Tagged: #齋

0

【中東素菜香而不辣 即叫即捲素Kebab好爽脆】素學堂

大家對中東菜有咩印象呢?係咪又乾又硬又辣辣哋?其實中東菜都有素菜食㗎!都係會用上好多醬料,紅卜卜嘅顏色就係加咗大量香料,但就唔一定辣嘅。為咗幫大家再認識多啲中東菜,今次小編去咗尖沙咀嘅Ebeneezer’s Kebabs & Pizzeria,試吓佢哋嘅素中東菜。呢間連鎖快餐店都攻入港九新界同學界,係唔少大學生嘅飯堂嚟㗎! 門口大大個menu俾你睇價錢同有咩食,唔夠喉仲有小食。午市套餐介乎HKD55-70,包飲品,分量都幾大。一般食量嘅男士都夠飽,女士就可以share食。 先嚟個熱辣辣嘅雜草硫豆卡巴Falafel Kebab(HKD58/配免費汽水),size差不多有女仔前臂咁長喎!即叫即捲,仲好細心幫你分兩份。呢款素食Kebab以Falafel為主料(Falafel即係用鷹嘴豆泥油炸成嘅鷹嘴豆餅),加上大量生菜絲、紫椰菜絲、甘荀絲同洋蔥令口感清甜爽脆,又減退Falafel嘅油膩感。醬料有酸忌廉同青豆醬,如果想食辣可以落單時話加辣椒醬,或者另外點餐枱上嘅辣醬。 如果你係飯桶就可以食咖喱雜菜炒飯 Vegetable Biryani(HKD58/配免費汽水)啦。唔好俾佢紅卜卜嘅外表嚇親,因為中東嘅咖喱香料都可以香而不辣,加上走咗辣醬,所以只有咖喱香。印度米口感厚實唔太腍,炒得幾乾爽,加上有青豆、豆角、薯仔粒、洋蔥同蕃茄調和就唔會好乾。入口有陣陣橄欖油、咖喱粉同香葉等味道滲出嚟,好香口,仲有雜菜沙律可以清清喉嚨添。 如果想加醬汁,枱面有3款俾你揀: 紅色:秘製辣椒醬超級辣呀! 白色:酸忌廉嘅酸味唔太重,但係有奶香味。 青色:青豆乳酪醬好清新,有少少檸檬酸嘅清新,亦冇草青味。 香口嘢香港人最鍾意食,小編都加咗件咖喱角Samosa(跟餐加HKD10/件)。外皮炸到金黃香脆,裏面填滿青豆同咖喱薯蓉,香料味十足,只係微辣但好惹味。   Ebeneezer’s Kebabs & Pizzeria 地址:尖沙咀亞士厘道24-38號天星大廈地下G01C號舖 電話:2114 0999 營業時間:星期一至日:10:00-01:00

