Tagged: 黯然銷魂飯

0

【2020年三條行大運親子路線 水塘打卡歎小區美食】2020年行大運

小編唔少朋友踏入新一年都會去行山轉個大運,今次小編都推介三條家庭樂路線俾大家,兩個鐘左右點都行完,除非打卡休息嘅時間長就預多啲時間啦。行完之後當然唔返屋企住,繼續喺附近轉個圈,睇吓有咩好玩好食啦,let’s go!   1. 河背水塘家樂徑 要去呢條喺元朗近郊嘅河背水塘家樂徑,可以喺元朗泰衡街搭71號小巴(HKD7.8/位)去到河背。 行去水塘會經過好似時光隧道嘅竹林。 堤壩嘅設計令石壁反映出唔同嘅顏色,可以試吓喺唔同角度留影。 圍繞成個水塘行一圈再原路返出去大約需時1個鐘。   我地農莊 免費耕種班 難得入到嚟唔會咁快返市區啦,呢度附近有唔少農莊,好似我地農莊就有免費耕種班,俾大家參觀唔同時節嘅有機種植係點運作。呢度有時亦會舉辦豆腐工作坊、混醬日、製作士多卑梨醬等活動,而今年活動初步排到5月,想參加就留意佢哋Facebook專頁喇。   Crostini Bakery & Cafe旗艦店 地址:錦上路大窩村天映峰左邊小路入 電話:6704 1919 營業時間:星期日:09:00-17:30   2. 大澳虎山 一講大澳就諗起中華白海豚、蝦醬同生晒鹹蛋黃,不過呢度都可以行山你又知唔知呢?虎山沿海而行其實只係半個鐘左右就行完,但係兜晒成個大澳就1個鐘左右,影相食吓嘢都玩到半日㗎。 起步時可以望返大澳內嘅景色。 行到海邊山上嘅觀景台就可以遠眺一望無際嘅海景。   大澳文物酒店 玻璃屋High Tea 沿途行去大澳文物酒店的話,可以喺裡面玻璃屋造型嘅Tai O Lookout歎個新年版大澳‧真味下午茶(HKD328/2人)。呢個下午茶由1月25日至2月2日(14:30-17:00)供應,有黑糖紫貝天葵年糕、大澳特色鮑魚撈起及笑口棗、具大澳及二澳特色嘅二澳薑黃沙嗲雞串、大澳鹹魚肉餅漢堡同大澳黃金蝦多士,絕對係合家歡鹹甜組合呀!  ...

