Tagged: #上環

0

【純素飲食生活新態度 有機咖啡館感受天然味】素學堂

食素順便長知識?呢間喺上環嘅順逆珈琲酒館,由調味料到乾貨類大部分都用公平貿易產品,而新鮮食材就選用本地有機蔬果。 咁咩係公平貿易呢?就係以合理價錢購買貨品,然後有嚿錢放喺社區建設基金,等生產貨物嘅社區可以有長遠發展。 呢度睇落似Cafe,但叫得酒館當然有酒賣啦!呢度會有本地手工啤酒,不過咪誤會,今次係介紹佢哋嘅食物而唔係酒,呢度主打純素同有機食物㗎! 依家咁流行食Pancake,老闆話有人食完佢哋嘅鹹熱香餅配芝士、蘑菇及素香鬆(HKD108)之後,揾返初戀嘅感覺呀!呢個鹹味Pancake嘅醬係自家調配,冇蛋同奶。芝士汁同Pancake底都係純素嘅大豆製成品。不過可能因為無蛋同奶嘅關係,所以Pancake質感有啲Soggy…….唔通係小編掛住影相搞到咁? 黑松露醬有機黑豆意粉配本地白蘑菇(HKD118)味道出乎意料嘅好!食材超新鮮,好有嚼勁,配黑松露醬同本地菇,感覺清甜,幾light。有機黑豆意粉質感有啲似蕎麥麵,仲係Gluten Free無麩質,連灑喺面嘅芝士碎都係純素,用黃豆做㗎!不過分量對男士嚟講少咗啲,女士的話都應該夠。 珊瑚草海帶芽腐竹沙律(HKD48)超好味,仲好有營養!珊瑚草係水底植物,有「海底燕窩」之稱,營養價值比燕窩仲要高,啱晒女士食。 雨林咖啡撻(HKD48)餅底有啲香脆,面層就好似紮實嘅布丁,口感幾得意,不過咖啡味唔算濃郁。 鍾意神秘感嘅朋友不妨試吓純素香蕉奇亞籽布甸配Granola脆脆(HKD48),老闆會按當日邊款水果新鮮而調配,Granola保留咗穀物原本嘅外形,減低營養流失。奇亞籽可補充omega 3,會吸水膨脹而增加飽肚感,所以好多人減肥都會食佢,小編都勁鍾意呀! 黃金素奶(HKD45)用全素奶沖泡,仲加咗肉桂同薑黃,幾暖胃,亦有增加記憶力同抗氧化功效。 順逆珈琲酒館亦支持本地雪糕品牌「Happy Cow」,有杯裝雪糕可以買走食。全線雪糕都係無蛋奶、無大豆、無膽固醇、純素、低GI(升糖指數)同100%香港手工製造,仲有兼售公平貿易有機護膚品,不定期舉行唔同嘅 workshop,例如玫瑰腐乳製作、大豆蠟燭製作、咖啡渣再造紙製作、有機護膚品製作等興趣班,詳情可以留意佢哋嘅Facebook專頁。   順逆珈琲酒館 地址:上環荷里活道 192A 地下 電話:5400 4236 營業時間:星期一至日:12:00-21:00

0

【母親節帶住阿媽去食cake 4款下午茶應節驚喜】Ask、DOUX、Tea WG、GREEN

其實同媽媽慶祝母親節都係想佢開心啫,不如就帶媽媽去High Tea歎吓,重溫少女情懷又得,做吓貴婦又得啫!小編搵咗4間唔同風格嘅餐廳俾大家,今個母親節一於俾個驚喜媽媽啦! 悠閒文青 以往小編絕對唔敢諗會入到陽明山莊食嘢,但依家你同我都有機會喇!不過唔好誤會,係去上環文青feel嘅Ask cafe就得喇,因為佢哋嘅cake係由陽明山莊嘅會所提供。今個母親節仲有Special Menu,俾個機會媽媽食正嘢啦! Ask有唔少Fusion菜式,母親節Special Menu(HKD180/set)都唔例外,前菜有鹹點日式無花果凍豆腐,味道幾清新;母親節橙汁特飲加咗少少酒,味道唔會好甜。 主菜士多啤梨汁煎龍脷柳意粉有淡淡嘅甜味,同濃濃嘅芝士撈埋都幾夾,仲有煙肉粒增加口感。外脆內嫩嘅龍脷柳都幾厚肉,分量十足! 重點嚟喇!甜品可以3選1,由濃味到清新嘅分別係左邊帶少少酒味嘅Macadamia Nut Brownie、中間微酸醒胃嘅Raspberry Mousse同右邊最清甜嘅Strawberry Mousse。 點選母親節Special Menu仲會額外送上充滿牛油香,又鬆軟嘅限定曲奇。 另外都有Afternoon Tea Set(優惠價HKD198/原價HKD238),三層款式由蛋糕到小食都有,當然蛋糕都係由陽明山莊嘅會所提供啦。兩杯飲品可以揀咖啡或茶。 蛋糕款式視乎當日陽明山莊會所供應邊款,去到先知,不過質素一定有保證。  小食有4款,爽口鮑魚、濃味吞拿魚多士、脆炸雞翼同香草三文魚,輕食吓都唔錯㗎。   Ask 地址:上環皇后大道中202號The Putman地下A號舖 電話:2677 1131 營業時間:星期一至五:08:00-20:00,星期六:11:00-20:00   可愛藝術家 想食完Tea方便行街可以去旺角嘅DOUX,佢哋嘅甜品設計得好cute又鬼咁靚,食落肚滿足眼福加口福啦。 Honey comb(HKD98)用蜂蜜檸檬芝士奶酪慕斯同蜂蜜軟糖做主料,鍾意甜食嘅朋友不妨一試。 Berry’s(HKD108)口味酸酸甜甜,因為用草莓同野莓整成,加埋白芝士慕斯,口感幾滑。...

