Tagged: cake

0

【本地牛角包店兼賣意粉+薄餅 酥脆曲奇禮盒買二送一】Crostini Bakery & Cafe

本地牛角包品牌唔少都有高質出品,好似Crostini Bakery & Cafe就每日製作三次牛角包以確保新鮮品質。不過佢嘅曲奇、蝴蝶酥同蛋糕你又試過未呢?而且部分分店仲有意粉、薄餅等熱食添。銅鑼灣旗艦店款式最齊全,今次就等小編試吓佢牛角包以外嘅食物,睇吓有咩正嘢先! 雖然以牛角包起家,但佢嘅曲奇同蝴蝶酥都幾出色,想試多啲口味就一定要揀禮盒裝喇!至尊曲奇禮盒(HKD238/45塊)有咖啡杏仁曲奇、紅莓棒子曲奇、南瓜籽熱情果茶曲奇、海鹽朱古力伯爵茶曲奇同牛油曲奇同玫瑰蝴蝶酥。有牛油香又唔會太乾身,而且每款口味都做得幾出,甜度亦控制得啱啱好,連續食幾塊都冇問題。 如果你係蝴蝶酥迷就更加要試至尊蝴蝶酥禮盒(HKD238/45塊),蝴蝶酥每層都搓得好薄,脆口又唔會太硬,而且有芝士、玫瑰、黑芝麻、玉桂、茉莉同原味6款咁多。今個月仲推出賀年優惠,1月6日起全線兩款禮盒可以自選口味買二送一! 想輕巧啲亦有單味細盒裝(HKD32/12塊),做小禮物或自私食又得。 小編發覺呢度嘅蛋糕外表比實際甜,唔嗜甜嘅朋友都可以一試。其中幸福橘子(HKD46)以雲呢拿慕斯包住清甜嘅柑橘果凍、柚子cream同海綿蛋糕,食完感覺又令人幾滿足喎。 想感覺貴氣啲?試吓呢個喺朱古力脆皮噴上食用金粉嘅金蕉流行(HKD52)啦!佢有一個甜甜嘅外表,但入面嘅香蕉蓉反而令層層疊嘅香蕉朱古力cream、朱古力蛋糕同朱古力脆皮珠帶陣清新香氣,又唔會太甜膩。 熱食方面薄餅套餐同埋配迷你沙律嘅意粉套餐都算抵食,另外會跟杯熱飲。呢個即焗嘅輕型三文魚薄餅(HKD89/8寸)落足料,煙韌嘅厚批上鋪滿鹹香又大塊嘅煙三文魚,配上三色芝士碎、車厘茄、黑水欖、火箭菜同蜜糖芥末醬,同平時食嘅pizza一樣有肉感但唔油膩,一個人當lunch食都幾飽。 估唔到香蒜大蝦炒意粉(HKD138)會有少少鑊氣,蒜蓉、紫洋蔥等材料炒過嘅香氣令意粉更惹味。蝦肉爽口彈牙,如果可以辣啲就更好喇。另外點咗杯凍抹茶咖啡(HKD46)試吓,宇治抹茶嘅甘味同咖啡幾融合,不過唔攪勻啲cream就飲會偏酸。 最後如果想食埋佢嘅麵包(HKD14-20),記得捕實每日18:00後有買二送一優惠呀!   Crostini Bakery & Cafe旗艦店 地址:銅鑼灣勿地臣街1號時代廣場7樓728-729號舖 電話:3105 9923 營業時間:星期一至日:11:30-20:30 供應意粉及薄餅分店:時代廣場店、杏花新城店、荷里活商場店、泓富廣場店、逸瓏坊商場店、新港城中心4期店 供應薄餅分店:時代廣場店、杏花新城店、荷里活商場店、K11店、泓富廣場店、九龍灣國際展貿中心店、上水中心店、連理街店、九龍貿易中心店、千色匯一期店、荃灣廣場店、青衣城店

