濃郁,但加咗加拿大嘅楓樹糖漿,甜味更加突出,牛油嘅鹹味無咁重,但夾埋楓樹糖漿啲甜味又好Match喎! 官方Instagram仲用咗舊版同楓糖漿結合埋一齊,變成全新口味,都幾搞鬼。 豬太郎點指兵兵 兩款薯片都係第一次食,要講抵食就一定係食珍珍薯片,價錢差唔多,但份量相差一半,性價比高。講埋味道,我就鍾意楓糖漿味牛油薯片,已經俾我勁快手咁食咗大半包。沾粉量嚟講其實兩款都差唔多,珍珍食落就鹹味重啲,單食一兩塊唔覺有檸荼味,但楓糖味一塊入口已經好香濃。 香港珍珍凍檸茶味薯片 抵食:★★★★☆ 香味:★★★★☆ 好味:★★☆☆☆ Haitai楓糖漿味牛油薯片 抵食:★★★☆☆ 香味:★★★★★ 好味:★★★★★ 食得薯片就唔好理卡路里,大家開開心心食埋佢! 以上產品喺7-Eleven有得買

0

【日韓秋祭自助餐 龍蝦和牛炸雞任食】THE PLACE

想同阿爸阿媽食自助晚餐,但佢哋又怕食生冷嘢?今次旺角香港康得思酒店THE PLACE就推出「日韓秋祭」,俾老老少少都食得暖笠笠。雖然係咁,都仍然有海鮮冷盤同即開生蠔。 今次嘅前菜都幾清新,有即製火炙壽司、軟滑日式溫泉蛋、開胃韓式宮廷料理九節板同韓式冷麵。 主菜有滋補韓式人參雞湯、外脆內嫩嘅韓式炸雞、香辣惹味嘅泡菜芝士焗龍蝦、肉香四溢嘅韓式香烤牛肋骨、烤牛肉、口感煙韌嘅韓式芝士年糕串等等,多到數唔晒。 和風料理一樣出色,廚師即炒鐵板和牛粒同關西風味熱溶芝士大阪燒,火喉十足!其他菜式仲有北海道十勝黑豚肉、大蝦天婦羅、日式味噌烤茄子、九州豚骨拉麵等等,諗吓都食指大動。 壓軸出場梗係甜品啦 —— 「禪」味噌焦糖朱古力蛋糕、柚子蜂蜜蛋糕、軟滑嘅日式蕨餅、北海道綠茶芝士蛋糕、半熟芝士撻、芒果麻糬蛋糕卷、紫薯撻等等,全部都係甜品迷唔可以錯過㗎! 自助晚餐供應時間:即日至2017年11月30日 (18:30-21:45) 星期日至四及公眾假期: 成人:HKD608;小童及長者:HKD428 星期五、六及公眾假期前夕: 成人:HKD648;小童及長者:HKD468 所有價錢以需另加一服務費,食物或會因應季節變化及供應而改變。   THE PLACE 地址:旺角上海街555號香港康得思酒店L樓層 電話:3552 3028 營業時間:星期一至日: 06:00-00:30

