Tagged: 80後

0

【80後咖啡師開店 首創人氣黑糖珍奶x咖啡】品茶弄啡

「黑糖」、「珍珠」、「鮮奶」近呢幾個月呢三個字不斷出現,開始聽厭未呢?過江龍講得多喇,今次等小編介紹吓本地薑啦,呢間新開嘅土炮茶飲品茶弄啡一啲都唔失禮㗎!三位老闆話開業前最困難嘅準備係去台灣茶園挑選茶葉,一日試成百種茶葉,試到嘴都「Wear」埋!最後揀咗一個台灣茶莊嘅茶,試勻咁多,有冇一套試茶準則?「冇㗎,都係靠自己嘅味覺,揀咗我哋認為最順口嗰幾種,咁結果好彩大家都好鍾意!」。三位拍檔每人有唔同角色,阿澤係咖啡師;Joe就負責構思飲品Menu、配方同店舖Design;而Raymond就主要負責對外宣傳。 阿澤本身係咖啡師,喺本地連鎖咖啡店打滾咗7、8年,對咖啡、飲品沖調非常有興趣,佢一直好想喺香港開一間Café,不過奈何資金有限,想喺寸金尺土嘅香港地,提供一個地方俾大家舒舒服服歎返杯咖啡並唔係咁容易。適逢呢一年台式飲品喺香港大行其道,所以阿澤決定同朋友合夥開舖,決定脫離連鎖店,自己闖世界。 雖然現實環境所限,並未令佢開到自己夢想中嘅Café,不過佢亦私心地喺舖頭留咗一個小小嘅Coffee Corner,俾鍾意飲咖啡嘅客人可以喺小角落慢慢歎一杯咖啡。除咗傳統嘅Latte、Mocha之外,佢哋嘅手沖咖啡(HKD65)同玫瑰鮮奶咖啡(HKD34)都相當受歡迎。大家亦開始理解到佢哋嘅舖頭除咗賣台式飲品之外仲有賣咖啡,喺香港算係比較少見。 小編飲過阿澤推介嘅手沖咖啡,精品咖啡豆係即磨,雖然冇加任何奶精或鮮奶,但完全冇飲茶餐廳齋啡嗰種令人皺眉嘅味道。淡淡嘅酸同埋咖啡嘅甘香混和,醒神得嚟又唔會飲到口寡寡! 雖然話就話開台式飲品店,但阿澤不忘自己嘅專業,招牌飲品之一就係黑糖珍珠鮮奶咖啡(HKD34)喇!將時下最受歡迎嘅黑糖珍奶Mix最拿手嘅咖啡,可以保留自己嘅興趣,又為客人帶嚟新鮮感,小編欣賞呢份勇敢同堅持呀! 黑糖全部都係每日新鮮手炒,因為小店空間唔多,唔可以一次過煮好多,每日要視乎銷量而煮幾多,所以大家食到、飲到嘅一定係新鮮製作嘅真.手炒黑糖! 除咗熱爆嘅黑糖珍奶,仲有新興嘅「願望茶」。願望茶其實係奶蓋茶,不過落單時大家可以諗定一個問題或者願望,然後交俾店員。「願望茶大神」就會俾一個答覆你,感覺都幾得意喎!小編即場試玩,問咗句相信好多單身女性都好關心嘅問題:「我將來嘅另一半靚唔靚仔?」答案出嚟係…… 小編覺得值得推介嘅除咗黑糖珍奶咖啡之外,呢杯台灣蜜芋頭鮮奶(HKD34/L)亦相當有水準,雖然小編覺得同台灣地道嘅芋頭鮮奶感覺唔一樣,除咗飲到低層攪到爛晒嘅芋頭蓉鮮奶之外,面層其實仲有一大堆超軟滑芋頭蓉粒粒。雖然飲落有啲飽肚,但小編唔經唔覺都飲晒成杯!芋頭控千祈咪錯過! 品茶弄啡 地址:尖沙咀漢口道19-21號漢宜大廈地下H號舖 電話:2338 0138 營業時間:08:30-23:00  