0

【山林道有個雲石小姐 少女必冧雲石紋流心蛋糕】Miss Marble

「當初說這裡有天 會由樹 變成路~」講起山林道,除咗諗起謝安琪首歌,仲諗起咩呢?小編就諗起山林道嘅Miss Marble雲石小姐喇!聽個名已經feel到一陣典雅味道,呢位「小姐」嘅真身就係一間充滿少女心嘅蛋糕甜品店! 雖然舖頭細細,但幅花花牆就夠晒吸晴,小編離遠見到已經唔小心被「吸」咗過去喇! 喺尖沙咀行街行到攰,坐低歎返杯茶先!玫瑰美顏茶(HKD58/熱)用咗沙漠玫瑰同杞子,茶底係紅茶,味道清新怡人,一路食蛋糕一路飲,可以解膩又可以美顏,一絕呀!連個茶壺都係粉紅色雲石紋,感覺超高貴!啱晒同閨蜜high tea打卡呀! 叫得雲石小姐,金漆招牌當然係雲石紋流心蛋糕(HKD420/4吋生日蛋糕)啦。有好多唔同味道,例如比利時朱古力、金莎朱古力、咖啡、抹茶牛奶同紫薯牛奶等,今次小編就試吓賣得最好嘅伯爵茶味啦! 如果大家平日經過想入去食件cake嘅話,可以揀雲石流心蛋糕嘅切餅系列(HKD68起/視乎味道價錢不同),每日限量20件,同閨蜜一人一件,咁就可以試到唔同口味啦;另外亦有提供客製化嘅訂造服務,如果大家對蛋糕有咩特別要求(例如雲石紋顏色、大小等等)可以預先同店舖溝通,生日蛋糕、散水餅等等都有做㗎! 其實見到蛋糕表面咁完美嘅雲石紋真係唔捨得切開佢……切開之後伯爵茶流心就爆出嚟,畫面真係幾治癒!茶味唔會話好淡或者有澀嘅感覺,同甜味夾得啱啱好。呢個口味做生日蛋糕就啱晒喇,通常每次食完飯都會食唔落壓軸登場嘅蛋糕,呢款伯爵茶蛋糕甜而不膩啱晒,可以影埋靚靚蛋糕相,perfect! 另外一款招牌蛋糕-海鹽芝士奶蓋流心蛋糕(HKD340/4吋生日蛋糕)望落真係好邪惡呀! 切開之後流心芝士奶蓋湧晒出嚟,鹹中帶甜嘅奶蓋超濃滑,芝士味十足,夾埋鬆軟嘅蛋糕成功俘虜小編嘅心呀!可能因為係海鹽芝士嘅關係,感覺冇想像中咁膩,反而好想一啖接一啖咁食落去! 呢位靚女就係雲石小姐嘅老闆娘Samantha喇!大約8個月前喺葵廣開舖,當時舖頭只得50呎,今日搬得去尖沙咀,雖然舖頭依然稱唔上好大,但起碼有個真正屬於自己嘅地方,廚房大返少少,同埋可以有位置俾客人坐喺度傾吓偈食吓cake。Samantha話除咗感激大家支持,亦都感激嗰啲曾經「Mean」過佢嘅客人,「其實都多謝佢哋,我先會愈變愈好嘅,雖然當時真係唔開心咗一排(試過俾人網上批評),但我都有因為咁而成長到!」。一個女仔靠自己努力開舖唔容易,舊事冇謂再提,最緊要整多幾件靚靚雲石蛋糕啦! Miss Marble 地址:尖沙咀山林道10-12號 電話:5542 9880 營業時間:星期一至四、日:12:00-22:00;星期五至六及公眾假期前夕:12:00-23:00