0

【㗎妹甜 韓妹醇 川妹辣 中日韓冷麵激戰連場】韓宮、拉麵來、慶麵

夏天食熱嘢,就算冷氣幾勁都好,一樣可以食到大汗疊細汗,但係食冷麵就可以舒舒服服,降住溫咁食喇。除咗蕎麥麵、冷烏冬同水冷麵之外,下面呢三款中、日、韓特色冷麵你一定要試! 黃埔地鐵站一上嚟就見到韓宮,呢度由一位韓媽媽做大廚,絕對食到正宗韓食嘅味道。唔好以為食傳統韓食就等於一成不變,老闆娘耐唔耐就會引入一啲韓國潮流菜式㗎喇。 呢個冰豆漿冷麵(HKD108)就係依家韓國大熱食品,連冰上嘅冷麵唔太常見㗎。湯底用韓國飛過嚟嘅豆漿煮成,唔會因為啲冰溶咗而變得淡口,清甜無油,成碗湯飲都得。溝埋黃豆粉會杰啲,但豆味會更加香濃,一啖麵一啖湯咁食係最好嘅食法,唔好就咁夾一撮麵咬呀。 韓宮 地址:紅磡黃埔新村民兆街16號地舖 電話:2334 5567 營業時間:星期一至日:12:00-23:00   拉麵來老闆同2010﹣2011年度「全日本拉麵大賽」獲獎嘅日籍拉麵師傅小林宏結緣之後,一齊為香港食客調配出唔同口味嘅拉麵。老闆話日本其實有好多五花八門嘅拉麵,唔係得豚骨湯底、味噌湯底同醬油湯底咁單調。 旺角分店同總店一樣用返日本懷舊feel嘅裝飾,有時空穿越嘅感覺。 未食有機豆乳擔擔冷麵(HKD92)之前,小編以為會好辣,點知一飲啖湯原來係重有機日本豆奶嘅清甜味,之後先慢慢滲出輕微鹹鹹辣辣嘅豆板醬味道,好啱夏天食。湯底預先雪凍咗,而自家製拉麵過冷河之後會更加彈牙爽口,呢樣亦係佢哋嘅賣點之一。配菜用有機豆腐、日本青瓜、日本芝麻、日本京蔥同豬肉碎,集清新、爽甜同香口喺同一碗麵,如果想食齋仲可以走肉碎添。注意:呢個麵係期間限定,10月左右會轉做大閘蟹拉麵,到時想食要等出年喇。 拉麵來 地址:旺角黑布街23號地下 電話:2715 0811 營業時間:星期一至日: 12:00-23:30 拉麵來(總店) 地址:大坑浣紗街20-22號地下B舖 電話:2808 4468 營業時間:星期一至五:11:30-16:00;18:00-22:30;星期六、日及公眾假期:11:30-21:30   大角咀愈來愈多餐廳,慶麵都喺度插旗。老闆身兼大廚,原本想學上海菜,但機緣巧合之下接觸川菜之後,發現佢變化多啲。加上老闆鍾意食辣,所以餐廳就以川菜做主打。 「慶」字嘅來由原來係老闆爸爸個名,細個係爸爸教佢煮餸,咁開餐廳當然要紀念一下啦。 冰火冷麵(HKD34)顧名思義又凍又火辣辣啦!雖然係中菜,但麵底揀咗比正常粗嘅拉麵,老闆話咁樣啲汁會更易掛上麵。質地煙煙韌韌,口感唔錯。撈麵嘅汁用咗幾種辣椒——青麻椒、野山椒同指天椒秘製而成,味道由開頭嘅辣到後尾會變成麻辣,變化出唔同層次。小編食到一半飲啖水,麻辣嘅感覺即刻衝擊成個口腔,愛好食辣嘅朋友必試! 慶麵 地址:大角咀角祥街2號J地舖 電話:2609 0966 營業時間:星期一至日: 12:00-21:00

