Tagged: 韓燒

0

【百味堂全新旗艦店推限定甜品 店中店歎韓式鐵板燒】百味堂.鐵及百味堂

以後食晏或晚飯都可以去百味堂喇!當然唔係叫你食雪糕食飽啦,因為佢喺尖沙咀新開嘅旗艦店增設「店中店」概念,首次收藏有韓式鐵板燒嘅百味堂.鐵及百味堂喺入面。聽日呢間店中店會正式營業,即刻睇吓有咩食先。 韓食之中一定有泡菜,加上熱辣辣嘅鐵板燒你會諗到咩呢?梗係韓式泡菜炒飯(HKD88)啦!香氣十足又酸酸辣辣嘅泡菜炒飯愈食愈開胃,配埋炸蓮藕片就更加香口。 仲有口味傳統啲嘅韓式香辣豬肩肉伴魷魚飯(HKD178),將韓式辣醬搽喺魷魚上面,加上醬炒過嘅豬肩肉係雙重滋味呀!不過呢款嘅飯底唔係泡菜炒飯,以免搶咗餸菜嘅味道。 想特別啲亦有加入韓式手撕麵片同水牛芝士嘅韓式海鮮火鍋湯(HKD168)。湯底落足蕃茄,感覺好西式。師傅煮湯嘅時候先即刻手撕麵片放入鍋,煮起會一粒粒咁,雖然唔似年糕咁煙韌,但都比一般嘅麵有咬口。而且火鍋湯都有唔少海鮮,鮑魚、扇貝、蜆同蝦,起鍋前再灑啲芝士喺面,令味道更加香濃。 講咁耐,說好的鐵板燒唔係得呢啲嘅。One Tray 套餐(HKD158起)有齊韓式傳統醃漬物、時令沙律配柚子汁、韓式麵豉湯配蒸蛋、韓式炒辣海鮮、泡菜炒飯之外,主菜有韓牛西冷扒伴雜菜、韓式燒豬肋骨、韓燒三文魚扒或豆腐扒咁多選擇。 呢款係最貴嘅韓燒西冷牛扒(HKD298),牛扒以蒜油煎香,再放喺以小熱鍋煮緊嘅洋蔥上面熱多一陣先上菜,令濃味嘅牛扒帶香蔬菜嘅香氣,又可以減低油膩感。為咗方便上班族都可以品嚐到,遲啲會提供Dosirak韓式餐盒外賣,都有齊湯、飯、沙律、小食同主菜㗎。 食完正餐梗係食甜品啦!做得旗艦店當然有本店限定口味,日本靜岡蜜瓜雪糕(HKD98)有唔少靜岡蜜瓜粒,每層牛奶雪糕之間仲有純靜岡蜜瓜打成嘅果汁,味道超清甜!不過按蜜瓜嘅時節,大約到十月中就冇㗎喇,想食就要快手啲。 另一款本店限定嘅係焦糖咖啡雪花冰(HKD128)。喺牛奶雪花冰面加上招牌牛奶雪糕,再唧啲焦糖醬都未夠,仲會配一杯甘香嘅焦糖咖啡俾你淋落去,入口就唔會太甜啦。如果想試另一款口味,就要去山頂旗艦店喇,嗰度會配紅豆醬代替焦糖咖啡。 仲有一款幾特別嘅甜品係兩間旗艦店都有,韓國紅豆粥(HKD38)喺兩間店內以韓式鐵鍋即煲,主要用紅豆同柿餅煮成,再唧上薯仔或栗子蓉。   百味堂.鐵及百味堂 地址:尖沙咀梳士巴利道18 號Victoria Dockside K11 MUSEA B111店及B225A 店 電話:5205 1327 營業時間:星期一至日:11:30-15:00,18:00-22:00,星期六、日:11:30-22:00

