Tagged: burger

0

【灣仔新店手製漢堡配咖啡 泰式生菜包+三牛漢堡】Mad Burger

食漢堡包就要飲汽水?灣仔呢間新開嘅小店就話你知原來漢堡配咖啡都可以好夾㗎!Mad Burger主打創意特色漢堡,自家製嘅漢堡扒用咗三種牛肉mix出嚟,牛味突出。佢哋更自創出一款泰式肉碎生菜包漢堡,真係成個肉碎生菜包夾喺Burger入面,夠晒創新啦!除咗漢堡之外,佢哋將咖啡呢個元素配漢堡做pairing,唔知又會擦出啲咩火花呢? 呢間漢堡新店店面以白色水泥簡約設計,同外國啲小店一樣咁Chill呀!而呢度係以外賣生意為主,店內只有兩張Bar檯、幾個座位,但就少有地見到漢堡店有一部專業級嘅咖啡機坐鎮喎。 佢哋嘅Burger選擇唔算多,勝在款式夠特別,就連最Classic嘅Right Mad(HKD78)喺度都唔簡單㗎。入面嘅牛肉漢堡扒係自家製,由本地牛小扒、牛腩同美國牛肩胛扒三種部位嘅牛肉,加入牛油blend埋一齊;牛油可以鎖住漢堡內嘅肉汁,食落有牛味之餘仲juicy啲添!另外,Burger內夾咗炒香嘅焦糖化洋蔥嚟增加甜味,成個感覺好和諧。 應該大部分人都同小編一樣冇諗過泰式肉碎生菜包可以做Burger啩?!呢度就好有創意咁研發出呢款Thai Mad(HKD78)喇。佢哋跟足泰國傳統做法炒泰式肉碎,加入金不換、檸檬葉、泰式辣椒粉同米碎等材料一齊炒香,入口微酸都幾開胃喎。 仲有一款素食嘅選擇就係Veggie Mad(HKD78),以牛油果做主角,同樣加入炒過嘅洋蔥,食落味道層次豐富唔單調。Burger除咗單嗌之外,仲可以加配自家製薯條(+HKD20)添。冇錯呀,呢度連薯條都自己整,真係好’Mad’!將本地黃肉薯仔去皮切浸冰水再切條,先焗一次,等客人落單先拎去炸,咁樣會令薯條表面更薄脆,薯仔香味亦會比較重。 小店好有創意咁將Burger同咖啡組合埋一齊,原來咖啡嘅香味係可以提升肉本身嘅炭烤風味,層次都唔同啲!而呢度選用本地烘焙嘅咖啡豆,其中比較特別嘅係呢杯Dirty(HKD38)。以冰凍嘅鮮奶做基底,面頭再加入熱辣辣嘅Espresso,飲嘅時候兩者就慢慢融合埋一齊。 小編當日嘅Pastas of the Day係香辣魷魚意粉(HKD88),以意大利傳統Agli E Olio方式用香蒜、橄欖油同辣椒炒香意粉,再加入新鮮魷魚,鮮甜惹味。   Mad Burger 地址:灣仔灣仔道181A-181G號長春大廈地下A號舖 電話:6792 5926 營業時間:星期一至日:12:00-19:00