0

【夏天消暑打卡名單 必食8大日韓泰冰品】想甜嚐甜、Yadllie Plate、青花

熱辣辣夏天,唔食返吓啲冰品透心涼點得呀?小編今次就推介8款分屬日韓泰嘅特色冰品,消暑之餘又可以打個靚卡,認住佢哋呀! 日式冰品 講起日式冰品呢,大家可能會諗起卡通片成日見到嘅草莓刨冰,即係一大杯冰再喺表面淋上草莓醬汁,諗起都流口水呀!呢個同樣充滿日本風情嘅荔枝玫瑰花之水滴(HKD56),個名改得咁唯美,之唔係日本好hit嘅水玄餅囉!睇見都透心涼呀!老闆話要做到晶瑩剔透都下過唔少工夫㗎!見到成碟藝術品咁真係唔捨得食呀! 夏天唔少得食雪糕,倒轉乳酪雪糕每隔1-2個月就會轉口味,keep住帶新鮮感俾大家,今次係菠蘿口味,好fresh呀!每款口味都由老闆親自製作,絕對只此一家!另外亦有好少見嘅榴槤心太軟-榴槤嚐甜配乳酪雪糕(HKD52),用嘅係D24靚榴槤,流出嚟嘅榴槤流心完全俘虜榴槤控呀! 除咗適合一眾「榴槤痴」嘅D24榴槤嚐甜之外,阿華田心太軟(HKD52)同埋紫心甜薯(HKD50)都好正㗎!阿華田味超濃郁,細個嘅感覺返晒嚟呀!唔知遲啲會唔會有埋好立克味呢?話晒阿華田同好立克都係好朋友嚟㗎嘛;另外紫薯心太軟亦相當唔錯,紫薯粒粒軟硬適中,甜得嚟好fresh,適合唔鍾意食太甜嘅朋友呀! 呢間甜品店由80後店主Elvis一手包辦,由研究新款式、製作甜品到收銀執枱佢都親力親為,舖頭細細但每一個細節都睇得出佢熱愛自己嘅工作,餐具、紙巾同擺設都毫不馬虎㗎,連舖頭design都自己包辦埋,超勁呀!Elvis話自己原本只係一個返朝9晚5嘅文員仔,有一日忽發奇想要開間舖,然後就著手準備。「想做就做」唔係咁易㗎,見佢做到自己熱愛嘅事,小編覺得好熱血呀!大家經過不妨幫襯吓喇! 想甜嚐甜 地址:黃大仙蒲崗村道73號富佑大廈地舖 電話:3956 4744 營業時間:星期一至日:13:00-00:00   韓系冰品 韓式甜品大家會諗起咩呢?小編第一時間諗起曾經喺韓國明洞食過嘅韓式黏糕雪冰(HKD68)喇!黏糕嘅質感有啲似平時食開嘅麻糬咁,不過就再煙韌啲同埋有咬口啲,另外鋪喺面嘅黃豆粉同埋少少焦糖醬,忍唔住食完一啖又一啖嘅邪惡冰品呀! 呢款草莓雪冰(HKD68)真係分量十足呀!士多啤梨鋪滿咗成個刨冰,好豪爽呀!望落都已經覺得好fresh喇!士多啤梨食落口一啲都唔酸,啖啖刨冰都食到士多啤梨肉,好幸福呀! 小編偷偷哋話你哋知……其實呢度嘅炸雞同埋豬肋排都好好食㗎,大家下次可以喺呢度食完正餐再試埋呢兩個韓式冰品,咁就夠晒圓滿啦! Yadllie Plate 地址:旺角西洋菜街1號兆萬中心11樓 電話:2360 0233 營業時間:星期一至日: 17:00-00:00   泰潮冰品 講到泰式甜品又點可以冇芒果糯米飯呢?不過呢度嘅芒果糯米飯(HKD78)加咗蝶豆花,所以係藍色㗎!雖然食落就同普通糯米嘅味道一樣,但係賣相就夠晒特別喇!另外芒果亦切得非常薄片,一嚿芒果配一啖糯米飯,加埋秘製嘅椰漿,泰式風味真係爆晒出嚟呀!仲用咗風乾嘅椰子脆脆伴碟,香口得嚟好清新,正! 除咗傳統泰式甜品,作為一間講究食物藝術嘅餐廳,亦推出咗比較創新嘅甜品-焦糖爆谷花生芭菲(HKD58)。面頭嗰啲唔係棉花糖,竟然係龍鬚糖呀!夢幻得嚟好特別呀!甜甜嘅龍鬚糖夾埋花生芭菲食超match!忍唔住一啖啖咁食到停唔到口,呢個新派泰式甜品掂呀! 除咗甜品耍家之外,佢哋啲泰菜都好正㗎,大家下次去試嘅時候可以食埋飯慢慢歎甜品,正呀! 青花 地址:旺角奶路臣街17號The Forest 1樓107-108號舖 電話:3468 2558...

