Tagged: 餃子

0

【東北餃子店溫暖人情味 必點抵食煎餃+爆汁餡餅】平霸

冬天最啱就係食餃子喇!今次俾平霸喺土瓜灣發現到呢間興興餃子館,主要賣東北菜式,去得餃子館梗係要試吓啲餃子啦,餃子價錢賣緊32蚊10隻、40蚊15隻,煎餃同水餃都同價,又幾抵食咁喎,即刻試試佢先! 呢間餃子店開喺橫街,附近大多數都係車房,唔多起眼,而舖面亦比較細,入面得兩、三張枱。成間舖頭由兩位有北方口音嘅店員阿姐打理,由打餡、包餃、下廚到上菜都一手包辦。 呢碟煎餃(HKD40/15隻)拼咗三款口味,分別係三鮮餡水餃、椰菜木耳鮮肉餃同白菜鮮肉餃。餐牌係冇寫明可以拼唔同口味餃子嘅,但係平霸好奇一問之下,店員阿姐好好人咁真係可以俾平霸揀唔同款喎,所以如果想拼唔同口味,記得問多句呀! 煎餃全部都好香口,當中比較特別嘅係呢款三鮮餡水餃,包咗韭菜、蛋同蝦皮,冇落到肉嘅。蝦皮就類似蝦米咁,都係一啲曬乾咗嘅蝦,但蝦皮就係蝦嘅幼苗,蝦味都幾重,可以幫成隻餃提鮮。平霸喺坊間比較少食到,幾有驚喜! 再試埋呢度嘅水餃先,今次就嗌咗芹菜蓮藕鮮肉餃(HKD32/10隻), 水餃唔連湯上,個皮都算幾薄,包得幾靚,就算落過湯煮都冇咁易爆開。入面啲餡剁得幾細,芹菜味幾出,配埋蓮藕咁爽脆嘅口感,清清哋都唔錯。不過平霸就覺得水餃比煎餃遜色少少喇,冇咁惹味。 反而牛肉餡餅(HKD15)真係幾出色,一上枱嘅時候熱辣辣,個皮煎到金黃色,齋睇賣相已經流晒口水!切開睇吓,皮夠薄、牛肉餡都唔少喎,仲有肉汁流出嚟添。第一啖入口,食到好香嘅牛肉味,咬落嚿肉feel到好多肉汁,唔會乾噌噌好Juicy!不過自己一個食晒成件可能會覺得有啲膩,如果餡料加啲蔬菜就更好喇! 凡係食餃子或者麵食都會送杯豆漿,連豆漿都係自家製,豆味幾重,冇乜甜味,味道唔多似平時飲開嘅豆漿,有啲怪怪哋味喎,不過係送嘅,點都好過淨係得清水飲啦。   平霸小評:15隻餃子食到捧住個肚走先40蚊,計落一隻都唔使3蚊,連爆汁牛肉餡餅咁大件又好食都只係15蚊,算好滿足啦!值得一提嘅係,喺呢度食餃子除咗抵食飽肚,平霸仲食到人情味,事關店員阿姐好易話為咁俾客人拼多幾款口味餃子都得之餘,仲不時問使唔使幫忙翻熱等等,服務態度認真唔錯。仲有,餃子店開到夜晚12點㗎,啱晒夜貓子覓食! 興興餃子館 地址:土瓜灣浙江街27號地下G5號舖 電話:2311 9209 / 9829 2686 營業時間:星期一至日:11:00-00:00   