0

【連鎖Café中等價錢快餐質素 漢堡乾噌噌意粉油淋淋】伏務台

有時你冇諗過會中伏嘅食物先最有機會中伏。就好似小編今次去沙田市中心嘅Parkview水準都幾飄忽,一時差評奇多,一時就突然成堆好評,不過呢度嘅burger同意粉就平均地差喎。 其實呢間曾經係A1 Bakery旗下嘅餐廳,不過今年年頭轉手俾另一間連鎖餐飲集團,點知轉手後啲質素差咗咁多。今次試嘅Lunch Set除咗「正宗美國牛肉(150g)漢堡伴薯條」(HKD138),仲有「香草醬忌廉汁意瓜帶子意粉」(HKD128),即刻睇吓兩樣咁基本嘅西餐可以伏到咩地步啦。 Lunch Set會跟餐包同餐湯,包就冇咩問題,但餐湯就就一般。小編嗰日嘅餐湯係南瓜忌廉湯,冇南瓜味但有咬口,好似一直飲緊冇味但有質感嘅水,唔足料嘅感覺好差囉。 主菜先講正宗美國牛肉(150g)漢堡伴薯條,漢堡嘅麵包冇做過任何處理,冇搽牛油或烘過,拎上手唔夠熱,只係一個單純麵包就上菜,對唔住佢個價錢囉。 而漢堡嘅重點牛肉漢堡扒,乾噌噌冇肉汁同冇咩味。雖然分量有150g,但塊肉厚得嚟煎到又乾又硬,真係好難吞落肚囉,呢個價錢可以喺X記食到漢堡包放題喇…… 香草醬忌廉汁意瓜帶子意粉上菜時賣相還好,頭幾啖都可以,不過食到帶子同食到一半問題就出現喇。 帶子一碟有兩粒,睇樣就煎得唔差,一食就係成碟嘅死罪!帶子好似平時醃牛肉咁醃到過晒火,入口有啲灼喉嘅感覺,冇咗食物原有嘅鮮味,本身仲嫌佢分量少,好彩得兩粒啫。 香草醬忌廉汁就得個樣,唔好睇佢外表綠油油好好味咁,入口又係冇味,全碟最濃味就係啲蘑菇,但其實都係佢本身嘅味。同埋碟意粉愈食愈多油,睇一睇𠴱碟底先知油到同炒意粉一樣,唔知大家又覺得點呢? 小編伏氣:3星(5星滿分) 入伏點:Parkview (沙田店) 入伏價:正宗美國牛肉(150g)漢堡伴薯條(HKD138)、香草醬忌廉汁意瓜帶子意粉(HKD128) 中伏by #MOMO 美術by #MOMO 攝影by #MOMO 《伏務台》歡迎各界報料。

0

【BIG SUR週末新推 牛扒全日餐肉迷必歎】BIG SUR

去得蘇豪食嘢,就係想hea吓抖吓。BIG SUR無論店內店外都充滿悠閒嘅感覺,加上新出嘅全日餐單同晚餐,幾點嚟食嘢都係一種享受呀!即刻睇吓有咩新菜式引人流口水先。 西式嘅佈置好似去咗外國咁,人都不自覺慢落嚟。 Weekend Breakfast之中,AVOCADO TOAST(HKD95)啱晒素食者同牛油果控。香烤麵包上鋪滿牛油果醬同牛油果切片,再灑上Cotija芝士、油漬蕃茄、羅勒同粟米片,既香又脆口。 STEAK AND EGGS(HKD195)就啱晒喜肉嘅朋友,5安士炭烤無骨西冷牛扒配雙蛋、蕃茄、蘑菇同炸薯餅,惹味又飽肚。 All Day Menu都一樣有新品,想飽肚嘅唔少得CALIFORNIAN CHICKEN BURGER(HKD155)。加州雞肉漢堡有大大塊香烤椰汁雞腿肉,夾埋青瓜、蕃茄、壘勒、牛油果醬、紅辣椒莎莎醬又有fresh嘅感覺添。 BIG SUR BBQ PLATE(HKD255)就啱晒同朋友開心share,有Memphis肋骨、Nashville手撕豬肉、烤豆、椰菜同啤油麵包。大家試少少又可以試其他菜啦 晚市嘅SQUID(HKD115)酥炸新鮮魷魚配柚子胡椒蛋黃醬,作為前菜定佐酒小食都一樣咁開胃。   BIG SUR 地址:蘇豪士丹頓街22號地舖 電話:2529 3001 營業時間:星期一至五:12:00-00:00,星期六、日及公眾假期:10:00-00:00

