Tagged: beer

0

【元朗熱爆船麵日賣三百幾碗 足料牛骨湯底香到暈】阿叔泰麵

最近喺元朗人氣急升,牛骨湯船麵紅到賣斷市,要休店三日調整供應量嘅阿叔泰麵依家專注於船麵款,慢慢先再推出其他麵類。點解揀做船麵?負責人之一倫哥就話:「大廚阿揚去泰國學廚半年,加上太太係泰國人,識整家庭船麵,設計menu嘅時候俾咗好多意見我哋。所以九成食材都搵到泰國當地嘅靚貨源。」。不過點解唔揀元朗市中心啲嘅位置開舖呢?「我哋都想吸引其他區嘅客入嚟試,冇咁近市中心反而方便啲人泊車。其實冇諗到咁多人支持,重開之後試過一日賣三百幾碗,係之前嘅double。」連泊車位都考慮埋,咁裝修同食物更加以客為先啦! 呢度冇收加一,幾抵食。不過想抵食又抵飲可以Like & Share阿叔泰麵嘅Facebook,攞埋杯贈飲。 既然船麵係牛骨湯底,咁就先試牛肉船麵(HKD58)。湯底除咗用大量牛骨煲12個鐘之外,仲加入八角同冰糖等材料,唔怪得未食已經聞到陣香氣,味道層次仲幾豐富添。有3件厚切牛腩粒、3粒牛丸、炸豬皮同通菜,都幾多料。牛腩粒真係好正,炆得腍又仍然有咬口,仲幾有肉香添。夾埋濃味得嚟又唔會過鹹嘅湯底,係perfect match呀!麵就有四款,米粉、金邊粉、泰式河粉同粉絲,全部都係泰國當地食材嚟㗎!呢款粗河粉好滑嘟嘟,厚度係港式炒河粉同幼河粉之間,都唔錯,而且夾咗幾次影相都唔會爛到碎濕濕。碗麵做返港人正常食一碗嘅分量,女仔食可能會飽啲啲添。 有牛就有豬,豬肉船麵(HKD52)都幾多人食,同牛肉船麵嘅分別就係轉用豬肉片同豬肉丸。豬肉片都幾大片,不過肉丸質感就冇牛丸咁彈牙,不過呢個麵冇肥肉,感覺冇咁滯。泰式米粉好幼身,而且唔會浸到發脹,由開始食到尾口感都唔會點變㗎。 泰式牛扒沙律(HKD52)雖然係凍食,但牛扒依然嫩滑有肉汁喎,仲有啲爽口筋腱位,質感唔錯。呢款喺餐牌上有2隻辣椒,如果食到譚仔三少辣嘅朋友會覺得呢份都有啲辣,不過接受到嘅。 抵食推介要數3式雞翼拼盤(HKD58),有齊酸辣凍雞翼、香茅魚露雞翼、紅咖喱雞翼一共9隻。Size正常,唔係特別細嗰啲喎。雖然呢三款個名好似重口味咁,但其實調味都算啱啱好。 想飲嘢不妨試吓香茅斑蘭特飲(HKD24),飲完感覺喉嚨好fresh,香茅同斑蘭味道又融合到。想啤一啤亦得,有象啤(HKD22)、勝獅啤(HKD25)同豹王啤(HKD22)。   阿叔泰麵地址:元朗西菁街20號益輝大廈地下3號舖電話:2887 3269營業時間:星期一至五:11:30-15:30,17:30-22:00;星期六、日公假假期:11:30-22:00

