Tagged: 麻辣

0

【旺角新派川菜中西合壁 辣控必試辣到噴火套餐】祥仔辣辣

煮開西餐,尤其擅長法國菜嘅大廚張錦祥Ricky,平時好鍾意食辣,出街食飯都會自備辣味香料。最近佢就開咗以川辣菜為題嘅祥仔辣辣,作為祥仔概念行政總廚都同精於四川菜嘅大廚誠哥交流,部分菜式會加入世界各地嘅西式香料,譬如印度黃薑、法國南部香草、泰國檸檬、台灣金不換等,出奇地令辣香層次有更多變化喎。 餐廳環境有啲中日式同古現代混合嘅感覺,感覺都幾輕鬆自在。食物方面都一樣俾大家「有得揀」,大部分嘅菜式都可以自選少辣、中辣、大辣,甚至地獄辣。Ricky話如果你可以生食指天椒或者成包18禁薯片,歡迎你挑戰地獄辣呀!如果冇特別指明辣度,都會以中辣烹調,所以小編都試呢個辣度體驗吓先。 食辣要食得出色除咗挑戰辣度,仲會享受帶酸、麻、香、甜等唔同嘅辣味,所以辣到噴火精選套餐(HKD388/兩位)就將呢啲味道注入六道菜式。前菜先試酸辣開胃嘅惹火山木耳同埋肉質嫩滑嘅川味口水雞,呢兩款人氣川菜未至於辣到噴火,但開始有麻香嘅感覺留喺口喇。 招牌菜可以二揀一,先睇呢盤水煮安格斯牛肉,紅卜卜咁真係幾嚇人,但加入迷迭香令麻香更有層次,食慾即刻大增!入口即刻俾麻辣味衝擊到要飲水,但肉味依然明顯,呢樣真係估佢唔到。不過餐廳會按時節轉換肉類,下次嚟就可能轉款喇。 相比之下,同樣落咗迷迭香嘅祥仔招標酸菜魚會辣啲,但開頭會俾自家製嘅酸菜掩蓋辣度,但後尾真係愈食愈辣同麻痺呀!鱸魚厚薄適中冇咩骨,質感滑不留口添,大力少少都會夾斷魚肉㗎。 套餐仲包埋三款特色小菜,噴火小籠包係罕見嘅口味,湯汁微辣幾惹味,唔蘸醋都好夠味,不過呢款就冇得揀辣度喇;香芹豬肉手水餃內面冇加辣,怕辣嘅朋友可以蘸少啲醬汁;乾煸四季豆反而爽甜唔辣喎。 最後食埋冰凍嘅黃金南瓜露解辣收尾,清涼甜滑,而好似海底椰嘅亞塔子仲增加咬口添。 食唔到咁多都有其他選擇,好似午市套餐嘅麻婆豆腐石鍋飯(HKD78)都俾足誠意,炒飯底配上滑嫩甜辣嘅麻婆豆腐,食晒都幾飽㗎。 而全日供應嘅招牌辣辣撈丁(HKD58)先麻後辣好惹味,撈勻櫻花蝦同蛋汁一齊食唔止香滑,好似冇咁邪惡添!   祥仔辣辣 Ricky’s Spicy Kitchen 地址:旺角彌敦道639號雅蘭中心2樓201號舖 電話:2885 1910 營業時間:星期一至日:12:00-15:00,18:00-23:00