0

【深水埗餃子店特價下午茶 逆市長推$19高質大隻餃】平霸

20蚊食一個下午茶,依家都幾難搵得到喇!深水埗呢間圓方餃子粥麵嘅餃子好食就出晒名,原來下午茶仲平到20蚊有找!今次平霸就同大家試匀佢哋兩款下午茶餐,睇吓係咪又平又抵食啦! 兩款原價25蚊嘅湯餃同粉麵,喺下午茶時段特價只係19蚊咋!雖然下午茶係唔包飲品,但係咁平價就食到大碗又好味嘅下午茶,都好吸引噃!不過記住呀,下午茶時段只限星期一至五下晝3點至5點,星期六、日同公眾假期係冇㗎。 平霸四點幾去到,竟然見到門口大排長龍,原來係排隊買生餃,證明佢哋啲餃子幾咁受歡迎。堂食就唔使等,入面環境幾乾淨,有5-6張大圓枱,每張大概可以坐到6個人,如果得自己一個或者同個朋友嚟食就通常都要搭枱。今次平霸叫咗兩款下午茶餐,兩碗唔使5分鐘就送到上枱喇。 連招牌餃子都有下午茶,呢款魚湯韭菜餃(HKD19)一碗有成8隻韭菜餃,仲要隻隻都咁大隻,連平霸都覺得幾驚喜。湯餃隻隻都好完整,啲皮冇爆開或煮到爛,而且餃子皮夠晒薄,煮熟之後透到韭菜嘅翠綠色出嚟添!個湯頭係奶白色嘅魚湯,感覺幾濃郁。 隻韭菜餃有成隻匙羹咁大,一啖都食唔晒,即係唔會因為下午茶就包得細隻啲囉,抵讚!湯餃咬落好香韭菜味,入面啲豬肉肥瘦適中,仲有少少湯汁滲咗入去,果然高質呀!奶白色嘅魚湯飲落冇乜味精味,唔覺得鹹,但魚味唔太重,不過不失啦。 另一款下午茶就係墨魚丸河粉(HKD19),一眼望到成碗粉有成5粒墨魚丸,河粉分量都唔少,胃口唔係特別大嘅都應該食得飽;湯頭睇落就同頭先碗餃嘅湯差唔多,都係奶白色咁。 呢碗粉入面啲墨魚丸都係幾大粒,食落彈牙,咬到啲墨魚肉,同平時打邊爐嘅墨魚丸差唔多。河粉口感就比較軟身,但未至於一夾就斷嗰種,而且真係有幾多河粉,食極都仲有。個湯飲落應該同韭菜餃嗰碗一樣,都係清清哋,鍾意清淡啲嘅朋友仔就咁食都夠味,如果食得辣嘅可以加啲辣椒油食就更惹味。 平霸小評:呢間餃子店喺深水埗開業超過二十年,全部餃子都係每日人手新鮮即包,估唔到連$19下午茶都咁足料。平霸就比較鍾意食魚湯韭菜餃,真心皮薄餡靚,下午茶19蚊有得食8隻咁大隻嘅韭菜餃,點可以唔試吓呢? 圓方餃子粥麵 地址:深水埗福華街104號地舖 電話:2720 0855 營業時間:星期一至日:0900-22:00

0

【網民力推人氣餃子 四大口碑店包你鍾意】梁記餃子麵坊、圓方餃子粥麵、蒲公英和牛專門店、餃子屋

上次同大家介紹完新派餃子,今次就同大家講吓有邊幾間人氣餃子店係網民極力推介嘅,讚唔停又食唔停啦! 皮薄饀靚 梁記餃子麵坊 呢間餃子店元朗人一定知,個個都話食完一定會返轉頭encore,係咪咁堅先? 小編叫咗淨食雙拼餃子(HKD34/8隻),價錢好親民喎。店員就推介小編食香甜南瓜餃子同菜脯沙葛餃子,上到枱完全呆晒呀,餃子係大粒到成個乒乓波咁,成粒啪落口幸福感爆燈呀! 香甜南瓜餃子確實餃如其名,夠晒香甜,又唔會做到好似南瓜蓉咁,仲有實體一粒粒南瓜俾你咬到,質感好實在呀! 菜脯沙葛餃子就真係好特別喇,平時小菜食菜脯就食得多,加咗落餃子入面,味道又唔同咗,加埋沙葛食落好爽脆!同埋佢個皮係好薄,薄到以為自己食緊雲吞咁呀。 梁記餃子麵坊 地址:元朗安寧路93-109號富祥樓地下1號舖 電話:3525 0138 營業時間:星期一至六:10:30-00:30;星期日:10:30-22:00 湯底取勝 圓方餃子粥麵 圓方餃子粥麵出名嘅程度唔使多講,佢嘅餃子真係世界級咁好食! 魚湯西洋菜餃(HKD26/8隻),雖然餐牌冇寫可以雙拼,不過小編嗰日問店員可唔可以雙拼,又得喎!平時出面食餃子好少見到有西洋菜,呢款可算係佢哋嘅王牌,西洋菜新鮮又爽脆,菜同肉嘅比例啱啱好,肉質鮮嫩,唔止網民,小編都推介呀! 另一款魚湯韭菜餃(HKD26/8隻),咬咗一啖,韭菜嘅香味完全噴發出嚟,成個口好似食緊成棵韭菜咁,一啲都唔誇張呀!鍾意食韭菜嘅一定要試! 圓方餃子粥麵 地址:深水埗福華街104號地舖 電話:2720 0855 營業時間:星期一至日:09:00-22:00 高級豚肉 蒲公英和牛專門店 聽個名係咪估唔到和牛專門店都有餃子食呢?仲要係用上全自家製100%嘅鹿兒島黑豚肉嚟做餃子餡料,好高級喎! 雙拼餃(HKD48/15隻),分別係白菜同韭菜餃。比較特別嘅係可以俾你揀簿皮定厚皮,我個人就比較欣賞白菜餃多啲,因為入面啲白菜碎好爽脆好有口感呢! 值得一提佢嘅辣醬好好食,小編見啲客人係會將豉油加芝麻醬再加埋辣醬一齊撈勻咁食,又真係幾惹味喎!大家可以咩都唔點就咁食咗餃子嘅原汁原味先,之後再點醬都得。 韭菜餃味道同樣都非常香濃,食完個口一陣清香呢! 蒲公英和牛專門店 地址:觀塘開源道60號駱駝漆大廈3座1樓F室 電話:2389 2184 營業時間:星期一至日:12:00-19:30 無味精老火湯 餃子屋 最後呢間就係好多人都推薦過嘅餃子屋!可以話係荃灣區必食呀。可以任選一款足料無味精老火湯,有魚膠淮山煲豬骨/重慶湯底。 雙拼傳統餃子(HKD30/6隻),小編叫咗雲耳白菜豬肉餃同芹菜豬肉餃,湯底入口好清甜仲好濃郁,好好飲喎!餃子超大隻又飽滿,餡料甚多,好滿足呢! 個個客人食過都話一定會再幫襯㗎!...