0

【西環隱世手打漢堡外賣店 牛肉超Juicy即炸原隻軟殼蟹】C+ Burger

雖然唔少漢堡界嘅過江龍都喺香港開連鎖店,但係永遠都大排長龍,價錢仲離晒地添,小編依家就介紹一間港島區抵食又貼地嘅本地漢堡專賣店俾大家啦!沿住西環水街嘅斜路同樓梯行上去,喺轉角位就見到呢間新開嘅C+ Burger,佢哋主打自家製嘅手打美國牛肉。價錢比其他漢堡專賣店賣得平,但一樣堅持落足料,每個漢堡入面塊牛肉足150g㗎。 漢堡店由於小本經營,全部食物都係由兩位店主自己落手整,冇請到其他員工。雖然舖頭人手唔多,但兩位店主兼店員好爽手,出餐速度都幾快,由點餐到出餐大約10分鐘內就完成。舖頭主要做外賣生意,但舖頭出面都有一排枱櫈俾客人坐喺度食,仲可以隔住玻璃睇晒成個製作過程添。 呢個特濃芝士漢堡(單價HKD45)嘅配料同一般食開嘅漢堡差唔多,都係有牛肉、芝士、生菜、蕃茄同洋蔥。但係漢堡入面塊牛肉夠晒厚,比起麥記嗰塊肉厚得多,驚喜嘅係塊肉入口竟然好Juicy,唔會乾噌噌。呢款嘅特色係用咗熱溶芝士,將啲整溶咗嘅芝士漿倒落漢堡上面,單睇賣相已經好吸引喇! 係拉絲呀!呢款香草芝士條(HKD28)係舖頭新出嘅小食之一,芝士條好脆口,香草味好濃,入面仲有拉極都唔斷嘅芝士添呀。 如果鍾意黑松露味嘅就可以試吓呢款黑松露芝士漢堡(單價HKD46)喇。店主搽咗好多黑松露醬落漢堡度,一啲都唔孤寒,所以未食已經聞到好香嘅黑松露味,同漢堡包真係絕配呀!牛肉味係自己調製,小編覺得佢哋嘅手打牛肉比較濃,陣黑椒味幾出,啱啲比較重口味嘅朋友仔。跟餐加18蚊有埋薯條同可樂,午市時段仲做緊3蚊薯條同3蚊汽水添,係咪堅貼地呢? 呢款軟殼蟹漢堡(單價HKD78)就係舖頭最新研發出嚟嘅新品,原隻軟殼蟹沾上薄薄嘅粉漿新鮮即炸而成,佢哋唔會預先炸定,有客人落order先會調炸漿落鍋炸,唔似出面啲舖頭咁翻炸又翻炸。食落啲蟹仲脆卜卜,肉質都幾新鮮,漢堡仲加咗蟹膏醬入去,令蟹味更出。 想食層次再豐富啲嘅漢堡?就要點呢個歐陸漢堡(HKD59),除咗手打牛肉,仲加埋煙肉同流心蛋添,啲材料多到瀉,大滿足!配埋炸到咁金黃嘅手指魚(HKD28)就perfect喇。舖頭入面炸物全部都係即叫即炸,所以到客人手仲係熱辣辣嘅,真係睇到店主對食物嘅執著呀! 唔想食肉嘅話都可以試吓呢個清新啲嘅素菜漢堡(HKD38),雖然入面冇肉,但味道都唔單調,啲熱溶芝士淋落半熟雞蛋上面,成為成個漢堡嘅亮點,再加上菠蘿同蕃茄酸酸甜甜,特別開胃。除咗漢堡之外,仲可以加唔同小食,好似旁邊嘅水牛城雞翼(HKD25)就好惹味喇! C+ Burger 地址:西環西營盤水街10C號地下6號舖 電話:6010 8431/5339 7900 營業時間:星期一至日:11:00-21:00  