0

【麻迷必試5間麻辣專門店 平食麻辣燙+串串香放題】辣妹來了、湯火功夫麻辣燙、麻辣妹、爆汗串串、Chilli Fagara

麻辣控一見到麻辣菜就流晒口水,尤其依家呢啲涼涼哋嘅天氣更加令麻辣癮發作。今次小編搵咗5間專賣麻辣菜式嘅專門店,要平嘅有,要精緻嘅有,要任食都一樣有!   1. 速食麻辣燙 喺葵涌廣場嘅辣妹來了HKD25起就有一大碗麻辣燙,辣度有四級,仲好似車仔麵咁自選配料。配料有HKD4、HKD6、HKD8同HKD10四個價,有成52款食物,嗌一碗當餸買返屋企食都得喎。   辣妹來了 地址:葵芳葵涌廣場1樓1183號舖 電話:3622 1353 營業時間:星期一至日:11:00-22:00   2. 麻辣燙變拌麵 喺銅鑼灣嘅湯火功夫麻辣燙有招牌麻辣燙、蕃茄湯底、泰式冬陰功湯底同經典麻辣拌(劃一HKD37)四款兩素一葷麻辣燙,唔夠可以另外加配料,不過一碗嘅麵量其實都幾多。每張枱仲有麻椒油、辣椒油同醋俾你任加,咁樣你想要幾麻幾辣都得啦!如果覺得太辣,可以加啲醋中和吓。   湯火功夫麻辣燙 地址:銅鑼灣謝斐道482號兆安廣場地下4-6號舖 電話:2148 6788 營業時間:星期一至日:11:00-23:00   3. 麻辣菜館 旺角嘅麻辣妹有四款麵食,其中重慶小鍋(HKD25)可以揀米線、薯仔粉、紅薯粉或水晶粉,而辣度就有五級。配料價錢分HKD6、HKD8同HKD9三個類別。不過想食飽啲仲可以嗌麻辣小食(HKD15-68),例如配特製辣椒粉嘅潮州魚蛋、可以自選麻辣度嘅口水雞、豬大腸、海帶等。   麻辣妹 地址:旺角通菜街27號 電話:9309 5990 營業時間:星期一至日:12:00-23:00   4. 串串香放題...

