Tagged: 高街

0

【都會型格氣息 西環藝術裝潢米芝蓮大餐】Flying Pig Bistro

西環高街向來係歐美特色餐廳聚地,想別具一格就要夠曬新派型格啦。呢間位於高街嘅Flying Pig Bistro,結合特色美食與都市藝術,為食客呈獻一場視覺同味覺盛宴。如此型格嘅餐廳係由曾於米芝蓮餐廳效力嘅星級廚師Christopher Przemyski同香港藝術家Malcolm Golding合力打造,供應優質歐洲美食。 餐廳裝潢行型格風格,混合回收木卡板同金屬元素枱椅,營造悠閒簡樸風格。Malcolm Golding希望通過裝潢營造出親切自在環境,同時散發原始粗糙嘅感覺。 威靈頓羊扒(HKD275)威靈頓係英國地名,當地無論食牛排或是羊扒都習慣會加上酥皮再火烤,咁樣嘅製法令口感軟嫩酥香,令人讚不絕口。 BBQ豬肋排(HKD185/Half,HKD285/Full) 以香濃醬料醃製,低火慢烤豬肋排後,肉汁與醬汁混合。集合酸、辣、甜、香各種風味,令人回味無窮。 Pig’s Burger(HKD168)豬肉肉質軟熟,混合燒烤醬味道,再加上蕃茄及生菜令整個感覺更清新,不油膩。 優惠活動源源不絕! 活動一:逢星期日12:00-16:00以HKD188享用任食烤肉以及2小時任飲。 活動二:逢星期一及二晚上可以以推廣價HKD218精選BBQ美食,包括BBQ豬肋排、BBQ豬頸肉或法式燒春雞,配一杯Kronenbourg 1664啤酒! Flying Pig Bistro 地址:西營盤高街62號 電話:2540 0311 營業時間:星期一至日:9:00-23:00

0

【留住昔日情懷 高街懷舊車仔麵店】高街麵霸

小編有時都會掛住港式懷舊小食,不過懷舊小食多數都係掃街,無得坐。懶豬小編食親野都想坐低慢慢食。嚟到高街,竟然搵到一間主打懷舊美食又有得坐嘅食店,可以介紹返比大家喎,佢就係高街麵霸! 講得係懷舊小食,又點少得碗仔翅呢?碗仔翅陪伴住大家一齊成長,一碗熱辣辣嘅碗仔翅,入面加啲肉絲、冬菇絲、粉絲、木耳絲等等,加啲胡椒粉、醋就已經好滿足。雖然食得碗仔翅都係「粉絲當魚翅」,但呢度嘅招牌金華火腿火腿碗仔翅(HKD38)堅係翅!個湯仲要濃得嚟唔會煮到一舊舊,材料十足,想用平民價錢食出帝王享受梗係要試下! 滷水鴨舌(HKD45)。鴨舌滷得入味又唔會黏到漿住個嘴,食落彈牙得嚟帶點滷水香,仲唔會好鹹。 小食又點少得腸粉呢?呢款懷舊蛋花炒腸粉(HKD28)一定啱你心水!加咗蛋花之後腸粉更添一分香滑惹味,加埋滑嘟嘟嘅腸粉入口又滑又彈!另外蔥花、甜醬、辣醬、花生醬同芝麻仲任得你要唔要㗎。 想食飽飽仲可以試埋車仔麵,3餸起,麵底(HKD9)每款餸(HKD9),有4種湯底、7種麵,32款餸任你揀!小編就揀咗油麵,滷水豬腩片、滷水糖心蛋、紅腸、豬大腸、魚蛋同時菜。特別推介滷水糖心蛋,除咗滷水入味仲真係流心㗎,淡淡蛋香混入麵裡面好香滑! 高街麵霸 地址:西環西營盤高街39號地舖 電話:2858 2680/2858 8122