0

【素蛋糕三大精選推介 無蛋奶素都咁香滑好味】素學堂

素食唔係得正餐先有,甜品選擇都有唔少,其實有好多地方都有素蛋糕㗎!今次我哋揀咗3間做精美素Cake嘅餐廳,全部都係無蛋奶素,有啲仲係無麩質添,健康指數唔係一般蛋糕可以媲美!部分蛋糕仲可以訂造,以後有素食朋友生日就唔使頭痕啦!   氣派之選  LN Fortunate Coffee 位於西營盤嘅LN Fortunate Coffee係一間專售賣素食食品嘅cafe,除咗正餐仲有多款西式小食同素食甜品,最驚喜係可以因應客人要求訂造純素/無麩質/無蛋奶素嘅蛋糕呀! 呢度有原個素食蛋糕可以訂,幸福冷泡咖啡朱古力蛋糕(HKD588/8吋)味道主要嚟自自家品牌嘅冷壓咖啡。蛋糕用亞麻籽、椰子油同腰果等製成,比一般蛋糕重身。面頭放咗大量唔同種類嘅果仁同生果做裝飾,口感非常豐富。 龍舌蘭腰果凍餅(HKD398/6吋)仲有唔同款,唔同size嘅蛋糕㗎。 當然仲有切餅件裝蛋糕啦,仲係每日唔同款式添。今次我哋試到兩款都用素忌廉同荳奶製成嘅抹茶芒果切餅[左]同朱古力香蕉切餅[右](HKD58/件)。抹茶好多時都係配紅豆,呢度就夾新鮮芒果,感覺更加清新。朱古力就用咗素可可粉製成,唔會太甜,甜味主要嚟自香蕉,都幾香㗎。 仲有好多款素食Cupcake(HKD36/件),呢幾款Cupcake 都冇用雞蛋,所以店舖都叫佢做素糕而唔係蛋糕。素糕比一般蛋糕厚實,由亞麻籽、椰子油、果仁等等製成,口感濕潤,而且會食得出一陣椰子香味。師傅都好有心思,好似朱古力素糕面頭舖咗杏仁醬加腰果打成嘅醬,扮成榛子忌廉芝士。呢幾款Cupcake冇平日食完甜品嗰種肥膩感,但就相當飽肚!因為用嘅材料比較厚實,最好係唔落化學食材。 另外吸睛嘅係素果撻(HKD58)呀!唔同嘅時令鮮果令到果撻七彩繽紛,最驚喜係撻底冇牛油成份,改用椰子油製成,椰香味好濃郁!   LN Fortunate Coffee 地址:西營盤第二街118號懿山地舖 電話:2858 3898 營業時間:星期一至日:09:00-22:00   悠閒小店  Sweetpea Cafe 喺中環嘅Sweetpea Cafe全間餐廳都係售賣無麩質食物,除咗甜品蛋糕,仲有一系列嘅三文治同意粉供應。遲啲佢哋將會喺佐敦開分店添,九龍區素友好方便喇! Double Chocolate Vegan Cake (refined sugar...

0

【漫畫聯乘咖啡店 海洋系甜品食「塵」落肚】THE STORY CAFE

農場食品一向俾到人最新鮮嘅感覺,好似青衣嘅THE STORY CAFE選用外地直送或本地農場嘅食料,提倡「簡單、美味、新鮮」的飲食概念,俾顧客品嘗最鮮味嘅菜式。 THE STORY CAFE同本地原創漫畫人物Dustykid大玩聯乘,即日起以Dustykid阿塵暢遊海洋為主題嘅期間限定店。Dustykid期間限定店將化身成海洋世界,店舖以柔和嘅海洋色系為主調,每張枱面都有獨家Dustykid溫馨小故事佈置,除咗牆上掛滿一幅幅圍繞海員塵嘅金句油畫,仲有兩尺玻纖製造嘅海員塵公仔俾大家打卡。話明聯乘,梗係有一系列美食啦,去文! 塵梳乎厘班戟(HKD80)由甜品師獨特秘方製造出軟綿又充滿空氣感嘅梳乎厘班戟,再印上可愛嘅塵水手模樣,冧盡一眾塵迷呀。再配上由日本直接進口嘅傳統黑蜜或本地蜂場直送的蜂蜜,再加酸酸甜甜嘅野莓,實在令人欲罷不能。 THE STORY CAFE 對美食嘅味道同賣相亦同樣講究,藍天碧海塵芭菲(HKD80/兩人份)希望食客喺視覺同味覺都有充足嘅享受。呢個巨形芭菲設計到好似一片藍天碧海,最頂層有吸睛嘅海藍色「塵」造型寒天,再有來自日本嘅波子汽水雪糕,中層佈滿濃厚軟滑藍色奶油嘅「波浪」,底層係冰涼又開胃嘅青檸沙冰 ,每一層都享受到唔同層次嘅口感同味道。 「塵」一向為大家帶來歡樂,彩虹塵蛋糕(HKD48/件)好似彩虹咁五彩繽紛,每款都唔同口味。THE STORY CAFE推介塵嘅原身顏色 ——黑色,竹炭味道嘅海綿蛋糕配合紫薯慕絲夾心,入口鬆軟幼滑,甜而不膩。其次,紅色係士多啤梨味、黃色係芒果味、綠色係抺茶味同藍色係藍莓味。 勇於挑戰嘅「塵」坐小食船乘風破浪而來,天空飛塵船(HKD68)係難以抗拒嘅惹味小食,有塵形迷你多士、照燒魷魚鬚、軟滑甘香嘅一口芝士波同金黃香脆嘅薯格,下午茶食佢就最滿足啦。 因為海水嘅鹽份帶到空氣裡面,所以海風總係帶有微微鹹味。飲啖用上日曬天然海鹽嘅塵望‧海鹽朱古力(HKD45),海鹽淡淡嘅鹹味配以質感幼滑嘅濃熱朱古力,令奶香得以提升,口感層次和諧完美,呢款飲品仲可以外賣㗎。   依家仲有限量精品換購(供應日期:即日起至2018年3月31日,供應時間:星期一至日:13:00-22:00) 凡惠顧指定Dustykid食品,就可以用優惠價換購Dustykid特別版塵海員白瓷咖啡杯禮盒乙個,仲有限量塵海員水松杯墊俾大家選擇。加HKD25可以換任何兩款Sailor Dusty水松杯墊,或加HKD68會有Sailor Dusty 白瓷咖啡杯及任何一款水松杯墊,快啲去換購啦!   THE STORY CAFE 地址:青衣城1樓117號舖 電話:3105 1825 營業時間:星期一至日:08:00-23:00

