Tagged: 麵包

0

【本地牛角包店兼賣意粉+薄餅 酥脆曲奇禮盒買二送一】Crostini Bakery & Cafe

本地牛角包品牌唔少都有高質出品,好似Crostini Bakery & Cafe就每日製作三次牛角包以確保新鮮品質。不過佢嘅曲奇、蝴蝶酥同蛋糕你又試過未呢?而且部分分店仲有意粉、薄餅等熱食添。銅鑼灣旗艦店款式最齊全,今次就等小編試吓佢牛角包以外嘅食物,睇吓有咩正嘢先! 雖然以牛角包起家,但佢嘅曲奇同蝴蝶酥都幾出色,想試多啲口味就一定要揀禮盒裝喇!至尊曲奇禮盒(HKD238/45塊)有咖啡杏仁曲奇、紅莓棒子曲奇、南瓜籽熱情果茶曲奇、海鹽朱古力伯爵茶曲奇同牛油曲奇同玫瑰蝴蝶酥。有牛油香又唔會太乾身,而且每款口味都做得幾出,甜度亦控制得啱啱好,連續食幾塊都冇問題。 如果你係蝴蝶酥迷就更加要試至尊蝴蝶酥禮盒(HKD238/45塊),蝴蝶酥每層都搓得好薄,脆口又唔會太硬,而且有芝士、玫瑰、黑芝麻、玉桂、茉莉同原味6款咁多。今個月仲推出賀年優惠,1月6日起全線兩款禮盒可以自選口味買二送一! 想輕巧啲亦有單味細盒裝(HKD32/12塊),做小禮物或自私食又得。 小編發覺呢度嘅蛋糕外表比實際甜,唔嗜甜嘅朋友都可以一試。其中幸福橘子(HKD46)以雲呢拿慕斯包住清甜嘅柑橘果凍、柚子cream同海綿蛋糕,食完感覺又令人幾滿足喎。 想感覺貴氣啲?試吓呢個喺朱古力脆皮噴上食用金粉嘅金蕉流行(HKD52)啦!佢有一個甜甜嘅外表,但入面嘅香蕉蓉反而令層層疊嘅香蕉朱古力cream、朱古力蛋糕同朱古力脆皮珠帶陣清新香氣,又唔會太甜膩。 熱食方面薄餅套餐同埋配迷你沙律嘅意粉套餐都算抵食,另外會跟杯熱飲。呢個即焗嘅輕型三文魚薄餅(HKD89/8寸)落足料,煙韌嘅厚批上鋪滿鹹香又大塊嘅煙三文魚,配上三色芝士碎、車厘茄、黑水欖、火箭菜同蜜糖芥末醬,同平時食嘅pizza一樣有肉感但唔油膩,一個人當lunch食都幾飽。 估唔到香蒜大蝦炒意粉(HKD138)會有少少鑊氣,蒜蓉、紫洋蔥等材料炒過嘅香氣令意粉更惹味。蝦肉爽口彈牙,如果可以辣啲就更好喇。另外點咗杯凍抹茶咖啡(HKD46)試吓,宇治抹茶嘅甘味同咖啡幾融合,不過唔攪勻啲cream就飲會偏酸。 最後如果想食埋佢嘅麵包(HKD14-20),記得捕實每日18:00後有買二送一優惠呀!   Crostini Bakery & Cafe旗艦店 地址:銅鑼灣勿地臣街1號時代廣場7樓728-729號舖 電話:3105 9923 營業時間:星期一至日:11:30-20:30 供應意粉及薄餅分店:時代廣場店、杏花新城店、荷里活商場店、泓富廣場店、逸瓏坊商場店、新港城中心4期店 供應薄餅分店:時代廣場店、杏花新城店、荷里活商場店、K11店、泓富廣場店、九龍灣國際展貿中心店、上水中心店、連理街店、九龍貿易中心店、千色匯一期店、荃灣廣場店、青衣城店

