Tagged: 食好西

0

【街市良心小店高質健康餐 黑松露炒蛋包一試難忘】街霸

上次街霸同大家介紹過南朗山街市入面嘅青咖喱屋,今次介紹埋對面舖珍珠奶茶美食坊啦!聽到呢個名係咪覺得Old School得嚟又帶點台灣味呢,喺街市入面專賣珍珠奶茶都真係夠晒奇怪喎! 其實唔止賣珍珠奶茶㗎,午市有超多選擇,多到應該要嚟足一個月先可以試勻晒咁多款食物呀!以小店規模嚟講,選擇真係多到唔合理,點解可以有西式、日式、台式、連越式都有,當然唔少得港式炒公仔麵啦,淨係以套餐計都有成十六款,仲未計每個套餐都再有3-10款選擇,真係逼死選擇困難症患者呀! 店員話最受女仔歡迎嘅set係鮮芒富士什果沙律餐(HKD45/包$14飲品),邊有餐廳嘅什果沙律係新鮮生果㗎,仲要係小店喎,芒果用呂宋芒,蘋果用富士果,蝕本喎大佬!跟沙律嘅配料都好多選擇,小編揀咗藍莓多士,因為藍莓醬係自家製㗎,保證無添加! 唔好以為Lunch食沙律就唔飽呀,由於用嘅係新鮮大大個嘅富士果,所以飽足感唔講得笑,我食半碟開始飽喇,蘋果味道超清甜,唔會話太多沙律醬搞到好膩,加埋微酸帶甜嘅呂宋芒真係超fresh。每一啖食落口都係清新味道,唔係全部罐頭嘢再溝埋,真係可以稱上小編街上食過最好食嘅「什果沙律」! 多士烘得啱啱好,咬落脆卜卜,中間搽咗一層厚厚嘅藍莓醬,酸酸甜甜超開胃呀。清新藍莓醬配埋真鮮果沙律真係冇得頂呀! 叫得珍珠奶珠美食坊,當然唔少得珍珠奶茶啦!選擇有成廿幾三十種,真係少啲意志都揀唔落手。街霸今次就試咗胚芽珍珠奶茶(HKD17),因為同枱大家都係飲呢杯,所以咪好奇點解囉。飲落個味唔算甜,飲得出茶味同埋胚芽味,啱晒飲嘢鍾意少甜嘅一族呀。胚芽分量好足料,至於珍珠就係普通嘅細珍珠,咬落唔會話特別彈牙,但起碼飲落去個感覺係舒服順喉唔heavy囉。 除咗Lunch吸引,下午茶都超吸晴。健康扒飽餐(HKD25)竟然有黑松露炒蛋喎,因為好奇街市小店嘅黑松露蛋究竟可以去到咩水準,所以就叫咗嚟試吓。 開頭諗住應該係勁hea嘅包夾住一塊hea炒嘅蛋,冇諗過個包原來都幾大個,大過老麥漢堡包。麵包用芝麻包,食落有種自家製嘅軟熟,黑松露炒蛋食落真係有黑松露味喎,仲幾香濃添,分量都唔慳皮㗎!本來黑松露蛋令到咁大個包有啲heavy,但加埋塊新鮮生菜同沙律醬又中和到,街霸真心覺得呢個包好高質!一定會返頭食呀!   街霸最愛:雖然鮮果沙律同藍莓多士都好好味,但街霸覺得今集嘅真愛係黑松露炒蛋包呀!25蚊食到飽一飽,仲難得好味,食完成個感覺超fresh!街霸超佩服街市小店咁堅持做高質新鮮嘅嘢食,唔怪得舖頭細細但lunch時段都爆晒場啦! 珍珠奶茶美食坊 地址:黃竹坑南朗山道1號南朗山道熟食市場1樓11號舖 電話:2555 9113 營業時間:星期一至五:07:00-16:00;星期六:07:00-15:00  

