Tagged: 香港

0

【「很讚紅燒牛肉麵」讚唔落 肉燥勁鹹牛肉嚡口】伏務台

肉燥係台灣地道美食嘅靈魂之一,喺長沙灣嘅台式餐廳一碗肉燥就以肉燥做膽,不論飯、撈麵定係湯麵都一定配咗肉燥。咁大膽係咪就一定正宗兼好食?試吓咪知囉! 餐廳係半快餐形式,自己搵位。剔完點餐紙就舉手,等店員埋嚟幫你落單。 反正食台式嘢,梗係要試埋牛肉麵,所以加HKD4由飯變湯麵,點咗很讚紅燒牛肉肉燥湯麵(HKD56),午餐包埋蜂蜜紅茶,冷熱同價,小編就揀咗熱。建議大家check check單,因為店員落錯咗撈麵,好彩改得切,因為落單唔使5分鐘就有得食,砌得好快手。先上飲品,真係有啲嚇親,因為蜂蜜同紅茶好似分開兩件事咁,好唔夾,而且太甜,蓋過咗茶香。麵嘅賣相一般,見到溏心蛋蛋黃邊過熟已經扣分!唔理咁多喇,先試肉燥啦! 近睇肉燥就係一大pat醬,就咁潷一啖會覺得醬多過料,冇咩咬口,反而覺得鹹咗啲。睇真啲(圖右),綠色嗰堆粒粒唔係蔥、係四季豆囉,牛肉麵用四季豆做配料,小編真係未見過喺台灣有咁嘅配搭同賣相囉;肉碎呢?愈咬愈乾、另外又夾雜唔少嚿肥膏;冬菇粒就好似醃到本身水份流失晒嗰種腍! 然後試佢自己讚自己嘅很讚紅燒牛肉,入口喺腦海中即刻出現係「好鹹」兩個字……調味太重手喇。肉質有啲嚡,又炆到乾柴咁款,真係讚唔落口喎。 麵條似刀削麵加鳥冬嘅感覺,不過唔知係差少少火喉定係麵質問題, 咬落有啲硬同實淨。不過麵條太粗,唔似台灣麵嘅風味。食到咁上下,食四季豆清清味覺,點知係成陣草青味!咬落跟本未熟,外層仲硬硬哋添!食到呢個時候,小編都冇講過個湯,因為就係帶味精嗰種鹹鹹哋嘅湯囉,冇特別。   小編伏氣:成碗麵就係兩種味,就係「鹹」同「青草味」。最鹹係「很讚」紅燒牛肉,鹹到眼都凸;第二鹹係肉燥,不過咁多醬浸住,似乎叫肉燥醬適合啲囉!冇諗過四季豆都可以唔煮熟,小編想食都食唔落。如果要改善,煮腍啲四季豆同麵條,鹽用少一半會好好多。 入伏點:一碗肉燥 入伏價:HKD56 中伏by #為食加菲貓 美術by #車雲 攝影by #為食加菲貓 《伏務台》星期一伏務大眾,歡迎各界報料。

0

【快過正版衝出國際 山寨喜茶攻東京㗎妹撐】食焦

山寨版開到成行成市,有時個勢仲誇張過正店咁喎!最近講得最勁嘅梗係「難辭其咎」嘅「蘭池」拉麵啦,呢間老翻一蘭喺杭州開店,像真度極高,真係難分真與假!有啲仲誇,好似喜茶,其實一直有唔少山寨版出現,誇到衝出國際嘅,就係呢間宣喜茶。 之前喜茶喺官方ig度登咗請人廣告,令到終於登陸香港嘅消息都曝埋光,將會喺沙田新城市開香港第一間海外店。正版都未正式攻港,山寨版宣喜茶就快人一步,上個月喺東京池袋開店,仲引咗好多日本人去打卡,有茶飲就唔理得你係正版定山寨,個個㗎妹手捧一杯杯芝士奶蓋,呢間山寨店輕易成為咗池袋熱點! 其實喜茶彈起之後,有樣學樣嘅山寨版層出不窮,又宣喜茶、囍茶、東喜茶、遇喜茶……多到數唔晒!至於衝出國際喎,池袋嘅宣喜茶都唔係第一單喇,舊年喺首爾江南區,就有網民發現喜茶蹤影,不過個名唔係叫「HEYTEA」,而係「HEEKCAA」,快過晒正版喺海外開店,勁呀!