0

【海鮮大咖合體酒吧推新菜 刁鑽麻辣串燒爽口彈牙】辣吧

鍾意返大陸食四川菜嘅朋友都可能食過海鮮大咖,呢種用一個大平底盤放滿唔同種類海鮮,再倒入麻辣湯嘅打邊爐食法近年好流行。上年第一間引入呢種食法嚟香港嘅麻辣派,早前由旺角搬咗去尖沙咀諾士佛臺,由20個位增加到有90個,仲改名為辣吧添。新舖除咗有海鮮大咖,仲有多款刁鑽部位嘅麻辣串燒、麻辣烤海鮮同四川冒菜等菜式;另外仲有中式cocktail同啤酒,將麻辣同酒吧合體。不過大家放心,都有極少數食物係唔辣嘅! 新店座位好闊落,亦有吧枱可以俾你飲酒吹水。嚟到新店,小編梗係試新菜先啦! 小編好想試嘅網紅海星(HKD128)真係要問店員點食先啱。廚師烤熟後用海鹽墊底上碟,反轉剪開底部挖綠色嘅內臟出嚟,就咁食幾似食緊蟹膏,濕濕哋有少少汁;正宗啲點芥末豉油亦得,不過會蓋過佢本身嘅鮮甜味,所以小編鍾意點海鹽,因為鹽可以提升鮮味呀!店長話有啲人都因為海星慕名而嚟,不過有人會覺得腥,但小編又唔覺喎,可能因為小編勁鍾意食蟹膏啦。 跟住到麻辣串燒喇,肉類同素菜加埋成四十款,老闆之一Sonic話四川嘅串燒食材比較爽口,有啲部位仲好刁鑽,所以餐廳用料多喺國內運嚟,香港其他地方未必有㗎。上菜嘅時候,會用火一路熱住鐵盤,不過建議大家趁熱食,擺得耐會乾。小編試嘅4款由左至右分別係: 鴨郡把(HKD26/串)係鴨腸同鴨賢之間嘅血管,口感比鴨腸爽口同厚啲,都易咬開。 豬鼻樑筋(HKD26/串)真係估唔到有得食,係呢幾款之中最彈牙,亦係小編最鍾意嘅,因為冇咁肥。 豬天梯(HKD26/串)係豬喉嚨,雖然都爽口,但質感會相對硬少少。 手打牛肉餅(HKD26/串)就係將手打牛丸壓扁整成餅,同煮湯麵嘅手打牛丸比會乾啲,但一樣彈牙。 食完呢幾款串燒,個咀都有啲麻,辣度似譚仔3小辣同2小辣之間,都容易接受。 魚喺燒烤菜式之中,最常見係多春魚,呢度反而烤耗兒魚(HKD32/條),Sonic話鍾意佢嘅肉質夠結實同鮮甜。小編平時好怕食魚要挑骨,但佢好易起肉,細骨亦唔多。 折耳根烤大茄(HKD48/條)面頭唔係蒜蓉,而係落咗折耳根,即係平時煲綠豆沙用嘅魚腥草(臭草),順便清熱一吓又幾好喎。味道就係平時燒茄子咁,微辣但非常多汁,好似右圖咁一壓落去就睇得出幾咁juicy呀! 熱鍋串串(HKD128/揀10款,每款3串)啱晒想輕食又想有食火鍋feel嘅朋友,餐廳煮好就一大碗咁上菜,拎起真係熱到冒煙㗎!葷素加埋有42款選擇咁多,小編揀咗素菜多啲同唔辣嘅蒜蓉汁。其中右邊嘅海帶薄薄哋幾軟滑,左邊嘅麻吉燒喺魚蛋裡面加年糕,煙韌唔覺膩喎! Sonic話好多鍾意食辣嘅人會追辣,因為愈食愈過癮,所以佢哋都有爆菊花系列滿足同好。不過小編仲想有命落樓,只係挑戰5隻辣椒。 湖南小米椒干爆雞軟骨(HKD88)雖然係當日食嘅嘢之中最辣,大約接近譚仔小辣。食嘅時候記住吞晒先好講嘢,否則啲辣粉好易嗆喉㗎。雞軟骨嘅炸漿唔算厚,都幾脆,係好正嘅下酒菜呀! 嚟到當然要試埋辣吧嘅招牌海鮮大咖(HKD288/一人份)啦!呢個大盤裝咗8人分量,但唔需要按人頭落order,如果4-5人可以叫2人分量,可以留肚試埋其他小菜吖嘛。餐廳每日提供6-8款海鮮,會按時節調整款式;仲有配菜俾你揀添,豆卜、芽菜、薯條、冬瓜、生菜、白蘿蔔、土豆粉可以揀四樣,食落都咪話唔飽。湯底有唔辣嘅蒜蓉汁同分大、中、小辣嘅麻辣汁,小編揀咗小辣,惹味又品嚐到海鮮嘅鮮味,依家近距離睇吓質素點先! 膏蟹係深得小編歡心嘅,微微炸過令膏同肉冇咁易散,啖啖甘香嘅蟹膏食到流晒口流㗎! 貴妃蚌同鮑魚仔平排,明顯睇到貴妃蚌堅好肉地,一咬就嗦嗦聲。 蟶子王同魷魚筒都同樣出色,尤其係魷魚筒,好少有咁大隻,一路煮都唔會韌。 酒類可以試吓cocktail,呢兩杯係兩位老闆嘅最愛,所以用返老闆個名命名。左邊SONIC(HKD118)用檸檬草浸嘅龍舌蘭酒、蘋果汁、蘋果花茶、百香果糖水等用料調製,果香中帶甜,不過唔會甜死人。右邊YU(HKD118)用咗廣東米酒、桂花陳酒、Rum酒、菊花茶同菊花糖水調製,真係好似飲菊花茶咁清新下火喎。兩款cocktail嘅酒精濃度唔算高,唔嗆喉,喺食濃味嘢同時可以refresh吓都幾好㗎。   辣吧 地址:尖沙咀諾士佛臺1號1樓 電話:6433 3362(WhatsApp) / 2363 0313 / 2363 7288 營業時間:星期一至日:17:00-03:00

