Tagged: 麻糬

0

【一店搜羅5大必買遊韓手信 熱賣爆餡麻糬+入味醬油蝦】Cookat Market

每次去韓國首爾買嚟買去都係泡菜、紫菜呢啲手信,收嗰個唔悶,送嗰個都嫌悶呀!究竟近期有冇咩特別啲嘅韓國手信呢?依家就介紹一間當地人氣食品店Cookat Market,佢由網店做到最近開咗實體店,有大量特色韓國食品俾大家揀。今次小編精選5款食物俾大家,下次遊韓嚟呢度一定買嘅開心,收嗰個仲開心!   韓國人氣食品店Cookat Market 喺介紹一堆韓國人氣手信之前,先講講呢間Cookat Market。佢係一間專賣韓國人氣食品嘅網店,上架嘅食品賣相吸引,令人未食已經流晒口水㗎。部分熱賣食品仲俾唔少網民打卡瘋傳。近期呢間人氣網店終於喺江南開埋門市,更方便大家遊韓嗰陣去選購呢啲特色手信啦。   1. 爆餡麻糬 煙韌嘅麻糬有邊個唔鍾意食呢?買返去做手信就最啱晒喇。呢度有相當多麻糬口味,其中一款就係呢個士多啤梨忌廉麻糬(約HKD65/盒[9個])。麻糬外皮軟熟,一咬啲士多啤梨果肉同cream就爆晒出嚟,好正咁喎。 另外,奶茶紅糖麻糬(HKD45/盒[12個])都好受歡迎㗎。外皮用紅糖整成,再包住奶茶味濃嘅忌廉,甜甜哋咁幾特別。 人氣之選仲有呢三種口味!忌廉麻糬(約HKD45/盒[12個]),有朱古力、牛奶同蕃薯味俾你揀,不過就冇獨立包裝。不過無論咩口味,每粒麻糬都好足料,脹卜卜咁睇見都想咬啖呀!   2. 蕃薯麵包 麵包可以玩咩花款?睇吓呢款蕃薯手工麵包(約HKD65/盒[5個])就知喇,外形成個蕃薯咁,真係呃得吓人喎!紫色嘅外皮用紫薯粉整成,搣開就有滿滿嘅黃色蕃薯蓉爆出嚟,夠晒足料。軟綿綿嘅麵包充滿香甜嘅蕃薯味,無論熱食定凍食都咁正!建議食法就係擺落雪櫃雪一個鐘再攞返出嚟解凍,微微凍咁食就最滋味喇。   3. 瓶裝蜜桃 韓國嘅水果出名香甜好食,蜜桃仲係最近當造添。喺韓國食完想買返嚟開心share都唔係唔得,但要抬兩箱蜜桃返嚟就唔易囉,撞爛咗會想喊囉。不過呢款瓶裝蜜桃(約HKD55/切塊;HKD45/切粒)就幫到你喇!將新鮮蜜桃去皮、去核,切塊或切粒入樽,再進行真空處理,咁就冇咁易變壞啦。而且佢哋冇落任何添加劑,同平時啲罐頭水果唔同㗎!每樽大約有3-4個香桃嘅果肉喺裡面,有粉紅水蜜桃同白桃兩種俾你揀,淨食桃肉或整蜜桃茶、配乳酪一齊食都得。   4. 沾醬 韓國品牌BALLAZ一系列嘅沾醬(約HKD60)都可以喺度買到!暫時店內有六款口味俾你揀,包括超人氣嘅綠茶、Oreo同薄荷朱古力味;特別啲就有韓國特色嘅年糕、大米同艾草口味。 呢啲沾醬大部分都有唔同嘅顆粒喺入面增加口感,例如大米醬真係有米、燕麥呢啲穀物顆粒;年糕醬就有煙韌嘅年糕,可以搽麵包、夾餅乾等等都好滋味㗎。   5. 醬油蝦 韓國人除咗鍾意食泡菜,用醬油醃製嘅食物都係佢哋最愛!呢款醬油蝦用咗螫蝦(約HKD80)同白蝦(約HKD55)兩種蝦嚟浸醬油,肉質比較肥美鮮甜。味道方面有分辣同唔辣,迎合唔同人嘅口味。 浸滿醬油嘅大蝦即開即食,而且已經全部剝晒殼,咁方便,餸多幾碗白飯都得呀!但係記得開咗食唔晒要擺入雪櫃冷藏,不過最好盡快食晒佢啦。   Cookat Market쿠캣마켓...

0

【旺中超平小食店 15蚊8粒煙韌麻糬】平霸

依家旺中已經變咗另一個新葵廣,愈開愈多小食店,小編今次就搵到呢間杯中物,主打平價又多款嘅小食,而且選擇超多,見到佢密密麻麻嘅餐牌就知有幾多選擇啦! 綠茶麻糬(HKD15/8粒)上面鋪滿綠茶粉,入口煙煙韌韌,好好食喎! 價錢嚟講係真係幾抵,仲要質素唔差,綠茶粉唔會話太苦,甜度啱啱好,係正喎! 脆炸雞皮串(HKD20/5串)本身賣15蚊3串,不過喺俾錢嗰陣,店員就話20蚊有5串喎,咁抵,除返開都係4蚊一串咋喎,小編梗係有殺錯冇放過啦!不過食落味道就一般般喇,因為雞皮冇灑到啲粉嘅位就真係完全冇味,好「寡」呀! 草莓牛奶(買任何食品加5蚊)只要加5蚊/3蚊就有小食或者飲品,抵就真係好抵!草莓牛奶入口有啲似韓國版嘅草莓牛奶,唔會話好死甜,飲落啱啱好,一啲都唔假㗎! 平霸小評:今次平霸搵食成功!呢間杯中物嘅職員都好nice,態度好好。雖然唔係話樣樣嘢都好食,不過已經唔錯㗎喇!而且放學時段有好多學生幫襯,睇嚟已經變咗學生哥嘅飯堂喇! 杯中物 地址:旺角彌敦道688號旺角中心一期1樓F87B號舖 電話:6198 1607 營業時間:星期一至日:11:00-23:00 《平霸》平食四方,歡迎各界報料。