0

【韓國過江有機麵包重秤足料 椰子蕃薯包最受歡迎】Tardemah

韓國過江嘅有機麵包Tardemah唙尖沙咀開業一陣,令你一落K11 MUSEA B2樓層就聞到陣陣麵包香。佢哋暫時帶咗十幾款全有機麵包口味嚟香港,拎上手都幾重磅㗎,即刻睇吓有咩選擇啦! 想堂食都有位俾你坐㗎,亦可以帶外來飲品,不過記得自己清潔返。 因為店內冇自設工場,所以每款包都係賣晒就等第二日喇。艾草年糕方包(HKD78)係香港最受歡迎嘅口味,一推出就好快賣晒,店員話最好兩點前嚟買就比較有機會。不過睇見有咁多年糕、紅豆同栗子,小編都會想買囉。 椰子蕃薯布莉歐方包(HKD89)就係韓國暢通No.1,淡淡嘅椰香配上大大粒嘅栗子,口感一流! 所以最多嘅係有芝士入饡嘅口味,好似有咁大粒芝士嘅栗子忌廉芝士方包(HKD78/左)同南瓜忌廉芝士方包(HKD78/右),加熱食令芝士有半溶嘅口感仲正,亦更加香口。 想口感滑啲就有帶果香嘅野莓忌廉芝士方包(HKD71/左)同藍莓忌廉芝士方包(HKD71/右),但係呢兩款唔可以加熱。 鮮忌廉芝士雲石(HKD70/左)同朱古力雲石(HKD70/右)就係香甜啲嘅口味,亦比較接近平時食麵包嘅感覺,不過有機麵包煙韌好多! 想入口清新啲就有伯爵茶蔓越莓方包(HKD72/左)同優質公州栗子方包(HKD89/右)。唔止見到勁多粒蔓越莓,原來一個優質公州栗子方包有大約廿粒栗子㗎! 特別啲嘅有三款蘸醬麵包,蟹與蝦方包(HKD83/左)配泰式醬;拱佐諾拉蜜糖芝士方包(HKD84/中)配蜜糖;辣肉腸方包(HKD84)就配洋蔥醬。 買包送飲品嘅新開張優惠隨時會完,想順便飲埋香蕉奶或其他口味就快啲去喇。   Tardemah 地址:尖沙咀梳士巴利道18號Victoria Dockside K11 Musea B2樓223號舖 電話:從缺 營業時間:星期一至日:11:00-21:00

0

【盤點五大熱門手工麵包店 純素款到鹹甜點樣樣齊】Bakehouse、Mayse Artisan Bakery、Chapter Two Barkery、享樂烘焙、B.TWO House

香港人愈來愈追求健康飲食,對手工麵包嘅要求都更加高,而且買嚟做早餐或下午茶都得。小編盤點五間出名嘅麵包小店俾大家,由早餐到下午茶,食勻唔同款式嘅手工包啦!   1. Bakehouse 名廚出品  第一間不得不提係灣仔嘅Bakehouse,創辦人兼大廚係前四季酒店星級餅廚Gregoire Michaud,佢嘅牛角包高質到街知巷聞㗎。 呢度嘅牛角包(HKD18起)無比鬆軟,牛油香仲恰到好處添。如果好似士多啤梨牛角包(HKD42)呢啲特別款式,入面仲係爆餡㗎!呢度亦可以坐低high tea,甜點同鹹食都正到令人眼花撩亂囉。 早餐時段(11:00前)嘅Brioche French Toast(HKD108)配咗草莓醬、新鮮漿果、開心果同奶油。 午餐時段(11:30-14:00)嘅Pork Schnitzel Sandwich(HKD108/2 Courses,HKD138/3 Courses)除咗有大塊炸豬扒,仲夾咗羽衣甘藍同是拉差蛋黃醬。個餐就咁跟湯,或者要埋甜品就自己按價錢選擇喇。   Bakehouse 地址:灣仔大王東街14號地舖 電話:從缺 營業時間:星期一至五:08:00-17:00;星期六、日:09:00-17:00   2. Mayse Artisan Bakery 北歐純素酸種包 素食界出名嘅Mayse Artisan Bakery由北歐素人Alex主理,佢因為食超級市場買嘅麵包而皮膚敏感,所以開始用復古食譜整傳統嘅拉脫維亞工匠麵包,只用自家酵母製作酸種麵包,冇添加劑同化學物。不過裸麥欠缺筋性,要發酵足足再30個鐘以上㗎!不過舖頭喺大尾篤偏僻咗啲,所以有時會擺吓市集;仲有同Live Zero*合作,預訂咗麵包嘅朋友可以去佢哋西營盤同西貢嘅店舖攞麵包,每星期五出貨,想訂嘅就要留意時間喇。 拉脫維亞傳統麵包會加入香料,賣相一般但味道好,質感結實,分量亦十足,同港式麵包截然不同。天然酵母運用環境中嘅菌種發酵麵包,所以天氣會影響有冇過度膨脹,或者要用更多時間。上圖呢三款啡色嘅Rye Sourdough系列(HKD100起/條),每款每日最多只造兩條,因為製作時間超過7個鐘呀!...

