Tagged: 黑糖珍奶

0

【台灣幸福堂懷疑港店貨源 出聲明叫香港粉絲唔好飲】食焦

港台兩邊嘅幸福堂之前嘅爭拗都仲未有共識,最近又爆出風波喇!由9月尾台灣總店出聲明話香港代理未按照合約規範內容經營開始,雙方都一直招來招往(重溫連結:https://goo.gl/Z3ZrjW),香港代理唔理咁多,繼續招收加盟店,依家銅鑼灣、元朗同月初喺尖沙咀開嘅新店,短時間内開足3間。 台灣總店上星期五喺專頁出聲明,話收到香港客人話港店品質下降,同埋味道同台灣店差好遠嘅說法,於是總店特地派員視察,得出結論係懷疑港店嘅貨源出問題喎,「可能不是來自台灣幸福堂,包括珍珠、茶葉 及黑糖,若此懷疑屬實,總公司十分擔心出品的品質,並懷疑其貨源的可信性……」(係懷疑咋吓!)仲話擔心相關食材會引起食安問題添! 重點嚟喇,總店話喺逼不得已嘅情況下,「請台灣幸福堂香港粉絲暫時不要飲用現在香港區的飲品」!仲未完㗎,重中之重係,原來總店已經自己籌備緊香港直營店,講埋會喺尖沙咀同旺角開店,「將會在2019年第一季開幕」! 正式擘面搞到自己開直營店,無非都係唔想再益香港代理啦!總店出咗呢個「停飲聲明」之後,香港代理終於喺星期二(20日)喺報章刊出聲明,話總店不斷抬高原材料價錢,又單方面延長發貨期,而香港代理亦於11月13日向總店終止代理合約,聲言保留索償一切損失之權利,據理力爭,仲話會奉陪到底咁話!

0

【幸福堂風波元朗加盟店照開 香港代理呻委屈總店企硬】食焦

老虎堂之前被爆黑糖唔係手炒而鬧出風波,今次就輪到幸福堂出事喇!事緣係台灣幸福堂喺fb專頁公告,「香港幸福堂多次未按照總公司合約規範內容及 SOP 手法營業……」,仲發出最後7日通牒,如果香港店仲未配合,就會另覓其他代理!不過官方好快就刪咗呢個po喎! 隔咗兩日過埋中秋,香港店先有反應,仲話係「幸福的小風波」,出po講到好似事情已經圓滿解決咁喎,「我們香港幸福堂亦跟台灣幸福堂有一個圓滿的討論……堅信香港幸福堂是能抬頭挺胸面對……」不過總店似乎唔多收貨,隨即再出聲明,「此次港台代理事件目前為止並無共識,中間嘗試告知都視若無睹……」,各有說法變咗另一塲羅生門喎! 睇返最初總店嘅公告,其中講到喺未有任何共識同改善前,係絕不允許擅自開放加盟嘅,不過你有你講,香港店亦都事先張揚9月底會有新分店,真係喎,元朗加盟店理你乜嘢違規風波,新鮮熱辣正式開張,香港店喺專頁仲hashtag咗#合法生育,話之你咁款!喺呢個星期日、即係最後通牒嗰日,元朗店仲搞gimmick玩買一送一添!依家兩邊搞到勢成水火,香港代理回應傳媒就話,係總店要求更改店面裝潢,包括個招牌要係凸字設計、招牌竹籤筒要擺喺櫃台…… 香港代理就話咁樣做係唔切合香港環境,唔係唔想配合、係環境因素唔得喎!總店就話香港店唔理質素只係掛住賺錢,回應台灣傳媒嗰陣話「就跟他說珍珠一定要炆,炆到多久時間……但他們員工就跟我們說哪有時間炆啊!我們是很講究我們品質還有品牌的,他們是為了要撈錢。」原來唔止要手炒,仲要炆珍珠? 網友梗係食花生多,有人話係咪見到香港店做得掂,想自己攞返嚟做,點解自己唔一早直營呀?最妙係香港幸福堂嘅fb admin竟然答話「你看得真透」!仲未止㗎,admin仲喺網度呻話好委屈,但係有口難言唔講得,當然有人同情有人鬧啦!有網友就問出重點,就係依家搞到咁,啲材料仲係咪台灣運嚟先,官方就好肯定咁話,所有都係台灣原材料喇!不過點都好,香港人都係照排隊照打卡㗎喇!