0

【街市內藏正宗星馬菜 秘製黑豉油撈麵稱霸】街霸

今集街霸帶大家食返餐正宗地方菜!去到觀塘碼頭搵食,其實喺嗰度不嬲都有個熟食市場㗎,入面仲有唔少正嘢食,好似呢間隱身於熟食市場入面嘅正宗星馬菜-拿督星馬大飯店!拿督呢個名其實真係響噹噹㗎,坐低見到佢哋牆上貼滿新舊媒體對佢哋對報導,真係紅喎!平日下午時分唔算多人,不過大家要留意喇,佢哋平日晏晝3點3就收工㗎喇,主要做早午市,而且星期六、日都唔開舖,想食就要睇住時間做人喇! 同一般街市嘅熟食檔有少少唔同,呢度嘅招牌、餐牌,甚至牆身嘅擺設都設計過㗎,感覺幾整齊舒服。 當然要試吓佢哋招牌嘅雞扒黑豉油乾撈麵(HKD42),麵底係粗麵,濃厚嘅黑醬油將芽菜同埋粗麵完美咁炒埋一齊,一啲違和感都冇,仲超惹味添!雞扒外皮亦相當香脆,雞肉算幾嫩滑入味,同埋個麵都真係幾大兜㗎!女仔一個人可能會食唔晒,帶定個盒打包做聽日lunch又得啫! 另外小編亦叫咗馬來福建海鮮蝦湯麵(HKD49),雖然賣相唔算好靚,但蝦湯味道真係好濃郁,小編見到隔離枱嘅食客都一人一碗咁滯,好受歡迎㗎!咁濃味難免會有啲口渴,小編喺餐牌見到平時好少見嘅馬來鮮桔仔冰(HKD16)就貪得意叫嚟試吓!有3-4粒桔仔,飲落酸酸甜甜好開胃同解膩呀! 檳城五香肉卷(HKD19)最後試埋呢個星加坡小食先正式收隊!聽個名就知係地道嘢,開頭以為係圓形包住啲肉或者圓條狀嘅肉卷,但原来外形反而似……肉餅。味道有啲複雜,因為入面有蟹肉、蝦肉、豬肉、馬蹄同埋腐皮,感覺係一個好傳統好地道嘅小食。雖然顏色好深,但味道唔鹹,反而有啲甘香味。   街霸最愛:今集我個心就獻咗俾大份夾抵食嘅雞扒黑豉油乾撈麵喇!因為蝦湯麵間唔中都會見到有連鎖店有做,但黑豉油撈麵就真係唔多,而且麵底做得好好,唔會黐埋一餅嘢咁,啲麵條分明,但又唔會覺得太油膩,令人有種食唔停口嘅感覺!正呀! 拿督星馬大飯店 地址:觀塘海濱道190號觀塘碼頭熟食市場1樓20號舖 電話:2344 2347 營業時間:星期一至五:07:00-15:15

