Tagged: 香港藝術館

0

【香港藝術館兩大澳洲菜餐廳 摩登西餐×海岸露天茶座】Hue、Ink

香港藝術館重開之後有兩間澳洲菜餐廳,同樣可以望海,不過風格就各走極端。地下嘅Ink以露天茶座形式,俾大家感受好似喺悉尼海岸嘅Cafe同海鮮餐廳咁,飲住啤酒食嘢夠晒chill。而喺一樓嘅Hue就係時尚嘅西餐廳,俾大家品嚐新派澳洲菜,依家即刻睇吓佢哋有咩正嘢食啦! 1. Ink Ink嘅環境同價錢都幾接地氣,好似手工啤酒Gweilo(HKD50/500ml)嘅價錢好全日劃一收費,定位好似Happy Hour咁,仲有Pilsner、Pale Ale、IPA、Hoppy Wheat等6款口味;如果想飲葡萄酒(HKD60/杯,HKD280/瓶)都有得俾你揀。 澳洲菜主要用海鮮食材,呢度自然都有海鮮拼盤(HKD430)。一次試勻即開生蠔、汁煮藍青口、燒大蝦、白脫牛奶炸鯖魚等食物,由鮮味到惹味全部齊晒,啱晒同朋友開心share。 想再邪惡啲可以揀小食拼盤(HKD190),黑熔岩鹽薯條、椒鹽魷魚、天婦羅八爪魚丸、白脫牛奶炸雞等食物鹹香惹味幾脆口,而且幾乎有齊單點小食嘅款式,抵食啲又有多重選擇。 簡單啲都有風靡一時嘅小龍蝦包(HKD120),夾咗爽口嘅小龍蝦肉配上微辣嘅泡菜同醬汁,醒胃又啖啖肉,佐酒一流! 如果想曬住太陽食lunch,全日供應嘅Combe Set(HKD80-110)就啱晒喇。你可以喺6款主菜同4款飯麵、卷餅之中各揀一款,小編就試咗天婦羅軟殼蟹配芝麻辣醬烏冬沙律,撈咗芥末醬汁嘅烏冬沙律帶少少辣,平衡返天婦羅軟殼蟹嘅油膩感,其實都幾清爽喎。 想暖胃啲就要飲勁多料嘅帶子蜆海鮮濃湯(HKD65),鮮味香濃又可以用煙韌有咬口嘅麵包蘸嚟食。 雪糕(HKD45/球,HKD80/雙球)可以揀杯裝或加錢用窩夫筒(HKD5)。小編試咗有八角香嘅Vanilla Star Anise拼清甜嘅Raspberry Milk Tea,質感有少少似雪葩,而且會按季節推出限定口味添。 店內會有少量包點,成間店嘅menu都幾多選擇㗎。   Ink 地址:尖沙咀梳士巴利道10號香港藝術館G樓 電話:3500 5881 營業時間:星期一至日:09:00-22:00   2. Hue Hue嘅格調比較時尚同富藝術感,分咗酒吧同餐廳兩邊,不過都係全海景㗎!呢度貫徹澳洲菜色彩豐富、混合各地烹調方法同埋分量足嘅特色。 呢度嘅凱撒沙律HUE Caesar(HKD130)款式同平時嘅好唔同,將新鮮生菜開半就原件盛載西班牙白鯷魚、用蘋果木煙燻嘅蛋、脆煙肉碎同Vadouvan香料醬。入口非常清爽,又帶啲鹹香,口感仲好豐富添。 呢道和牛刺身Raw Mayura Wagyu以柚子胡椒忌廉調味,入口清新有柚子香氣又有香辣嘅味道,再配埋酥脆嘅紫菜脆餅就更滋味喇。...