Tagged: 麵包舖

0

【10蚊紫薯瑞士卷大平賣 仲有6蚊3個大麵包】平霸

今次平霸搵食輪到麵包篇喇!小編有日行過長沙灣見到呢間麵包店好似都幾平咁,多口問咗句啲包幾錢,店員就話3點後賣6蚊3個,心諗!會唔會太平呀?仲要係大包唔係迷你包!即係2蚊一個咋!抵到爛啦! 雞尾包(HKD6/3個),除返開2蚊一個包,真係好食㗎。啲料好足,甜度啱啱好,麵包都夠鬆軟!絕對好ok! 甜餐包(HKD6/3個),個人覺得最好食係呢個。超鬆軟,同埋好夠甜,唔會話好齋,做早餐fit晒! 提子包(HKD6/3個),呢個相對嚟講就硬咗少少,同埋提子分量唔係好多,得幾粒;而且食落feel到個包勁鬆散,不過2蚊就算啦!已經好好㗎喇! 紫薯瑞士卷(HKD10),喺特價箱見到,10蚊嘅瑞士卷我真係第一次見,仲要唔係普通原味,唔買點得呀!個名話就話紫薯,但唔知點解食到落肚有陣香芋味,不過平得嚟都有質素㗎喎,唔會好乾身,夠濕同鬆軟,而且一啲都唔膩,正呀! 大菜糕(HKD5)食落就一般般啦,味道唔太出,冇乜味,普普通通啦。  平霸小評:估唔到繼之前介紹過嘅明華餅家8蚊3個包(重溫:https://goo.gl/JFukDh )之後,仲可以有更平嘅包出現,都係咁好食喎!專做街坊生意,keep住咁多客幫襯,真係大件夾抵食喇!   豐麥園麵包 地址:長沙灣東京街37-39號恆順大廈地下6號舖 營業時間:星期一至日:06:30 – 21:00 《平霸》平食四方,歡迎各界報料。

0

【麵包舖惡鼠橫行片瘋傳 老闆:間唔中先一兩隻!】食焦

上星期邊條片喺網上瘋傳?一定係沙田間麵包舖變咗老鼠樂園咁,俾網民拍到有好多隻生猛老鼠凌晨時份喺舖頭亂咁走,畫面好驚嚇!話說係有網民喺年初五凌晨兩點幾,經過沙田瀝源邨嘅漢和麵包舖,喺玻璃門望入去,見到有好多隻老鼠走嚟走去,仲話起碼有30隻咁多添! 條片po咗喺「沙田友」fb專頁之後即刻瘋傳,個個睇見都嘩嘩聲,而麵包舖老闆都即刻「做嘢」,好快親自留言致歉,仲po返之前啲滅蟲公司收據,證明舖頭有定期做滅蟲滅鼠工作!老闆仲做埋《東張西望》訪問添! 小編都有打俾老闆,陳生就話呢幾日食環署日日都去舖頭巡查,「發生咗呢件事,我第一時間係即刻換咗間滅蟲公司,搵過第二間,同埋成個工場做大清!全個場嘅麵包要丟晒先啦!」老闆話以往一個月都做兩次滅蟲滅鼠,佢話點都估唔到會有咁多老鼠,「一定唔會有咁多,以往好間唔中耐唔時先有一、兩隻可能喺出面爬入嚟嘅!點會有咁多?」 雖然有片有真相,不過老闆又話愈諗愈古怪喎!「你諗吓,我做咗十幾廿年,幾乎一年365日全年無休,咁啱得咁橋嗰幾日工場趕完工,就係嗰幾日真空期就發生呢件事。如果平時真係咁多老鼠,我仲點會咁樣……唔拉閘呀!無可能啦!」 老闆話雖然冇證冇據講乜都冇用,但佢話俾人專登整蠱放啲老鼠入嚟嘅機會唔係無㗎!「(同行做?)我唔敢講話邊個做,但我真係覺得成件事唔係咁簡單!我賣包一向低價啲,我又會派包俾啲老人家,其實試過有行家同我講,叫我啲價錢可唔可以高返啲!我話我唔係頂爛市,總之大家各有各做!」 老鼠片瘋傳後,老闆話門面生意跌咗七成,不過都仲有啲老街坊熟客話會支持佢!「好無奈、好傷心!依家只能夠做好自己!」