0

【鹿兒島頂級燒肉店襲港 豪食「4%奇跡之牛」】Beefar’s

近排好多過江龍日式燒肉店相繼攻港,即係小編嘅脂肪比例又再度提高啫(唔想係真囉)!不過話時話,A4和牛大家就食得多,但A5級別嘅牛可能就少啲機會食到喇(好貴呀,又唔知有咩分別)!今次就帶大家嚟到呢間專提供A4等級或以上和牛嘅鹿兒島過江名店Beefar’s,試吓嬴過日本和牛大賽嘅和牛係咪真係咁好食先! Beefar’s所賣嘅薩摩牛被譽為「4%奇跡和牛」,真係聽到個名都嚇一嚇,心諗:「有冇咁勁呀?」。不過再聽餐廳經理講,原來鹿兒島每年生產嘅13000隻薩摩牛入面只有大約500隻能夠成功入選,又真係好矜貴咁喎!好,小編決定試吓佢哋嘅Beefar’s全牛盛合(HKD848),一次試勻薩摩牛嘅牛柳扒、牛肋肉、牛赤肉、頂級西冷、頂級牛小排、上等牛舌、和牛面頰肉同埋頂級安格斯側腹橫肌牛肉。經理話呢個set係4人分量嘅,望落去肉上嘅紋路都好靚,除返開每人200左右食到晒唔同部位嘅靚牛肉,其實價位合理嘅 ! 師傅建議燒嘅時候盡量唔好well done佢,半生熟就perfect喇!入口超嫩滑,嚿肉幾乎喺口入面融化咁滯呀!就咁易沾少少盬同wasabi就食得,師傅話咁樣食係最原汁原味嘅,當然店內亦有提供燒肉專用醬汁,可因應個人喜好選取。 如果食完和牛盛合覺得唔夠喉,可以再追加呢個4%奇跡之牛極上牛肩肉(HKD238)。呢個牛肩肉唔喺和牛盛入面嘅,因為呢個奇跡之牛肩肉屬於A5級別,霜降程度達10級或以上呀!其實食牛食到A5真係唔係咁多機會,所以呢,食嘅時候記得嗒真啲喇!師傅都係建議大家唔好燒得太熟,見到肉上面有啲格仔坑紋就夠㗎喇!入口真係超有牛味,直頭可以話喺小編食過最好食嘅燒肉,「奇跡之牛」浪不虛名呀! 呢個和牛海膽壽司&和牛甜梨卷(HKD118)亦都係Beefar’s嘅特色菜式嚟。小編唔太習慣食「和牛刺身」,不過食落口又ok。和牛上嘅海膽好新鮮,鍾意食海膽嘅朋友一定啱!不過小編最鍾意都係呢個甜梨卷,和牛嘅油膩感喺咬落口嘅一瞬間被梨嘅甜味中和,好好味呀!呢個甜梨卷好有驚喜! 如果嫌晚市套餐都係有啲貴嘅話,可以試吓佢哋嘅午市套餐,極上烤肉午餐(HKD298)亦分別有4%奇跡之牛極上牛肩肉同牛肩眼肉㗎,咁就可以用平啲嘅價錢試吓4%奇跡之牛喇!另外仲有定食添喎,食材同樣係頂級嘅薩摩牛,會有師傅幫你燒好再送上,Lunch time想食好西冇難度啦!   Beefar’s 鹿兒島燒肉 地址:尖沙咀金馬倫道8號Otto酒店2/F 電話:2557 6286 營業時間:星期一至五:11:30-15:00;18:00-01:00;星期六至日:11:30-01:00

0

【全新面貌踩入銅記】王家沙花樣年華

王家沙喺香港都已經開左一段時間,相信無乜人會唔識。但今時今日樣樣野都講求與時並進,所以王家沙都決定以全新面貌登場,正式落戶銅鑼灣金朝陽中心二期,連個名都唔同啲,叫「王家沙花樣年華」!將傳統滬式同港式烹調法黎個crossover,加入創新元素,推翻大家對滬菜舊有既定形象。 一望就發現餐廳整體感覺都同平時王家沙好唔同,非常有格調! 環境咁靚咁有feel,有家人朋友生日不防黎呢度慶祝都得喎! 食滬菜又點少得麻辣口水雞(HKD78),賣相非常精緻,雞肉嫩滑,味道唔算太辣。 茄汁蝦仁鍋巴(HKD98)都做得唔錯,脆身鍋巴點落茄汁同蝦仁一齊食,好回味! 叫得做上海話梅骨(HKD98)就知佢夠晒惹味啦,甜甜地食過返尋味,停唔到口。 鑊仔香辣咸肉炒花菜(HKD88)連埋個火爐上菜,喺你面前炒兩炒啲香味出晒黎,胃口大開啊。 冬天天氣咁乾燥,當然要食番個雪耳燉津梨(HKD62)潤一潤先啦! 有個咁靚嘅水吧,做出黎嘅飲品都特別啲啦!桂花之戀 (HKD42)入面有桂花糖漿同胡椒薄荷茶,帶點酸味可以解油膩感。 特別注重養生嘅女士們可以試下呢個肉桂檸檬蜜糖茶 (HKD38),暖下身幾好嫁! 王家沙花樣年華 地址:銅鑼灣登龍街1-29號金朝陽中心2期Midtown 1樓 電話:2383 4068 營業時間:星期一至星期日: 11:00-23:00 截單時間: 21:30