Tagged: 飲茶

0

【蓮香樓姊妹店攻入荃灣 限定懷舊菜獨家食】蓮香棧

一路都有傳聞話中環蓮香樓會搬去荃灣,仲會改名叫蓮香棧,但原來錯晒囉……我哋訪問咗蓮香棧,原來只係姊妹店,而總店係咪要面臨拆遷定喺返原址續約呢?一切都未有定案㗎,所以大家唔好亂估喇!講返呢間姊妹店,原来負責人係總店嘅拍檔,對總店嘅菜式都好了解,不過呢度更有空間可以增添多啲懷舊菜式。今次介紹嘅都係蓮香棧限定菜,總店都冇得食㗎! 未正式到午市,已經見到好多人,加埋懷舊風味嘅裝潢,好似回到舊式茶居咁,就咁睇就似足總店咁款喇! 見到門口啲燒味咁吸引,咪以為只係得叉燒、燒肉同燒鵝咁單調,呢款七十年代傳統燒味串燒金錢雞(HKD16件/4件起)都係燒味部出品,差不多整兩日先起貨㗎!由雞肝、叉燒同肥豬肉組成。肥豬肉咬落唔會成口油,質感仲有啲啲實,因為由酒同薑醃製再燒,已經變咗冰肉喇。燒嘅時候,迫咗冰肉嘅油份出嚟,令雞肝同叉燒更加滑,以前啲師傅真係好刁鑽。眼睇好重口味咁,但味道唔會好鹹;油份一定有啲㗎喇,間唔中食ok嘅。 點心車一出嚟,食客即刻圍住搶點心,呢個情境同總店又係一模一樣!手快有,手慢冇。 點心價錢同總店一樣,任何時段都冇優惠,價錢中高啦。不過懷舊菜咁多功夫,食物size又大分啲,呢個價都差不多啦!跟住同大家介紹蓮香棧限定菜色啦! 點心師傅有個好好好重要嘅職位叫「撈餡」,因為所有要撈嘢嘅點心都由呢位師傅負責,例如燒賣、牛肉球等等。野雞卷(HKD28/大點)好有八、九十年代嘅味道,餡料主要係雞肉同蔬菜,有啲似大包味道嘅餡mix手打丸嘅口感,幾彈牙。用腐皮包住上脆漿濕炸,香脆但感覺冇咁熱氣,又有少少酥皮嘅感覺,小編勁鍾意呢款呀! 鮮蝦銀針粉(HKD28/大點)口味清同鮮,好似清泉咁潤吓喉,重口味嘅朋友就會覺得淡啲喇。呢款最好趁熱食,因為擺耐咗銀針粉就會吸咗啲汁㗎喇!肥嘟嘟嘅銀針粉配爽口鮮蝦,口感都幾豐富。 有懷舊點心當然有懷舊小菜,雙冬炒鴿甫(HKD128)用冬筍同冬菇炒鴿甫。原來以前食鴿甫係比較高檔次,而高檔嘅意思即係食肉又唔要咬骨囉!而且舊時嘅食物都係大大件,要起到咁大件肉,隻鴿嘅size要去到頂鴿級㗎。肉香又多蔬菜,都幾正呀。 八、九十年代仲流行骨髓炒三鮮(HKD108),但隨著飲食潮流轉向健康就愈來愈少人食,亦唔多師傅識整。牛骨髓味道幾清,多數鍾意食嘅人都係因為佢滑嘟嘟嘅質感。夾埋大件嘅魷魚、鮮蝦、斑片同時蔬一齊炒,鮮甜味就更加突出,湯汁又啱啱好掛到上餸菜度,師傅功夫好到家! 門口仲有啲中式餅同茶葉俾你買走,呢種舊式風味真係買少見少喇。   蓮香棧 地址:荃灣蕙荃路22-66號綠楊坊L1樓P9-9A號舖 電話:2498 6330 營業時間:星期一至日:06:00-22:00