0

【荃灣$4.5芝士撻平通街 $9大件黑森林切餅任揀】平霸

平霸去麵包舖除咗留意入面啲麵包夠唔夠平之外,仲會睇埋佢哋啲西餅甜品抵唔抵食㗎!呢間喺荃灣街市街嘅貝嘉餅屋啲西餅就逆市咁平,出面閒閒哋都十幾蚊一件嘅蛋糕切餅,呢度仲係賣緊9蚊,4個半銀錢嘅迷你撻都係熱賣之選! 喺轉角位嘅餅店有兩個門口,麵包舖嚟講環境唔算細。上午時段有唔少客人幫襯,更幾度大排長龍。 門口嘅蛋糕櫃入面竟然見到各式切餅只係賣緊9蚊一件,仲有成5款揀,點可以唔試吓佢哋呢? 呢件黑森林切餅(HKD9)望落好大件,上面鋪滿朱古力碎,朱古力碎係偏甜嗰種,蛋糕整得好鬆軟,朱古力味夠濃;忌廉都係朱古力忌廉嚟,中間嗰層同平時啲黑森林蛋糕一樣有啲提子啫喱,食落口感都幾豐富,抵食! 藍莓芝士切餅(HKD9)面頭嘅藍莓醬都幾多,冇用到新鮮藍莓整,係用比較甜嘅藍莓果醬,果醬本身都有少少藍莓肉,配埋蛋糕一齊食就中和返個甜味。蛋糕入口同樣都幾鬆軟,忌廉同蛋糕嘅比例啱啱好,唔太膩。雖然佢叫芝士切餅,應該係用咗忌廉芝士嚟整層Cream,但就唔係好食得出芝士味,平霸就覺得啲忌廉可以打得更幼滑,不過唔使10蚊就食到件Cake好滿意㗎喇! 呢兩款的的骰骰嘅係餅店熱賣嘅迷你撻。撻皮係平時食開嘅牛油撻皮,咬落去質感比較實在,搽咗啲朱古力醬喺撻皮上面,所以冇俾啲餡整腍個撻皮,食落依然係乾身脆口嘅。 淡啡色嘅迷你栗子撻(HKD4.5)有唧花造型,啲栗子蓉唧得幾高,唔會話得嗰兩圈。味道方面,食落都有栗子味,甜度適中,不過栗子蓉入面應該有溝到忌廉,唔係純栗子蓉。 白色脹卜卜嘅係迷你芝士撻(HKD4.5),面頭灑咗啲朱古力粉,呢款同坊間食到嘅芝士撻完全唔同,佢用咗忌廉芝士,食落芝士味唔係好出,但味道都唔錯,只係食晒成嚿會有啲膩。   平霸小評:一間餅店要經得起通脹嘅考驗真係唔易,9蚊一大件蛋糕嘅水準唔差,仲要賣得咁平,好難得㗎喇!4.5蚊嘅迷你撻可以買嚟過吓口癮,平時餅店仲有賣紫薯撻㗎,好受食客歡迎添,不過平霸嗰日去到就賣晒喇,惟有下次再試啦! 貝嘉餅屋 地址:新界荃灣荃灣街市街166號地下 電話:2615 1123 營業時間: 星期一至日:06:15-21:30    

