Tagged: 黑糖珍珠

0

【KiKi茶新推秋冬限定 爆多珍珠伯爵蛋糕茶味濃】茶米

九月中先喺香港太古廣場開業嘅KiKi茶@茶.米,最近又有新搞作喇,就係邀請咗一位日籍米芝蓮星級大廚為旗下招牌KiKi麵設計咗秋冬限定麵食,另外仲推出咗一系列令人期待嘅甜品同暖笠笠嘅茶飲。有幾吸引?即刻睇埋落去啦! 環境都幾闊落,好有空間感,唔會覺得逼。 有個沖茶飲嘅開放式吧台對住客人,成個沖製過程一眼望晒,幾咁開揚。 呢款秋冬期間限定嘅KiKi溫泉蛋肉味噌拌葱油太麵(HKD118),就係由日籍米芝蓮大廚設計出嚟。同樣係用KiKi招牌日曬麵做拌麵底,再加上肉味噌同溫泉蛋,台日配搭好match。一拮隻溫泉蛋,蛋漿即刻流晒落碗麵入面,撈埋一齊食除咗有蔥油香之外,仲有濃濃嘅蛋香添。 梗係唔少得最吸引嘅甜品啦!伯爵戚風蛋糕配黑糖珍珠(HKD68),唔止以英式伯爵茶嚟做戚風蛋糕,上面啲Cream都加咗伯爵茶,成個蛋糕都有好濃郁嘅伯爵茶味;另外仲有乜都有佢份嘅黑糖珍珠喺面頭做點綴,既有蛋糕嘅鬆軟,又有煙韌嘅口感,味道一啲都唔單調。 表面有一個個綠色波波、賣相咁得意嘅就係綠茶提拉米蘇(HKD68),平時嘅提拉米蘇係用可可粉,但佢哋就一反傳統,用日本綠茶粉取代,感覺新鮮,綠茶味食落仲好濃添。 之後可以試吓焙茶布丁拌黑糖珍珠(HKD38),以香濃嘅焙茶整成布丁,估唔到,焙茶味同奶香又係夾到一絕,加埋咁煙韌嘅黑糖珍珠,特別有台灣味。 KiKi烤茶泡芙(HKD38)入面係加咗鐵觀音忌廉,茶味十足。一啖咬落去,食到酥脆嘅泡芙皮同好幼滑嘅忌廉,仲浸出鐵觀音嘅香味! 冬天熱飲不可少!自家桂圓紅棗茶(HKD32)用料絕對唔求其,用返台灣當地嘅紅棗同桂圓每日新鮮煮嘅,女仔飲仲夠晒滋補。 仲有用黑糖熬煮而成嘅黑糖紅棗薑母茶(HKD34),加埋薑就更加暖胃。怕凍嘅朋友仔喺寒流來襲飲返杯就真係暖笠笠喇!   茶米 地址:香港金鐘金鐘道88號太古廣場1樓112號舖 電話:2117 5903 營業時間:11:00-22:30

0

【全台四大黑糖手搖店 最誇要排兩粒鐘先飲到】小黑糖、水雲堂、米塔、老虎堂

快問快答:台灣最多喺乜?小編就會答你,台灣最多喺手搖店囉!見佢仲多過見7仔,搞到小編去親台灣都要日日一杯珍珠奶茶,唔肥都假啦!講到話飲珍珠奶茶咯喎,小編都飲到有啲心得㗎 ,依家同你share吓全台四間超級出名嘅珍珠奶茶!袋定落袋呀,冇乜人講過㗎咋! 台北兩大精選 Baroness小黑糖聽個名都知主打係黑糖啦!招牌:小黑糖鮮奶珍珠(約HKD14),超級受台灣人歡迎,珍珠有超濃嘅黑糖味,台妹教路半糖就啱啱好,每啖都伴隨住香甜嘅牛奶同軟腍腍嘅珍珠,好正呀! Baroness小黑糖 地址:松山區南京東路三段335巷5號 電話:02 2514 9808 營業時間:星期一至五:10:00-20:00;星期六、日:11:00-20:00 水雲堂店舖主打沖繩黑糖珍珠奶茶(約HKD12),真心超平囉,仲要喺好飲嘅,香港幾時先有呀?啱啱煮好嘅黑糖珍珠沉喺杯底,食落口仲暖暖哋;黑糖味香濃,珍珠Q彈唔黏口,同埋啲奶茶一齊飲,冇得輸啦! 水雲堂台北統領店 地址:大安區忠孝東路四段201號1-5室 電話:02 8771 5302 營業時間:星期一至四及星期日:11:00-22:00;星期五、六:11:00-23:00 台南精選 呢間米塔開咗唔算耐,但已經成功吸引咗唔少台灣人去打卡!佢嘅黑糖珍珠鮮奶(約HKD13),啲珍珠聽聞有成30年功力,店員將冒住煙嘅黑糖珍珠放落杯度,再倒埋啲牛奶落去,濃郁得嚟又唔會過甜,個個都讚呀! 米塔黑糖飲品專賣 地址:台南市永康區中華二路350號 電話:06 234 0038 營業時間:星期一至日:10:00-22:00 台中精選 老虎堂又係新開冇耐,聽講要排成兩個鐘先飲到,就知佢有幾巴閉啦!老虎堂黑糖波霸厚鮮奶(約HKD13),啲黑糖簡直好似老虎咁鬼霸氣,齋望都知好飲啦!兩個鐘,睇你覺得值唔值囉! 老虎堂黑糖專賣 地址:台中市北區一中街96號1F-7 電話:04 2229 0190 營業時間:星期一至四:11:00-22:00;星期五、六、日: 11:00-22:30