Tagged: A5和牛

0

【米芝蓮名店日山壽喜燒襲港 專人炮製A5黑毛和牛】日山壽喜燒

連續11年獲得日本東京米芝蓮、人氣爆燈嘅日山壽喜燒終於嚟到香港喇!進駐尖沙咀海港城嘅新店面向維港無敵大海景,由專人為你炮製高級嘅日本A5黑毛和牛壽喜燒同涮涮鍋。所用嘅和牛係由「日山」百年品牌嚴選出嚟,再配合正宗嘅壽喜燒或Shabu Shabu食法,自然食得滋味又奢華啦,即刻睇吓國寶級和牛有幾正先! 以大自然做主題嘅新店,一行入去會先經過竹林長廊,日式庭園風嘅裝潢夠晒舒適;仲有落地玻璃可以180度睇到維港無敵海景添!喺度邊食邊欣賞維港海景,簡直係一大享受呀! 現時以套餐供應嘅壽喜燒同涮涮鍋都分別有松、竹、梅三個等級,三個套餐所選用嘅牛肉同部位都各有不同。而呢款「日山 · 竹」套餐(HKD688/一位用)可以揀壽喜燒或涮涮鍋食法,仲包括三款前菜、壽司、蔬菜、牛肉或豬肉、飯或烏冬同埋甜品。 先睇吓套餐入面嘅前菜先啦!頭盤有和牛筋煮凍(右上)、薄燒和牛卷(中)以及日式蝦沙律(左上)。當中用咗日山傳統秘方製成嘅和牛筋煮凍就夠晒特別,以和牛清湯凝固成透明嘅和牛凍,裡面夾雜和牛牛筋,入口滑溜又有咬口。 套餐配有A5和牛壽司三點盛,三款壽司都以肉質柔軟嘅A5和牛片做主題,分別加上海膽、酸汁辣蘿蔔同三文魚籽,令和牛刺身壽司帶出唔同風味。 另外,仲有沖繩黑毛豚肉溫野菜作為小菜俾你歎,特別配上淡黃色嘅日本茄子,feel到小菜都有用心設計呀! 日山嘅黑毛和牛主要來自青森、岩手同山形縣,餐廳會按時節轉用唔同縣嘅出產,今次「日山 · 竹」套餐所用嘅A5黑毛和牛西冷部位就來自岩手縣。而壽喜燒嘅蔬菜五品盛同涮涮鍋嘅都有唔同,呢款跟壽喜燒嘅就有洋蔥大蔥、水菜、冬菇、蒟蒻麵同豆腐。 見到咁多配料無從入手?唔緊要,每枱都會有專人為你炮製㗎。呢位由日山本店遠赴而來嘅「女將」以傳統手法煮壽喜燒,先加入由日山本店直送嘅壽喜燒醬油,再酌量加入清水,放上蔬菜,再煮牛肉,手法純熟。 以壽喜燒醬汁煮成嘅A5黑毛和牛牛味濃郁,油脂豐富,蘸上蛋汁一齊食就更滋味滑溜喇! 涮涮鍋就以清甜嘅昆布木魚湯作為湯底,放入牛肉大約淥4-5下就食得,呢個配搭比較原汁原味,另外亦附有芝麻醬同酸汁俾你蘸。 套餐有得揀配飯或烏冬,但兩款亦一啲都唔hea,有晒配料㗎!是日精選嘅飯係京都栗子飯;而烏冬就暫時都係呢款和牛牛腱濃湯烏冬。 最後食埋甜品就圓滿喇!套餐甜品都係是日精選嘅,今次呢款就係流心抹茶撻配雲呢拿雪糕。抹茶味濃郁甘甜,口感有啲似芝士蛋糕,連埋焦糖碎同朱古力碎一齊食,味道同口感就更加有層次。   日山壽喜燒 Hiyama 地址:尖沙咀廣東道3-27號海港城海運大廈3樓OTE302號舖 電話:2885 3203 營業時間:星期一至日:11:30-15:00、18:00-23:00