0

【柞木炭家新店推王道御膳 餐車自選日韓高質靚牛】柞木炭家

相信唔少鍾意食韓燒嘅朋友仔對柞木炭家都唔陌生喇,呢間炭烤韓燒店繼上年喺旺角開業之後,早幾日喺銅鑼灣開第二間分店,正式進駐港島區!新店有新菜單是常識,「王道」同「御膳」套餐就令大家食盡唔同部位嘅牛肉,因為揀完套餐之後,店員會推出擺滿牛肉嘅「牛肉餐車」俾你自選日韓產地靚牛,食得夠晒精囉。除咗套餐之外,有幾款新菜式都唔可以錯過㗎,即刻睇落去啦! 銅鑼灣新店一樣氣派十足又夠開揚,裝潢都好有韓風,真係好似去咗韓國嘅餐廳咁。 睇meun係易明啲,不過睇埋實物仲正! 先介紹「王道」套餐(HKD356/位),食客可以自選一款西冷產地,而韓牛牛肩同日本和牛牛胸腹就係指定款式。 而「御膳」套餐(HKD420/位)就再豐富啲,西冷同牛肩肉可以自選產地;另外仲配埋日本和牛牛胸腹、日本和牛牛胸同「是日稀有部位」三款牛肉添!呢兩款套餐仲有其他燒烤食物同主食,黑毛豬同柞木韓牛飯都令人好滿足呀! 揀完套餐之後,牛肉餐車就出動喇,車上係來自韓國全羅南道同日本岩手縣兩個產地、唔同部位嘅牛肉。睇住牛脂嘅雪花紋自選牛肉產地,更加易揀中心水口味啦。 除咗兩款咁有霸氣嘅套餐之外,仲有幾款新菜式㗎。柞木甕漬牛肋骨(HKD288)用咗韓式嘅甕漬古法加入秘製醬汁嚟醃製牛肋骨,肉質軟腍又入味。 最上等牛小排(HKD240)係牛胸腹肉,每塊肉嘅雪花紋都好靚,油脂分佈得咁均勻,食起上嚟有油香又有牛味喎。 即叫即整嘅牛柳三明治(HKD188)就用咗頂級1++韓牛最嫩嘅牛柳整成,烘底多士嗦晒啲肉汁精華,值得一試㗎。由即日至5月28日仲做緊開業優惠,試食價HKD88就可以食到喇!   柞木炭家 地址:香港銅鑼灣記利佐治街 1號金百利廣場 3樓 301-322舖 電話:2320 9993 營業時間:星期一至日:11:30-23:00

0

【全港首間炭烤韓燒 頂級1++韓牛運到】柞木炭家

韓燒係好食,但食得多都會覺得好油膩,令人想食又有啲卻步。不過依家唔怕喇!旺角以日韓做主題嘅新地標T.O.P開咗全港首間炭烤韓燒柞木炭家,以柞木炭網燒嘅肉唔單止鎖住肉汁Juicy啲,亦唔會有鐵板燒嘅油膩感呀! 開飯梗係要食埋環境,木色格局令人好relax,座位都好闊落,行入啲仲有露天位㗎。 店員會先介紹唔同部位嘅肉有咩分別,俾你更易揀到想食嘅口感。餐廳選用嘅韓牛都係1+或1++嘅頂級全羅道南韓牛,仲會按食材或時節轉換牛肉部位添。 菜單選擇都幾多,燒肉、海鮮、主食、Lunch Set等等加埋有過百款。 韓牛肋眼上蓋(HKD328)咁靚嘅雪花係咪好少見呢?因為好多地方都將牛肋眼上蓋切到細細嚿咁,好似柞木炭家原條上真係極少!原條燒兩邊一陣先剪開,2-3分鐘左右已經食得喇!牛肋眼上蓋嘅肉好軟腍,油脂比例亦啱啱好,入口非常Juicy!輕輕咀嚼啲油脂好似化開咁! 牛脷嘅爽口都吸引到唔少人,但唔同切法都會令口感轉變,牛舌三吃(HKD228)就可以一次過食到爽、腍、脆三種口感。大家最熟悉嘅韓國醬料可能係大醬,但原來韓國人燒烤都好鍾意點熱辣辣嘅鹹魚醬,仲會擺埋喺爐上面一直燒住,燒咩肉都可以點,大家可以喺度試到,嗰種鹹香feel有啲似蝦醬㗎! 厚切濟洲黑毛豬梅肉(HKD158)雖然冇韓牛嘅油香,但肉質都好鬆軟,燒起嚟唔會比韓牛差㗎!而且有黑椒輕輕調味過,燒完就咁食都好夠味。 雞肉拼盤(HKD128)一雞三味,圖左邊開始係泡菜味,唔會好辣;黑椒海鹽味清啲,肉味會明顯啲;秘製燒汁甜中帶鹹幾惹味。肉好嫩滑,就算失手燒耐咗啲都唔會好乾。 一定唔少得有泡菜啦!成棵俾你自己剪,就咁食又得,燒熱食仲更軟熟入味呀! 主食中嘅柞木雪濃湯飯(HKD128)又食得又吸睛添!唔好影太耐相呀,唔係就浪費咗以牛骨同牛內臟煲12個鐘嘅雪濃湯㗎喇!趁熱淋熟大肉片,配埋大量蔬菜,清甜嘅湯飯都啱夏天食! 另一道柞木韓牛飯(HKD158)選用上乘嘅1++厚切韓牛粒,色澤嫩紅,油花分明,入口甘香鬆化。石鍋飯配咗蘿蔔絲、冬菇絲、青瓜絲、韓國生雞蛋等拌飯配料,再淋上自家特製嘅韓式拌飯醬,口感豐富仲好飽添! 有選擇困難嘅朋友可以參考吓Dinner Set。提一提,泡菜都係成棵上,不過影相要靚就轉小碟囉。 等唔切晚餐都可以試Lunch Set,一樣好吸引㗎。   柞木炭家 地址:九龍旺角彌敦道 700號 T.O.P 5樓 501舖 電話:2619 0868 營業時間:星期一至日:11:30-23:00

