Tagged: #韓牛

0

【柞木炭家新店推王道御膳 餐車自選日韓高質靚牛】柞木炭家

相信唔少鍾意食韓燒嘅朋友仔對柞木炭家都唔陌生喇,呢間炭烤韓燒店繼上年喺旺角開業之後,早幾日喺銅鑼灣開第二間分店,正式進駐港島區!新店有新菜單是常識,「王道」同「御膳」套餐就令大家食盡唔同部位嘅牛肉,因為揀完套餐之後,店員會推出擺滿牛肉嘅「牛肉餐車」俾你自選日韓產地靚牛,食得夠晒精囉。除咗套餐之外,有幾款新菜式都唔可以錯過㗎,即刻睇落去啦! 銅鑼灣新店一樣氣派十足又夠開揚,裝潢都好有韓風,真係好似去咗韓國嘅餐廳咁。 睇meun係易明啲,不過睇埋實物仲正! 先介紹「王道」套餐(HKD356/位),食客可以自選一款西冷產地,而韓牛牛肩同日本和牛牛胸腹就係指定款式。 而「御膳」套餐(HKD420/位)就再豐富啲,西冷同牛肩肉可以自選產地;另外仲配埋日本和牛牛胸腹、日本和牛牛胸同「是日稀有部位」三款牛肉添!呢兩款套餐仲有其他燒烤食物同主食,黑毛豬同柞木韓牛飯都令人好滿足呀! 揀完套餐之後,牛肉餐車就出動喇,車上係來自韓國全羅南道同日本岩手縣兩個產地、唔同部位嘅牛肉。睇住牛脂嘅雪花紋自選牛肉產地,更加易揀中心水口味啦。 除咗兩款咁有霸氣嘅套餐之外,仲有幾款新菜式㗎。柞木甕漬牛肋骨(HKD288)用咗韓式嘅甕漬古法加入秘製醬汁嚟醃製牛肋骨,肉質軟腍又入味。 最上等牛小排(HKD240)係牛胸腹肉,每塊肉嘅雪花紋都好靚,油脂分佈得咁均勻,食起上嚟有油香又有牛味喎。 即叫即整嘅牛柳三明治(HKD188)就用咗頂級1++韓牛最嫩嘅牛柳整成,烘底多士嗦晒啲肉汁精華,值得一試㗎。由即日至5月28日仲做緊開業優惠,試食價HKD88就可以食到喇!   柞木炭家 地址:香港銅鑼灣記利佐治街 1號金百利廣場 3樓 301-322舖 電話:2320 9993 營業時間:星期一至日:11:30-23:00