0

【高質食材超鮮味 精緻日菜食豪啲過聖誕】UMI

普天同慶嘅聖誕節食得豪啲都係一次半次啫,位於上環嘅UMI俾你尊享傳統風味江戶前壽司體驗。江戶前壽司嘅壽司主料多數係煮、醃等方法處理過嘅海鮮,可以保持到食物嘅鮮甜味。 餐廳採用日本最新鮮嘅食材,加上資深大廚Kimijima頂級嘅手藝,你會品嚐到精湛嘅手握壽司技藝,用心嘅擺盤令菜式更加色香味俱存。店內只有10個座位,讓你同愛人喺聖誕節或元旦前夕,靜靜享受高品質嘅精緻日本料理Omakase晚餐(HKD2,388),依家介紹其中幾道菜啦: Ise Lobster with Uni用上最受日本人歡迎之一嘅伊勢龍蝦配海膽,用返佢哋嘅外殼器皿,即開即食嘅新鮮感覺好到位。 喺海鮮料理之中,Steamed Awabi係常見菜式之一,相信呢度嘅清蒸鮑魚會令人品嚐到更具日本特色嘅味道。 香港唔會落雪,食返個白雪雪嘅Matcha Log Cake抹茶樹形蛋糕攞返個冬日氣氛啦。想知仲有咩菜式可以睇睇menu:   UMI 地址:上環荷里活道159 至163 號地下3 號舖 電話:2956 3177 營業時間:星期一至六:18:30-22:30 供應時間:聖誕節及除夕晚餐於12月24日、25日及31日18:30-20:30

0

【潮拜中環十層海膽杯 OL熱捧甜品式居酒屋】S2 Kitchen

一講居酒屋就會諗起傳統燒物,但中環嘅S2 Kitchen就將海膽同整甜品嘅意念融合埋一齊,創造出一個新飲食風味。 餐廳有多款非市面可以買到嘅清酒俾客人點選,再用返清酒樽做裝飾,都幾雅致㗎。 皇牌十層海膽杯(HKD398)嘅材料全部都來自日本,而重點當然係每朝由日本拍賣場投返嚟嘅北海道紫海膽,有上、中、下三層咁多㗎,而其他層數嘅材料就有機會因應季節或味道而調節。第一啖將頂頂嘅海膽、黑魚籽同沖繩海葡萄放喺香口嘅燒白飯魚脆片上面一齊食,味道會濃郁啲,但仍保留到鮮味。之後就考小編功力喇,因為要一羹潷到落杯底,一次過食鮮甜藍鰭吞拿拖羅、白蝦同蟹葉蟹肉,不但唔會搶對方嘅味道,反而令口感更加滑,鮮海帶仲增添甜味同海水味,層次更加豐富。  三文魚他他海膽沙律(HKD138)令人意想不到嘅組合,他他醬同海膽加埋令鮮甜度升級,而三文魚夾香梨、車厘茄、沙律菜同薯仔一齊食,清甜爽口,fresh到無與倫比。用埋專用木叉食,特別有風味。  S2特色海膽火焰卷(HKD148)碟底係滲咗白蘭地嘅鹽,一點火就會燒30秒左右,要影相就快手喇!呢個菜式主打健康意念,用一隻雞蛋打出十份沙律醬,就算一個人食晒全板壽司都唔會肥。帶子同海膽入口即溶,新鮮度爆晒燈。如果鍾意食辣,可以加一片薑已經好夠味喇。 無論你點鍾意食海膽,都未必諗到海膽雪糕(HKD88)呢個idea,味道有少少鹹,熟咗嘅海膽又好似蟹子咁一粒粒咬落去會爆開,幾得意吖。 S2 Kitchen  電話:2885 8803 地址:中環威靈頓街51號地下A舖 營業時間:星期一至日:12:00-01:00

