Tagged: #齋菜

0

【酒店歎日本精進料理 五色五味五法真.天然】素學堂

相信好多人都鍾意食日本菜,素人都唔例外!今次素學堂就帶大家去到逸東酒店Food Court入面嘅MUM日常野菜料理,試吓以日本精進料理做基礎嘅定食。咩係精進料理?其實係指日本傳統素菜,注重營養均衡之外,對食物同製作過程都有三大原則㗎!首先係紅、綠、黃、白、黑嘅「五色」食材;甜、辣、酸,鹹、苦「五味」;同埋煮食方法烤、煮、炸,蒸,切(生食)嘅「五法」。雖然可能有人會覺得淡,但其實淡味唔代表味道唔夠,而係令每樣食物充分發揮本身嘅天然味道同口感,先至係精進料理嘅重點囉! 四項小編今次就試咗日常定食(HKD100/三項;HKD125/四項),定食係會配香菇五穀炊飯、味噌湯同埋麥茶嘅。咪以為味噌湯就係味精呀!係唔同㗎!呢度嘅味噌湯好足料,用昆布同乾冬菇浸出嚟,再加白、紅蘿蔔,飲落去唔會好鹹亦唔會覺得口渴。再睇吓有咩配菜啦! 首先係野菜天婦羅(左)同金平牛蒡(右),天婦羅有秋葵、冬菇同日本南瓜,炸粉非常薄身,面頭亦有曬上海藻鹽;高纖維嘅金平牛蒡就有輕微辣味,但辣味唔會停留好耐,因為加咗醬油同味醂做少少調味,食落會帶少少甜。 秋葵湯葉含煮(左)同山葵鮮淮山(右)都好特別,小編都係第一次食鮮淮山,食落好爽口好似食緊雪梨,但又有少少滑潺潺嘅口感,點埋昆布鼓油同加啲山葵食又幾夾喎!秋葵湯葉含煮就保留咗腐竹嘅原有形態,唔會因爲太腍而散或者爛,面頭有少少薑蓉,豆味好香。 薑蔥汁煑茄子(左)同芝麻菠菜(右)就見到有綠色同紫色嘅出現啦!茄子配洋蔥同薑做汁,食落層次更加豐富但又唔會蓋過茄子味;而芝麻菠菜嘅芝麻醬係自家磨製㗎,菠菜煮熟咗再即刻用冰水浸,之後就整乾身啲,咁就唔會咁易爛又保留到口感喇! 最後到紫薯紅菜頭青蘋果沙津,小編幾推薦大家試呢個,沙津甜甜哋再帶少少青蘋果酸甜,每一啖都食到有紅菜頭粒同青蘋果粒,好開胃添呀!   MUM日常野菜料理 地址:佐敦彌敦道380號香港逸東酒店LG樓8號舖 電話:2762 0258 營業時間:星期一至日:12:00 -20:45