0

【全港首間炭烤韓燒 頂級1++韓牛運到】柞木炭家

韓燒係好食,但食得多都會覺得好油膩,令人想食又有啲卻步。不過依家唔怕喇!旺角以日韓做主題嘅新地標T.O.P開咗全港首間炭烤韓燒柞木炭家,以柞木炭網燒嘅肉唔單止鎖住肉汁Juicy啲,亦唔會有鐵板燒嘅油膩感呀! 開飯梗係要食埋環境,木色格局令人好relax,座位都好闊落,行入啲仲有露天位㗎。 店員會先介紹唔同部位嘅肉有咩分別,俾你更易揀到想食嘅口感。餐廳選用嘅韓牛都係1+或1++嘅頂級全羅道南韓牛,仲會按食材或時節轉換牛肉部位添。 菜單選擇都幾多,燒肉、海鮮、主食、Lunch Set等等加埋有過百款。 韓牛肋眼上蓋(HKD328)咁靚嘅雪花係咪好少見呢?因為好多地方都將牛肋眼上蓋切到細細嚿咁,好似柞木炭家原條上真係極少!原條燒兩邊一陣先剪開,2-3分鐘左右已經食得喇!牛肋眼上蓋嘅肉好軟腍,油脂比例亦啱啱好,入口非常Juicy!輕輕咀嚼啲油脂好似化開咁! 牛脷嘅爽口都吸引到唔少人,但唔同切法都會令口感轉變,牛舌三吃(HKD228)就可以一次過食到爽、腍、脆三種口感。大家最熟悉嘅韓國醬料可能係大醬,但原來韓國人燒烤都好鍾意點熱辣辣嘅鹹魚醬,仲會擺埋喺爐上面一直燒住,燒咩肉都可以點,大家可以喺度試到,嗰種鹹香feel有啲似蝦醬㗎! 厚切濟洲黑毛豬梅肉(HKD158)雖然冇韓牛嘅油香,但肉質都好鬆軟,燒起嚟唔會比韓牛差㗎!而且有黑椒輕輕調味過,燒完就咁食都好夠味。 雞肉拼盤(HKD128)一雞三味,圖左邊開始係泡菜味,唔會好辣;黑椒海鹽味清啲,肉味會明顯啲;秘製燒汁甜中帶鹹幾惹味。肉好嫩滑,就算失手燒耐咗啲都唔會好乾。 一定唔少得有泡菜啦!成棵俾你自己剪,就咁食又得,燒熱食仲更軟熟入味呀! 主食中嘅柞木雪濃湯飯(HKD128)又食得又吸睛添!唔好影太耐相呀,唔係就浪費咗以牛骨同牛內臟煲12個鐘嘅雪濃湯㗎喇!趁熱淋熟大肉片,配埋大量蔬菜,清甜嘅湯飯都啱夏天食! 另一道柞木韓牛飯(HKD158)選用上乘嘅1++厚切韓牛粒,色澤嫩紅,油花分明,入口甘香鬆化。石鍋飯配咗蘿蔔絲、冬菇絲、青瓜絲、韓國生雞蛋等拌飯配料,再淋上自家特製嘅韓式拌飯醬,口感豐富仲好飽添! 有選擇困難嘅朋友可以參考吓Dinner Set。提一提,泡菜都係成棵上,不過影相要靚就轉小碟囉。 等唔切晚餐都可以試Lunch Set,一樣好吸引㗎。   柞木炭家 地址:九龍旺角彌敦道 700號 T.O.P 5樓 501舖 電話:2619 0868 營業時間:星期一至日:11:30-23:00

0

【韓式意菜晚晚爆場 肉眼扒蒜頭山搶住食】Mad for Garlic

食嘢講氣氛,喺時代廣場嘅Mad for Garlic跟返韓國店設計風格,大玩歐陸酒窖特色,俾你一入餐廳就好似去咗旅行咁放鬆,唔怪得去親都爆場啦。 好鍾意呢度酒窖式卡位設計,未食都覺得自己好似嚟品酒咁,「實的的」嘅磚牆仲夠晒私隱度添。 餐廳以新韓式意大利菜為主打,而最特別嘅係由頭盤到甜品,近九成半菜式都離唔開蒜頭。 MFG招牌意大利薄餅(HKD138)係薄脆餅底,有蝦、菠蘿同大量蒜片,上菜嗰陣會喺你面前當面刨芝士,想要多啲就即刻講喇。 熱板烤MFG招牌肉眼扒配蒜頭山有三款肉俾你揀,美國牛(HKD268)、澳洲M9和牛(HKD398)同頂級韓牛(HKD498)。鐵板上夠晒鑊氣,香脆嘅蒜片加上剛剛熟嘅嫩滑肉眼扒,係意想不到嘅滋味組合呀! 外形特別搞鬼嘅MFG特色蒜蓉包塔(HKD48)有餐廳哥哥為你服務,幾吓手勢就一開六喇!外面香脆內裡鬆化嘅法包釀咗超級多蒜頭,仲有紅椒粉調成辛辣味,味道一流呀! 食咗咁多都要洗滌吓味蕾喇,飲杯清爽嘅Sun-gria White(HKD68)啦!   Mad for Garlic 地址:銅鑼灣勿地臣街1號時代廣場食通天11樓1104號舖 電話:3752 2880 營業時間:星期一至日:11:00-23:00