Tagged: 香芋

0

【太安樓平食台式車輪餅 $12即製爆餡紅豆餅】平霸

平霸耐唔時就去一轉太安樓,掃吓有咩平嘢食,最近發現又有間新店叫南國紅豆餅,係賣台灣爆晒餡嘅車輪餅,依家香港都有得食喇! 店舖只限外賣,款式唔多得六款,四款甜味同兩款鹹味,重質不重量。 隔住塊玻璃都見到啲車輪餅全部新鮮製造,保證拎喺手都仲係熱辣辣! 即時製作大概等十五分鐘左右。 紅豆車輪餅(HKD12),店內招牌款式,一場嚟到點都要試吓嘅。選用台灣萬丹紅豆,天然原料自家製紅豆餡,見住店員落咗海量嘅紅豆餡,食落每一啖都有濃郁紅豆味,最犀利係啲紅豆做到粒粒分明,味道又唔會太甜,做小食一流呀! 香芋車輪餅(HKD12),選用新鮮製芋泥,絕對無落任何添加劑!味道雖然冇紅豆味咁突出,不過都食得到芋頭粒,而且質地幾錦密,帶有芋頭本身嘅甜味,比起紅豆更加適合啲唔太嗜甜嘅食客呢! 芝士鹹牛肉薯仔車輪餅(HKD15),唔好以為車輪餅只得甜食,仲有兩款鹹食俾你揀,可以轉吓新口味!呢個車輪餅簡直滿足晒你三個願望,入面有齊車打芝士、薯仔同埋鹹牛肉,又真係幾邪惡!入面嘅芝士仲做到拉絲嘅效果,配上鹹牛肉又食埋粒粒嘅薯仔,三重口感好滿足! 平霸小評:今次搵到呢間車輪餅簡直執到寶!雖然網上評語有褒有貶,不過有時要親身食過先知伏唔伏嘅!平霸食完就覺得質素好好,雖然款式較少,不過貴精不貴多啦,而且款款都咁足料,爆餡咁滯呀!去開太安樓試試佢啦! 南國紅豆餅 地址:西灣河筲箕灣道57-87號太安樓地下G1號舖 電話:3427 9829 營業時間:星期一至星期日:11:00-23:00 《平霸》平食四方,歡迎各界報料。