0

【盤點3間特色茶店  吸客絕招賣點大不同】春風三月、Flamingo Bloom、了不起

珍珠奶茶幾乎成為咗大家嘅「必需品」咁喎,開心要飲,唔開心都要飲;夏天解渴要飲,冬天保暖都要飲!不過珍珠奶茶店愈開愈多,開到好似便利店咁「梗有一間喺左近」之後,間間差唔多冇咩特別咁。今次小編就同大家精選近來三間唔同特色嘅茶飲店,睇吓有冇你心水? 元朗小店 自家製珍珠 喺元朗千色店地下嘅春風三月有別於普通賣台式珍珠奶茶嘅小店,佢哋嘅珍珠唔係由台灣進口,而係用台灣嘅原材料做成嘅「手工珍珠」。人手製珍珠所用嘅人力物力都比較高,不過老闆娘之一嘅方小姐就話希望顧客可以有多啲選擇,同埋飲到有信心保證嘅珍珠奶茶。唔講唔知,原來春風三月呢個名係來自一首唐詩《茶山貢焙歌》,「使君愛客情無已,客在金台價無比。春風三月貢茶時。」呢首詩仲印咗喺舖頭內壁上,飲珍珠奶茶都咁有詩意,好文藝呀! 自家製珍珠有幾款,除咗最Original嘅黑糖口味之外,小編認為焦糖Baileys口味珍珠就最特別喇,全港應該只有呢度食得到!老闆娘話挑選合適嘅酒類製作珍珠時都試過好多種,結果發現焦糖味Baileys製成珍珠後可以保留到焦糖嘅香味,食落冇乜酒味,大人細路都啱食!另外桂花珍珠同玫瑰珍珠亦係舖頭嘅招牌之一,小編今次試咗鐵觀音玫瑰珍珠(HKD30),珍珠咬落口好QQ,而且玫瑰味好濃!鍾意花香味嘅朋友記得試試喇! 如果夜晚想飲返杯嘢但又驚飲茶會瞓唔著嘅話,可以試吓呢款嫩仙草奶凍(HKD28)或者Double芋頭奶(HK36)!呢兩款飲品都係不含任何茶或咖啡因成分嘅,而且仙草入口超幼滑,仲滑過小編隻手仔呀!大人細路都啱飲。 春風三月 地址:元朗教育路1號元朗千色匯地下G34號舖 電話:6060 4907 營業時間:星期一至日:11:00-22:00   中環潮店 健康果茶OL最愛 中環石板街旁嘅呢間茶店用咗搶眼醒目嘅Flamingo做吉祥物,成個舖頭設計都好有熱帶風情呀!直頭有一種鬧市中綠洲嘅感覺,店主亦希望客人入到嚟可以暫時放下工作,好好歎返杯茶。佢哋分別主打茉莉毛尖綠茶、高山油入烏龍、四川蝶蘭紅茶同埋胎菊普洱黑茶,飲品款式多數搭配新鮮水果,夠晒健康呀!小編問過負責人,佢話因為老闆本身唔鍾意飲咖啡,而返工需要提神嘅時候就會選擇飲茶,因為茶同咖啡一樣都有咖啡因,不過比咖啡更加健康同埋容易入口。老闆亦知道好多女士都未必鍾意飲咖啡,所以就開咗呢間Flamingo Bloom,希望大家可以多一個健康新選擇。 近年興健康飲食,Flamingo Bloom都堅持用新鮮水果和蔗糖代替傳統糖漿,仲會不定期更新Menu,可以係唔同季節飲到最好味嘅水果茶;而茶葉方面亦嚴選唔同產地嘅茶葉,並用原片沖泡,茶底夠濃夠甘香!由於2-3月係士多啤梨當造期,所以佢哋就推介咗呢杯草莓茉莉珍珠綠茶(HKD44)俾小編。望落好粉紅好少女心呀!飲落口既有士多啤梨嘅酸甜果香又有淡淡茉莉花嘅香味,飲落唔會好Heavy,如果你同小編一樣怕肥就啱晒喇! 如果Tea Time想飲得滿足少少嘅話,亦可以試吓呢杯奶蓋玫瑰烏龍(HKD36)。奶蓋上層放原粒玫瑰真係好賞心悅目,奶蓋同帶有淡淡玫瑰香嘅烏龍茶好夾,呢杯小編畀5粒星呀!雖然奶蓋係有少少肥,但吃貨係應該所向無懼㗎哈哈!另外Flamingo Bloom亦有提供無糖無咖啡因嘅Nacked Zero系列,呢個系列sell嘅係純果汁,甜味只靠杏仁奶同烏魯木齊提子,連大肚婆都啱飲! Flamingo Bloom(中環店) 地址:中環士丹利街50號信誠廣場地下B號舖 電話:5177 8255 營業時間:星期一至六:11:00 – 21:00;星期日:11:00 – 20:00   台灣過江龍...