0

【火腿牛角包得幾粒碎仔 連登仔:唔係點叫空氣包?】食焦

成日話百物騰貴,食物成本價高,明嘅明嘅,但係都唔使偷工減料得咁過份啩?可以去到幾盡?話說有網友喺連登開po「啱啱食左(咗)個麵包店既(嘅)火腿牛角包,師父刀功同手勢都係世界級」,真係曲到圓!事主仲po咗兩張相出嚟,係就係牛角包,但火腿呢? 呢個空氣感十足嘅牛角包,少啲眼力都好難睇得出啲火腿喺邊,事主話「可以將火腿砌到極限咁薄 仲可以圈埋佢 買既(嘅)時候如果唔係寫明火腿牛角包 我會以為係搓麵粉時唔覺意跌左(咗)塊火腿碎落去」,再睇埋另一張牛角包相,都係得2忽仔火腿碎! 網友回應話「唔係點叫空氣包?」更多網友叫樓主開名公開究竟係邊間麵包舖,事主就話喺第二張相已經有提示,原來就喺嗰張影到少少麵包袋見到少少logo同幾粒英文字嘅相入面,勁過福爾摩斯嘅連登仔已經知道答案喇,認為呢個空氣包係出自一間叫「FRESH FRESH」嘅麵包舖喎! 事主冇表示係定唔係㗎,只係答返其他網友嘅問題,就係話呢袋火腿牛角包係事主老婆買返嚟,18蚊有4個!而網友就話喺呢間疑似偷工減料嘅麵包舖度,曾經都出過事,仲話呢間舖頭啲嘢食係「金玉其外、敗絮其中」添!