0

【周董加持現身火鍋店 中西日式湯底×手工麵】J POT by Gosango

周杰倫因咩事現身銅鑼灣?原來佢朋友以音樂為題嘅火鍋店J POT by Gosango開業。餐廳設計充滿音樂感之外,食物都夠晒創新!唔止將西餐Tasting Menu嘅設計融入火鍋之中,又有中西日式fusion火鍋湯底、手製意粉同意式雲吞火鍋料添,即刻睇吓有幾正啦! 老闆同周董有幾熟?熟到本尊親身撐場之餘,仲話遲啲會喺度搞簽名會添,粉絲們可以期待吓喇! 餐廳環境都幾大,容納到過百人㗎。黑白色相間嘅梳化就好似鋼琴琴鍵咁,仲有舞台燈光,夠晒型呀! 呢個Tasting Menu(HKD498/位)明明係邊爐,但就有齊頭盤意式海鮮薄片、小食拼盤、主菜同甜品拼盤;四款主菜之中,有三款和牛嘅A5和牛拼盤貨源仲嚟自日本最TOP嘅肉類供應商「日山」,佢同J POT仲簽咗香港專利,供應多種部位嘅和牛添;又有本地海鮮拼盤等食物。一個套餐食盡高質和牛、海鮮兼多款火鍋配料,仲好似西餐咁逐樣上,都咪話唔爽! Tasting Menu本身跟咗和牛清湯或法式海鮮湯,想再特別啲仲有三款特選湯底(另加HKD198)。先睇呢款人氣之選滋補花膠湯,大大片花膠喺湯底幾清香,用意大利巴馬火腿代替味道較濃嘅金華火腿,再配埋自家製蜆肉魚湯,真係啖啖精華呀! 松茸野菌雞湯用自家熬煮嘅松茸野菌清湯做底,又可以補氣又加強免疫力,啱晒忙碌嘅香港人囉。 仲有突破傳統風味嘅海膽麵豉湯,湯底用蜆肉昆布高煮成,再落新鮮海膽、蘿白蓉同少量白味噌,咁鮮味嘅配搭仲唔係為海膽迷而設?! 呢度連響鈴都唔簡單㗎!脆炸和牛響鈴(HKD78)係其中一款餐廳自創嘅食材。 打邊爐梗係要食埋麵先夠滿足!餐廳其中一個特色係有8款自家製手工麵(HKD58/款)打邊爐,同埋4款意式雲吞(HKD58起),多到小編唔知點揀好呀!   J POT by Gosango 地址:銅鑼灣謝斐道535號 Tower 535 1樓 電話:2885 0533 營業時間:星期一至五:18:00-00:00 (最後落單:23:00),星期六、日:11:30-15:00(最後落單:14:30)、18:00-00:00(最後落單:23:00)

0

【鐵板燒全新OMAKASE餐單 A5和牛配極尚海鮮】Ukiyo 世

雖然仲係年頭,但都想食餐好獎勵自己。小編推介大家試試銅鑼灣Ukiyo世嘅全新廚師發辦menu。雖然價錢稍貴,但絕對值回票價,因為依家用上多款海鮮同A5和牛,即刻睇吓點正法啦! 餐廳位於時代廣場對面嘅OLIV,就腳得嚟環境好似去咗中環咁。想食正嘅Fine Dine?以後多一個選擇啦。 全新嘅OMAKASE MENU(HKD1680/位)總共有9道菜,每款菜式選用嘅食材都由主廚Gary按季節精挑細選。重點菜式有咩?呢道北海道海膽多士,有超多新鮮肥美嘅海膽,味道鮮甜甘香。鋪埋魚子醬同金箔喺面,睇落氣派又奢華,入口層次都好豐富,正! 另外,甘鯛魚配南瓜汁係令人眼前一亮嘅清新開胃菜。甘鯛魚喺日本有「萬魚之王」嘅稱號,相當矜貴㗎!呢種魚口感好嫩滑彈牙,味道鮮甜。面頭鋪上炸成脆片嘅魚鱗,令菜式更加精緻,同時口感層次更加多變化。配埋香濃幼滑嘅忌廉南瓜汁,真係心機菜嚟。 仲有活龍蝦配海膽忌廉汁,用上厚肉又彈牙嘅新鮮深海龍蝦,配秘製海膽忌廉汁,啖啖龍蝦肉都俾海膽嘅精華包住,好鮮味呀!將伴碟嘅法國炸麵餅點埋海膽汁,惹味到唔想停口囉。 主菜之一有西班牙紅蝦意粉,承接海鮮嘅味道。將多膏嘅紅蝦頭壓碎,配鮮蕃茄熬煮成濃厚精華湯底,然後加入煮到半熟嘅紅蝦身同意大利麵一齊烹調,令成道菜都充斥紅蝦嘅精華。 到食肉獸大愛嘅特選日本宮崎A5和牛牛柳,油脂分佈細緻,入口即溶到爆發心心眼!配埋即磨山葵、鹽漬昆布同岩鹽,一道菜試到幾種風味添。 作為一餐嘅結尾,呢個顏色超sharp嘅焦糖蘋果應該滿足到大家。以焦糖慕絲同海綿蛋糕包住青蘋果啫喱,底層係黑朱古力脆脆,酸甜味道交替衝擊勁正!小編覺得大家budget夠,絕對可以一試當犒賞自己囉。   Ukiyo 世 地址:銅鑼灣霎東街 15 號 OLIV 18 樓 電話:2152 8880 營業時間:星期一至日: 12:00-15:00;18:00-23:00