0

【牛頭角風味小店 創出新派意韓飯卷】Koretaly

韓國餐廳喺香港遍地開花,尤其係近年韓流大行其道,韓式餐廳愈開愈多。最近小編發現連滿布車房嘅牛頭角定業街都有間隱世韓意式組合既「 Koretaly 」,主打韓式飯卷Kimbob,將傳統韓國食物與意大利烹飪融合,帶俾大家意想不到嘅體驗。 大家都應該好奇點解會將韓式食物同意大利菜式融合一體,等小編話你知啦。原來源自餐廳兩位主廚,其中一位有10年意大利菜式烹飪經驗,另一位係韓國人,從事飲食行業多年。將韓意結合係 Koretaly 經營理念,佢地想俾客人唔同體驗,嘗試新味道。 韓式飯卷Kimbap有六款口味:芝士、豬肉生菜、吞拿魚、肉腸、蟹棒及西芹生菜,全部即叫即製。小編迫不及待試個團結飯卷(HKD42),睇下究竟係點團結法。原來內裏有醃蘿蔔、甘筍、肉腸、蛋同菠菜等配料,口感十分豐富,飯卷亦都包到實一實,一啖食落飯卷唔會散曬,真係好團結呀! 意式豬肉醬配韓式年糕(HKD48)意式調料搭配韓式食物夠曬特別,食年糕就怕煮得太軟無口感。呢個年糕出奇煙韌彈牙,醬汁辣中帶甜又好開胃。 小店不定時會製作多款富有特色甜品,Korea Green Tea Panna Cotta(HKD18)同樣結合咗韓國同意大利元素,極濃綠茶融合濃郁牛奶產生另一種清新感覺,口感似足布丁。 小店除咗有熱食意粉同韓式年糕供應,亦都有售賣韓國同意大利空運過嚟嘅罐頭雜貨,鍾意韓國、意大利菜式嘅你可以隨時將呢種味道帶返屋企! 店舖其實内有乾坤嫁!原來店舖後場有座位,可以容納20人左右。想喺度開Party都得啦! Koretaly 地址:牛頭角定裕坊14號地下 電話:3971 0888 / 5281 4949 營業時間:星期一至六:12:00-20:00 星期日或公眾假期休息

0

【小編直擊首爾膠囊酒店】仁川機場

話明【真假期】,咁重要嘅新聞梗係唔係求其喺網上攞幾張相出嚟hea 你啦!就係呢個韓國仁川機場膠囊酒店正式開張嗰個禮拜,我哋已經特別派左小編(即係我,仲有得玩2日!)同大家做個實地考察加真實圖片,睇下係咪真係咁正! 次次坐親凌晨機去首爾都要搵地方落腳,通常都會去汗蒸幕度Hea。今次為咗測試如果凌晨機攰到死而又有個膠囊酒店比你抖下嘅感覺係點,小編都好不情願咁揀咗呢班機(順便玩多半日)。 機場上個月嘅1月20號,首爾仁川機場終於開咗第一間膠囊酒店Darakhyu,位置喺仁川機場交通中心一樓。由機場出境大堂行過去大概十分鐘,跟住通往地鐵嘅指示,就會搵到,非常方便!有搭過地鐵出市區嘅人都一定知道邊度。 膠囊酒店分開東翼同西翼兩邊各30間房,兩條扶手電梯都可以上去一樓,check-in大堂位於東西翼中間。 Check-in大堂位置寬敞,係24小時休息區。 Check-in完之後,就可以用房卡或者佢地嘅專屬app正式進入膠囊酒店範圍。 膠囊酒店入口分幾個,會根據房間分派到唔同入口。 入到去就見到左右兩排都係房間,每間都係獨立設計,私人空間十足! 小編今次住呢間係雙人房間(連淋浴室)。等我同大家介紹下裡面究竟係點嘅樣!話就話係膠囊酒店,但其實同酒店好相似,用膠囊酒店價錢可以住到呢個質素,真係非常不錯! 開門之後就係咁嘅樣:左手邊係淋浴室,右手邊就係張床。有埋個小小嘅衫架掛下衫,仲有埋洗手盤,仲有個檯面可以放下野,細得黎位置都好實用! 張床一啲都唔細,完全訓得落兩個成年人,有埋床頭燈添,幾好幾好。床下面仲有足夠空間,可以放得落兩個大行李都絕對不成問題! 其實如果選擇唔連淋浴間嘅房間會平多少少,但係想沖涼就要用公共淋浴室。 公共淋浴間其實都幾乾淨(可能因為仲新啦)。 淋浴間有埋洗頭水同沐浴露,仲有乾淨毛巾用! 講到咁吸引,大家當然會關心到收費。收費模式主要分日間同晚間時段。 日間時段早上6點至晚上8點,所有房間最低消費3小時。 單人房間23100won起 (大概158HKD) 單人房間加淋浴間26400won起(大概181HKD) 雙人房間31500won起(大概216HKD) 雙人房間加淋浴間36000won起(大概247HKD) 晚間時段晚上8點至早上6點,所有房間最低消費12小時。 單人房間55000won起 (大概376HKD) 單人房間加淋浴間60000won起(大概411HKD) 雙人房間69000won起(大概473HKD) 雙人房間加淋浴間75000won起(大概514HKD) 超時使用房間每小時都係另加4000won(大概27HKD)超低! Darakhyu Capsule Hotel 網址:www.walkerhill.com/capsulehotel 查詢電話:+82...