0

【尖沙咀小清新花系café 夢幻鮮花菜式打卡必去】Séan CAFE

尖沙咀最近有間新開嘅花系咖啡店Séan CAFE,由一位任教特殊學校嘅Miss開嘅,café仲用咗鮮花做主題,由店內裝修、擺設到食物賣相都充滿視覺享受。鮮花背後,原來店主係受到一個鍾意咬花瓣嘅自閉症學生所啟發,先至開始研究唔同嘅鮮花,了解埋花嘅食用價值。小編知道店主仲會安排佢嘅學生喺咖啡店度幫手,希望可以教多樣技能俾學生們。咁有愛嘅咖啡店,食物味道又點呢? 餐廳環境以淺色為主,配合café嘅主題,有唔少花嘅裝飾,啱晒鍾意小清新嘅朋友仔。 梗係要試吓咖啡出品先啦!呢杯玫瑰咖啡(HKD42)面頭放咗啲食用花瓣做點綴,飲到淡淡嘅玫瑰味。店主對咖啡品質都幾講究,選用指定嘅埃塞俄比亞咖啡豆,咖啡顏色比較淺,入口特別醇厚。 小編特別推介呢款新出嘅婺源皇菊花茶(HKD48),透明茶壺入面見到嘅婺源皇菊花個Size比平時飲開嘅菊花大好多,好似盛開緊嘅鮮花一樣,就咁望住已經覺得好放鬆。呢個菊花茶有兩個飲法,就咁飲已經好清香,有少少紅棗杞子味,又唔會太濃郁,好啱小編口味。可以隨自己喜好加入蜜糖,加咗蜜糖嘅花茶又有另一種感覺,冬天飲夠晒滋潤! 主菜其實都幾多選擇,好似玫瑰花忌廉汁海蝦意大利燉飯(HKD128) 用咗白汁加入玫瑰花去煮汁底,再加入野菌去煮意大利飯,食落會有淡淡嘅玫瑰香味,竟然幾夾到咁濃郁嘅忌廉白汁,可以令燉飯冇咁膩;飯上面嘅大海蝦就先浸咗玫瑰花水再煎香,海蝦夠大隻,肉質意外地爽口。由於海蝦同飯係分開煮嘅,所以即使對蝦有敏感嘅朋友仔仍然可以食到個燉飯,認真細心吖! 和風玉子黑豚肉漢堡扒竹炭漢堡(HKD68)入面嘅漢堡扒係有流心芝士㗎,食落幾juicy !平時食親嘅漢堡通常會配煎蛋或者炒蛋,而呢個竹炭漢堡就配咗香煎玉子,係餐廳嘅fusion菜。 小編見到玫瑰班戟(HKD78)個賣相即刻心心眼,餐廳採用法國嘅玫瑰花,顏色更粉紅,用佢嚟打卡真係一流!班戟嘅蛋漿裡面有加入食用玫瑰花瓣,但就咁食個班戟,味道就普通咗啲,不過蘸埋旁邊嘅玫瑰蜜就多咗陣花香,坊間比較少食到呢種口味呢!雖然甜品嘅製作時間比較長,要等大概15-20分鐘左右,但只要早少少落單,同朋友邊食邊傾邊等都好快過啫! 抹茶班戟配香草雪糕(HKD118)用咗宇治抹茶粉,會有回甘嘅抹茶味,而且唔會好甜,配埋雪糕食就啱啱好喇! 有教家政科嘅Fiona修讀過西廚課程,依家亦有讀咖啡相關課程,咖啡店大部分嘅菜式都係佢親自設計。為咗確保食物質素,Fiona幾乎每日放學之後都會到舖頭坐鎮。小編當日食到嘅甜品就係佢親自炮製喇,見到Fiona連對花瓣嘅擺盤都非常講究,就知佢要求高啦!   Séan CAFE 地址:尖沙咀漆咸道南29-31號溫莎大廈地下12A號舖 電話:6676 9679 營業時間:星期一至六:11:30-23:00,星期日:11:30-18:00