0

【80後組隊開拉麵店圓夢 堅持自家製唔用現成貨】團日式拉麵

近年荃灣愈開愈多小店,競爭都幾大㗎!今日小編就去到一間由一班80後開嘅團日式拉麵,麵店雖小但五臟俱全!位置喺正楊屋道街市同Citywalk附近,人流都幾多㗎! 門口放咗一張長櫈俾客人等位用,隔離就係一部自助點餐機,完全仿效日本拉麵小店嘅做法,自助點麵機喺日本就見得多,今次都係小編第一次喺香港見到呢款機咋,都幾得意吖。 雖然係小店,但佢哋對自家拉麵嘅要求都好高㗎!事關小編同負責人閒談間講到,小店目前仲未定到邊日先係休息日,即係話樓面同廚房喺開業呢個幾月嚟完全冇放過假!太誇張了吧,聽到小編都嚇咗嚇,但望住廚房哥哥們喺連續一個月冇休假之下,竟然冇乜疲態?見到佢哋精神滿滿,盡心盡力做好每一碗麵嘅熱血模樣,小編真的滾動了……一問之下,原來冇時間休息同佢哋希望保持食物同服務質素有關,負責人話佢哋唔想請外人幫忙,樣樣都親力親為,一班大男孩目標一致咁為拉麵店仆心仆命真係超,熱,血,呀! 豬骨湯底每日新鮮熬製,一熬就要熬十個鐘,都咪話唔辛苦呀!所有配料例如炸蒜呀、櫻花蝦呀都係經自家調味同炒製而唔係用現成,每一樣都咁花時間同工夫。另外,店舖嘅拉麵有分直麵同曲麵,客人可隨喜好選擇。 櫻花蝦拉麵(HKD88)有海量嘅櫻花蝦,望到流口水喇,豚肉非常腍,入口幾乎唔使咬就溶喺口咁滯。湯底濃郁順喉,真係冇味精喎,至少小編冇食兩啖麵飲一啖水解渴先啦。呢個湯直頭係好飲㗎,可以好似日本人咁飲晒啲湯呢!小店人手有限,都堅持用真材實料熬湯,呢份堅持小編超欣賞呀! 黑蒜油拉麵(HKD83),同頭先碗櫻花蝦拉麵一樣,賣相好吸引,上至豚肉下至蔥花同埋紫菜嘅擺位都好講究,一啲都唔hea!黑蒜油嘅香味將濃郁嘅豬骨湯底變得更有層次,唔經唔覺飲晒碗湯!老闆仲話呢間舖就好似佢哋嘅親生仔咁,大家都自動波咁去做,目標又超一致。唔怪得今次小試牛刀就贏得大家嘅肯定啦! 差啲漏咗要頒一個「最佳配角獎」俾溏心蛋添!以一碗好嘅拉麵嚟講,如果湯底係驅幹、麵底係四肢,咁溏心蛋就應該係眼睛喇,畫龍點睛個睛呀!老闆話:「啲蛋我哋都唔係用現成㗎,係每日新鮮整,全人手剝殼,每日淨係剝蛋殼都要2-3個鐘呀,我哋廚房就淨係得2個人,所以真係好忙㗎,忙到成個月都冇真正嘅落場時間,每日都係12點開舖到夜晚10點收舖咁囉。」上至湯底下至一粒蛋都咁執著!大家下次去幫襯嘅時候真係要嗒真啲,「粒粒皆辛苦」㗎! 由於小店暫時未有水吧,所以賣嘅主要係一啲比較特色嘅日本牌子飲品,其中上圖有招財貓同埋不倒翁嘅飲品,飲完仲可以攞個樽嚟寫願望許願添!幾特別喎! 除咗以上介紹嘅兩種口味拉麵,仲有魚介拉麵(HKD80)同辛味拉麵(HKD85)!小編一路睇住製作過程,淥個麵、潷個湯、甚至灑個蔥花都好細心咁將每一個步驟做得完美。嗱,真係唔係賣廣告,小編見到碗麵上枱嘅時候,都深深感受到老闆們嘅熱血。呢班80後開店圓夢仲咁有熱誠,希望真係有發展空間啦,唔通真係開到周街都係「X千拉麵」好咩? 團日式拉麵 地址:荃灣大屋街18號金豐閣地下 電話:2488 2322 營業時間:星期一至日:12:00-15:30;18:00-22:30(詳情留意Facebook)