0

【八月堂攻港12款牛角包晒冷 限定優惠日派30盒禮盒】八月堂

各位牛角包迷有口福喇!台灣人氣可頌八月堂終於登陸香港喺太古城AEON開店,開業幾日已經出齊12款口味,當中嘅相思卡士達味更係香港限定,而沖繩黑糖味就係康怡店限定,價錢由HKD15-HKD22不等。香港負責人阿To話,以前台灣每間分店開張初期都會有沖繩黑糖味,但依家已經轉咗做黑糖麻糬味,想重溫昔日味道嘅朋友就一定要嚟康怡喇!香港新店當然有筍嘢啦,依家至9月21日,每日會以隨機口味嘅形式免費送一盒6件嘅禮盒裝俾首30位顧客。攞唔到唔緊要,亦可以優惠價HKD98買6款可頌,不過優惠期未定幾時完,最好打去舖頭查詢。不過阿To唔建議一次過買太多,因為擺太耐質感會變;沖繩黑糖味、曜黑胡麻味同迷戀卡士達味更加建議2個鐘內要消滅佢添! 阿To一直做開廣告公司,點解會踩入牛角包界呢?「因為我哋喺台灣食過覺得正到嘩一聲,我試咗原味(蜂巢可頌)同明太子味覺得外脆內軟好好食。之後試埋其他味,發覺唔係好食甜味嘅人都食到,就開始傾合作。」。阿To完全唔似門外漢,佢話:「睇你有幾熱誠去做好件事,我哋一唔明就問,麵糰嚟到香港,由發酵至出品都要兩個鐘先可以送入口。20個步驟都要好小心,如果做好19步,第20步做唔好已經唔係嗰個感覺囉。唔計咬一啖嘅,試過一日食十幾隻包㗎!」。麵糰由台灣飛過嚟,香港店就跟足台灣步驟同用料,由發酵過程開始就喺AEON店內即整,講咗咁多,即刻睇吓啲牛角包有幾正先! 首先梗係睇兩款限定版先啦!左邊沖繩黑糖可頌(HKD22)係小編首選推介呀!就咁睇外形,小編以為黑糖整到好似凍咗嘅朱古力漿咁硬硬哋,點知一咬係好滑好creamy嘅質感!外皮好薄脆,入面就勁鬆軟又唔乾。不過最點睛嘅係粒核桃,烤過令味道更加香,更有層次。右邊相思卡士達可頌(HKD22)係No.2推介,暫時係9月限定,睇睇入面係點: 幼滑嘅卡士達醬同大大粒紅豆填滿咗牛角包,清甜嘅味道又有咬口,真係唔錯喎!內裡嘅蜂巢紋理好有層次同平均,令每啖嘅鬆軟感覺都差唔多。 跟住介紹其他款式喇,左邊白色莊園可頌(HKD17)雖然搽咗層薄脆嘅白朱古力醬,但入口唔算好甜;右邊迷戀卡士達可頌(HKD20)係No.3推介,即使有醬都唔會膩。 牛角包內有一半都係清香嘅卡士達醬,一咬就爆出嚟, 軟滑creamy令人想一食再食呀! 右邊明太子可頌(HKD19)係No.4推介,可能有人覺得鹹味牛角包有啲怪怪哋,但出奇哋夾喎!唔好甜嘅朋友一定要試,雖然唔係爆醬款,但幾惹味。中間朱古力可頌(HKD18)除咗面頭搽咗朱古力醬,入面仲有朱古力棒,係4款朱古力可頌之中最甜,但都唔會甜死人;而左邊皇家爵士可頌(HKD18)就用黑朱古力做脆皮外衣,以白朱古力畫花,係男士都接受到嘅甜度。 左邊粉紅戀人可頌(HKD18)就只搽士多啤梨味朱古力,甜中帶清香果味,少女同小朋友都一定鍾意;右邊香濃起司(HKD19)係喺原味蜂巢可頌面頭加塊芝士同香草,鹹香味簡簡單單就將味道層次提升咗喇。 左邊蜂巢可頌(HKD15)牛油味唔重,都係外脆內軟。不過小編認為食得八月堂,冇理由唔試花巧啲嘅味囉,好似中間嘅曜黑胡麻可頌(HKD22)芝麻味幾香,入面好似迷戀卡士達可頌咁注滿芝麻醬做餡料,味道唔會好搶,同麵包嘅味道平衡得幾好;右邊雪花檸檬可頌(HKD17)感覺會甜啲,因為面頭搽咗鮮檸檬汁糖霜,酸味會一吓喚醒味蕾,酸一、兩秒就會食得返陣甜味。 採訪期間已見有好多客人,阿To話已經物色緊其他位置開分店,希望快啲推出更多限定口味啦!   八月堂 地址:香港康怡廣場(南)AEON STYLE康怡G11舖 電話:2601 0900 營業時間:星期一至日:10:00-22:30