0

【韓系4℃夢幻冷麵】The Joomak

嘩!精緻兩個字通常用黎形容西餐,但今次絕對可以用返依兩個字嚟形容韓國菜,韓國菜一諗到就係炒年糕,石頭鍋飯,韓燒等等,好似食黎食去都無啲新意思,但究竟精緻既韓國菜有咩咁特別?同一般韓國菜有咩分別,真係要細心品嚐一下先得。 傳說韓國光州流行一種4 ° C冷麵食法,麵條保持喺4 °C最爽滑!呢款4° C 豚肉冷麵 (HKD78),令你唔駛去到光州都食到地道爽滑冷麵。麵條經過嚴格冷熱調製,控制到唔腍唔硬啱啱好,非常爽滑彈牙。為咗保持麵條喺4 °,食器入面仲擺咗大量冰塊,上枱果陣出晒煙,非常夢幻!建議大家食嗰陣將麵條、配料及醬汁放落碟再拌勻食,仲要喺冷麵上枱之後15分鐘之內食晒呀,咁就最好味啦! 鍾意食芝士嘅朋友一定要試下呢個紫菜x溶岩芝士包(HKD228)啦!事關呢個芝士非常有心思,一共混合咗五種芝士調製,仲非常考究咁將芝士用唔同溫度加熱,先至再即時倒入外皮卜卜脆嘅特製方型麵包裡面混合。拉出一呎芝士絲不是夢!小編推薦食嗰陣將紫菜包住小食,再隨意加上泡菜,沾上特製芝士一啖過!咁樣表層有香濃芝士包住,底層又有小食香脆口感,幾個層次一啖過享受晒!小食一共四款,包括有招牌炸雞、炸韓國年糕、炸魷魚同埋炸翠玉瓜。 ICE STORM(HKD68)呢款士多啤梨冰沙出奇咁香滑,一飲落去酸酸甜甜,再慢慢滲出士多啤梨嘅果香味,令人一試難忘。加埋冰筒有保溫嘅效果,唔會咁快就溶晒,就算抖陣再飲都依然咁香濃! 鍾意拼盤嘅朋友可以試下Joomak Plate (HKD158),入面有家鄉醃菜飯卷、泡菜芝士三文治、甜酸炸雞、士多啤梨慕思同埋沙律。呢個拼盤有傳統菜式之餘亦有新派三文治,加埋充滿肉汁嘅炸雞、香滑士多啤梨慕思同埋沙律,一次過滿足晒小編五個為食願望! Joomak出名鬼主意多,菜單又有創意,混入多種驚喜元素,大蜆泡菜炒年糕意粉(HKD108)就係一個好例子,泡菜同年糕原來已經可以成為一道菜式,但加上大蜆同意粉,口感提升咗另一個層次。 韓式牛肉墨西哥飯卷(HKD78) 如果大家鐘意其他異國風情食物嘅話,依個飯卷絕對適合你,佢混合韓、日、墨西哥風味係依個飯卷上,本身整個以日本手卷為藍本,但用墨西哥餡餅取代紫菜包,最後餡料選用韓式牛肉,牛肉味濃,食落難以忘懷,此外,飯卷以外仲有沙律菜伴碟,盡見心思。 The Joomak 地址:尖沙咀廣東道17號海港城海運大廈3樓LCX 34號舖 電話:2111 0851 營業時間:星期一至日: 11:30-22:30