0

【美式墨西哥餐廳葷素兩食 新推重磅真味素漢堡】素學堂

連鎖店美式墨西哥餐廳CALI-MEX BAR & GRILL,一直都以採用高質量同對環境影響低嘅肉類為宗旨,最近亦加入葷素並存行列,全線11間分店都推出新系列HARLEY’S GOURMET BURGERS,有唔同國家嘅口味㗎。呢個系列由曾經喺22 Ships同RHODA等餐廳掌廚嘅Nate Green主廚設計,10款唔同嘅漢堡可以揀真肉、亦可以轉用Impossible Food植物肉,小編都唔執輸試咗啲新款式,即刻報告吓先! 餐廳有濃厚美式餐廳感覺,座位幾舒適。提提大家,每款由真肉轉為Impossible Food素肉嘅菜式要個別另加HKD20,加起嚟有啲貴,但分量都幾多,女仔可以share食囉。 El Chapo(HKD188+HKD20)係南加州墨西哥風味嘅經典漢堡,自家工場生產嘅麵包鬆軟如海綿,豆味唔太濃,反而有好香奶味,質感有啲啲似中式麵筋嘅感覺。配上辣椒醬、新鮮墨西哥辣椒、牛油果醬、美國芝士、牛蕃茄同醃黃瓜,味道微辣口感多層次,同真肉漢堡比相似度都有90%咁勁喎!加埋炸得外脆內軟嘅冇削皮幼薯條,食晒真係飽到上心口。 Rumble in the Bronx(HKD188+HKD20)充滿紐約風格,用濃郁芝士味嘅mac and cheese撈通粉、酸青瓜、厚切澳洲蕃茄、洋蔥、美國芝士、蕃茄醬同芥末,令成個包嘅味道好豐富同刺激。雖然有蕃茄減低油膩感,不過有芝士感覺都係飽滯啲。 Impossible Meat焗芝士玉米卷(HKD128+HKD20)呢款焗芝士玉米卷又係一道芝士迷最愛嘅菜式,辣度仲可以揀大、中、小添!闊身麵皮包住素肉碎同墨西哥蕃茄炒飯,面頭再鋪咗醃黃瓜中和返飽滯感覺。 墨西哥夾餅(HKD88+HKD20)嘅玉米餅炸得香脆,先放入生菜同蕃茄等新鮮清甜嘅蔬菜喺底,肉碎即使轉做Impossible Food,口感同真嘅幾乎一樣囉。素肉碎煙韌有咬口,最好係冇筋添,不過做成肉碎之後豆味冇咁出。面頭落埋酸忌廉,感覺又fresh啲。 另外都有小食係連素肉都走埋,菠菜亞枝竹配玉米片(HKD78)就用菠菜同亞枝竹碎,混入濃厚忌廉同芝士,好creamy,配埋極脆嘅玉米片都好滋味。   Cali-Mex Bar & Grill 地址:尖沙咀加連威老道14號地舖 電話:2661 9933 營業時間:星期日至四:11:00-23:00,星期五、六:11:00-00:00