0

【賀年飲茶推介 歎懷舊點心大團圓】大榮華酒樓 

新年同長輩飲茶係例牌活動,開心嘅係可以趁新年大家一齊聚吓笑吓,但點樣令餐飯食得更開心?梗係要食到正嘢啦! 其實好多後生都鍾意飲茶,仲想食懷舊菜,今日新正頭就推介大家去食神韜韜(梁文韜)主理嘅大榮華酒樓啦,佢哋啲點心夠晒新鮮,味道香濃又唔會太鹹,仲可以食埋圍村菜!唔單止元朗有得食,喺九龍灣同灣仔都有分店。呢幾日過年放假,飲茶有選擇啦! 由食神韜韜嚟介紹食物真係吸引㗎,仲有好多食物典故同圍村故事講俾大家知,想知多啲記住留意我哋最新一期嘅雜誌啦,好快有得睇喇! 臘味糯米包(HKD28)嘅皮好薄,糯米煙韌有咬口但絕對唔黐牙,只有靚糯米先有呢個效果㗎!配埋臘味、花生呢啲香口餡料,夠味之餘口感好有層次。 鮮竹牛肉球(大點HKD28)圍村嘅食法係唔落喼汁嘅,咬開裡面係鮮嫩嘅粉紅色。大榮華嘅牛肉球用芹菜唔用馬蹄都依然勁彈牙,而最厲害就係佢放幾耐都唔出水! 豉汁蒸魚雲(大點HKD28)勁新鮮,一啲都唔腥,魚雲又滑又爽口。佢睇落濃味但其實啱啱好,長輩一定鍾意! 奶黃馬拉糕(中點HKD24)係好多人鍾意食嘅糕點,但要整得鬆軟一啲都唔易。呢度嘅馬拉糕分咗三層製作,所以由頂到底都勁鬆軟。韜韜用筷子壓落去,件糕可以彈返上嚟添!入口淡淡嘅奶香味,嗒啖茶幾正。 食完點心唔夠喉,不妨試埋家鄉蒸芋泥(HKD90/例),芋泥滑嘟嘟,幼滑到好似蓉咁,小朋友都食到。仲有蝦肉提鮮,餸飯一流!   大榮華酒樓  地址:元朗安寧路2-6號2樓 電話:2476 9888 營業時間:星期一至日:06:45-23:30

0

【奇趣飲茶新體驗 破格特式點心任你點】飲茶Yum Cha

飲茶係同屋企人相聚相處嘅好選擇,得閒同屋企人飲下茶,食返幾樣點心嘆下茶傾下計,就可以平伏一下星期一至五忙於工作拼搏嘅心情。平時工作繁複,難得可以同屋企人出街食飯飲茶,唔想成日都食返同樣嘅菜式,例行公事、了無新意,想間中搞搞新意思?去飲茶Yum Cha試試創意無限、天馬行空嘅一盅兩件!開開心心同朋友、家人飲返餐茶,又得意又抵食。 室內環境非常舒適,光線充足,係一個悠閒好去處。茶類有三種可以選擇,包括有紅茶:紅棗紅袍(HKD16/位) 、綠茶:玄米綠茶(HKD16/位) 同埋花茶:杭州白菊(HKD16/位) ,如果大家怕飲茶會瞓唔著,可以選擇花茶不含咖啡因㗎! 睇住流奶(3件)(HKD49)睇個名都覺得好得意,佢係流沙奶皇包,樣子十分趣怪。黃色嘅包,有兩隻眼凸凸咁。趁熱食或者趁熱篤個窿比個嘴仔佢,裡面嘅流沙奶黃餡料就會流出嚟,真係要小心佢流奶!放涼咗會唔夠流心,大大降低好玩抵死指數,大家要趁熱食呀!味道方面,感覺唔膩,食落鬆軟,蛋香味濃郁,大人小朋友都會適合。 吉川奶子(3件)(HKD49)睇落同「睇住流奶」好似樣,同樣都係玩流心。就咁睇名都估到佢係「日本人」啦,佢綠色嘅外表裡面,係抹茶餡料!抹茶控真係去到邊度都有好野食!綠茶味清香又唔會苦澀,大人小朋友都會啱食,仲可以繼續大玩特玩添! 一籠八戒(3件)(HKD49)一籠三隻豬,造型可愛趣緻,原來唔係得個樣,內外都係豬豬!因為佢係叉燒包嚟,唔止外皮軟,叉燒仲好香,又唔肥膩,食落帶有少少豬肉嘅鮮味,推介! 鴿吞鳳梨(3件)(HKD59)可愛嘅鳥籠入面有三隻雀仔,原來佢地係鳯梨酥。籠入面嘅雀仔好精緻,睇落好真好可愛。雀仔鳯梨酥外皮鬆化,裡面嘅餡料味道唔會太甜,啱晒怕甜膩嘅小編! 飲茶Yum Cha 地址:中環德輔道中173號南豐大廈2樓1-2號舖 電話:3708 8081 營業時間:星期一至日:11:30-15:00,18:00-23:00 (Happy hour:18:00-20:00) 地址:尖沙咀加連威老道20-22號3樓 電話:2751 1666 營業時間:星期一至日:11:30-16:00,18:00-23:00 (Last order:22:30)