0

【西日fusion純素小店 牛油果漢堡脆炸驚喜】素學堂

觀塘東廣場餐廳林立,開業大約2年半嘅Veggle Cafe都算穩打穩紮。大廚兼老闆喺fb專頁講:「要令更多人接受全素嘅唯一方向,就只有做最好最美味嘅素食!」,想知道係咪好似佢咁講?當然要一試真偽啦! 店舖空間唔大,只有20個座位左右,想留住食客就一定要真材實料喇。 自選沙律配雞心豆醬(HKD$75/500g)可以喺每日6-7款沙律餸菜中,揀最多6款。今次小編叫咗5款: 紅菜頭配橙:紅菜頭好清甜,一咬啲汁爆晒出嚟呀!配埋橙酸酸哋,好啱夏天食。 芒果沙葛藜麥:呢款最驚喜,清新、醒胃同爽甜嘅組合,仲好飽肚添。 日式蕎麥冷麵:簡簡單單加啲醬油調味就得,鹹鹹哋好易食唔停口。 黑椒麻油西蘭花:烚熟咗嘅西蘭花用黑椒麻油撈勻,淡淡嘅麻香令人好回味。 薄荷香草汁雜果配羽衣甘藍:薄荷味唔會好重而搶味,生果同羽衣甘藍嘅組合好fresh。 話就話揀咗5款餸,但加加埋埋有成9種食物;另外仲有2塊中東包,真係飽到上心口囉,因為跟餐仲配蔬菜湯同熱飲呀! 威靈頓菜卷配甘筍薯蓉黑松露汁(HKD110)嘅靈感來自威靈頓牛柳,係一道有層次嘅菜式。薄脆酥皮包住兩大重點:一係燒過嘅蔬菜、茄子、甜椒同南瓜,味道比平時鮮甜;二係由菇菌打成嘅黑松露菇菌醬散發出好濃烈嘅黑松露味,係成個菜嘅靈魂呀!威靈頓菜卷下面墊住甘荀薯蓉,唔止有薯蓉,仲有啲未壓爛嘅薯仔粒增加口感,食落絕不單調。燒汁就用燒蔬菜流出嚟嘅精華,加重料黑松露醬製成,每一啖都濃郁香口。 小編最愛就係脆炸牛油果蕃茄醬漢堡(HKD110),配自選沙律+蕃薯條+熱飲。麵包好鬆軟,都係純素,冇蛋、奶同牛油,但充滿麥味。餡料多到要分層食,炸牛油果即使表面嘅炸漿炸到金黃色,但牛油果依然保持青綠結實;蕃茄醬就有好濃嘅香草同欖油味;黑豆好腍,加埋其他蔬菜一齊食好有口感!另外好鍾意佢蕃薯條,比薯條更香甜脆口。 Tofumisu(HKD25/套餐升級加HKD15)主要由豆腐製成,連素忌廉都無落,但質感好滑;而平時整Tiramisu唔可以缺少嘅Espresso一樣落足料,香濃嘅咖啡味加老闆自製嘅無蛋奶素手指餅,回甘又唔會太甜。 食完感受到老闆花勁多心思喺每個菜式之中,分量連男士食都飽就知絕不欺場,難怪一直有捧場客啦!   Veggle Cafe 地址:觀塘成業街7號東廣場地下G13A及15號舖 電話:2456 3330 營業時間:星期一至四:12:00-21:00(截單時間20:45);星期五、六:12:00-21:30(截單時間21:00);星期日:12:00-20:30(截單時間20:00)

0

【素葷共融韓式素菜 回味激罕紅火龍果雪糕】素學堂

青衣城有咩新嘢食?新登場有全場唯一嘅韓式素食店BOBSANG樸生!第一個特別之處係素葷共融,因為一間舖分咗兩邊,左邊嘅Green.素食只供應全素自助餐、右邊則係素葷都有得食嘅單點餐廳。雖然素葷人士可以同枱食飯,但餐廳嘅爐頭就分開素食同葷食,等素食嘅你可以放心享用;其二就係餐廳所有用上芝士嘅菜式,都只用Daiya呢個素食界聞名嘅素芝士品牌,即使冇牛奶都有好濃郁嘅芝士味,唔係靚貨都唔俾你食囉! 餐廳開12:00,但未夠鐘就有食客等緊開餐喇! 小編今次選擇單點素菜,所以安排咗喺餐廳右邊位置,都幾多位㗎。呢度樓底夠高冇壓迫感,木系裝潢亦令人感覺幾放鬆。 外形趣怪嘅牛蒡凍豆腐(HKD65/原味)用咗九龍城老字號公和荳品嘅豆腐呀!豆腐質感厚實之中好細滑,豆味濃郁。原味以紫菜碎同芝麻醬拌勻一齊食,提升味道層次。加埋面頭炸到香脆可口嘅牛蒡絲,鹹鹹哋好正。想刺激啲可以試泡菜味(HKD65)、清新啲有萵筍味(HKD68)添。 炸腐皮芝士卷(HKD66/素泡菜)係其中一款用咗Daiya嘅菜式。以腐皮包住素泡菜、青瓜、甘荀、醃蘿蔔、牛蒡同素芝士炸成,香脆程度係一咬層腐皮已經散落喺碟度喇!點埋韓式甜辣醬就更惹味,如果想轉成葷菜可以揀泡菜牛肉(HKD68)或泡菜豬肉(HKD66)。 以芋頭、冬菇、紫椰菜同甘筍切絲煎成嘅四蔬韓式煎餅(HKD94),用無蛋奶素粉漿製作㗎。爽口清新,都幾飽肚喎! 主食點少得自選韓國撈麵呢,主料可以自己選配,呢款係素豬炒泡菜配麵(HKD68),另外有大醬豆卜(HKD58)。以菇菌類仿豬肉嘅口感,非常神似,一咬爆汁添;配埋柚子豉油汁,香得嚟酸味味,特別開胃。 不得不提自家製軟雪糕杯(HKD58),除咗冇奶類成分,仲有激罕見嘅紅火龍果味呀!味道清香唔會太甜,感覺幾輕盈;仲配有藍莓、士多啤梨等鮮果同甜醬穀物球,心理上冇咁罪惡感。 蜜桃玄米綠茶(HKD48/左)味道清淡中有微微米香,再以碟豆花混合出天然藍調,感覺更加清涼。想消暑啲亦可以試青瓜西柚冰茶(HKD48/右)。 雖然小編冇食自助餐,但都影俾大家睇睇。款式唔算勁多,但都算新穎。   BOBSANG樸生 地址:香港青衣青敬路33號青衣城一期119B舖 電話:3105 9836 營業時間:星期一至五:12:00-22:30;星期六、日及公眾假期:11:30-22:30