0

【新派餃子店特集 四大賣點餃邊科?】三一餃子、有得餃、手作餃子專門店、餃掂手工餃子雲吞專門店

一向都好鍾意食餃子嘅小編,今次搵咗幾間比較新派嘅餃子店俾大家,炸餃湯餃乜餃都有齊晒,即刻睇吓有咩好食啦! 吸睛造型 三一餃子 最出名係香炸玫瑰餃(HKD15/1隻),用餃子整成玫瑰嘅造型,非常吸睛; 而餃子餡料係薑蔥豬肉,食落唔會好似食緊一大堆炸粉咁,味道仲非常唔錯呢! 另一款炸黑松露芝士雞餃(HKD15/3隻),呢款好有驚喜喎,炸餃嚟講一啲都唔油膩,估唔到黑松露味道咁突出,夾埋芝士一齊食好邪惡呀! 三一餃子 地址:石硤尾偉智里1-3號白田購物中心地下G5號舖 電話:65838013 營業時間:星期一至日:11:30-20:30 即叫即炸 有得餃  呢間餃子就夠晒潮啦!炸餃都出埋嚟,小編試咗金菇肥牛炸餃(HKD46/6隻),估佢唔到咁好食,即叫即炸又唔會話好油膩,入面堅有金菇肥牛,變咗炸餃嘅食法又幾正喎! 另外仲試埋芝士比撒炸餃(HKD46/6隻),食落真係好似食緊pizza咁㗎,仲有少少拉絲添! 除咗炸餃,再食埋野味溫室蕃茄豬肉餃(HKD41/8隻),如果要加湯就再加2蚊,係胡椒豬肚湯,不過我就覺得湯嘅味道唔出,蕃茄豬肉餃有啲啲酸,但又幾fresh喎。 有得餃 地址:元朗又新街53-59號滿利大廈地下E舖 電話:2449 3389 營業時間:星期一至日:10:00-00:00 Fusion風味 手作餃子專門店   如果想食fusion餃子,呢間就啱晒你喇!餃子餡料全部都好特別,餃子又大粒脹卜卜咁。 小編食咗咖喱雞肉薯仔餃同鮮肉冬蔭功香辣餃(HKD32/7隻),可以雙拼添喎,咁一次過就可以食到唔同味啦!兩款餃各有特色,鮮肉冬蔭功香辣餃味道較突出,真係幾辣吓㗎,好有泰式風味; 而咖喱雞肉薯仔餃啖啖都會食到有薯仔,唔錯喎! 手作餃子專門店 地址:太子荔枝角道88號地舖 電話:3689 7218 營業時間:星期一至日:11:00-22:30 貴價餡料 餃掂手工餃子雲吞專門店 呢間餃子巴閉喇,龍鳳松茸雙灼餃(HKD82/8隻),價錢嚟講應該冇人貴得過佢,不過我又覺得貴得幾值嘅,間唔中一次絕對可以接受呀。 點解咁貴?事關佢用咗菌王之王-松茸嚟做餡料,隻隻都好飽滿㗎,松茸味道非常香濃,個人覺得黑松茸味道出過白松茸呢! 而且佢嘅狀元九鼎湯完全冇落味清,好清甜。為咗唔想俾啲湯搶咗松茸嘅鮮甜,店員仲會將餃子同湯分開上,好細心㗎! 餃掂手工餃子雲吞專門店 地址:太子界限街30號地下...