0

【米芝蓮大廚炮製私房菜 川味深海龍躉滾到起泡】漁牧

原先喺尖沙咀以食川菜同雞煲出名嘅漁牧,最近搬竇移師九龍灣MegaBox插旗,新店裝修大玩中式feel,牆上壁畫仲係人手畫上去,真係氣派不凡!招牌烤鴨可能好多人都知,不過為免有漏網之魚,依家餐廳將大大個風乾機放喺門口當生招牌添喎。新店新介紹,今次唔講燒魚同雞煲喇,其他單點菜式一樣咁正。依家由米芝蓮大廚鋼師傅掌舵,嚟緊會推出私房菜,小編率先試咗啲,真係擺返圍宴客都好得體呀! 試業一個月,午市時間好爆場,想食就要訂枱啦,唔好博呀。 新店多咗幾間VIP房,呢間仲可以唱卡拉OK添,同親友食飯就更加盡興啦。 鋼師傅之前喺六福菜館由開業做到2009年,攞咗米芝蓮之後就轉戰內地,依家再回歸連帶烹調嘅菜式都帶啲內地風味。小編問鋼師傅有冇喺漁牧引入六福菜館嘅菜式,佢就話只有海鮮類囉。講咗咁多,即刻帶大家睇吓有咩正嘢食啦! 介紹新菜之前,先嚟個涼菜九宮格(HKD188)開開胃,有辣有唔辣,有肉亦有素,啱晒唔同口味嘅朋友。其中麻辣牛?、麻辣豬耳同牛肚係小編最鍾意嘅,香口惹味亦煮得夠腍;之後食件爽甜青瓜粒同木耳,清清喉嚨又可以準備食下一道菜喇。 新菜亦係私房菜之一就係呢味香麻味重,但唔太辣嘅漁牧沸騰深海龍躉(HKD588),用咗沙巴龍躉,另外都有5-6斤重嘅大鯰魚俾你揀。鋼師傅話舊時成日講「老魚嫩豬」,魚愈大條就愈好食,因為肉質結實啲。魚肉用滾水浸到大約7成熟就上碟,即刻淋上子彈椒、炮彈椒、花椒等辣椒同滾菜油。上菜嘅時候仲見到啲油滾到起泡泡,令食客可以品嚐到熱辣辣又啱啱夠熟嘅魚肉,嫩滑彈牙。碟底仲有芽菜同紅薯粉,最好係菜油嘅口感唔肥膩,反而更加滑。 另一味私房菜就係特色香辣龍蝦干鍋,不過仲未定價,想食嘅話建議打去問咗先。餐廳選用本地龍蝦,肉質彈牙多肉汁,即使炸過再炒都好鮮甜。一隻龍蝦有斤幾接近兩斤重,呢碟例牌size有4隻龍蝦,夠10位用㗎!呢味菜用嘅辣椒同漁牧沸騰深海龍躉一樣,不過再加咗辣椒醬、豆瓣醬等醬料一齊炒,所以食嘅時候有啲豆豉嘅香甜,之後先有陣香麻嘅辣味滲出嚟;仲有萵苣、蓮藕、薯仔、青瓜同雲耳做配料,真係好豐富呀! 然後點少得漁牧嘅招牌菜呢,老北京烤鴨片皮鴨(HKD170/半隻)大約5斤一隻,每隻鴨都掛咗個號碼牌,可以追蹤返係來自邊個農場㗎!鴨上咗鴨皮水之後風乾一晚,唔使落醃料。先用電爐烤乾鴨身,再轉用荔枝木呢款果木繼續烤,令鴨肉更加香。呢度嘅片皮鴨唔使加錢都俾埋肉你食,其實幾抵吓。 餅皮幾薄,餐廳好細心咁每塊都用紙隔住易夾啲。包好之後仲可以咬到鴨皮脆口嘅質感,食到「嗦嗦聲」添,最驚喜係鴨皮睇落去肥,食落唔覺油喎。不過肉味會淡咗,因為餅皮嘅香味會蓋咗少少,想試濃啲嘅肉味就建議就咁食。 漁牧混豬(HKD298/半隻)都係好多人點嘅,特別之處係自家調製嘅醃料同三色醬料。100日嘅乳豬用西芹、紅蘿蔔、辣椒等新鮮材料醃製,比平時婚宴食嗰種清甜啲。乳豬燒到後段仲釀埋煮過嘅糯米飯一齊燒,將豬油逼入糯米飯,令味道更加香。食嘅時候除咗有平時嘅乳豬醬之外,仲有加咗沙律醬調製嘅抹茶醬同秘製芥末醬,兩種帶甜但清啲嘅醬料可以減退乳豬嘅肥膩感。不過小編最鍾意係乳豬皮呀!光皮嘅燒法鬆脆啲,唔會好硬,堅食唔停口囉。 曹池汁大蝦配手抓餅(HKD108)嘅醬汁有啲似咖喱炒蟹嘅味道,但質感唔杰身,手抓餅都易沾起醬汁。不過手抓餅記得趁熱食,因為佢用酥油整,凍咗就會有啲酥味喇。大蝦肉質好結實彈牙,啖啖肉勁滋味。 雙色水晶球(HKD48)睇落普通,但用足料㗎!尤其係紅豆苛水晶球,除咗有一粒粒嘅紅豆增加口感,仲好難得咁食到陳皮味呀! 雙色馬拉盞(HKD58)有黑糖同抹茶味,口感鬆軟到似海綿蛋糕,但質感厚啲。味道唔會好甜,做飯後甜味都唔覺膩。如果你係嗜甜嘅朋友,佢配嘅肚臍餅、百力枝同煉奶就啱晒你喇。   漁牧 地址:九龍灣宏照道38號企業廣場5期Megabox13樓5號舖 電話:2529 8383 營業時間:星期一至日:11:30-15:00;17:30-23:00