0

【深水埗「素」街食好西 榴槤飛餅+新豬肉咖喱小籠包】素學堂

唔使去淘寶,今次要去深水埗!事關小編要帶各位素人去食小籠包呀!喺深水埗有兩間有得食素嘅小籠包店都大受好評,分別係誠記小籠包拉麵同上海生煎皇,唔講咁多,梗係試咗小籠包有幾素先啦! 首先去到喺西九對面嘅誠記小籠包拉麵,小店由父子檔拍住上,鎮店小籠包、生煎包同芋圓等等,都用新鮮食材全人手製作㗎,難怪深受街坊歡迎啦!兩個月前仲推出咗素食小籠包,啱晒素人胃口呀! 素食小籠包(HKD57/六隻)即叫即蒸熱辣辣,小籠包嘅皮都算薄,蒸嘅時間啱啱好,唔會太腍又唔會一夾就拮穿。有成8種餡料咁豐富㗎,有素雞、木耳、椰菜、冬菇、烤麩、松茸菇、紅蘿蔔同粟米,食落口感豐富同好清甜,雖然冇乜爆汁效果,不過清清哋都好滿足呀! 另外小編仲試咗榴槤飛餅(HKD48)同芋圓鮮椰露(HKD27),如果你係榴槤控就唔好錯過喇!榴槤夠香甜、飛餅亦煎到脆卜卜,不過榴槤餡就唔算厚,但都好夠味;芋圓鮮椰露就有芋圓、南瓜圓、地瓜圓、小丸子同西米,啖啖椰香廿七蚊碗都唔錯㗎! 誠記小籠包拉麵 地址:深水埗欽洲街58號米蘭軒地下 電話:2388 3538 營業時間:星期日至四:11:00 – 23:30,星期五至六:11:00-00:30   食完誠記,之後去到大家應該都唔陌生嘅正宗上海生煎皇啦!喺香港總共有4間分店,老闆係娛圈中人,大家叫佢做生煎包王子、亦係江若琳老公Oscar蕭潤邦啦!半個月前舖頭推出日式咖喱薯仔新豬肉小籠包,唔係唔試呀? 日式咖喱薯仔新豬肉小籠包(HKD40/四隻),金黃色外皮都夠薄,第一啖已經食到咖喱味,由於用咗新豬肉(Omnipork)嘅關係,食落口感同一般小籠包好似,而汁就比誠記多啲。小編覺得咖喱味幾過癮又新奇,就算唔係素人都啱食㗎! 店內都有提供新豬肉素食套餐(HKD72),有一份主食、小食同飲品,素人可以直接揀啦! 小編今次就試咗四季豆新豬肉碎飯同芥末柚子粉皮,四季豆同新豬肉都幾夠鑊氣,小編冇諗過咁好味喎;芥末柚子粉皮就偏甜,芥末味唔算好出,不過勝在粉皮夠滑亦唔厚,一條條滑溜溜食落口好特別!   正宗上海生煎皇 地址:深水埗福榮街100號地下 電話:2723 7723 營業時間:星期一至日:11:30 – 23:30

0

【品茶食點心再試新菜單 中環大館歎法式素菜晚餐】素學堂

中環大館除咗吸引到唔少人去打卡影相,仲有唔同嘅餐廳俾你醫肚,有中有西又有酒吧添!其中樂茶軒呢間素食餐廳更加特別,真係可以飲啖茶食返個包。店內佈置古色古香,有好多精美茶具同擺設,用餐環境相當優雅! 樂茶軒平常除咗提供精緻素點心同甜品之外,餐單亦會因應食材每日更新,所以每一日都會有驚喜㗎!餐廳嘅茶款超過六十多種,有適合唔同季節品嚐嘅茶,最近餐廳仲推出了法式素菜晚餐(HKD328/1set),由頭盤到甜品食足五款菜式,炮製呢個素晚餐嘅師傅,喺行內有40年經驗,真正大師級呀!餐廳每季換一次菜單,呢個法式素菜晚餐大約供應到一月底咋,快啲去試吓喇! 未食法式素菜晩餐之前,睇吓廚師推介點心有咩好選擇先啦!左邊翡翠苗炸餃(HKD38/2件)外皮又薄又脆,翡翠苗有口感不會過腍,小編好鐘意呢款!右邊竹笙紅菜頭蝦餃(HKD42/2件)顏色鮮豔奪目。 左邊八菌燒賣(HKD45/2件)非常精緻,以雜蔬同蘑菇粒做餡料,食落去口感豐富,食得出師傅嘅用心呀!而右邊椰絲紫薯餅(HKD28/2件)係季節性甜品,所以未必日日有。食落去質感有少少似糯米糍,甜度適中亦唔會滯。 品茶嘅選擇就有屬青茶類嘅蘭花香單欉(HKD118)係半發酵茶,淡淡嘅蘭花香撲鼻而來,口味甘醇。 而屬黑茶類嘅陳年六堡(HKD88)香氣陳厚,滋味甘醇可口,唔會有苦澀味。 輪到最期待嘅法式素菜晚餐啦,第一道菜式係煎釀蘑菇配田園沙律,蘑菇上面嘅雜蔬粒加咗羅勒嚟豐富菜式味道,帶點酸甜十分開胃,睇賣相已經好想食啦! 第二道菜式係焗茄子包燴法式雜菜伴甜椒汁。 茄子切得好薄,第一眼真係以為佢係梅菜扣肉嘅朋友,裡面嘅雜菜切成一粒粒食落口感十分豐富,而甜椒汁分量都好足,每一啖都非常滿足。 喺品嚐蜜糖豆湯嘅時候又點少得麵包嘅陪伴呢!分別有法包、德國黑麥包同罌粟籽包,由脆卜卜到軟腍腍都有齊。沾麵包嘅醬汁分別係由黑橄欖打碎再加橄欖油,同埋日曬蕃茄醬汁,好味又健康。 蜜糖豆湯嘅顏色係咪好特別呢?小編平時好驚青豆嘅草青味,不過飲完第一啖就感受到蜜糖豆磨碎後嘅質感,飲落唔會覺得粗糙反而好易入口,甜甜哋帶少少忌廉嘅香滑,味道好有驚喜,小編話咁快飲晒成碗呀!師傅話蜜糖豆容易變黃,所以湯係每日新鮮即做兼限量供應,所以想試就要快手喇! 主菜香脆蔬菜芋頭松露卷配法芥末汁,一嚟到已經聞到松露香味,外皮很薄炸得卜卜脆,而松露同芋頭味道好夾,仲附上菠菜、薯仔同粒粒翠玉瓜,菠菜很鮮甜可以平衡返芋頭嘅飽肚感,食完唔會有飽滯感。 最後梗係要食埋甜品啦!自家製青檸撻賣相已經好吸引,質地好滑亦唔會太甜太酸,餅底唔厚,青檸味酸甜清新,為整個法式素菜晚餐畫上完美句號。   樂茶軒 地址:中環荷李活道10號(舊中區警署)大館01座G06-07號舖 電話:2276 5777 營業時間:星期一至日 :11:00 – 22:00