0

【小編直擊首爾膠囊酒店】仁川機場

話明【真假期】,咁重要嘅新聞梗係唔係求其喺網上攞幾張相出嚟hea 你啦!就係呢個韓國仁川機場膠囊酒店正式開張嗰個禮拜,我哋已經特別派左小編(即係我,仲有得玩2日!)同大家做個實地考察加真實圖片,睇下係咪真係咁正! 次次坐親凌晨機去首爾都要搵地方落腳,通常都會去汗蒸幕度Hea。今次為咗測試如果凌晨機攰到死而又有個膠囊酒店比你抖下嘅感覺係點,小編都好不情願咁揀咗呢班機(順便玩多半日)。 機場上個月嘅1月20號,首爾仁川機場終於開咗第一間膠囊酒店Darakhyu,位置喺仁川機場交通中心一樓。由機場出境大堂行過去大概十分鐘,跟住通往地鐵嘅指示,就會搵到,非常方便!有搭過地鐵出市區嘅人都一定知道邊度。 膠囊酒店分開東翼同西翼兩邊各30間房,兩條扶手電梯都可以上去一樓,check-in大堂位於東西翼中間。 Check-in大堂位置寬敞,係24小時休息區。 Check-in完之後,就可以用房卡或者佢地嘅專屬app正式進入膠囊酒店範圍。 膠囊酒店入口分幾個,會根據房間分派到唔同入口。 入到去就見到左右兩排都係房間,每間都係獨立設計,私人空間十足! 小編今次住呢間係雙人房間(連淋浴室)。等我同大家介紹下裡面究竟係點嘅樣!話就話係膠囊酒店,但其實同酒店好相似,用膠囊酒店價錢可以住到呢個質素,真係非常不錯! 開門之後就係咁嘅樣:左手邊係淋浴室,右手邊就係張床。有埋個小小嘅衫架掛下衫,仲有埋洗手盤,仲有個檯面可以放下野,細得黎位置都好實用! 張床一啲都唔細,完全訓得落兩個成年人,有埋床頭燈添,幾好幾好。床下面仲有足夠空間,可以放得落兩個大行李都絕對不成問題! 其實如果選擇唔連淋浴間嘅房間會平多少少,但係想沖涼就要用公共淋浴室。 公共淋浴間其實都幾乾淨(可能因為仲新啦)。 淋浴間有埋洗頭水同沐浴露,仲有乾淨毛巾用! 講到咁吸引,大家當然會關心到收費。收費模式主要分日間同晚間時段。 日間時段早上6點至晚上8點,所有房間最低消費3小時。 單人房間23100won起 (大概158HKD) 單人房間加淋浴間26400won起(大概181HKD) 雙人房間31500won起(大概216HKD) 雙人房間加淋浴間36000won起(大概247HKD) 晚間時段晚上8點至早上6點,所有房間最低消費12小時。 單人房間55000won起 (大概376HKD) 單人房間加淋浴間60000won起(大概411HKD) 雙人房間69000won起(大概473HKD) 雙人房間加淋浴間75000won起(大概514HKD) 超時使用房間每小時都係另加4000won(大概27HKD)超低! Darakhyu Capsule Hotel 網址:www.walkerhill.com/capsulehotel 查詢電話:+82...