0

【灣仔街頭小店掃平嘢 $20重慶酸辣粉辣得過癮】平霸

平霸有一段時間好迷酸辣粉,簡直瘋狂地食上癮咁,幾乎一個星期要食足四次先得!唔知係咪嗰期食得太勁,已經好耐冇食過咯! 不過最近行經灣仔,見到呢間辣嗎?美食,一聞到酸辣粉嘅味道又忽然癮起添!見佢價錢平平哋,即刻食返碗頂癮先啦! 重慶酸辣粉(HKD20)可選不同辣度,由BB辣去到大辣都有,唔食得辣就咁叫清湯底都得!麵底可以揀薯粉或米線,20蚊已經夠飽肚,抵食!雖然冇得堂食,不過街口位總有碇企,買完企喺街食埋先啦梗係!酸辣粉必備嘅配料齊晒,有花生、榨菜同芫荽缺一不可,臨落配料之前店員會問你有冇咩唔食,好細心㗎!酸辣粉一到,陣酸辣味非常強勁,平霸今次叫咗BB辣,點知食第一啖就俾個辣度嚇親,BB辣都食到眼水鼻水都出晒嚟呀!雖然好辣,不過食酸辣粉就係貪佢呢種味,愈食愈辣愈食愈麻,先夠過癮嘛! 最鍾意薯粉煮到晶瑩剔透,麵質彈牙煙煙韌韌,口感一流! 淨食酸辣粉唔夠喉?可以食埋麻辣四寶(HKD20),都係20蚊搞掂好抵食呀!有四款配料:兩粒牛丸、兩粒鵪鶉蛋、四串豆腐串同海量嘅海帶。平霸一樣叫咗BB辣,喺四寶料上面仲灑咗啲白芝麻,食落有麻辣味仲有芝麻香,平霸鍾意喎! 豆腐串其實係豆卜嚟嘅,豆卜索晒湯汁,入口湯汁爆出嚟嗰吓真係好好食! 牛丸算彈牙,充滿麻辣香氣,正! 海帶煮到好腍身,入口易咬又夠滑溜!   平霸小評:好多食客買慣買熟,俾完錢自動自覺企埋一邊食,小編見到個個捧住唔同食物圍住個檔口,場面都幾搞笑!小店叫得做辣嗎?美食,係有個問號嘅,咁小編就要答返一句喇,係好辣呀!如果你都係食得辣之人,真係要試吓呢度嘅重慶酸辣粉喎,包你辣得過癮食得開心。 辣嗎?美食 地址:灣仔灣仔道177-179號保和大廈地下C舖 營業時間:星期一至日:10:00-22:00 《平霸》平食四方,歡迎各界報料。