0

【屯門素食薄餅小店 即焗雙拼Pizza足料香噴噴】素學堂

呢間薄餅專門店喺屯門好受歡迎,店名叫常嚐素,仲夠膽聲稱自己係全港唯一嘅素食薄餅店添!小店由趙生兩兄弟主理,點解開素店賣Pizza?唔多唔少都同本身係素食者嘅趙媽媽有關!話說趙生細細個同媽媽去街市,佢話見到檔口啲人劏魚又劏雞,見得多都覺得殘忍,於是慢慢就跟媽媽一樣食素喇! 趙生入行超過十年,先後喺多間大型薄餅店度做廚,最後決定自己開返間全素食嘅薄餅專門店,有堂食又有外賣服務!兩兄弟由打理店舖、諗新菜式、落單、聽電話到揸車送貨都親力親為㗎!唔怪得咁多街坊熟客支持。趙生仲話店名叫常嚐素係有意思㗎,就係希望多啲人嘗試去食素,咁就唔止身體健康啲,連皮膚都靚啲咁話喎! 店內提供15款薄餅,小編今次分別叫咗兩個雙拼普通批(HKD88),可以一次過試齊四種味呀!分別係海鮮總匯、世外桃園、日式芥辣風同照燒素鰻魚。即叫即焗,Pizza喺焗爐出嚟已經香噴噴喇!Pizza嘅麵粉會先用機器打,再用人手搓,食落特別香脆鬆軟。海鮮總匯口味係千島醬配素蝦、蟹柳、青椒、菠蘿同芝士,味道算濃郁,啖啖都有料放入口;世外桃園口味就係千島醬配水蜜桃、蘑菇、金菇、粟米同芝士,食落甜甜哋好清新。 輪到日式芥辣風即係Wasabi醬配素三文魚、蟹柳、粟米、素獅子狗、紫菜、芝麻同芝士。素三文魚係蒟蒻製品,喺顏色上點綴不少,薄餅落足Wasabi醬,一食落口搞到小編有啲標眼水,每一啖都好刺激;照燒素鰻魚就有照燒醬配蘑菇、素丸、青椒、素鰻魚、芝麻同芝士,用紫菜同大豆纖維做嘅鰻魚,像真度十分高,照燒醬汁令Pizza多咗日式風味,同香脆鬆軟嘅餅底又好夾啫! 除咗薄餅,都有其他主食!菠菜汁雜蔬焗飯(HKD44)雖然材料只係用西蘭花、粟米芯、蘑菇同粟米,但味道令小編好驚喜。菠菜汁用白蘆筍汁再加菠菜打勻,加埋芝士再放入焗爐之後,真係抵擋唔到誘惑呀!菠菜汁濃郁得嚟又有芝士香,配埋各類蔬菜就平衡返晒! 鮮茄素肉醬意粉(HKD42)都好特別!仲可以改用只喺用米嚟提煉,而唔含任何蛋奶成份嘅米芝­士(HKD6),適合純素人士,不過暫時就得呢個意粉有得轉米芝士,其他菜式用嘅芝士都係含蛋奶成份嘅澳洲進口芝士,如果純素素食者就要小心喇。小編都係第一次試米芝士,味道冇普通芝士咁濃郁,軟軟哋質感幾得意,但就無得拉絲啦! 小食選擇可以試馬來素雞串燒(HKD34/5串)同素麥樂雞(HKD40/8件)。鹹鹹哋嘅素雞串燒估唔到係用蘑菇椗嚟做,質感嚡嚡哋好似食真雞胸咁,點埋甜酸汁真係味道一流!咪以為呢個係麥記嘅麥樂雞呀!望落真係勁似,但呢個係用大豆纖維做㗎,外脆內軟好快一件食一件呀! 羅宋湯(HKD10)有素肉,味道都算濃郁,但就同一般嘅羅宋湯冇太大分別。   常嚐素 地址:屯門井財街青棉徑5號金寶大廈地下7D號舖 電話:3488 0072 營業時間:星期一至日 :11:00 – 22:30