0

【期間限定南洋風素自助餐 必食海南素雞+素肉骨茶】素學堂

叫得做走肉•朋友,餐廳嘅意念係想打造一個「冇肉料理」嘅地方,無論素食者或非素食者,都可以一齊享用走肉料理,食返餐有好多選擇嘅素自助餐! 開業大半年,今次「走肉南洋風情」素自助餐已經係第四個主題,期間限定只做到8月15號,想食就快手喇!餐廳之前已推出過懷舊港式、台式同日式主題,定期轉換主題搞搞新意思,令到街坊食客都有新鮮感!餐廳師傅係星加坡人, 所以今次嘅素食特別得嚟又保留咗少少正宗烹調方法;而喺餐牌上面都會寫明有冇含蛋奶素,照顧到唔同素食者嘅需要,好細心呀! 自助沙律選擇有好多,除咗薯仔沙律、水果同新鮮沙律菜之外,仲加入埋配合咗南洋風情嘅涼菜,例如青木瓜沙律同印尼加多加多等等,非常開胃呢! 海南素雞賣相做到好神似,仿效咗黃油外皮,仔細睇仲連雞皮嘅紋理都有埋㗎!照足煮海南雞嘅方法,搵秘製汁浸過幾次之後再風乾。其實「雞肉」係麵筋,食落同真嘅幾乎冇分別呀!配埋三種唔同醬料,當中嘅酸辣汁為配合全素人士所以冇落蒜頭,照顧周到呀! 南洋pizza外皮又薄又脆,加上南洋醬料有少少微辣,加咗椰奶食落仲有少少椰香味,口感好特別喎! 素肉骨茶飲落有陣藥材味,仲加咗粟米、冬菇同素排骨等,每樣食材都有獨特嘅鮮甜,惹味得嚟又唔肥膩! 菠菜脆脆卷雖然唔係南洋風情食物,不過小編試完覺得好正,好想推介俾大家呀!菠菜脆脆卷睇落色彩好鮮艷,菠菜餅皮包住甘荀絲同埋椰菜絲,外皮厚實、入面嘅材料就好爽脆,一啖一個好滿足!口感超豐富,正到爆!   「走肉南洋風情」素自助餐: 供應日期:即日至2018年8月15日  自助午餐供應時間: 星期一至五:11:30-15:00 HKD68/位(購票入座起計60分鐘用膳) 星期六、日及公眾假期:11:30-16:00 HKD88/位(購票入座起計75分鐘用膳) 自助晚餐供應時間: 星期一至四:第一場18:00-19:30;第二場20:00-21:30 成人:HKD118;小童:HKD88 星期五至日、公眾假期及初一、十五:第一場18:00-19:30;第二場20:00-21:30 成人:HKD148;小童:HKD118   走肉‧朋友 地址:大角咀博文街28-30號地舖 電話:23886280 營業時間:星期一至星期日:11:30-16:00;18:00-21:30