0

【兩大美國素肉打入香港 漢堡「肉味」直逼滿分】素學堂

近年素肉嘅研發為素食者帶來福音,可以解決素食者容易缺乏蛋白質同鐵質嘅問題。好似Beyond Meat同Impossible Foods呢兩間連Bill Gates都有份投資嘅食品公司,佢哋嘅王牌出品就係Beyond Burger同Impossible Burger喇,呢兩款素肉仲引入咗香港,成為首個外銷地點!不過好多人都唔係好知Beyond Burger同Impossible Burger有咩大分別!Beyond Burger主要成分係豌豆、每塊有20克蛋白質,仲加入紅菜頭扮肉嘅顏色;另外混入椰子油同芥花籽油,令「肉汁」豐富啲,做到7成真肉效果;而Impossible Burger主要材料係水、織紋小麥蛋白、椰子油、馬鈴薯蛋白同存在於植物嘅豆血紅蛋白製成,做到9成真肉效果,因為仲可以煮唔同生熟程度添。呢兩款素肉營養成份唔會比真牛肉弱,甚至可以話更好,雖然冇動物成分,但蛋白質同鐵質就多過真正漢堡扒,啱晒貧血嘅朋友仔食㗎,而且仲用健康啲嘅植物油脂,做到零膽固醇嘅效果。咁香港邊度食到?旺角嘅TEXAS BURGER同灣仔嘅HONBO就係其中嘅選擇喇。   TEXAS BURGER TEXAS BURGER本身主打美式漢堡,但近半年都選用由Green Common引入嘅Beyond Meat整素漢堡。 Beyond Burger(HKD88)嘅包面微脆,內裡鬆軟。素漢堡扒煎得焦香,咬落有一絲絲嘅纖維,豆味濃厚,同真正嘅牛肉漢堡扒有7-8成相似,不過始終欠缺牛肉嘅氣味同肉汁。其他材料例如洋蔥會有蔬菜嘅juicy,彌補咗植物扒嘅不足。夾埋芝士、洋蔥圈同牛油果,口感豐富又滋味。薯條新鮮即炸都好出色,表面酥脆,內裡好似薯蓉咁。   Texas Burger 地址:旺角亞皆老街8號朗豪坊12樓1A號舖 電話:3488 5005 營業時間:星期一至四:11:30-22:30,星期五至日:11:00-23:00   HONBO Impossible Burger唔多地方有得食,灣仔小店形式嘅HONBO係其中一間,12月會喺荃灣開分店添! Impossible Burger(HKD128)漢堡扒,煎嘅時候不易散開,最特別係呢塊植物式肉扒更可以煎唔同的熟度,味道模仿到肉嘅味道,質感比肉軟腍但冇筋;而另一個特別之處係自家製麵包,配合日本技術花咗9個月時間研發出全港獨有嘅薯仔粉牛奶麵包,仲申請咗專利添。如果你鍾意接近真肉嘅口感,Impossible Burger會係不二之選。Impossible...