0

【素食車仔麵2大名牌 砂鍋上菜+素喇沙湯底】素學堂

車仔麵唔係肉食者專利,今次小編介紹兩間喺素食界無人不知嘅車仔麵小店,唔知引唔引到肉食者一試呢?觀塘嘅滕王閣以砂鍋出名、荃灣嘅素悅軒就款式特別。事不宜遲,即刻睇小編試食報告啦! 工廈小店 滕王閣 素友一致好評嘅滕王閣,前身係喺北角廣受歡迎嘅麵店,葷素都有得食,但因為加租就搬去觀塘工廈。 湯底有8款咁多,不加任何添加劑同味精,有辣有唔辣。麵款有米線、米粉、薯粉、闊條薯粉同自家製拉麵,同平時嘅車仔麵選擇好唔同。 小編當然試佢出名嘅砂窩湯麵(HKD30)啦,蕃茄湯底(加HKD3)鮮茄味十足,仲要有蕃茄粒,濃得嚟唔係茄膏整,真係唔會口乾零味精,配煙韌手打拉麵一流呀!餸揀咗三款,自製酸齋(HKD7/4-5件)微酸夠醒胃,都幾大舊;蘿蔔(HKD8/2件)勁大件,清甜無渣。 自製猴頭菇丸(HKD7/2粒)重量十足,食落彈牙,菇味好鮮甜。呢鍋已經扣底都好大碗,勁抵食!   滕王閣 地址:觀塘觀塘道436-484號觀塘工業中心第4期10樓B號舖 電話:5427 7888 營業時間:星期一至日:11:00 – 20:00   巷中清泉 素悅軒 全素嘅素悅軒喺荃灣兆和街海晴軒旁一條唔起眼嘅小巷,舖面唔大,三張枱容納十幾人。老闆何生年前接手咗老婆個姨媽嘅呢間素食店,以前因姨媽篤信佛教,每日會派發100個飯盒,依家冇宗教信仰嘅佢唔想老友記失望就繼續派,仲怕唔夠派,將免費飯盒增加到120個添。 呢度主力賣車仔麵同三餸飯,何生由新加坡回流返香港,所以車仔麵除咗舊有嘅湯料醬汁之外,仲加入喺新加坡帶返嚟嘅素喇沙同素肉骨茶湯底。 一坐低餐都未點,何生就送上熱辣辣冇味精靚湯。 3餸湯麵(HKD43)配米線同喇沙湯底,掛麵吸汁好正。喇沙湯底可以揀大、中、小辣。呢個小辣接近譚仔5小辣,滿滿嘅香葉味勁惹味囉。 自製素叉燒幾可亂真,有啲燒味嘅燒烤感覺同甜味;用麵筋整嘅自製素牛腩連牛腩脂肪都模仿到,啫喱口感有嚼勁。紫菜滿滿一堆,未食已經好開心,勁豐富囉! 炸薯片(HKD8/加一餸)一客3大塊,有手掌咁大。重點係即叫即切即炸,絕對新鮮足料。   素悅軒 地址:荃灣兆和街25號海晴軒15號舖 電話:3486 4428 營業時間:星期一至日:12:00 – 21:00