0

【主打日式素食料理 $38歎即製素鰻魚便當】素學堂

舖頭細細嘅知味駅素食隱身喺沙田愉翠苑街市,雖然座位得幾個,但知音人多籮籮,尤其係家長呀,訪問期間眼見好多人嚟買外賣!因為呢度主要售賣日式素食料理,連素刺身都有,俾小朋友食都唔使驚呀!菜式都有唔少選擇,由壽司、刺身、天婦羅、便當樣樣有,全部新鮮即製添!佢哋都有做到會服務,素食朋友想開Party都冇難度啦! 呢度價錢親民,但用料絕對唔馬虎!好似天婦羅,老闆就用咗日本南瓜,用料靚連非素食者都會嚟幫襯㗎。 手撕雞冷麵(HKD38)不論外形同味道都同真嘅極度似,配榨菜絲、青瓜絲、芝麻醬一齊食好香口!白色素麵口感幾清爽彈牙,夏天食就最啱喇。 日式燒汁素鰻魚飯(HKD38)用圓形日式便當盒裝,同餐廳比都唔失色。飯選用珍珠米,壽司醋只係落少少,味道唔會好酸。素鰻魚扒由腐皮卷成,層層疊幾有口感;淋咗燒汁同炒香咗嘅白芝麻好香口。最後食埋黃蘿蔔、酸薑同埋青瓜仲可以消滯添。 香芒吉列卷(HKD26/4件)顏色鮮艷好吸睛。芒果好香甜,壽司卷入面包咗炸素魚塊、子薑同青瓜,入口酸甜清香,都幾開胃。 老闆建議台式燒肉刈包(HKD22/2件)新鮮即食係最好,刈包熱食會軟熟啲,口感同味道似中國嘅饅頭。入面有一塊香脆可口素炸豬扒、開胃酸青瓜、蕃茄同自家製嘅酸甜微辣芥末沙律醬,好豐富呀!   知味駅素食 地址:沙田牛皮沙街2號愉翠苑街市地下2號舖 電話:9458 5190 營業時間:星期一至日:10:00-20:30(老闆隨心放假,記得留意佢哋Facebook呀)

0

【銀杏館旗下全素餐廳 29款素菜美式韓式任揀】素學堂

雖然銀杏館並唔係社會企業,要自負盈虧,但用社會企業嘅理念經營,希望可以對社會作出一啲貢獻,好似聘請長者工作同提倡素食呢兩個大方向,銀杏館一直出心出力!而旗下唯一全素食餐廳華麗耆素就位於火炭工業區,唔經唔覺已經開業兩年幾添。店長Ada好享受喺度工作,除咗會介紹新產品俾客人,亦同客人分享日常開心事㗎! 華麗耆素每日有29款菜式選擇,今日就介紹其中幾款啦!  港式蜜味素叉燒配地道薑粒菜脯炒飯(HKD58)係最受歡迎嘅菜式之一!素叉燒外脆內軟,面頭搽咗蜜糖,酸酸甜甜,味道整到同真嘅一樣,唔睇真係未必分到囉。飯包括糙米、紅米、珍珠米,最特色就係加咗薑米同菜脯粒,增加口感之餘,味道變化出更多層次! 樂活素漢堡(HKD68)麵包烘得好香脆,仲脹卜卜添!夾住兩塊由黃豆打成嘅素漢堡扒,加咗黑胡椒模彷黑椒牛扒嘅味道。中間用菠蘿隔一隔,感覺冇咁飽滯又Juicy啲!另外仲有好多雜菌同香菇,啲菇菌嘅汁滲入素漢堡扒,令味道更香濃。加埋千島醬汁,酸酸甜甜食得好開胃。跟餐嘅薯角炸到金黃香脆,有埋沙律菜平衡吓又健康啲。 蒜香韓風石鍋飯(HKD68)燒到熱辣辣上枱,三色飯底有糙米、紅米同珍珠米,配菜就睇時令有咩新鮮食材,因為農場供應咩菜就會放啲咩,保證係最新鮮同最當做。今次小編就試到肥嘟嘟嘅大豆芽、好清甜嘅油麥菜同好爽口嘅青瓜;而模仿肉燥嘅係用冬菇椗煮成,鹹鹹哋,幫其他蔬菜增加鮮味。當然仲有最重要嘅韓式泡菜啦,少少辣,係石鍋飯嘅靈魂呀! 手作健康三色藜麥紫菜壽司卷(HKD50)簡簡單單用糙米、紅米、珍珠米同藜麥整成,好清甜。配埋壽司醋食,唔會好乾,但幾飽肚。 印尼炒飯(HKD58)用素香腸粒、素叉燒粒同埋少少薑炒成,口感豐富。飯有少少薑味,一啲都唔油!再篤爆太陽蛋蛋黃,撈飯食更香滑㗎! 呢幾個餐本身冇跟飲品,但加HKD5就可以無限飲用湯水同埋咖啡或茶,今次是日餐湯係冬瓜薏米甘筍粟米湯,湯清甜多料冇味精真係好正! 銀杏館有自家農場種植蔬菜,供應俾旗下餐廳,冇化學肥料,保證天然,所以呢度仲有賣自家品牌嘅素食食材㗎!   華麗耆素 地址:火炭桂地街10-14號華麗工業中心4樓406室 電話:3996 8353 營業時間:星期一至六:11:00-15:00(星期日及公眾假期休息)

