Tagged: 鰂魚涌

0

【日式口碑店多菜少肉 重量級咖喱飯素量十足】素學堂

依家好多人都鍾意發掘小店,除咗有人情味之外,小店嘅餐單都比較有特色。鰂魚涌嘅坐忘由兩夫婦經營,先生日本人、太太係香港人,港日聯盟多年來一直好好口碑,仲喺天后開埋分店,晚晚都要大排長龍添!講到咖喱,人人都大讚嘅慢煮豬軟骨不用多說喇,另外小店嘅素食主菜都好出色!老闆喺日本學廚,依家親自研究食譜,所以菜式建立喺日本菜基礎上,再結合中西素食嘅特點。餸菜每日用新鮮蔬菜製作,調味料就用日本貨,俾大家出街食都有多啲蔬菜選擇,食得天然健康又冇化學成份囉。 餐廳好似屋企咁有啲小擺設,感覺令人輕鬆自在。 沙律唔一定係凍嘅,蓮藕薯仔茄子金比羅沙律(HKD78)就係溫沙律喇,係日本金比羅呢個地方嘅傳統家庭料理。醬汁經過特別調配,有啲似芝麻醬又有少少鹹味。沙律主要有蓮藕、薯仔同茄子煮成,輕輕飛過油有啲脆口,灑上芝麻同七味粉幾惹味。 沙律烏冬近年喺日本都好流行,牛油燒汁雜菇沙律烏冬(HKD75)*都係溫沙律。沙律菜上舖滿牛油炒香過嘅雜菇,落咗少少燒汁鹹鹹哋,再加埋沙律醬有陣奶香味,好特別!稻庭烏冬口感彈牙啲,呢個組合都幾開心。 *沙律會附上木魚碎,如果唔食可以要求走木魚碎。 重頭戲喇!咖喱係日本菜另一個特色,15種一日野菜咖喱飯(HKD62)包含15種唔同種類嘅蔬菜,有甘筍、南瓜、薯仔、洋蔥、甜椒同蓮藕等等。淨係蔬菜重量已經有350g,係成年人每日要食嘅最低蔬菜分量喇!咖喱汁用咗幾款唔同嘅日本咖喱磚,再加調味料煮成,係好日本風味嘅甜咖喱,撈飯一流!日本珍珠米仲溝咗蕃薯同南瓜蓉,好香甜,仲幾飽肚添!   坐忘 地址:天后電氣道127號地舖 電話:2889 7377 營業時間:星期一至六:11:30-15:00,18:00-22:00;星期日:11:30-15:00,17:45-21:15

0

【包保新鮮滾熱辣!用心堅持即叫即製西餐】J’s kitchen

鰂魚涌工商業大廈多,自然係上班族聚集地。午飯時間想搵間環境舒適而食物質素又較佳嘅餐廳,呢間 J’s Kitchen西餐廳係唔錯嘅選擇。餐廳供應多國菜式而且選材新鮮,唔想食餐飯都同人左逼右逼可以試下啦。 裝修後嘅J’s Kitchen,裝潢行歐陸風,喺門口望入去就知係西餐廳。微暗燈光配合寬大沙發,午飯時間都可以享受恬靜時光。 餐廳米飯特別選用日本越州——越光米,其米粒黏性強且膠質濃厚、色澤晶瑩透亮。比起一般米粒更香甜。挪威煙三文魚炒飯(HKD77) 份量十足,三文魚粒嫩滑帶點煙薰味,入口甘香濃郁。炒飯粒粒分明,咀嚼時燻香同魚味喺口中散發出黎,再加入三色椒增添香甜,清新融和。 其實小編食蝦好驚清洗唔乾淨仲有蝦腸,呢道黑松露香草海鮮炒意大利粉(HKD76)嘅蝦處理得好乾淨,而且好爽口。香草同海鲜醬搭配得好完美。 黑松露野菌忌廉湯(HKD36)雜菌足料,雞髀菇爽口彈牙,一啖入口忌廉好香滑,仲有陣陣黑松露餘香。材料豐富到飲完一碗都感覺到有啲飽意。 食到有啲Dry可以叫返杯梳打飲下透心涼,有三款口味選擇荔枝梳打(HKD26)、水蜜桃梳打(HKD26)、菠蘿梳打(HKD26),重點係每杯果肉都多,飲得夠過癮。 J’s Kitchen 地址:鰂魚涌海堤街10號龍景大廈地下3B號舖 電話:6875 3088 營業時間:星期日至五:12:00-21:30

0

【用心親民星馬菜】隨心

人生順逆無常,有無諗過如果事事順心,人生仲會唔會一樣精彩?定係事事順心反而會覺得乏味呢?有時選擇隨性,放鬆一啲,未嘗唔係一件好事。隨心而行、隨心咁生活,或者去鰂魚涌食馬來西亞菜隨心,都係一樣簡單隨意又舒適。 小店裝潢雖然簡單,但係並唔代表馬虎。牆上貼滿一幅幅特色畫作,環境舒適整潔。 海南雞飯(HKD78),雞肉非常嫩滑,外皮有彈性,感覺上一啲都唔油膩,亦唔會好肥。值得一讚係海南雞已經去骨,可以一啖食晒,感覺更加爽,仲有三種口味嘅醬汁可以搭配添!油飯散發淡淡香味,同爽滑嘅雞肉非常夾。再飲埋杞子雞湯,成個餐雞味濃郁,愛食雞嘅朋友要試試啦。 沙嗲串燒6串(HKD60)串燒包括有豬肉同雞肉各3串,燒完好香好惹味。再點埋特製沙嗲醬,初入口味道香辣後帶少少甜味。加上醬入面帶有少許花生粒粒,更加有多重口感。豬肉串食落肉汁豐富,好香口;雞肉串嫩滑,質感比較軟。 鍾意重口味可以試下新加坡炒貴刁(HKD75),味道濃烈得嚟有少少辣,好惹味又有鑊氣!濃濃嘅醬汁煮到上面各樣食材都好入味,特別係大蝦,將原本嘅爽甜蝦肉加添一分惹味,層次更豐富。  馬來西亞肉骨茶(HKD98)以豬骨、豬肉同埋中藥材熬製,藥材份量非常多,好足料!無論聞落定食落藥材味道都相當濃郁,湯內嘅豬肉煲到又腍又入味!據聞肉骨茶仲有行氣活血嘅功效,鍾意食肉骨茶嘅朋友一定要試! 海鮮喇沙(HKD80)食喇沙個湯底真係好重要!呢個湯底有少少辣,椰香十足又有好香花生味,味道香濃。麵條彈性十足,唔會一夾就斷。加埋豐富海鮮,有蝦、蟹棒、帶子、魚片、豆卜同埋糖心蛋,將每樣食材浸入香濃湯底,加倍鮮味! 隨心 地址:鰂魚涌海光街12號地舖 電話號碼:2117 3588 營業時間:星期一至日:11:00-22:00