Tagged: 黃竹坑

0

【南區露天茶座打卡一流 邪惡新品酥炸水牛芝士】Kömune

依家去南區咁方便,去試入面嘅餐廳都輕鬆好多。喺黃竹坑嘅Kömune星期一至四17:00至19:00,推出全新嘅平日歡樂時段(HKD118/位),可以無限食豬肋排、薯條、啤酒同西班牙水果酒。唔喺附近返工?Weekend去試新menu啦,有個酥炸水牛芝士係必食㗎! 餐廳外有露天茶座座位,邊食邊同陽光玩遊戲都幾寫意。如果星期四晚或星期日下午嚟,仲有樂隊演出添。 Buffalo Cauliflower甜辣椰菜花(HKD95)係仿效美式香辣雞翼嘅特色素菜,非常惹味。 Burrata Bomb酥炸水牛芝士(HKD140)將新鮮水牛芝士油炸,配香濃嘅車厘茄蓉同新鮮羅勒,邪惡得嚟勁驚喜! Prosciutto-wrapped Pork Chops巴馬火腿包豬扒(HKD285)配軟滑薯仔、芥末蔓越莓同抱子甘藍,開胃又飽肚。 Salmon in Beetroot Miso紅菜頭味噌三文魚(HKD260)係低卡路里嘅健康之選。 清新精緻嘅Strawberry Parfait士多啤梨芭菲(HKD65)配咗白朱古力、開心果同香莓雪葩,未食已經覺得好fresh。   Kömune 地址:黃竹坑黃竹坑道64號Ovolo奧華 ∙ 南岸4樓 電話:3460 8157 營業時間:星期一至日:06:30-23:00

0

【街市良心小店高質健康餐 黑松露炒蛋包一試難忘】街霸

上次街霸同大家介紹過南朗山街市入面嘅青咖喱屋,今次介紹埋對面舖珍珠奶茶美食坊啦!聽到呢個名係咪覺得Old School得嚟又帶點台灣味呢,喺街市入面專賣珍珠奶茶都真係夠晒奇怪喎! 其實唔止賣珍珠奶茶㗎,午市有超多選擇,多到應該要嚟足一個月先可以試勻晒咁多款食物呀!以小店規模嚟講,選擇真係多到唔合理,點解可以有西式、日式、台式、連越式都有,當然唔少得港式炒公仔麵啦,淨係以套餐計都有成十六款,仲未計每個套餐都再有3-10款選擇,真係逼死選擇困難症患者呀! 店員話最受女仔歡迎嘅set係鮮芒富士什果沙律餐(HKD45/包$14飲品),邊有餐廳嘅什果沙律係新鮮生果㗎,仲要係小店喎,芒果用呂宋芒,蘋果用富士果,蝕本喎大佬!跟沙律嘅配料都好多選擇,小編揀咗藍莓多士,因為藍莓醬係自家製㗎,保證無添加! 唔好以為Lunch食沙律就唔飽呀,由於用嘅係新鮮大大個嘅富士果,所以飽足感唔講得笑,我食半碟開始飽喇,蘋果味道超清甜,唔會話太多沙律醬搞到好膩,加埋微酸帶甜嘅呂宋芒真係超fresh。每一啖食落口都係清新味道,唔係全部罐頭嘢再溝埋,真係可以稱上小編街上食過最好食嘅「什果沙律」! 多士烘得啱啱好,咬落脆卜卜,中間搽咗一層厚厚嘅藍莓醬,酸酸甜甜超開胃呀。清新藍莓醬配埋真鮮果沙律真係冇得頂呀! 叫得珍珠奶珠美食坊,當然唔少得珍珠奶茶啦!選擇有成廿幾三十種,真係少啲意志都揀唔落手。街霸今次就試咗胚芽珍珠奶茶(HKD17),因為同枱大家都係飲呢杯,所以咪好奇點解囉。飲落個味唔算甜,飲得出茶味同埋胚芽味,啱晒飲嘢鍾意少甜嘅一族呀。胚芽分量好足料,至於珍珠就係普通嘅細珍珠,咬落唔會話特別彈牙,但起碼飲落去個感覺係舒服順喉唔heavy囉。 除咗Lunch吸引,下午茶都超吸晴。健康扒飽餐(HKD25)竟然有黑松露炒蛋喎,因為好奇街市小店嘅黑松露蛋究竟可以去到咩水準,所以就叫咗嚟試吓。 開頭諗住應該係勁hea嘅包夾住一塊hea炒嘅蛋,冇諗過個包原來都幾大個,大過老麥漢堡包。麵包用芝麻包,食落有種自家製嘅軟熟,黑松露炒蛋食落真係有黑松露味喎,仲幾香濃添,分量都唔慳皮㗎!本來黑松露蛋令到咁大個包有啲heavy,但加埋塊新鮮生菜同沙律醬又中和到,街霸真心覺得呢個包好高質!一定會返頭食呀!   街霸最愛:雖然鮮果沙律同藍莓多士都好好味,但街霸覺得今集嘅真愛係黑松露炒蛋包呀!25蚊食到飽一飽,仲難得好味,食完成個感覺超fresh!街霸超佩服街市小店咁堅持做高質新鮮嘅嘢食,唔怪得舖頭細細但lunch時段都爆晒場啦! 珍珠奶茶美食坊 地址:黃竹坑南朗山道1號南朗山道熟食市場1樓11號舖 電話:2555 9113 營業時間:星期一至五:07:00-16:00;星期六:07:00-15:00  