0

【細味大坑素食天地 自家製餡餅原汁原味】素食微調

平時食得太多肉,有時真係會忍唔住想Green Monday一吓!今次小編帶大家嚟到大坑呢間素食微調,入面有多款自家製嘅特色素食,等大家食素都唔會好似淨係食菜咁慘,其實素食都可以有好多選擇、好精彩㗎! 素漢堡包(HKD88)入面有有機豆腐、大蘑菇、南瓜蓉、蕃茄同素芝士等。其實係一個超大分量嘅burger,食完先發現原來burger冇肉食都可以好好味。小編本身係食肉獸,但食完素burger一啲都唔抗拒,反而仲愛上咗佢添!你唔會覺得自己食緊素,味道非常好味,重點係好飽肚。 微調流心餡餅(HKD128),餅皮係自家製,非常有心思!醬汁用咗西芹頭、核桃同腰果等打成,再加上紫心蕃薯、波菜同素芝士等,相比其他餐廳嘅餡餅,真係好味好多添!事關佢食落一啲都唔膩,完全零負擔,切開層次分明,好靚㗎。 土耳其卷-清新素卷(HKD53),好多外國人同香港人都好鍾意食。入面會有牛油果、鮮茄、青瓜同雜菜等,食落口非常清新!而且佢啲牛油果係非常新鮮,超好食,一嚟夠飽,二嚟方便消化,小編like爆呀! 薯蓉堡壘(HKD60/3件),可以自選款式,小編就揀咗芋蓉堡壘、薯蓉堡壘同甜粟紫心蕃薯。芋蓉堡壘會先將芋頭打成蓉,然後再用焗爐烤到香香脆脆;而薯蓉堡壘入面加咗有機藜麥,再配啲黑松露喺上面,感覺夠fresh又夠營;最後就係甜粟紫心蕃薯,本身紫心蕃薯已經好清甜,再加上又爽又甜嘅粟米,加晒分呀! 飲品方面,小編試咗兩款鮮榨果汁,一款係左邊番石榴+紅菜頭+蘋果(HKD30)可以幫助抗氧化,飲落酸酸甜甜;紅菜頭又唔會有腥味,反而多咗蘋果嘅清香,飲完即刻覺得自己健康咗;而另一款就係右邊羽衣甘藍+香蕉+菠蘿+波菜(HKD45),呢款飲落有少少檸檬味道,加咗香蕉所以好飽肚㗎!   素食微調 地址:大坑銅鑼灣道144號 電話:2802 6126 營業時間:星期一至日:10:00-22:00

0

【中西日台款式齊集 多元化新派素食飯堂】素食分子

新派素食飯堂愈開愈多,北角嘅素食分子就係其中一間代表喇。佢哋嘅用料唔會淨係得麵根呀、菇呀呢啲一般齋料,係玩多元化!做出嚟嘅款式仲橫跨中、西、日、台等款式。 呢度設計時尚,格局都幾寬敞,有唔少年輕一代同外國人嚟食㗎,今次同大家推介中台菜式啦。 台南三杯雞煲(HKD88)同平時食嘅鍋一樣,上菜已經「滋滋」聲,香噴噴!用猴頭菇做嘅「雞」肉,不論質感同味道都令我誤以為食緊肉,像真度達90%!加上九層塔嘅甘香,令呢個小菜更惹味。 咪以為松子粟米炒蝦鬆(HKD78)平平無奇,「蝦肉」用蒟蒻整成,真係爽口彈牙幾得意,小朋友都會鍾意食。加上西芹、粟米、淮山同松子呢啲清甜嘅蔬菜,炒完都唔會覺得油膩。 牛肝菌福果浸時蔬(HKD98)係比較傳統嘅菜式,如果老人家接受唔到新派嘅就可以食呢味啦。銀杏、牛肝菌配豆苗都有唔同嘅口感。 呢度除咗單點之外,午市同晚市都有超值自助餐,只係HKD68起,食多幾次都ok啦。   素食分子 地址:北角堡壘街2號 電話:2856 6238 營業時間:星期一至日:11:30-22:30