0

【重慶風味有辣有唔辣 冷鍋酸菜魚香麻嫩滑】捌壹壹

新餐廳日日都有,但夏天開川菜店會唔會感覺又熱又辣呢?旺角捌壹壹嘅老闆Thomas就話唔怕,因為佢哋有4個辣度俾大家揀,如果唔想每道菜都辣,仲可以走辣添。8月頭開始試業到依家都幾多人,所以晚市都係book位穩陣啲。「捌壹壹」其實係舊時重慶嘅電話地區號碼,直接用嚟做餐廳名夠晒代表性啦!餐廳用嘅調味香料全部都由重慶運嚟香港,連大廚都係重慶人,確保煮出最正宗嘅川味。小編試嘅都係小辣程度,入口feel到陣香麻味先,之後就有啲辣滲出嚟,一般人都表受到。 除咗單點菜式之外,呢度仲可以打邊爐,枱櫈咁闊落一啲都唔逼呀。 呢度最最最一定要食,又令小編迷上嘅就係招牌必食冷鍋酸菜魚(HKD148)!話明係冷鍋,上枱後唔好加熱食咗先,因為再煮啲魚就會老。Thomas揀咗用3斤重嘅生魚,因為肉質好爽滑彈牙,連魚皮都好有厚度㗎!如果唔想食生魚,可以問店員當日有冇其他魚揀,價錢會按種類調整。湯底可以飲埋,微微酸、唔油又清潤嘅感覺異常開胃,小編都飲咗兩碗呀!頭先提過佢哋嘅香料由重慶運嚟香港,估唔到連酸菜都係,咬落仲有啲嫩嫩哋嘅口感。食完魚仲可以加水變打邊爐添。 什錦香鍋(HKD148)係邪惡美食,肥腸、大蝦、午餐肉、蓮藕、土豆條等材料都炸過,好脆口惹味。加埋多款辣椒、花椒一齊炒,香料味道出晒嚟呀!呢款菜有三種口味選擇,分別麻辣、泡椒同孜然,如果好鍾意辣嘅朋友可以揀泡椒。 乾煸肥腸(HKD88)將肥腸炸到好香脆,口感唔會好油膩,係勁惹味嘅下酒菜呀! 黑糖糍粑(HKD25)係四川街頭熱賣小食。糍粑用糯米做成,客人落單先即炸再灑上黃豆粉。趁熱食可以品嚐到外脆內煙韌嘅口感。當地人會點埋黑糖醬,質感會juicy啲。小編食吓食吓,一個人都KO咗半碟呀! 最後想解辣涼一涼又點少得冰粉呢?!Thomas將呢款甜品改良咗少少,用紅糖整成紅糖桂花冰粉(HKD23),再配口啲紅莓乾,清涼又解滯,好正呀! 冰粉以外可以選擇沙冰,藍莓沙冰(HKD32)大杯又清甜,順便護埋眼。   捌壹壹 地址:旺角奶路臣街33號地下F舖 電話:2481 3030 營業時間:星期一至四:11:30-00:00;星期五至日:11:30-01:00