0

【肉餅哥潮推「新豬肉」素菜 蒸完再煎糖醋麻辣任揀】素學堂

大圍嘅肉餅哥小炒料理出名花款多多嘅肉餅,過往有有芝士肉餅、金沙蛋黃肉餅呢啲重口味款式。依家咁多人食素,肉餅哥都要跟上潮流步伐啦!今次肉餅哥小炒料理同Green Monday合作,選用年中引入香港嘅*新豬肉Omnipork,推出全新素肉餅,配合唔同嘅素小食,令素食者都可以大擦一餐。 肉餅可以配白飯、南瓜粥或米粉,如果加HKD2可以轉菜飯。小編就比較鍾意南瓜粥,清甜又潤喉啲。不過跟餐嘅是日餐湯有肉,所以素食者要小心喇。 幾款肉餅之中,蓮藕蒸新豬肉肉餅(HKD59)口感同真嘅最相似!新豬肉豆香味濃郁,因為用豌豆整成,口感有啲似麵筋,幾結實;混入大量蓮藕粒,非常清新爽口。 平時食中式肉餅通常都係蒸,不過先蒸後煎你又試過未呢?糖醋煎新豬肉肉餅(HKD59)先蒸6分鐘,然後再煎3分鐘左右至金黃色,外脆內滑。跟住淋糖醋汁,味道同口感似素咕嚕肉。質感有啲厚實,糖醋汁酸酸甜甜開胃,絕對會令你想食多幾碗飯。 麻辣香菇煎新豬肉肉餅(HKD59)主要用辣椒、香菇、甘荀絲同菜脯增加口感同提味。唔食得辣嘅朋友考慮清楚先好試,小編試完承受唔起,因為好易咬爆啲辣椒㗎!呢款肉餅冇醬汁,建議配南瓜粥或米粉會易入口啲。 另外都有小菜俾大家加料,芝士炸薯波(HKD28/6粒)將薯餅搓成波形包住芝士,香口又濃味,過足口癮。 前面嘅涼拌青瓜(HKD22)清爽多汁,最好係幫到解辣。 中間嘅芥香木耳(HKD22)好新鮮爽口。味道鹹中帶酸,再加埋芥末味慢慢滲出嚟都幾開胃。 後面嘅芥末四季豆(HKD20)嘅芥末味比芥香木耳強好多,完全滲晒入豆,非常攻鼻呀! *每100克“Omnipork新豬肉(純植物肉碎)”含1.5克飽和脂肪,與一般未經烹調的豬肉碎(瘦肉佔84%)#相比,“ Omnipork新豬肉”的熱量和飽和脂肪分別低65%和70%。(#參考資料:美國農業部營養資料庫)   肉餅哥小炒料理 地址:大圍美田路30號美林邨熟食亭5-8號 電話:9885 6225 營業時間:星期一至日:11:30 – 22:30