0

【埋單唔同價收貴咗 韓燒$198變$228出蠱惑】食焦

明碼實價寫明咗係呢個價錢,埋單嗰陣都可以變咗另一個價錢?變少咗就話啫,要加錢就擺明呃人喎!係咁嘅,有絲打公開咗「騙徒」嘅手法喇,話說去食韓燒,樓下派宣傳單張寫明$198,點知埋單變咗$228!即使要加一服務費,都唔係呢個價錢啦! 結果係無奈地埋咗張單!絲打問收銀,佢就話12月係收呢個價。咁單張明明係寫$198喎?店員就話係舊嘅,依家嘅價錢要$228,仲話惟有送返張9折咭俾絲打下次食喎!仲有下次咩?絲打po埋張單上群組,有唔少網友留言叫絲打去消委會投訴同報海關,告佢違反《商品說明條例》啦! 邊間韓燒店咁樣出蠱惑先?就係旺角嘅「韓牛韓式燒烤」喇!小編打過去問價,佢哋話依家係收$198加一,咁點解之前收過客人$228呢?店員就話係聖誕新年先收呢個價錢喎,話喺1月2日已經變返$198!再問佢點解喺單張度唔寫明呢?店員就開始唔耐煩喇,佢話:「總之依家收$198啦!」。 其實唔係話唔肯俾多少少錢嘅問題,最緊要明碼實價吖嘛,依家又難怪絲打咁嬲!其實最近都有唔少食店「瀨嘢」,真係違反咗《商品說明條例》!又係食燒肉嘅,位於尖沙咀赫德道嘅伊賀日本燒肉料理,廣告就話$114食海鮮燒肉放題,聲稱有龍蝦、燒蠔同一口和牛供應;但食客到餐廳後發現龍蝦賣晒冇得食,燒蠔就要另加$68先有得食,於是就向海關投訴。餐廳上星期承認違反《商品說明條例》,被判罰款1萬元。睇嚟絲打真係要去海關先得喎!

0

【韓式萬聖節 約齊嘩鬼火燒血色鮮肉】炑八韓烤

萬聖節食西餐食到悶?咁去食韓燒啦,炑八韓烤喺荃灣新開嘅旗艦店門口有3D牆俾大家影相玩吓,地方超闊落,唔使就住驚撞到隔離枱。 10月9日開始推出嘅萬聖節餐血色小鮮肉套餐(HKD618)可以滿足愛韓燒嘅一眾嘩鬼。兩層燒肉架鋪滿厚切上等鹽烤牛舌、厚切豬五花肉、豬梅花肉、梨汁雞肉、韓國大蝦等等肉食。食材新鮮就梗㗎啦,燒到少少焦香嘅時候,嗰陣香味令人流晒口水! 等緊燒熟嘅時間可以食住熟食先,小編勁like套餐裡面嘅詭異南瓜牛肋骨煲,香甜軟熟嘅南瓜蓉真係一試難忘;牛肋骨啖啖肉又入味,腍到大人細路都咬到。仲有萬聖節牛小排,連埋少少油脂同牛排一齊食絕對將美味指數100%up! 食到咁上下實口喝,眼球梳打(HKD32)有冇嚇親你呢?眼球用奶凍做成,好彈吓㗎,當半份甜品食埋仲爽呀! 另外,單點熟食有骷髏芝士熔岩飯(HKD186),篤爆對流心蛋黃眼同泡茶芝士飯撈埋一齊,好香滑。 特大炸魷魚墨汁年糕粉絲(HKD175)原隻魷魚啖啖肉,勁爽口彈牙。年糕同粉絲可以試到用墨汁煮嘅新口味,都幾有趣㗎。   炑八韓烤(全新旗艦店) 地址:荃灣楊屋道1號荃新天地二期1樓125號舖 電話:2363 6408 營業時間:星期一至日: 11:30-00:00

