Tagged: 龍蝦包

0

【Wine & Dine埋單計數 龍蝦包賣斷 酒檔宣傳勁】食焦

今年嘅「美酒佳餚巡禮」(Wine & Dine Festival)尋晚收檔,連續四晚吸引咗唔少人去狂飲狂食,現場各攤位梗係要出招吸客,希望呢四晚有好成績啦!小編搵咗兩個攤位檔主,一檔飲、一檔食,佢哋為咗呢次美食節攤位究竟使咗幾多錢,成績又滿唔滿意先? 本身做開食品批發、主攻黑松露嘅「Fresco dal Mercato」,今次專登為美食節整咗個獨家龍蝦包,秘製醬料配龍蝦肉,估唔到反應咁好,上星期四第一晚已即刻賣晒!檔主Kathy話:「一晚賣咗三百幾個龍蝦包,斷晒貨!我哋公司本身係賣開黑松露醬,為咗呢次美酒節特別整咗呢款龍蝦包,用我哋自己秘方將黑松露醬撈落沙律醬度,再加埋龍蝦,個味好香好夾。」 Kathy話佢哋八月開始入紙申請,好快已經批咗,跟住即刻揀檔位籌備。問佢用咗幾多錢搞檔,佢就話唔方便透露喇,咁今次埋單計數賺定蝕?佢話:「其實冇話諗住會賺好多㗎!可能『打個和』囉!無所謂,最緊要反應好就得。」以往一直有做開市集擺檔,但係大型美食節就係頭炮,難得呢幾晚反應咁好,Kathy原來已經準備好下次喇,兩個月後會到糖廠街市集出擊,到時又有新諗頭啦! 同樣都係第一年參加美食節嘅Ming,身為「Y Cocktail & Mocktail」酒吧老闆嘅佢,知道今年大會新增咗「氣泡盛薈」賣氣泡酒嘅專區,Ming喺三個月前就已經入紙申請,佢話旅發局好快批咗,跟住佢就立即入新酒。「計埋租場同入貨,萬幾蚊一晚租,我又特別入咗啲德國提子酒,加埋入貨錢,成檔嘢使咗十零萬啦!」 現場有唔少人都等Ming親自調返杯特製氣泡酒,呢幾晚佢就每晚調足至少二百杯酒,咪話唔厲害!不過佢竟然話:「未係最勁喇,我試過喺酒吧一晚最高紀錄係三、四百杯!」調酒之王Ming話今次擺檔有得賺當然好,但佢估計可能埋單都係「打個和」!「其實擺檔最大目的都係想幫酒吧宣傳,想多啲曝光,咁今次我覺得係做到嘅!」下年會唔會encore?Ming就話未決定,但佢最想搞個沙灘音樂節,可以一邊聽歌一邊賣酒!

0

【啜爆你手指 唔用餐具徒手狂食龍蝦宴】Hungry Lobster

想瘋狂豪食海鮮大餐?而家登龍街就有主打龍蝦嘅Hungry Lobster,唔止有得狂食大熱龍蝦包、烤龍蝦,仲有超多海鮮擺晒上檯嘅海鮮大餐!真係不得了! 餐廳裝修配色特別,喺柔和自然色之中加入鮮紅色同藍色,醒目搶眼。細心留意仲會發現燈飾同其他小擺設都同海洋有關添! 嘩!一攤出嚟,成堆海鮮差唔多霸晒兩張檯呀!想食真正嘅龍蝦大餐,就要試下呢個Hungry Table(HKD1288/4人用)。參考咗美國南方食法,成堆海鮮擺晒上檯,任你慢慢食!餐廳每期都會精選時令鮮到爆燈嘅海鮮同新鮮蔬菜放落去,而且一定會有龍蝦喺入面,帆立貝、青口、蝦,樣樣海鮮都勁鮮味呀!有2種醬汁泰式辣醬同蒜蓉牛油任你撈嚟食,仲為你準備埋手套、圍裙,包埋4杯有汽白酒,今次仲唔大食特食! 龍蝦真係好新鮮,蝦肉豐富又鮮嫩。成個Hungry Table仲有得揀2人(HKD688)包埋2杯有汽白酒,海鮮迷真係唔好錯過呀! 喺香港大受歡迎嘅龍蝦包,呢度都一樣有,仲出埋變奏版黑松露龍蝦包(HKD138)!大大舊龍蝦肉擺喺麵包入面,配埋沙律菜同黑松露醬,清新而不失惹味。為咗個麵包唔會蓋過龍蝦肉厚實口感同獨特嘅鮮味,麵包係餐廳特登研究過食譜再送去訂製,軟綿嘅麵包質感加埋牛油煎過嘅香味,真係只此一間㗎咋! 如果想食扒,呢個烤龍蝦牛扒組合(HKD378)就啱晒你啦。仲可以揀肉眼、西冷或者牛小扒。點完之後廚師將龍蝦同牛扒放於烤爐度燒,除咗鹽同黑胡椒之外就唔會再加其他調味啦!龍蝦肉啖啖鮮味,牛扒Juicy得嚟牛肉味超級香濃,仲有埋厚切薯條添! 香辣味同海鮮一向都係絕配,呢個蒜片橄欖油辣椒蟹肉意粉(HKD128)略帶清新嘅香辣味道配埋蟹肉,意粉啖啖都帶有蟹嘅鮮甜味道,微辣令蟹肉更惹味! Hungry Lobster 電話:9330 5378 地址:銅鑼灣登龍街18號V Point地下3號舖 營業時間:星期一至日:11:30-22:30