0

【銅鑼灣三大火鍋比併 邊間最麻辣又好食?】麻神麻辣火鍋、雲長小龍坎老火鍋、渝味曉宇重慶老火鍋

雖然依家天氣開始熱返啲,不過邊個話唔可以打邊爐先?夏天打邊爐就好似冬天食雪糕咁,咁先正㗎嘛!今次小編就搵咗三間喺銅鑼灣嘅麻辣火鍋,睇吓邊間最好食啦!   麻神麻辣火鍋-台灣過江龍,一聽個朵都知有料到!有唔少明星名人都爭住捧場,城城郭富城就一個星期要食足幾晚先滿足添! 麻神鴛鴦湯底(HKD228/1-2人份)只有昆布同麻辣兩款湯頭,咪睇昆布湯得兩條海帶飄吓飄吓,味道好濃㗎,好有日式風味。麻辣湯頭只有一個辣度,而最特別之處係湯底只以新鮮蔬菜、水果、秘製嘅麻辣醬、紅椒乾、辣椒粉等各式香料調配,係全素㗎!香料味濃郁但唔會蓋過食物原味,以純素調配減低油膩感;入口有別一貫對「麻辣」嘅印象,真係唔嗆喉又飲得落肚,仲食到食物嘅原味添! 食麻辣湯會跟人頭每人有一件招牌果凍鴨血(HKD88)隨鍋上,鴨血用秘製湯料浸足幾日,賣晒就冇,要等下一批。食嘅時候一定要用刀叉切,減輕湯汁受壓而逼返出嚟嘅程度。口感名副其實好似果凍咁滑入口,真係有驚喜!   美國頂級牛小排(HKD288/200g;HKD388/300g)係麻神嘅招牌牛肉之一,質感好似厚身嘅肥牛咁,但浸熟之後仍然好嫩滑,確實幾滋味。 綜合丸子拼盤(HKD118)有梅菜豬肉丸、鯪魚丸、墨魚丸同蝦丸各兩粒,全部都係手打丸,好彈牙。最鮮甜味美嘅係蝦丸,蝦味濃到好似食緊精華咁,絕對值得獨立叫一份!   ★★食物款式:主打多屬特色火鍋料,選擇不算多。 ★★湯底麻辣度:因為麻神個湯底係全素,當湯咁飲都得,所以麻辣度不算高。 ★★性價比:人均要六百上下,再食多次也要考慮一下! 麻神麻辣火鍋 地址:銅鑼灣登龍街1-29號金朝陽中心2期Midtown 25樓 電話:2341 0999 營業時間:星期一至日:18:00-00:30   雲長小龍坎老火鍋-老細係陳柏宇,大大個生招牌喺度,吸引咗唔少粉絲幫襯,等小編都捧吓場,睇吓有幾正宗嘅四川風味喇! 紅油藥膳鴛鴦鍋(HKD138),佢個麻辣湯底唔係好辣,不過飲落口就有好重嘅麻辣香味,飲得出係用咗唔同嘅辣椒同材料熬成,而且一啲都唔油,好惹味呀!食唔到辣嘅朋友仔記得要叫小辣,因為個湯底會愈食愈辣,食到小編頭皮發麻,好過癮㗎;而另一款藥膳湯底就充滿濃濃藥材味,足料又濃郁,好好飲呀! 龍廚八寶摩天輪(HKD118)有水餃、雲吞、牛丸、豬肉丸同墨魚丸等等,拎到出嚟夠晒氣派,又可以一次過試晒唔同嘅食物。 巴蜀麻辣牛肉(HKD108),睇見都出緊汗喇,牛肉上面沾滿辣椒同香料,見到都覺辣呀!食一嚿已經辣到小編不行了,愛辣人士可以挑戰吓喎! 紅糖糍粑(HKD58),食完啲辣嘢梗係要食返啲甜嘅中和返啦。糍粑其實係糯米滋拎去炸,再淋上糖漿,食落煙煙韌韌外脆內軟。   ★★★★食物款式:選擇同種類都好多選擇。 ★★★湯底麻辣度:辣度麻度也夠勁! ★★★性價比:價錢嚟講算合理。 雲長小龍坎老火鍋 地址:銅鑼灣記利佐治街1號金百利廣場7樓R3室 電話:2761 3300 營業時間:星期一至日:16:00-23:45  ...

0

【經典川菜半山殺落銅鑼灣 必食水煮魚招牌菜】三希樓

之前想食正宗川菜,一定係上半山科達中心嘅三希樓先過到口癮。自己地方一定要整靚啲,佢古色古香嘅傢俱,唔同嘅窗景仲可以遠晀香港動植物公園同ifc,真係幾寫意。覺得唔多就腳?依家去銅鑼灣就得喇,因為三希樓慶祝開業十週年,揀咗喺時代廣場開分店,地點咁方便又唔使去到半山,食完飯仲可以行吓街。不過新店好多時會爆場,穩陣啲最好就訂位先。 三希樓出名將正宗川菜、家鄉粵菜同巧手點心結合,一路食一路感受到師傅嘅功力。其中最出名嘅水煮魚同麻辣鍋係一定!一定!要食!今次小編都試咗其中一款。 必食前菜蒜泥白肉(HKD98)嘅蒜泥亦磨到好幼滑,腩肉同青瓜片到薄一薄,師傅刀功十足。入口爽、滑、脆,口感層次好豐富! 招牌麻辣口水雞(HKD328/大;HKD198/例)麻辣嘅勁力調得啱啱好,食落有淡淡嘅香氣攻上鼻,雞肉仲好滑嫩添。 主菜干鍋牛肉粒(HKD198)用咗大量辣椒同香料炒成,好有川菜風味。牛肉粒分量都唔少,幾有鑊氣同惹味。 水煮野生魚(HKD438/大;HKD368/例)肉質滑得嚟結實彈牙,仲有粉皮一齊煮,可以當湯粉咁食。 極品流沙包 (HKD34)唔講得笑,皮薄餡靚係基本,但流沙嘅感覺可以做到水溶狀態真係唔多,呢個攞滿分呀!   三希樓 地址:銅鑼灣勿地臣街1號時代廣場食通天11樓1102號舖 電話:2111 9952 營業時間:星期一至日:11:00-23:00