0

鬧市神秘出擊!真 ‧ 香港搵食手機APP

今個12月,Too Full For Food除咗為大家帶嚟全新真.香港搵食手機 APP – BOGO HK,等大家可以親身體驗遍佈全港九新界,超過600個買一送一嘅餐飲禮遇之外,仲為你準備咗好多豐富節目,為你呢一年更添豐盛!Too Full For Food好開心終於可以走入鬧市街頭,喺網上平台以外見到大家!有Too Full For Food喺度,梗係會送美食比大家啦!嚟緊我地會同Prep Time合作,喺12月11日(星期日)嘅旺角,12月17日(星期六)尖沙咀同埋12月18日(星期日)喺旺角鬧市送出軟綿綿甜絲絲嘅即製棉花糖!大家見到我地記得同我地打招呼。 除咗送棉花糖之外,12月18日(星期日)仲會有神秘節目添呀!到時仲會派發《太飽喇!菜後報告》創刊號比大家,成本搵食指南喺手,搵食梗係更就手啦!好期待同大家見面呀,快啲過嚟搵我地啦! 太飽喇!Too Full For Food x Prep Time Roadshow 日期: 2016年12月10日(星期六)、12月11日(星期日) 時間:15:00-19:00 地點:旺角 送比你:即製棉花糖 日期:12月17日(星期六) 時間:15:00-19:00 地點:尖沙咀 送比你:即製棉花糖 日期:12月18日(星期日)...

0

【特選!和風外賣便當】板上Griddle Top

深水埗區不嬲臥虎藏龍,鄰近食店真係各有特色,深受廣大觀眾愛戴。但你又知唔知,深水埗本身有間平價鐵板燒,令該區居民日常中午都係作為飯堂。不過,平價還平價,但絕對拍得住其他高級鐵板燒店既質素。 店面簡潔而富現代感,主要用紅黑兩色作為店舖既主調,搶眼得黎又不失格調。 店內水泥牆帶點工業風,黑紅餐桌椅卻係同店鋪一脈相承,毫無違和感。 店內牆壁上既插畫都係一大特色之一,由於店舖係深水埗區,所以畫中主題都係想簡介深水埗既建築群及其他特色店舖,充滿本土味道。 板上雪花一口牛‧珍珠飯 (HKD52/午餐優惠HKD47) 一口牛質素不錯,咬落牛味濃郁而多汁,焦黃既外層令食落多一份脆口。 板上照燒雞‧珍珠飯 (HKD42/午餐優惠HKD38) 照燒雞沾上燒汁再加上芝麻,加埋珍珠飯就好perfect啦! 安格斯牛肉漢堡‧脆薯皇(HKD61) 美國安格斯牛肉直送香港,配上新鮮生菜,洋蔥及芝士,多重口感係口裡一次過爆發,牛肉鮮嫩而充滿肉汁,肉味濃,的確係板上皇牌之選。 大板燒(HKD32)內包含魷魚同豬肉,加上沙律醬同木魚,魷魚既爽口增加整個大板燒既口感,材料好充實,配上埋醬汁就更好。 可樂餅(HKD12)即叫即整,一咬落去熱辣辣燙口,內裡薯仔既綿密配上外表金黃既脆皮,價錢又合理,得閒經過都可以買返個食下;而大拇指雞翼(HKD28)一客8隻,香脆可口,因廚師很貼心將雞翼變成單骨,令顧客食起上來方便得多。 此外,除左主食同小食,板上仲會有其實特色飲品,咁就唔需要淨飲汽水咁悶啦。 當中最值得推介就係玫瑰荔枝紅茶(S/HKD17; L/HKD19),入面真係有食用玫瑰係入面,玫瑰加上荔枝味,異常配合,加上椰果,減輕食完後既肥膩感。 仲有仲有,除左深水埗總店之外,荔枝角分店已經開幕左啦!就係D2三樓入面,食物CP值不但高,而且環境更新更舒服。小編覺得無論平日或者假期就可以絕對值得一試! 板上 深水埗總店 地址:深水埗桂林街36B號地舖 電話:2386 8288 營業時間:星期一至日:11:30-22:00 荔枝角分店 地址:荔枝角長義街9號D2 Place 304號舖 電話:23708097 營業時間:星期一至日:11:30-22:00