0

【飲飽食醉西式啤酒宴 沙律薄餅甜品加料手工啤】掌門精釀啤酒

掌門精釀啤酒係台灣幾出名嘅手工啤酒品牌,香港店嘅酒都由台灣運嚟以保持一致品質。繼尖沙咀店之後,上月喺西營盤開分店,用酒煮嘅菜式多咗,星期六、日仲有Brunch食添,等小編帶大家睇吓新店有咩好食啦! 餐廳位置喺西營盤高街小斜坡之上,餐廳環境就好開揚。 沙律都可以落酒?掌門四款沙律之中有兩款加咗酒,火箭菜意大利火腿無花果沙律(HKD108)仲係廚師推介添!廚師喺沙律汁落咗精釀啤酒「酸酸」,酒味比較薄,但味道酸啲,撈埋新鮮嘅無花果、火箭菜、Parma Ham好開胃又夠fresh!最鍾意佢加埋核桃,有咬口,感覺更加健康。 意式辣肉腸薄餅(HKD118)喺搓薄餅底嘅時候以招牌精釀啤酒「55%小麥」代替水,令薄餅口感煙韌啲,不過一樣焗得好香脆。餅底搓得算薄,意式辣肉腸同車打芝士海量式鋪滿喺面,食肉獸最愛呀! 海鮮意粉(HKD148),大廚喺炒意粉時,加入以大量美式啤酒花為風味特色的暢銷酒款「柒拾肆-加強版」,務求強調香氣,襯托海鮮鮮美。 安安檸檬芝士蛋糕(HKD58)用咗啤酒花能增加果香,質地好順滑同厚實。芝士味同檸檬味都好出,配埋雲尼拿果仁有多重享受添。 試完用酒煮嘅菜,輪到新店星期六、日嘅Brunch喇,一樣好足料囉!三杯雞多士盒(HKD78)外形有啲似台灣小食「棺材板」。嫩滑嘅雞髀肉用薑片、蒜頭、辣椒同葱爆香,惹味又有少少辣,再回鍋落埋「三杯」,即係黑麻油、生抽、老抽同冰糖一齊炒。收乾之後再加埋九層塔,肉有少少焦又好鬼香。不過最點睛係溫泉蛋喇!篤爆佢,將蛋汁同雞肉撈勻更香滑。加埋即烘脆口多士盒,真係飽到上心口。 仲有將蛋漿加入蘑菇、雞肉粒、薯仔粒、紅椒、青椒、菜同肉腸,煎成厚厚嘅香腸淡色艾爾意大利蛋餅(HKD68)。口感好豐富,因為落咗勁多料。蛋餅煎到啱啱好,仲有啲蛋汁添。 當然要飲杯酒落肚啦,新款Cocktail之中,小編幾鍾意狂野烏梅(左:HKD68/杯)。以味道辛辣嘅Tequila龍舌蘭酒同Cherry Brandy櫻桃白蘭地做基酒,加上重口味的烏梅汁同清新嘅青檸汁。入口即刻feel到酒精濃度高,酸中帶甜都啱夜晚飲。 仲有炭燒西柚(中:HKD68/杯),相比之下感覺好清爽,lunch飲都好舒服。以Gin酒做基酒,簡單配上西柚汁同炭燒烏龍茶,口感順滑,同時加入西柚粉紅色糖漿都唔會覺得甜,反而餘韻有種果茶嘅香氣添。 如果都係鍾意啤酒,大吉大利(右:HKD49/250ml)都唔錯,以科隆Kolsch啤酒加入大量新鮮金桔製成,因為「吉」同「桔」係同音字,所以攞個好意頭叫做「大吉大利」。味道清新但有啲酸甜果香,反而冇咩啤酒花嘅苦味。   掌門精釀啤酒 地址:西環西營盤高街53-65號地下富裕大廈地庫 電話:2650 0511 營業時間:星期一至日:12:00-23:00