0

【蛋糕造型海鮮飯 西班牙傳統蛋餅層層疊】La Postre

食唔同地方嘅傳統菜式,可以順便了解嗰個地方嘅文化,而西班牙菜會出現好多醃菜,口味濃郁嘅燉、燴同炸嘅菜式。上環有間樓上餐廳La Postre就對傳統西班牙菜烹調方式有份堅持,俾大家更容易感受到當地嘅異國風情。 餐廳以藍色,啡色做主調,有種揚帆出海嘅感覺。如果想居高臨下望下街,可以坐窗邊吧檯位,都好舒服㗎。 伊利比亞你可能唔識,但依度出產嘅黑毛豬一定要識,佢地真係淨食松果無溝其他雜糧,蜜瓜黑毛豬(HKD198)嘅肉果香味濃,肉質好滑,因為佢地揀咗24個月大嘅伊利比亞黑毛豬,件蜜瓜仲大到小編差啲一啖放唔入口。佢地自家炒嘅合桃必須激讚添,入口鬆化唔會硬,人手炒完再人手逐粒分開,絕對係心機之作。 如果你超鍾意芥末,小編推介你挑戰芥末雞翼(HKD78/3隻)。食雞翼尖嘅時候可能你會笑一聲點解咁都要挑戰,但係一食到中翼嗰度,辣到小編差啲飆眼淚,不過用芥茉醃過嘅雞肉堅係滑。 唔好話小編唔提你,去西班牙唔食醃菜就好似食炸雞走皮一樣咁失色。西班牙人好鍾意飲兩杯配多款小碟醃菜,如果點任何一枝紅酒或白酒(HKD398-1588)就會附送西班牙拼盤一份。以前小編諗油浸嘅肉一定食到成口油,今次發現原來口感係0油㗎!餐廳自家浸嘅沙丁魚係小編食過之中最滑嘅一次,如果連食10條都願意呀!另外,浸蕃茄、浸橄欖、藍芝士配多士都一樣好夾。 登登登登!最震撼嘅海鮮蛋餅飯(HKD238)出場啦!一上枱小編嘩咗聲,因為靚到成個蛋糕咁。蛋餅飯都係西班牙必食菜式之一,為咗令口感層次更豐富,喺薯仔、洋蔥同蛋嘅傳統餡料之中,再加入煙肉、蘑菇、芝士同飯。蛋皮煎到金黃香口,再淋上由3種芝士調成嘅微鹹醬汁,配埋海鮮,出奇地唔會勁重味,切開蛋餅仲見到裡面一層層添,口感好分明。 食完可以問下大廚咩名,因為再去食可以預約返同一位大廚再為你效勞添。   La Postre 電話:2668 5802 地址:上環永樂街50號昌盛大廈3樓 營業時間:星期一至日:12:00-23:00

0

【食得又影得 多國美食走唔甩 】 Gees Restaurant & Bar

有時去到某啲酒店餐廳往往比人一種好拘謹嘅感覺,小編就鍾意去上環依間Gees Restaurant & Bar餐廳,呢度地下係Bar,樓上就係餐廳。 一上到閣樓就見到鹿頭掛飾,再襯埋仿火爐設計嘅壁爐,感覺好現代歐陸風格,簡單顏色配搭帶出咗和諧寧靜嘅氛圍。 餐廳座位都比較寬敞,私隱度較高,另外設有貴賓角落,同三五知己係度聚一聚真係好似匿咗入房咁呀,夠HKD6,000仲可以包場添。 頭盤樣樣都令小編心心眼,Cajun Scallop Cocktail(HKD128)靚到好似迷你花園咁,色彩豐富極度吸睛!帶子揀選接近頂級嘅美國U10級別,兩大粒爽口香滑嘅帶子,配沙律菜、提子同自家秘製酸甜汁,醒神開胃。 “Gees” Carb Cake(HKD138)喺呢度招牌菜一定要食先啦,成個蟹餅有8成都係珍寶級蟹冧肉,加埋秘製醬汁,啖啖蟹肉,食到停唔到口。 主菜Iberico Pork Chop(HKD268)除咗頂頭個兩粒原粒荔枝之外,仲釀埋入西班牙黑毛豬豬扒裡面,一陣陣果香味係豬肉滲出,外層焦香,入面肉質juicy,比人一種好清新感覺。 至於魚扒小編最鍾意大大件又厚肉,Gees嘅亞拉斯加Black Cod(HKD288)係大大件呈獻㗎,魚扒用白麵豉汁醃製,肉質厚實嫩滑,魚皮仲煎到甘香可口。泡沬白麵豉忌廉汁滲埋落大菇同薯蓉,令味道更上一層樓。 飯後甜品係必須嘅,Banoffee Pie(HKD78)拖肥餅底配上燒新鮮香蕉,上面嘅mousse非常之滑,入口即溶,食完都唔會覺得滯。 Gees Restaurant & Bar 電話:2547 3832 地址:上環皇后大道西77-91號荷李活中心地下及閣樓  營業時間:星期一至六:12:00-14:30,18:00-23:00