0

【韓國引入地道燒烤 尖咀又一韓食精選】韓流村

位於尖沙咀嘅韓流村,由韓國引入地道燒烤,仲用埋韓國廚師提供地道燒烤同別緻菜式。加埋佢地用圓檯,成個Friend飯局坐埋一齊吹水燒野食就係咁簡單! 餐廳裝潢極具街頭風,室內空間充足,坐喺圓檯,成班朋友一齊圍埋食住燒肉吹水最開心! 食韓燒配料非常重要,呢度都算幾好食,尤其泡菜唔會過鹹,甜甜地帶點辣,配搭起嚟好加分!而且前菜仲係無限任添㗎。 黑豚豬脖肉(HKD138)選用西班牙黑毛豬,脂肪分佈平均,肉質結實又爽口,加埋泡菜食更加惹味! 調味牛排骨(HKD228/2件)選用優質安格斯牛排骨,配埋韓國廚師秘製調味,以多種配料加埋生果秘製。牛肉食落口感鬆化,肉汁豐厚,甜甜地好開胃。 醬螃蟹(HKD368/2隻)韓國藍蟹直送香港,再喺香港新鮮醃製。就咁食個藍蟹多膏鮮甜,食落有少少鹹香,隨蟹仲會附送6舊紫菜飯糰,一齊食更滋味!只需要將飯糰加落蟹蓋,再混和蟹蓋本身有嘅醬汁同蟹膏食,食起嚟感覺鮮甜、別具風味,一定要試! 食韓國菜當然唔少得炸雞,呢個辣味炸雞(HKD178),辣之中帶點蒜香,醬汁惹味香濃。入口嘅時候,外皮香脆但唔會硬,唔會成塊皮剝落,一啖咬落去可以一次過食晒雞皮同雞肉。佢地仲有原味同蒜味炸雞,就算唔食辣,都一樣可以食到。 嚟食飯想飲返杯,可以試下果味燒酒(HKD80),呢隻牌子嘅燒酒係韓流村獨家代理㗎。一共有四款口味:柚子、青提、藍莓同埋西柚味,飲落甜甜地好容易入口,無論男女都啱飲。 而家3月生日嘅朋友,喺3月之內惠顧,早2日訂位就可以享有韓流村全單8折優惠添!(套餐除外) 韓流村 電話:3622 1854 地址:尖沙咀漆咸道南53-55號嘉芙中心地庫 營業時間:星期日至四:11:30-23:00 星期五至六:11:30-00:00

0

【韓國專利獨門烤肉】朴將軍全韓烤

嘩!韓風大熱,香港果啲韓式烤肉其門如市,但點樣楝一間好食嘅烤肉嚟襯我小編識飲識食嘅身份,食烤肉點樣先食得招積,梗係食啲有專利嘅烤肉 – Sioyakki,依種菜式係朴將軍全韓烤獨有,無論係烹調方法,自製醬料同食譜都擁有韓國專利權,梗係要去試一試先! 餐廳裝備基本係用韓國傳統烤肉店風格再加入現代元素,空間亦算充裕,令客人更加舒服。 吊燈帶有少少中國大紅燈籠嘅味道。其實佢仲可以吸走油煙,睇得又用得。 一場嚟到,一定要試下佢依個拎咗專利嘅朴將軍鐵板秘製黑豚肉 (HKD198/+惹味芝士飯HKD288),首先佢配菜包括有泡菜,包肉嘅生菜,其他醬料等等。 黑豚肉來自西班牙直送到港,肥瘦均等,現場仲有OPPA幫手,真係好幸福啊!首先將豚肉烤熟,然後再混入韓式秘製醬汁同埋配菜,炒熟之後就搞掂啦!食落去豚肉略帶爽口,配菜亦好爽脆鮮甜加埋醬料嘅甜辣,令人有爽辣嘅感覺。 當然唔只得黑豚肉咁簡單啦,仲有個惹味芝士飯!一樣都有OPPA代勞,好細心為你慢慢煮。首先佢會將豚肉、秘製醬料,紫菜、蔬菜同飯混合埋一齊,將佢地炒到金黃之後再加上芝士,熱力令芝士有少少溶化,緊緊黏住飯粒。入口嘅時候除咗食到飯同菜多重層次之外,仲可以食到半溶芝士,真係極級享受。 依個朴將軍鐵板秘製黑豚肉+惹味芝士飯套餐,最適合兩三個人嚟食,一定可以食到飽飽返屋企! 朴將軍全韓烤 地址:銅鑼灣駱克道491-499號京都廣場9樓 電話:2898 7001 / 2898 7717