0

【每隻至少1.5磅!加拿大直送龍蝦盛宴】Mama Burger & Lobster

鍾意食龍蝦嘅朋友要留意啦!小編最近發現到一間餐廳,專門做龍蝦料理,唔止大賣全隻新鮮龍蝦,仲大賣龍蝦包!大大隻龍蝦,隻隻都鮮甜實肉,加上餐廳做得咁專門,梗係要試試啦! 餐廳裝潢型格,室內佈置用上紅、白、藍,三種顏色,令人不其然諗起法國。牆上嘅畫作加上搞鬼塗鴉,令人心情加倍放鬆。 想食出龍蝦嘅鮮味,不妨試試全隻新鮮龍蝦(HKD288)。食落龍蝦非常鮮甜,完全無冰鮮味。原來龍蝦每日由加拿大新鮮空運到港,而且每隻龍蝦仲至少1.5磅重添,真係真材實料㗎!小編身邊好多朋友仔都怕食龍蝦會食到周身污糟,唔駛怕!餐廳會提供圍裙,大家可以慢慢嘆龍蝦。 全隻新鮮龍蝦卷(HK288)大大隻嘅鉗,簡直係XXXXL特盛級別!龍蝦肉好豐富!由加拿大新鮮空運到港嘅龍蝦,輕輕煮熟之後混合多種醬汁調味,夾入已經烤香嘅麵包之中,非常惹味。麵包輕輕烘過外脆內軟,龍蝦肉感豐富,吃下去啖啖肉,口感極之滿足! Mama Burger & Lobster 地址:長沙灣昌華街49號昌暉大廈地下6號舖 電話:3956 5440 營業時間:星期一至六:12:00-00:00 星期日:12:00-23:00

0

【大滿足! 啖啖肉龍蝦盛宴】Master Kama

香港掀起一股龍蝦狂熱潮,似乎吃貨們都對龍蝦食物著迷。當中以龍蝦包、龍蝦湯作招徠嘅Master Kama,更獲不少吃貨稱讚。令小編都開始好奇究竟有幾吸引。餐廳位於鬧市銅鑼灣,裝潢以簡約風爲主,藍白色設計配上淺色木桌同湖水色梳化,令人感覺更舒適自在。小編仲發現餐廳多個小角落都有龍蝦公仔,相當可愛。 龍蝦匯(HKD428)嘅威力令小編覺得係必點食物之一。套餐包括有龍蝦包、炸蒜蓉牛油龍蝦同龍蝦海鮮石鍋湯烏冬,賣相相當吸引! 龍蝦包同烤蒜蓉牛油龍蝦(Half Size) 龍蝦包吸睛不在話下,仲要係足料上檯。龍蝦包包身十分軟熟又有陣陣牛油香味且口感香脆,包入面嘅龍蝦肉鮮甜彈牙又肥美 ,入口啖啖肉滿足感爆登!烤蒜蓉牛油龍蝦蝦肉帶鮮味,肉質唔會太乾,蒜蓉味道濃郁,鍾意食龍蝦嘅朋友實會愛上。另外一籃薯條,入口脆卜卜,小編食到停唔到口。 龍蝦什錦海鮮石鍋湯烏冬用石鍋上可以Keep住熱辣辣!仲可以自由選擇配湯飯或是湯烏冬。金黃色湯底配上大大隻龍蝦鉗,好震撼呀!龍蝦湯底味道香氣撲鼻。除咗有龍蝦仲有其他海鮮鮮,有青口、蜆肉同魷魚等,咁多海鮮匯集令湯底更鮮甜。 龍蝦玉子燒(HKD88)内有乾坤,輕輕切開蛋卷會見到蝦肉。玉子燒嘅蛋身香滑,甜味較重。 黑魚子龍蝦多士(HKD68)蝦多士人人都食過,龍蝦多士真係少見啦!龍蝦多士咬落極之酥脆,入口龍蝦味道鮮甜,配上黑魚子海鮮味道更覺香濃! 相機食先必備Master Magic Soda(HKD48)趣味十足,原先上檯時呈藍色,當倒入檸檬汁攪拌後,就會變咗紫色。好似變魔術咁神奇!味道清涼醒神。 茶町屋系列——屋(HKD78) 抹茶三重奏,有晶瑩剔透嘅水滴餠,口感煙韌嘅抹茶蕨餠,再配上香濃幼滑抹茶雪糕。抹茶味嘅蕨餅上面沾咗少許黃豆粉,味道頗特別。 Master Kama 地址:銅鑼灣謝斐道500號維安商業大廈3樓 電話:3421 2129 營業時間:星期日至四: 12:00-22:00 星期五至六及公眾假期: 12:00-23:00 Day and Nite by Master Kama 地址:旺角山東街50號1-2樓 電話:3106 0900