0

【紐約最紅漢堡店襲港 中環Chill住食包歎生啤】SHAKE SHACK

喺香港講起食漢堡包,我諗大家第一時間都會諗起親愛的老麥,不過如果你喺紐約嘅大街問途人,最具代表性嘅Burger shop就好大機會係SHAKE SHACK喇;而SHAKE SHACK喺5月1號就正式登陸中環ifc喇!小編當然要去試吓係咪真係咁有料到啦,話晒過江龍嘛! 客人點餐後可以選擇喺室內或者室外嘅平台花園用餐,環境真係唔錯㗎!食住burger歎杯生啤都咪話唔chill呀 ! 呢度嘅飲品除咗老少咸宜嘅奶昔之外,仲有多款香港牌子嘅生啤,當然唔少得佢哋招牌嘅Shack Meister Ale(HKD68)啦,帶有清新花香味,女仔飲啱晒! 主打梗係漢堡包啦,Shroom Buger(HKD66)將原隻大啡菇鮮炸,再夾埋生菜、蕃茄同秘製嘅Shack Sauce,一啖咬落去仲有芝士爆出嚟,超有驚喜呀!呢款係無肉漢堡,素食者都啱呀! Chick’n Shack(HKD56),呢款雞肉漢堡強調用100%純天然嘅走地雞,保證絕對不含激素同抗生素咁話喎,聽落都食得放心!雞肉炸完之後依然好juicy,鍾意食雞嘅朋友一試無妨呀! 嚟到Shake Shack當然非試不可佢哋最招牌嘅ShackBurger(HKD50/single beef)啦!夾喺中間嘅牛肉係100%全天然嘅安格斯牛,同雞肉漢堡一樣保證絕對冇加激素同抗生素。生菜、蕃茄加埋芝士嘅牛肉咬落超juicy,而且牛味十足,唔會好似平價快餐店賣嗰種紙皮咁嘅所謂牛肉! 美式漢堡店當然有多款milkshake坐鎮啦,除咗普通口味嘅concrete之外,仲有主廚特別為香港設計嘅Milk Tea Shake(HKD42),呢款淨係得香港分店先有㗎咋,喺紐約總店都飲唔到㗎!呢杯奶茶味奶昔飲落唔會太甜,雖然茶味唔算好出,但係對香港人嚟講絕對親切、對遊客嚟講亦係好「香港」特色嘅milkshake!大家記得要試吓喇! SHAKE SHACK 地址:中環金融街8號國際金融中心商場四樓平台4018號舖 電話:2522 5611 營業時間:星期一至日:11:00-23:00

0

【隊完啤再歎 $288至抵食超巨龍蝦海鮮拼盤】H.OURS Bar & Restaurant

去酒吧當然想盡情啤一啤,但又想歎埋有水準嘅美食喎,想同時滿足晒呢啲要求?H.OURS Bar & Restaurant肯定係呢期最好選擇啦! 位於太子嘅H.OURS Bar & Restaurant,全場高身酒吧櫈設計,都算坐得幾舒服。每邊都設有電視,360°C零死角唔使就住就住。 嚟到梗係飲咗先講,Paulaner Draught Beer(HKD78/Normal),一大班人嘅話就可以叫Tower(HKD308/2L、HKD448/3L),係拜仁慕尼黑足球隊至愛嘅啤酒,每次贏波都係飲呢款酒慶祝㗎!去唔到現場睇球賽,都可以飲啖慰藉吓心靈嘅。 另外都有唔同食物俾你揀,冷盤小食推介巴馬火腿配哈蜜瓜(HKD98)。巴馬火腿揀選14-21個月之間嘅火腿,哈蜜瓜唔會太大粒,一啖啱啱好咬到。 至於重頭戲就係連海鮮都有得食,海鮮拼盤(HKD288配波士頓龍蝦 或 HKD258配麵包蟹)好適合情侶拍拖孖住歎。仲有青口、帶子刺身同翡翠螺配埋,呢個價錢算大件夾抵食啦。 炸物配啤酒一定唔少得嘅,炸脆香雞(HKD38/1件、HKD98/3件、HKD168/6件)有咖喱味同辛辣味。炸粉用咗泰國入口嘅材料,香料味唔會好重,落埋檸檬汁就無咁滯。 另外,Happy Hour時段16:00-20:00可以優惠價HKD160飲2杯啤酒配一款小食。趕唔到Happy Hour唔緊要,任何時段飲紅酒、白酒或大酒都會送一款小食㗎。   H.OURS Bar & Restaurant 地址:太子通菜街230E地下 電話:2381 1178 營業時間:星期一至日: 16:00-04:00