0

【黃竹坑地踎泰菜CP值爆燈 滿分青咖喱牛腩撈汁送飯】街霸

暑假唔經唔覺又到尾聲,今日街霸介紹呢間街市餐廳都係啱啱放完暑假喎,就係黃竹坑南朗道街市嘅青咖喱屋!唔好睇個名以為好普通,食物CP值同水準爆晒燈㗎! 環境同一般街市餐廳冇咩分別,最搞笑係每張枱上面都會放一枝假玫瑰花,搞到懶浪漫啫!望住枝花差啲唔記得自己喺街市食緊嘢囉! 其中一道招牌菜就係泰式海南雞飯(HKD48/午市)。呢個海南雞飯無論飯同雞嘅分量都好驚人,2個人share絕對冇問題。雞大嚿得嚟皮嫩肉滑超新鮮。唯一美中不足就係當日油飯賣晒,如果唔係就perfect喇! 啲雞賣相真係超靚仔,嚿嚿都油光十足,大件夾抵食,女仔食真係可以帶定個盒打包一半食多餐,CP值爆燈! 食泰國嘢又點少得泰式冬蔭功湯(HKD58/細)?又係超足料,大蝦大隻又新鮮,再望吓啲湯,唔係水汪汪㗎!海鮮同香料嘅精華喺晒湯入面,每啖超香濃惹味,送飯啱晒!順帶一提,呢個湯幾辣吓,唔太食得辣嘅朋友可能要問吓店員有冇得小辣喇! 話明係青咖喱屋,點都要試「青咖喱」啦!泰式青咖喱牛腩(HKD68)必食呀!又係超大份,咖喱味道濃而不鹹,唔係好食得出味精咁。撈汁送飯是常識吧,唔怕同你講,街霸食呢碗咖喱食到問店員加飯……你就知道呢個汁真係出事喇!好味到停唔到口,牛腩炆得夠晒腍,完全唔使用牙「齒」開啲肉搞到攝晒落牙隙咁,又夠晒入味。呢個我俾滿分! 食到有啲口渴,叫咗呢杯番石榴沙冰(HKD30)。由食物到飲品嘅分量真係從一而終咁……大份。呢杯沙冰大到嚇親我,凸咗出嚟嘅沙冰同杯裡面嘅分量差唔多,即係等於一般餐廳分量嘅double喎,30蚊真係超抵囉!味道甜得嚟唔係糖漿嘅假甜,係番石榴本身淡淡嘅果香味。唯一有啲無奈係實在太大杯,飲得唔夠快就會瀉出嚟,所以店員事先已準備好一隻碟仔,等你唔使流到周圍都係,都幾貼心嘅,哈哈! 街霸最愛:其實今集真係難以抉擇,不過必食嘅係青咖喱牛腩同埋番石榴沙冰。街市都食到高級泰菜嘅水準,價錢仲要超親民貼地。如果2個女仔去食,嗌一個飯一杯沙冰加個小食已經夠飽!無錯,連嘢飲都淨係叫一杯好喇……街霸上次同朋友一人一杯真係飲唔晒㗎! 青咖喱屋 地址:黃竹坑南朗山道熟食市場1樓5號舖 電話:6273 2861 營業時間:星期一至五:11:45-14:30;18:00-22:00;星期六:不定