0

【回味傳統懷舊麵包 精選六大必食老字號】丹麥餅店、快樂餅店、協香麵包西餅、明華餅家、豪華餅店、新雄雞麵飽西餅公司

麵包一直都係做早餐嘅不二之選,貪佢夠平又快又夠飽肚。今次小編就搵咗幾間懷舊麵包店,一齊睇吓有乜懷舊麵包啦!呢間丹麥餅店唔使多講,喺銅鑼灣開咗好多年,一直都好出名好多人幫襯。 小編今次就試咗熱狗(HKD12),果然同傳聞一樣,真係好好食呀!佢啲沙律醬調得好好,抵佢咁出名! 另外仲試埋佢嘅炸雞髀(HKD18),炸到金黃色,香脆又惹味,正呀! 丹麥餅店 地址:銅鑼灣禮頓道106號禮信大廈地下 電話:2576 7353 營業時間:星期一至日:06:30 – 19:00 快樂餅店又係一間喺香港區屹立多年嘅老字號,當中嘅奶油筒(HKD7 )最出名。 奶油筒裝滿奶油,出面層皮好鬆脆、奶油入口夠香滑,仲要冇想像中咁膩,好食喎! 另外佢嘅墨西哥包(HKD4.5 )都好正,又甜又鹹咁,外面表層夠香脆,成個麵包又鬆又軟,不愧為老字號。 快樂餅店 地址:灣仔皇后大道東106號地下 電話:2528 1391 營業時間:星期一至日:06:00 – 20:00 作為粉嶺名物嘅雞髀包,當然要嚟協香麵包西餅朝聖啦。. 雞脾包(HKD8.5)確實係幾特別嘅搭配,雞肉都算嫩滑,唔錯唔錯。 酥皮煙鴨胸麵包(HKD8.5),酥皮好有驚喜,鴨胸都好足料,抵食呀! 協香麵包西餅 地址:粉嶺聯和墟聯盛街24號地下 電話:2675 6251 營業時間:星期一至日:06:30 – 20:30 喺旺角都可說係好出名嘅麵包店,一講起明華餅家大家都會知道。 麵包賣8蚊3個,超級抵呀!嗰日小編就食咗椰子奶油、菠蘿包同紅豆包,唔好見佢咁平就以為唔好食呀,其實質素都好好,抵價之選呀!...

0

【10蚊紫薯瑞士卷大平賣 仲有6蚊3個大麵包】平霸

今次平霸搵食輪到麵包篇喇!小編有日行過長沙灣見到呢間麵包店好似都幾平咁,多口問咗句啲包幾錢,店員就話3點後賣6蚊3個,心諗!會唔會太平呀?仲要係大包唔係迷你包!即係2蚊一個咋!抵到爛啦! 雞尾包(HKD6/3個),除返開2蚊一個包,真係好食㗎。啲料好足,甜度啱啱好,麵包都夠鬆軟!絕對好ok! 甜餐包(HKD6/3個),個人覺得最好食係呢個。超鬆軟,同埋好夠甜,唔會話好齋,做早餐fit晒! 提子包(HKD6/3個),呢個相對嚟講就硬咗少少,同埋提子分量唔係好多,得幾粒;而且食落feel到個包勁鬆散,不過2蚊就算啦!已經好好㗎喇! 紫薯瑞士卷(HKD10),喺特價箱見到,10蚊嘅瑞士卷我真係第一次見,仲要唔係普通原味,唔買點得呀!個名話就話紫薯,但唔知點解食到落肚有陣香芋味,不過平得嚟都有質素㗎喎,唔會好乾身,夠濕同鬆軟,而且一啲都唔膩,正呀! 大菜糕(HKD5)食落就一般般啦,味道唔太出,冇乜味,普普通通啦。  平霸小評:估唔到繼之前介紹過嘅明華餅家8蚊3個包(重溫:https://goo.gl/JFukDh )之後,仲可以有更平嘅包出現,都係咁好食喎!專做街坊生意,keep住咁多客幫襯,真係大件夾抵食喇!   豐麥園麵包 地址:長沙灣東京街37-39號恆順大廈地下6號舖 營業時間:星期一至日:06:30 – 21:00 《平霸》平食四方,歡迎各界報料。