0

【認真!入到嚟最緊要Hea 家的感覺唔嚟過唔覺】Casa

香港人日做夜做,最大心願都係辛苦完一日有得舒舒服服咁抖返下。想無憂無慮咁hea返陣,去呢間位於西貢嘅Casa飲返杯,食返餐就一定啱晒你。”Casa”西班牙文解做「家」,佢地非常非常認真咁令你可以放輕鬆,出街去食餐飯都可以feel home! 餐廳用嘅檯凳都好講究舒適度,包保唔會坐到你周身唔舒服,大家仲可以喺入面行下、飲下、食下,總之你想點就點,開心舒服就得! 講到家,大家一定諗到家常菜,但係呢度嘅食物係包羅晒環球美食,不過用日式煮法送上,夠晒特別!呢個Tuna & Avocado (HKD100)就係日本墨西哥Fusion,吞拿魚用咗柚子醃製,配埋牛油果、蘿蔔同wasabi醬,入口清新口感又夠豐腴! 想食肉就一定要試Beef Tenderloin (HKD100)選用新西蘭牛肩脊,啖啖都彈牙又多肉汁,配埋wasabi辣辣地好惹味呀! 大阪燒小編就食得多,呢度嘅Okonomiyaki (HKD50)就好得意咁分開一件件咁上,入面有大量椰菜,蛋漿食落軟綿綿地唔油膩。上面再加埋蜜糖、燒汁、沙律醬同香蔥,味道香濃。 Casa 電話:5594 0007 地址:西貢海傍廣場1號兆日大廈地下1號舖 營業時間:星期一至日:10:00-00:00

0

【尋覓手工啤酒專家】Doodie Cafe Bar

手工啤酒喺香港愈黎愈盛行,無論係香港本土製造或是外國既傳統手工啤酒都有一班固定支持者。手工啤酒都用純正大麥小麥製造而成,味道非常濃郁,而且味道都具有創意;有見及此,小編明查暗訪,終於搵到一間係荃灣而手工啤酒同熱狗都出名既餐廳,同區黎講的確無咩同類型既餐廳,究竟佢係一間Bar定一間餐廳,等我看過究竟? 內裡裝潢格調充滿美式風格,無論係一個人或一大班人,都適合係依度風花雪月,把酒談天,甚至可以成為悠閒消磨時間既好地方。 由於依度出名手工啤酒,所以店主都會定期試不同國家不同類別既手工啤酒,希望藉著可以更新名單,讓顧客可以嘗試到唔同口味。 前排同後排來源都有所唔同,前排既全部都係香港手工啤酒,雖然質素未必有外國既咁穩定,但係勝在每款都有加入本土元素,令顧客飲落特別有親切感;而後排既就係老牌手工啤酒,品質有保證,由右到左,淡至濃既味道劃分,淡味既手工啤酒多啲顧客接受到,但如果係資深手工啤酒愛好者,就必揀老牌手工啤酒啦。 紅磚牆加上海報同其他擺設,的確令人感覺置身美國酒吧一樣。 熱狗配招牌松露醬(HKD78) 熱狗有塗上牛油輕微烘焗過,麵包內裡鬆軟,外層帶點香脆,再夾上一條鋪滿白色松露醬的大肉腸,腸上面有嫩滑炒蛋加上黑松露,因為有雙重松露 (白松露醬+黑松露),成個口感濃郁香滑,而且腸仔係選用酒店級既香草腸,絕對係鎮店之寶。 酥炸珍寶蘑菇配松露醬(HKD78) 送酒之選,本身磨菇沒有用太多調味料,加上炸漿係餐廳親手調配,食落去外脆內裡好juicy,而且加埋松露醬,味道更加有層次。 啤酒薯條(HKD78) 用啤酒整既薯條,既有啤酒香味,更可以令薯條脆身可口,再加上自家製煙燻醬,食到停唔到口。 呢系列係餐廳推出既外國手工啤酒,種類都唔同,仲有一款適合你心水。 Doodie Cafe Bar 地址:荃灣富華街9號運通洋樓地下 電話:2468 0110 營業時間:星期一至五: 16:00-02:00 星期六、日及公眾假期: 12:00-02:00