0

【元朗小店招牌鹵水手工菜 食神叉燒明爐出品最銷魂】鹵家

想搵高質嘅鹵水、燒味食,小編就介紹呢間喺元朗嘅鹵家俾大家啦!家庭式經營嘅小店,店主兼大廚曾經喺五星級酒店做中菜大廚,連叉燒、燒味都係親自明爐燒製㗎。叫得做「鹵家」,鹵水嘅質素當然有返咁上下啦,舖頭仲自創咗唔少好花心機嘅手工菜,就係咁儲落咗一大班街坊捧場客! 呢間小店其實早兩年已經喺橫巷比較細嘅舖位小試牛刀,最近終於由以前嘅細舖搬到大街比較大嘅舖位,店內嘅座位足足多一半有多,有成二、三十個位,環境光猛,坐得幾舒適。 呢個就係傳說中嘅食神叉燒飯(HKD56)喇!雖然依家好多餐廳啲叉燒都係同啲燒味工場攞貨,但呢度嘅每嚿叉燒都堅持自家用明爐燒出嚟,工序咁繁複都仲肯做,睇得出對出品嘅用心!更加抵讚係,冇因為咁而賣得特別貴,咁嘅價錢有咁足料,叉燒分量又好多,配埋半熟太陽蛋,見到都開胃呀! 食神叉燒唔止係噱頭,食落真係同坊間啲叉燒唔同。叉燒用嘅醃料唔同,望落有種自然嘅紅色,燒得啱啱好,肉質比較鬆軟,夠香之餘又唔會太油膩。當日呢碟叉燒偏瘦,但一啲都唔乾身,好啱小編嘅口味。 呢道酒仙醉雞卷(HKD45)賣相啖啖肉好吸引,醉雞卷係用無骨雞髀肉捲成嘅,肉質厚實鮮嫩。以調教過嘅花雕酒浸嘅醉雞卷,有酒香而不澀,酒味滲晒入啲雞肉度,非常入味! 想食啲開胃嘅手工菜就要試吓呢道話梅涼瓜片(HKD32)喇!舖頭將烚過嘅涼瓜浸自家製嘅話梅汁,製成冷盤。可能好多人接受唔到涼瓜嗰苦澀味而唔鍾意食,但呢道涼瓜片浸過話梅汁,減輕咗涼瓜嘅苦澀味,入口反而酸酸甜甜,有少少回甘,幾有驚喜!加上涼瓜質感好爽口,做開胃菜最啱喇!唔怪得咁多客人都要點佢,成日好早就賣晒。 蒜汁豬頸肉(HKD63)啲豬頸肉切得夠薄,淋埋秘製嘅蒜汁,蒜味好濃惹味。鍾意蒜香嘅朋友一定要試呢道菜! 鵝肉鹵水拼盤(HKD180)分量多,有鵝肉、豬大腸、牛肚、豆腐同鹵水蛋五種鹵水食材。每款食物都鹵得好入味,啲鹵水唔係好深色嗰種,但幾上色,味道帶甜;鵝肉肉質食落唔老,抵讚!   鹵家 地址:元朗教育路68號兆豐樓地下10及14號舖 電話: 2363 0355 營業時間:星期一至日:11:30-14:30,18:30-21:30(星期四休息)

0

【黯然銷魂飯現身佐敦 重新打造高質黑毛豬! 】Baby K 寶貝廚房

想去市區食返個扒,唔一定要幫襯連鎖餐廳嘅。想靜靜喺小店慢慢歎返餐,小編推介位於佐敦嘅Baby K 寶貝廚房,大家可以物超所值嘅價錢,享受用心製作嘅上佳西餐。 餐廳入面格仔檯布非常搶眼,餐廳特色牆同燈飾令人感覺舒適。 作為前菜,鍾意食薯蓉嘅你一定好難抗拒呢個香草田螺焗薯蓉(HKD78),焗過嘅薯蓉喺柔滑之中增添咗幾分香烤味道,加埋田螺作為小食或前菜都十分滋味。 嚟得食西餐,自然會對扒類有期望。K至尊西班牙黑毛豬配薯菜(HKD178)完全唔會韌,食落肉汁豐富,配埋香脆粗薯條簡直一絕!嚟到食個晚餐,仲會包埋餐湯、蒜蓉包同熱飲。 如果想食海鮮,呢個K至尊阿拉斯加銀鱈魚扒配薯菜(HKD228)就啱晒你啦。鱈魚滑嫩而唔會鬆散,鍾意嘅話仲可以配檸檬汁或者特製醬汁加倍鮮味! 選擇困難唔知食咩好,呢個海陸空(HKD128)就啱晒你啦。有齊晒魚柳、豬扒同雞扒,豬扒同雞扒煎得香脆又不失肉汁,魚柳夠晒嫩滑,加埋薯條成餐就夠晒豐富啦! 叉飯就叉飯啦!但係呢個黯然銷魂飯(HKD78)係高級版!因為選用咗西班牙黑毛豬,入口感覺額外爽脆。仲係每日11:00-18:00限量發售10份,售完即止,想食到黯然銷魂飯就要留意啦,食唔到真係好黯然好銷魂呀! Baby K 寶貝廚房 電話:3704 7821 地址:佐敦白加士街7號康寧大廈地下 營業時間:星期一至日: 07:00-23:00