0

【22蚊12粒薯粉餃子 太子小店正宗潮汕味】平霸

平霸搵食,今次小編去咗太子嘅粿然好味,一直都知道呢間小店好出名好多人推介,主打正宗嘅潮汕美食,鍾意潮州菜嘅朋友仔可以嚟呢度搵食喇! 除咗有家鄉菜茶之外,仲有潮式腸粉、冬節餃、薯粉餃子、千層糕同草果等等,好多選擇㗎! 潮式腸粉(HKD22)同平時食開嘅腸粉有好大分別!呢個係超!級!之!滑!老闆每晚都會浸米,朝朝新鮮磨米漿整出嚟,再加埋雞蛋一齊落去蒸,唔怪得啲腸粉可以咁滑啦!而且仲要滑得嚟有米香㗎喎,抵讚呀!腸粉上面仲加咗啲雜菜、冬菇同雞蛋等配料,再配埋自家製香油,真係冇諗過腸粉都可以食到咁惹味,雖然食完確係有少少油膩感,不過絕對可以接受嘅! 薯粉餃子(HKD22/12粒),身為餃子控嘅小編見到已經心心眼都出晒嚟!佢嘅皮用番薯同大地魚粉整成,入面嘅餡料就用豬頸肉,食落又幾得意喎。最鍾意佢個皮煙煙韌韌,食落好QQ,再點埋醬汁,一口一粒,正呀! 草果(HKD12)另一個名又叫黑涼粉,食落質感係幾似涼粉嘅,但又冇涼粉嗰種苦味,可以配花奶或者糖漿一齊食,口感好Q彈,仲可以清熱解暑,夏天食返碗消暑都好喎! 平霸小評:小編不嬲都好鍾意呢啲小店,呢次去到咁啱得老闆自己一個,見佢事事親力親為,態度仲好親切,真係難得!而且對於未食過潮汕美食嘅我嚟講,估唔到係咁正!未食過潮汕美食嘅你,一定要嚟試吓啦! 粿然好味 地址:太子界限街41C號地舖 電話:2295 0959 營業時間:星期一至六:12:00-23:00;星期日:11:00-18:00 《平霸》平食四方,歡迎各界報料。

0

【札幌名店進攻灣仔 一幻鮮爆甜蝦湯拉麵】一幻拉麵

講咗咁耐終於等到佢開喇!喺札幌出晒名,勁多日本藝人推介嘅一幻拉麵進駐灣仔,價錢同一般嘅拉麵差不多,試完都唔會傷荷包。 店舖唔算好大,但都設計得好有特色,拱形大竹簾都幾有氣派。 嚟呢度梗係試咗招牌原味拉麵(HKD88)先啦!佢嘅甜蝦湯底每日以大量甜蝦蝦頭新鮮熬製,不過咁係未夠嘅,仲要配有混合紅薑同蝦湯底油炸而成嘅秘製脆脆蝦味麵酥,同埋熬煮過再磨碎炒香嘅蝦頭蝦粉,鮮味到好似飲咗個海落肚呀!每碗拉麵都有一片叉燒同半隻溏心蛋。 當然另外都有豚骨蝦湯同濃厚豚骨蝦湯,滿足埋鍾意豚骨湯漿口感覺嘅朋友。調味有三種選擇,有鹽味、醬油同味噌;鹽味係北海道風味嘅代表;味噌就係札幌代表,你鍾意邊款呢?提埋你,麵底有粗麵同幼麵揀㗎。 仲有海外限定叉燒飯(HKD45),將日式叉燒切細,再加入麵酥、青蔥同少少秘製辣椒醬提味。 食拉麵好多時都要加料,追加溏心蛋(HKD10/隻)好平常啦。 加叉燒(HKD30/3片)亦未嘗不可,肥瘦適中都唔錯㗎。 小編就鍾意食餃子(HKD35/5件),次次食拉麵都要配㗎。 如果想食少少飯落肚,不妨試吓蝦味飯糰(HKD20/個)。   一幻拉麵  地址:灣仔皇后大道東119-121號欣景閣地下B-F號舖 電話:2789 3799 營業時間:星期一至日:11:00-23:00