0

【咖啡師一償心願開地舖 時令素cake鎮店之寶】素學堂

要搵到心水舖位開業真係唔易,好似Lucy COFFEE & FOOD就幾經轉折先開到地舖。老闆阿蛋同Sophie本身係咖啡師,最初只係租餐廳嘅咖啡吧沖咖啡,之後寄居喺朋友嘅手作市集。由於兩個人本身都好鍾意食食食,又覺得坊間有好多食物都唔知成分由來,所以佢哋就想自己推出低油、鹽、糖,比較優質嘅餐飲,於是喺荃灣工廈嘅樓上舖就開咗店!做咗四、五年之後,開地舖嘅心願冇變過,終於喺上個月大舖搬細舖兼落地喺長沙灣喇!舖頭細咗有冇唔開心?佢哋反而樂得自在喎,因為更容易控制食物質素,令客人食得滿足同開心先最重要咁話。食材方面一啲都唔馬虎㗎,酵母、麵包同醬汁全部都係自家調製,所有蛋糕都採用高級食材,好似日本蛋、高級橄欖油、法國牛油、有機椰棗同有機椰子油等等。咁用心整cake,小編要試多幾款先得喇! 除咗招牌甜點,蛋卷、蛋糕、撻之外,餐廳都有供應少量輕食,例如沙律、貝殼粉、自家製麵包、素食等等;飲品就有冰滴咖啡、手沖咖啡、拿鐵同茶飲等等,款式幾多元化。 純素芒果熱情果撻(HKD62/件)係小編最鍾意嘅,不過生果會按當造期而轉換。酥脆嘅撻底配自家製素杏仁餡,仲加入咗堅果喺入面幾好咬口;腰果忌廉好滑,甜而不膩 ,同芒果乾、新鮮熱情果同新鮮芒果粒好夾。 焦糖香料炒蘋果忌廉蛋糕(HKD68/件;HKD480/6吋)冇用蛋同奶,蛋糕依然鬆軟唔乾,口感亦唔油。兩層蛋糕中間搽咗自製素焦糖,再夾住用肉桂炒過嘅蘋果。外層就掃咗自製素忌廉,再放上自製蘋果乾,成件蛋糕甜度啱啱好,夠飽肚而唔會頂胃。如果想訂原個蛋糕,就留意Lucy COFFEE & FOOD嘅Facebook專頁啦,有訂購蛋糕流程㗎。 因為無花果季節就快完,原個蛋糕冇得訂,但件裝仲有機會食到,想試純素無花果黑莓撻(HKD68/件)就要快啲去喇!呢款都係用自製素杏仁餡,但就掃上意大利黑醋香料忌廉先鋪無花果乾,香甜中幾清新。 輕食之中又點少得沙律呢!貝殼粉沙律(HKD88)即叫即製,仲用咗大量Superfood,好似藜麥、牛油果、羽衣甘藍、青蘋果同車厘茄等等勁清新,都有飽肚感,好啱OL食。撈埋自家製亞麻籽沙律醬好濃厚,質感幾杰身,味道甜甜哋幾好喎。 想再飽啲仲有Lucy素漢堡配有機羽衣甘藍小沙律(HKD108)。漢堡包用全麥、苔麩同自培酵母製成,係好厚實嘅口感。素牛肉就用黑豆、糙米、藜麥、燕麥同菇菌煮成,同真牛扒嘅質感好似,但豆味香濃。配埋牛油果泥、新鮮蕃茄片、苜蓿同自家製亞麻籽素沙律醬同辣粉,惹味啲,唔食肉都吸收到蛋白質添。 Kale Smoothies(HKD68)用羽衣甘藍、牛油果、香蕉同椰子水整成。第一啖有微微清新草青味,然後香蕉同椰子嘅香甜味會慢慢滲出嚟。口感比奶昔杰身同飽肚,如果運動前後飲杯頂吓肚都得啫。   Lucy COFFEE & FOOD 地址:長沙灣保安道55號美寧中心地下C1舖 電話:5508 8318 營業時間:星期二至日:11:00-18:00(逢星期一休息)

0

【聰嫂煮素菜一樣好手藝 鑊氣小炒惹味到流口水】素學堂

聰嫂最出名係糖水甜品,但原來聰嫂本人食咗廿幾年齋,直到兩年前搵到人睇實糖水舖,終於可以抽身喺北角開聰嫂.原素,一圓開齋舖嘅心願。餐廳走親民路線,平均幾十蚊一碟小菜。煮法方面忠於食材原味,啱晒追求健康嘅素客。最重要係聰嫂煮小菜嘅廚藝高超,未開糖水舖前已喺香港電台主理員工飯堂,一味「劉華雞翼」係廣播道名物。 小編食咗咁多年茄子,第一次食茄子發現新嘅口感喎!椒鹽脆茄子(HKD61)竟然做到外脆!內軟!茄子炸到金黃後灑上椒鹽,鹹鹹哋好香口。 椒鹽素鮮魷(HKD63)用菇同豆類仿製,造型好似平時食鮮魷咁?花,真係見微知著呀!口感同真嘅似到十足十,仲好Q彈添,有啲似魚蛋。雖然冇魷魚嘅鮮味,但陣陣菇香都好正。 蕃茄芝士素豬扒焗飯(HKD50)像真度幾高,不過只喺午市供應,蛋炒飯底好香,焗完都仲濕潤唔乾㗎!蕃茄切粒增加口感之餘,亦令味道更鮮甜。面頭濃郁嘅芝士好夠味,拉絲效果都好得!素豬扒係炸過嘅麵筋,質感幾厚實,仲有陣豆香,亦比真豬扒少咗種飽滯感。 芝士芥末素吉列豬扒漢堡配薯條(HKD45)係下午茶之選,特別在自家調製嘅芥末沙律醬,第一啖有少少攻鼻,跟住會散發出奶香,幼滑嘅口感好正;夾埋芝士同脆口素豬扒漢堡一啲都唔乾。 跟住要介紹嘅菜式新到連餐牌都印唔切㗎!聰嫂間唔中就設計新菜式,所以有時趕唔切更新menu,想食新嘢最好問清楚店員呀!呢兩個煲仔菜都係11:30後供應,黑松露九層塔什菌豆腐煲(HKD68)落咗金不換好夾,令成個餸香氣up up up!豆腐片完全吸晒超濃嘅黑松露醬汁,一咬成口充滿黑松露香氣,啱晒重口味朋友。 泰式香茅蕃茄草菇煲(HKD68)落重香茅同金不換,原來香茅有排毒、幫助消化同降低膽固醇功效,又幾健康喎!豆腐、甜椒、草菇同椰菜花等蔬菜令湯底更清甜。豆卜一咬就爆汁,完全係點睛嘅配菜呀!   聰嫂.原素 地址:北角英皇道康威大廈地下03號舖 電話:2877 9411 營業時間:星期一至日:09:00-22:00