0

【全港首間立食燒肉店 超抵價食日本A5靚和牛】阿久根和牛立燒店

喺日本搵食,相信大家都試過立食乜乜乜,壽司食得多甚至立食燒肉都開始興起! 依家連香港都有首間立食燒肉店喇,就係旺角新開嘅阿久根和牛立燒店,主打食日本和牛,店內環境闊落舒適,就算企喺度食都唔會覺得擠逼,而且油煙味唔重,唔怕食到成身燒烤味喇! 唔好以為食和牛價錢一定好貴喎,呢度最平12蚊就可以食到一塊日本和牛,抵到爆!靚和牛其實唔使燒好耐就食得,真係啱晒企喺度食,加上香港人生活節奏咁快,立食燒肉就快靚正啦! 除咗單點,當然仲有定食選擇啦! 和牛胸腹肉定食(HKD98/5pcs)包前菜、麵豉湯同米飯,牛肉由廚師發辦,會喺上下前中後胸腹肉中取其中一款。 當日小編食嘅後胸腹肉,雪花睇落非常均勻。太多選擇唔知揀咩牛食?師傅建議可以由胸腹肉食起,口感偏腍身,牛味仲好濃郁!食完胸腹肉,下一款就可以食埋唔同部位。 上至下:前胸部(HKD22),後腿肌(HKD18),三角肋肉(HKD20)同肩胛(HKD20)。食完先知牛可以有咁多變化,唔同部位都會有唔同嘅層次同口感,下次食牛唔使淨係叫西冷同肉眼啦,其他部位一樣咁好食㗎! 呢四款入面,小編覺得肩胛肉最特別,因為肩胛位平時郁動得最多,肌肉發達,夠好肉又有韌勁。 和牛款式多之餘,連調味料都有好多選擇,除咗有一般嘅柚子鹽或者白松岩鹽,仲有唔同嘅辣粉挑戰:左起:海鮮味辣粉,蒜蓉味辣粉同十萬度辣粉。小編試咗少少十萬度辣粉,開頭食落去冇咩感覺,點知隔咗3、4秒就開始嚟料,後勁超強,真係唔嘢少呀!唔怕辣仲可以挑戰埋一百萬度辣椒油(右),小編唔敢挑戰喇,等你哋報告啦! A5和牛刺身(HKD38/推廣價),勁抵呀,唔係講笑,三十零蚊就食到A5和牛刺身! 師傅即時手切新鮮和牛刺身,淋上柚子豉油、洋蔥絲、蔥絲同薑絲等,一啖放晒落口,口感極之軟滑,牛味又濃,真係食過返尋味呀! 除咗可以立食平價靚貨燒肉,餐廳喺星期五、六有時仲會有突擊進行嘅和牛拍賣,以100蚊起跳,拍賣一塊250-300g嘅和牛,價高者得。想食又想玩,記得去體驗吓啦!   阿久根和牛立燒店 地址:旺角白布街2-24號藝興大廈8號舖 電話:2697 6988 營業時間:星期一至四及星期日:18:00-01:00;星期五至六:17:30-02:00