0

【鎮店朱古力餃贏人氣 黑豚餃子回歸搞新料】餃餃餃子

唔知大家會唔會對某種食物有情意結呢?我就有喇!小編由細到大都好鍾意食餃子㗎,一日三餐食餃子都冇問題,今次呢間餃餃餃子喺大阪有超過40間分店,主要都係以餃子為主,嚟到香港開業近兩年幾乎晚晚爆場,今次試吓佢哋鎮店之餃同有乜新餃啦!  雞翼餃子(HKD50/2隻)雞翼餃子入面釀咗日本豚肉、日本椰菜、洋蔥、香蒜同生姜,脹卜卜嘅外形,食落啖啖肉而且仲要去埋骨,經過高溫油炸,可以鎖住餃子入面嘅肉汁,表面香脆入面juicy,勁正呀! Shake Shake餃子(HKD42)呢個非常特別,shake薯條就shake得多,shake餃子又試過未?香港限定shake shake粉係粟米濃湯味,用咗秋田縣嘅米做外皮,食落比較厚身同有米香,而且唔會炸到爛晒,食得又玩得,超受大人細路仔歡迎呀! 餃子盛組合4種(HKD55)入面係有海老餃子、蘑菇餃子、京都九條蔥餃子同椰菜豚肉餃子,可以試晒四款唔同嘅餃子,唔使心思思諗食咩啦!比較特別嘅會係海老餃子,入面有滿滿嘅蝦肉,而且係點紫菜鹽食,可以提升鮮味,加上全部材料都由日本直送,樣樣都咁新鮮啦! 朱古力餃子配雪糕(HKD38)唔好諗住食落會好奇怪呀,呢個真心超好食!係京都店嘅人氣no.1,外皮好脆薄,朱古力質素高,可可味超重,加熱之後變咗好似流心咁,勁吸引呀,再配埋雲呢拿雪糕,冰火相融,超好食! 餃餃餃子每年都會有啲新menu搞吓新意思,由2月1號開始,又有明太沙律拌磨菇餃子同黑豚餃子兩款新餃子推出啦!明太沙律拌磨菇餃子(HKD52),因為日本人好鍾意食明太子,所以特登諗咗將明太子沙律同餃子結合埋一齊,用明太子嘅鹹香提升蘑菇餃子嘅味道,食落好有層次,好開胃。 黑豚餃子(HKD42)其實早喺2016年香港推出嗰陣已大受歡迎,今次經客人強力要求終於再度回歸。今次特別用上日本國產嘅黑豚肉,貪佢纖維較少,肉質彈性高,食落口感更加正啦! 餃餃餃子 地址:灣仔廈門街31號地下 電話:2735 5360 營業時間:星期一至日: 11:45-22:00;公眾假期:11:45-23:00

0

【至潮日本餃子食堂】餃餃餃子

一間接一間過江龍在本地開業,這家「浪花ひとくち餃子 餃々店」日本平民美食餃子店於大阪起家,大受歡迎,開到黎香港,都一樣多人追捧。其實日文的「ひとくち」係「一口」的意思,「浪花ひとくち餃子」也就是「浪花一口餃子」,幾有feel。招牌上大大隻的兩個漢字「餃々」即餃餃,因此店子的中文名就叫作餃餃餃子。店外長期有人等位,人流多但食得算快,所以唔使驚等得耐。走到店內,地方真的不算大,半開放式廚房見到幾位師傅忙住煎餃子,餐廳椅桌均以紅色示人,都幾搶眼!一開始當然唔少得小食出場,清新蟹子沙律(HKD18),夏天愛吃小食!小菜系列當然有自家製香辣青瓜BB(HKD18),幾開胃,但唔係太食得出辣味!期待已久!店內名物Chao Chao餃子到啦,可選8隻(HKD22)或16隻(HKD40)。黠樣先係最好食?可以參考在店內的建議,試試不同醬汁!皮薄餡靚的煎餃子,一定是長年人氣不降的平民美食!而餃餃餃子香港店跟日本店一樣,每天新鮮包製,好似手指公咁大的迷你餃,一啖就岩晒,而最大賣點除嚴選食材外,更由人手每天包製而成。店內餃子款式當多元化,但有部份已貼上sold out,今次試餃子4種盛合(HKD52),有海老餃、蘑菇、京都九條蔥及淡路島產洋蔥四款口味,小編最鍾意係海老餃子,真係似食緊蝦餃,較爽同鮮,原汁原味。今次小編一人橫掃餃子食堂,表示大滿足! 餃餃餃子 灣仔廈門街31號地下 星期一至日: 12:00-15:00; 18:00-22:00