0

【太子小店有包食有衫賣 招牌手工漢堡陀地西多】包販子

最近小編喺太子行街周圍逛,發現「太子酒吧街」附近有間Logo設計得幾Cute嘅包販子,望吓門口嘅Menu,係間專賣Burger嘅Café喎,望落都幾闊落。 上次經過嘅時候發現人客幾多,於是小編今次揀平日下午先去,環境幾舒服。 見到牆上用粉筆畫嘅公仔同Menu都幾可愛,另外門口有個Corner係賣餐廳Logo嗰個公仔嘅周邊產品。好少見到餐廳會用自己Logo做Tote Bag呀、名信片咁,感覺幾新奇呀! 老闆阿鋒話,坐喺靠牆嗰張枱嘅係一位本地設計師,名叫嘉寶。成間舖頭嘅設計都係佢負責,阿鋒話嘉寶同餐廳嘅關係既係一部分,又係獨立嘅。有時候客人入嚟食嘢見到佢嘅作品會幫襯,又有客人專為嘉寶嘅作品慕名而來,順便坐低食個Tea。呢種似係合作又非常獨立嘅經營模式幾新鮮!一間有Designer坐鎮嘅餐廳,小編feel到唔止係一間for醫肚嘅地方,反而比較似一個放鬆自己嘅小場所,有種台灣文青咖啡店嘅悠閒感覺。 梗係要試吓Burger啦。小編今次叫咗青咖喱軟殼蟹包(HKD78)同北京填鴨包(HKD62)。呢兩款食物就食得多,夾入Burger入面都係第一次。軟殼蟹炸得非常酥脆,雖然夾咗落包仲落埋沙律醬,但都冇因此變腍,咬落依然脆卜卜,仲食到蟹膏嘅甘香味,食材質素滿分呀;另外填鴨包亦冇我想像中咁油膩,清爽嘅青瓜絲同鴨絲夾埋北京填鴨專用嘅甜麵醬,一啖過咬落去肉+醬+青瓜食晒,完全滿足到填鴨迷嘅口腹之慾呀! 阿鋒話:「專整Burger嘅小店,其實真係多到十隻手指都數唔晒。我希望帶啲新鮮感俾客人,同時又令自己嘅競爭力高啲咁!」。如果只係賣手打牛肉漢堡,要連鎖有連鎖、要小店有小店,要突圍而出唔係咁簡單。所以呢度嘅賣點除咗餡料比較古靈精怪,大部份都係Handmade嘅。「好多人為咗慳成本同慳時間,會買現成嘅嘢返嚟砌埋就算。不過我就覺得既然自己識,冇理由唔做啫!」。 阿鋒做廚師做咗十幾年,入廚經驗當然非常豐富啦!不過今次就係第一次做老闆,「係有啲唔慣㗎!身份唔同,諗嘢嘅角度都唔同。以前會覺得『點解明明有隻靚料貴少少唔用,死都要慳嗰少少用隻平但質素差一截嘅?』呢個就係廚師同老闆嘅分別,老闆係唔會明白貴嘅食材同平嘅分別,淨係知要用最低嘅成本賺最多錢咁囉,不過佢又冇錯喎,咁佢係老闆嘛!但依家我個角色又唔同,我既係廚師又係老闆,用料我可以自己話事,亦都易啲做到平衡……其實係辛苦過打工好多,搵錢又少啲,要顧慮嘅嘢好多,不過咁講啦,有種自由係打工嘅時候冇嘅。」。 除咗手工Burger,甜品亦係招牌。陀地西多(HKD66)好受歡迎,除咗賣相靚,食落都好特別!不過一個人食就有啲heavy喇,底層係自家製港式西多,老闆將佢做成圓形,西多外脆內軟,加埋頂層嘅花生醬雪糕,再淋上焦糖醬同灑上花生碎,超邪惡啊!  另外呢個用點心籠裝住嘅會溶嘅流沙包(HKD22/件)同樣係handmade嘅,口感有少少煙韌,食落竟然係鹹蛋黃嘅味道,好特別!雪糕上嘅流沙滿瀉,拎起食嘅時候要小心啊!   包販子 地址:太子通菜街254號地舖 電話:2656 5605 營業時間:星期二至日:12:00-22:00  

0

【黑椒漢堡攝影大賽又嚟 高登仔一人一張過招】食焦

麥記又回歸咗黑椒漢堡啦,即係高登仔又要做嘢,之前趁麥記推出嗰陣,又再推黑椒漢堡攝影大賽,截止日期係今日喎!呢個咁深入民間嘅攝影大賽,真係高手在高登喎!睇吓嗰三大參加條件啦,「1. 一定要係出自麥當勞既黑椒漢堡 2. 一人一個reply只可以貼一張 3. 禁用真屎」! 重點係,最緊要多汁啦,記得落order嗰時就要叫多汁呀,咁先至可以影出一張爆汁嘅靚靚黑椒漢堡相嘅!開咗po之後,高登仔一人一張影出嚟啦,有啲真係爆晒汁,但係有啲就相反,乾過沙漠呀仲!熱心高登仔就有好提議喇,「要影得靚,除咗角度,個包嘅濕潤度都好緊要」! 其實每次嘅黑椒漢堡攝影大賽,最想睇嘅就係有幾核突影到有幾核突啫!爆晒黑汁嘅效果梗係最得高登仔歡心啦!除咗濕潤度要夠,有高登仔再有溫馨提示㗎,就係一不做二不休啦,「其實呢個世界仲有樣嘢叫茄汁可以加埋落去」;「唔爭在加埋粟米」……真係夠晒創意呀! 仲有個永恆嘅問題係,如何可以食到唔會成手都係?高登仔話次次食親黑椒漢堡,唔止成手都係喎,仲食到連件衫都係喎!咁呢個先係黑椒漢堡嘅魅力啫!黑椒漢堡回歸咗喇,又令高登仔懷念起消失咗嘅咖喱漢堡喎!唔知幾時又推返個咖喱攝影大賽呢?