0

【新開素食餐廳進駐蘇豪 素蟹肉漢堡香脆醒胃】素學堂

最近喺中環蘇豪區新開咗間素食餐廳POP vegan,8月中開始試業,等小編去拜會吓先。餐廳名幾有意思,POP係指Pursuit Of Peace追求和平,因為老闆想推廣「和平餐桌」嘅信息,希望社會共融唔殺生。餐廳用咗中西食材crossover,好似用猴頭菇扮漢堡扒、冬蔭功醬煮意粉等,仲有賣各類型素食產品,最特別係有認證嘅純素紅酒呀!鍾意素食嘅你,買枝紅酒返屋企,加多幾分情調啦。 工業風裝潢都可以感覺幾高級,加埋紅磚牆、水泥地,座位又闊落令人幾relax㗎! 有小食同冷盤,Vegan Tuna Tartar(HKD98)嘅素食吞拿魚扒用蒟蒻整成,雖然蒟蒻本身冇味,但點咗醬汁真係有啲似日式刺身嘅味道同質感,再加埋呂宋芒、藜麥同牛油果,爽口又有啲軟腍。因為有薄荷葉同泰式醬汁,味道清香中又有啲酸酸甜甜。 Cauliflower Cake(HKD88)用椰菜花加薯蓉,炸完甘香脆口。薯仔味算濃郁,但係有椰菜花嘅甜同杏仁、果仁嘅香,仲有香草調味令你愈食愈滋味;另外仲配咗泰式沙律,青木瓜、芒果同蔬菜絲幫你refresh吓味蕾呀! 小編私心推介Vegan Crab Burger(HKD138)!麵包係純素,冇蛋、奶同牛油,都幾軟熟。用菇彷製成蟹肉漢堡扒,炸到外脆內軟,比一般麵筋做得更有咬口。大廚精心調配嘅純素蛋黃醬、青芒果、蔬菜絲,酸甜爽口,食晒都唔覺頂住個胃。 Tom Yum Fettucine(HKD108)用嘅冬蔭功醬有香濃椰汁味,帶少少甜。意粉質感厚實好滑溜,配菜又豐富,有豆卜、豆類、西蘭花同菇菌等時蔬。 Four Season Pizza(HKD138)一個Pizza食到四款口味,因為每兩塊就落唔同嘅料。最特別係有好少地方食到嘅貴價食材雅枝竹,冇烘到乾,咬落仲有汁;然後係車厘茄、大嚿南瓜拼蘑菇同黑橄欖拼茄子。Pizza係薄底,醬料用蕃茄醬,同所有餡料都好夾。飛走芝士冇咗肥膩感,食多兩件都得呀! 嚟到甜品環節,Strawberry Cheesecake(HKD55)自家製,將腰果打到滑再加入椰奶。餅底主要用椰絲同椰棗整成,有好重椰子味。成個cake雪到好凍,口感似雪葩,最好係唔會太甜,食晒都唔覺膩。   POP vegan 地址:中環蘇豪伊利近街28號1樓 電話:2628 6211 營業時間:星期一至日:12:00-23:00

