Tagged: 麻辣派對

0

【花花格調四川菜】麻辣派對

銅鑼灣金百利有新餐廳!麻辣派對屬於傷心酸辣粉分支,不論味道同川菜風味都極有水準。名字都非常過癮,叫麻辣派對。嗜辣一族可以約埋過黎挑戰舌頭,開返個麻辣party! 餐廳氣氛不錯,愛辣情侶們可以黎享受一餐浪漫嘅川菜。 餐廳周圍都用花花格調佈置,唔講真係唔知原來呢間餐廳係食川菜,好新穎!首先上個涼菜,戀味毛肚(HKD58)。其實就係辣牛栢葉,好開胃! 食開四川野個個都應該食過酸辣土豆絲(HKD68)啦,唔係容易炒得好食,稍爲做過酸就變得好怪。呢個土豆絲炒味道做得剛剛好,非常合我心意。豆花小麵(HKD43)細細窩,好精致!比其它菜色淡口,建議先食個麵,再食其它香料味重嘅餸菜。 重點黎喇!每次食四川菜最重要環節,當然係水煮系列。魚類分別有草魚(HKD148),江團(HKD168),百花鱸魚(HKD188),標明全部係活魚,肉質夠滑夠鮮。可以再追加輔菜,例如水晶粉、肥牛、蓮藕、豆芽等等。次次食水煮菜色見到啲辣椒都超級興奮! 再黎一碟超多辣椒菜色,歌樂山辣子雞(HKD138)。裏面仲有一片片豆乾同茄子,好惹味。如果唔夠食,可以同水煮系列一樣追加輔菜。 食到中途通常大家都開始流汗或者辣到嘴唇腫起,係時候要叫返杯野飲。啤酒、椰青水、冬瓜茶、紅酒白酒、中國酒都有!想特別啲可以試個蜜語水果茶(HKD35),好足料,大大杯,仲有粒粒蘭香籽添。 飲完野冷靜過後,再繼續刺激味蕾。挑戰酸辣鍋系列泡椒雞鍋(HKD138),超級重口味,超級辣! 酸辣豬手(HKD148),炆得夠入味又腍,加上辣椒嘅刺激令到整體味道更勝一籌! 估唔到個乾煸四季豆(HKD68)竟然係多個菜色之中令我印象最深刻,濃烈味道同辣度配合得非常好。 川香豬軟骨炆娃娃菜(HKD78)送飯食一流! 紅燒牛腩炆津白(HKD78)不算太突出,但想食下菜的話都係一個不錯嘅選擇! 清炒萵筍(HKD78)完全唔辣,用黎緩和一下味蕾最適合。 麻辣派對 銅鑼灣記利佐治街1號金百利廣場4樓R1號舖 星期一至日: 11:30-22:30 電話:2178 4898