0

【㗎妹甜 韓妹醇 川妹辣 中日韓冷麵激戰連場】韓宮、拉麵來、慶麵

夏天食熱嘢,就算冷氣幾勁都好,一樣可以食到大汗疊細汗,但係食冷麵就可以舒舒服服,降住溫咁食喇。除咗蕎麥麵、冷烏冬同水冷麵之外,下面呢三款中、日、韓特色冷麵你一定要試! 黃埔地鐵站一上嚟就見到韓宮,呢度由一位韓媽媽做大廚,絕對食到正宗韓食嘅味道。唔好以為食傳統韓食就等於一成不變,老闆娘耐唔耐就會引入一啲韓國潮流菜式㗎喇。 呢個冰豆漿冷麵(HKD108)就係依家韓國大熱食品,連冰上嘅冷麵唔太常見㗎。湯底用韓國飛過嚟嘅豆漿煮成,唔會因為啲冰溶咗而變得淡口,清甜無油,成碗湯飲都得。溝埋黃豆粉會杰啲,但豆味會更加香濃,一啖麵一啖湯咁食係最好嘅食法,唔好就咁夾一撮麵咬呀。 韓宮 地址:紅磡黃埔新村民兆街16號地舖 電話:2334 5567 營業時間:星期一至日:12:00-23:00   拉麵來老闆同2010﹣2011年度「全日本拉麵大賽」獲獎嘅日籍拉麵師傅小林宏結緣之後,一齊為香港食客調配出唔同口味嘅拉麵。老闆話日本其實有好多五花八門嘅拉麵,唔係得豚骨湯底、味噌湯底同醬油湯底咁單調。 旺角分店同總店一樣用返日本懷舊feel嘅裝飾,有時空穿越嘅感覺。 未食有機豆乳擔擔冷麵(HKD92)之前,小編以為會好辣,點知一飲啖湯原來係重有機日本豆奶嘅清甜味,之後先慢慢滲出輕微鹹鹹辣辣嘅豆板醬味道,好啱夏天食。湯底預先雪凍咗,而自家製拉麵過冷河之後會更加彈牙爽口,呢樣亦係佢哋嘅賣點之一。配菜用有機豆腐、日本青瓜、日本芝麻、日本京蔥同豬肉碎,集清新、爽甜同香口喺同一碗麵,如果想食齋仲可以走肉碎添。注意:呢個麵係期間限定,10月左右會轉做大閘蟹拉麵,到時想食要等出年喇。 拉麵來 地址:旺角黑布街23號地下 電話:2715 0811 營業時間:星期一至日: 12:00-23:30 拉麵來(總店) 地址:大坑浣紗街20-22號地下B舖 電話:2808 4468 營業時間:星期一至五:11:30-16:00;18:00-22:30;星期六、日及公眾假期:11:30-21:30   大角咀愈來愈多餐廳,慶麵都喺度插旗。老闆身兼大廚,原本想學上海菜,但機緣巧合之下接觸川菜之後,發現佢變化多啲。加上老闆鍾意食辣,所以餐廳就以川菜做主打。 「慶」字嘅來由原來係老闆爸爸個名,細個係爸爸教佢煮餸,咁開餐廳當然要紀念一下啦。 冰火冷麵(HKD34)顧名思義又凍又火辣辣啦!雖然係中菜,但麵底揀咗比正常粗嘅拉麵,老闆話咁樣啲汁會更易掛上麵。質地煙煙韌韌,口感唔錯。撈麵嘅汁用咗幾種辣椒——青麻椒、野山椒同指天椒秘製而成,味道由開頭嘅辣到後尾會變成麻辣,變化出唔同層次。小編食到一半飲啖水,麻辣嘅感覺即刻衝擊成個口腔,愛好食辣嘅朋友必試! 慶麵 地址:大角咀角祥街2號J地舖 電話:2609 0966 營業時間:星期一至日: 12:00-21:00