0

【試食50蚊太空人麵包 提子味加熱即中伏】伏務台

乜嘢係太空人麵包?即係偉大嘅科學家發明出來嘅「罐頭麵包」囉!又即係唔使捱壓縮食物,可以喺太空都食到鬆軟美味嘅麵包囉!聽起上嚟好科學,咁味道又化唔化學呢? 今次小編喺朗豪坊嘅美樂士多發現呢款「罐裝鬆軟麵包」,分別有提子味同埋橙味,登登登櫈,要成50蚊一罐喎!單睇價錢都伏咗一嘢,身為好奇寶寶嘅小編一於試埋個味道伏唔伏! 罐頭包裝上寫住話「開罐前可原罐放入熱水中加熱,麵包會有另一番風味」,小編決定試吓將提子味加熱先。 由於包裝上冇講要加熱幾耐,小編大概加熱咗10分鐘左右就開,罐,喇!一打開個罐嗰吓,完全聞唔到提子嘅香味,反而聞到啲啲膠味……心感不妙啦! 個麵包有張膠膜包住,一拎上手竟然feel到麵包有啲濕漉漉,感覺有啲似麵包浸咗水咁。小編立即檢查吓個罐頭有冇入水啦,但發現罐頭根本冇滲水喎,唔通係因為加熱時令到本來儲存喺罐頭裡面嘅濕氣散埋出嚟?唉……唔理咁多啦,試吓味道點先! 包裝上明明寫住冇提子成份,但咬落去竟然有啲提子乾嘅質感。味道就……好似芬達提子味汽水咁甜。麵包咬落唔鬆軟,反而有啲似發水麵包,質感有啲核突。 提子味伏咗,都要試埋橙味啦!其實小編本身唔太偏好橙味嘅食物,不過一打開個罐竟然聞到一陣清新嘅橙香味飄出嚟。 搣開麵包嗰剎那簡直想講句「Yes」,因為麵包質感正常,而且真係好鬆軟。咬落口有啲橙皮咁嘅質感,唔會好似食咗嚿橙味嘅膠落肚咁。   小編伏氣:明明包裝上話「加熱會有另一番風味」嘅,聽佢講照住做,點知就出事喇,嗰種「風味」確係「特別」喎,小編今次真係睇唔透喇……呢次橙味贏咗,提子味加熱即衰,又唔值再買多罐提子味試吓唔加熱係點囉!50蚊唔抵呀!   入伏點:朗豪坊美樂士多 入伏價:HKD50一罐 中伏by #肥仔文 美術by #mui mui 攝影by #肥仔文,大食積 《伏務台》星期一伏務大眾,歡迎各界報料。

0

【麵包+啤酒?超霸氣組合!】Tap The Ale Project

Tap The Ale Project位於旺角黑布街,專門以麵包和啤酒為基礎設計食物。佢地嘅麵包選用天然酵母發酵嘅搔耳朵麵包,小店更以大麥麥芽自創出獨門招牌啤酒包。啤酒方面,會精心揀選適合當下時令啤酒,其中包括高質進口啤酒,仲有新鮮嘅本地啤酒添!係大家悠閒暢飲嘅好去處。 吐司雞(半份)(HKD49)以香脆又鬆化嘅厚切西多為基底,配以介央牛油散發陣陣香氣,再加埋香脆炸雞,同埋淋上大麥麥芽糖漿。非常豐富惹味,每啖入口都飽嚐幾重口感,令人回味無窮。 退役超人(半份)(HKD73)以招牌啤酒包為基底,配以火腿、火雞、莎樂美腸、煙肉、太陽蛋、醃青瓜、紅洋蔥、蕃茄、牛油果及辣根蒜蓉蛋黃醬。太陽蛋蛋汁非常豐富,令餡料入口更添一分柔滑嘅感覺。 Rye on wood(左)(42/0.2L)加入橡木釀造的粿麥啤酒,酒精濃度6%,帶有麥芽甜同埋絲綢咁柔滑嘅口感。Classic Pale Ale(右)(40/0.2L)酒精濃度5%,有淡淡的西柚、核果和松子的香氣。 而家只要係TFFF專頁嘅粉絲,仲可以享用更優惠「雞全部都係雞」套餐,Like我地facebook再去啦! https://www.facebook.com/toofullforfood/ 「雞全部都係雞」套餐包括: 吐司雞(價值HKD82) 雞翼(價值HKD58) 薯條(價值HKD44) 再配以1 Jug Classic少爺麥啤(價值HKD260),有齊咁多樣野(總值HKD444),埋單只係(HKD298)! Tap The Ale Project 地址:旺角黑布街15號地下 電話:2468 2010 營業時間:星期一:18:00-00:30 星期二至四及日:12:00-00:30 星期五至六:12:00-02:00