0

【夢幻少女味西式素食店 千層闊條麵吸睛飽肚 】素學堂

經營一間餐廳難,經營素食餐廳可能更生意難做,但悠蔬食四年前喺銅鑼灣開店後,兩年前再喺尖沙咀開多間雅‧悠蔬食,只因為太多人捧場,要開多間分流呀!不過點解多個「雅」字呢?總店裝潢比較樸實,分店就想優雅啲,吸引平時唔食素嘅人多啲嚟,推廣素食文化。餐廳午市、下午茶到晚市都有套餐,今次小編就試晚市套餐嘅大啡菇鮮豆包栗子紫薯焗千層闊麵(HKD248)同菠菜核桃野菌忌廉燴意大利飯配香脆腐皮卷(HKD258),有埋前菜、小食同甜品,大廚仲用唔同嘅中西食材玩轉菜式添。 紫色色調好Lady,入到嚟都不自覺文靜啲,幽雅啲囉!Menu方面,分店同總店絕大部份菜式相同,但前菜同甜品就有機會唔同。有啲菜式會有蛋或奶,部分可以選擇走蛋奶,詳情可以睇menu或向店員查詢。唔講咁多,開餐先! 前菜大約兩、三個月會按時令食材轉款,依家有: 涼拌日本黑豆亞塔子黑木耳(左)用黑醋橄欖油汁醃製,酸酸哋好開胃,夾埋青瓜就更爽口。 秘製千島醬拌四季豆(上)用自家調製芝麻醬,微酸嘅味道提升咗白烚四季豆嘅香味,同面頭嘅炸薯仔絲一齊食,口感層次就更豐富喇。 柚香紅菜頭蘋果拌核桃(右)用柚子汁撈勻,令紅菜頭同蘋果嘅味道更加清新。 食完開胃菜就到手卷小食,兩款二揀一。手卷要馬上食是常識,唔係紫菜好快腍。呢兩款手卷最特別之處係用苜蓿芽代替飯,唔會早早塞飽你。右邊蘆筍素香鬆苜蓿芽手卷嫩滑冇渣嘅露筍、清爽嘅青瓜同有啲鹹香嘅素香鬆,咬落爽爽脆脆又清爽。左邊香芒牛油果苜蓿芽手卷主料轉為芒果同牛油果,同樣清甜口味。 大啡菇鮮豆包栗子紫薯焗千層闊麵(HKD248)只有兩層係麵,因為想夾多啲其他食材,口感豐富啲。底層係日本紫薯粒同栗子,鋪一層麵後鋪豆包,再鋪層麵之後就鋪大啡菇喺面,一共5層好飽肚。不過最估唔到係大廚將藜麥打碎,再加入用大量鮮蕃茄煮成嘅蕃茄醬,健康指數升級,亦係小編最鍾意嘅菜式呀! 菠菜核桃野菌忌廉燴意大利飯配香脆腐皮卷(HKD258)最特別係用腐皮卷起扮雞髀,豆香味足又脆口,會想好似真雞髀咁大啖咬嚟食。意大利飯煮到熟透夠黏身,同濃郁嘅菠菜味勁夾。煮嘅時候加咗黑松露,令野菌、意大利青瓜同合桃嘅香氣提升。 甜品都係自家製,可以揀其中一款: 1. 焦糖海鹽榛子千層班戟(右)要另加HKD25,每一層皮都煎到好薄,整體唔會好甜。榛子味比較清淡,但焦糖醬可以提升返整體甜度。 2. 紫薯乳酪蛋糕(中)好香滑,芝士味比平時食開嘅濃味,嗒真啲有淡淡嘅紫薯味滲出嚟。 3. 杏汁椰香紅豆糕(左)係最唔甜嘅一款,口感似果凍多啲,紅豆都好軟腍。杏仁汁係自家磨製,香味比椰汁更突出。 晚市套餐有太多選擇,俾埋menu大家睇啦:   雅‧悠蔬食 Leisurely Veggie 地址:尖沙咀金馬倫道48號中國保險大廈3樓B號舖 電話:3706 5827 營業時間:星期一至日:11:30-16:30,18:00-22:30