0

【得意趣怪雪糕蛋糕】HeyYO!!

食雪糕食來食去嗰幾隻味,食到悶悶地?不如試下自己D.I.Y.乳酪雪糕啦!HeyYO!!有多種口味嘅乳酪同Toppings比你任意挑選,想食啱自己心水嘅味道話都無咁易啦!除咗乳酪雪糕之外,仲有多種得意造型嘅蛋糕任你慢慢揀添! 嚟到HeyYO!!當然要試試佢地嘅乳酪(HKD18/100g)啦!有專人控制品質,食得夠晒安心!加上無論係乳酪嘅口味抑或Toppings都夠晒多元化,五花八門嘅Toppings完全由你話事,想落咩就落咩,一定啱晒你口味!仲會不定期有乳酪新口味推出添! 除咗乳酪之外,仲有好多款造型好可愛嘅雪糕蛋糕(1磅)(HKD268.8)比你帶返屋企!每款雪糕蛋糕外形都好得意趣怪,可以揀嘅味道亦都有少少分別,但係唔駛擔心,可以揀嘅口味平均都有十幾樣,實有一種啱味啱晒你! 就好似仲夏之熊同冰河小企鵝都有多種口味可以選擇,包括:草莓天使、甘栗碎杏仁、石板街、雲尼拿曲奇、香脆朱古力、士多啤梨、菠蘿綿花糖、香蕉曲奇、泡沫咖啡碎朱古力、焦糖咖啡曲奇、荔枝雪果、蜜桃乳酪雪糕、薄荷碎朱古力、忌廉曲奇、意大利朱古力同埋意大利雲尼拿。 無論你揀咩口味都好,上面嘅得意公仔都係一樣細緻又得意,想點呃like就點呃like,大人細路收到都咁開心!除咗可以相機食先之外,雪糕蛋糕仲非常幼滑又香甜,而且密度比較高,唔會充滿空氣,食兩啖就無晒!如果太多種味道唔知點揀好,不妨叫多幾個朋友仔一齊食。加大蛋糕,每磅加(HKD130),2磅或以上仲可以揀1-2款味道,咁就可以要多一款味道唔駛諗得咁辛苦啦!雪糕蛋糕仲不定期推出期間限定嘅趣怪款式添! 除咗雪糕蛋糕之外,仲有忌廉蛋糕㗎!鍾意食芒果或者拿破崙嘅朋友一定要試下(4″)芒果拿破崙(HKD138),表層堆滿切粒芒果已經夠晒香噴噴,下面再以忌廉圍邊,食落芒果鮮甜度頓時倍增!切開一件件食落去,拿破崙脆脆地再配埋鮮滑芒果,每啖口感都好豐富又香甜脆口! 如果想試獨特口味可以選擇(4″)朱古力曲奇芝士蛋糕(HKD138),蛋糕外形似足一塊巨形朱古力曲奇,非常得意。表層仲有曲奇同士多啤梨作裝飾,鍾意食曲奇餅嘅朋友又點忍得口!蛋糕入口鬆化,每啖都滲出濃香朱古力曲奇味道,再加埋芝士質感更幼滑,但係一啲都唔膩! 分店資料如下: HeyYO!! Frozen Yogurt 九龍區分店: 地址:觀塘觀塘道418號創紀之城五期(apm)地下高層UC45舖 電話:3422 8645 營業時間:星期一至日:11:00-22:00 HeyYO!! Frozen Yogurt 香港區分店: 地址:銅鑼灣告士打道311號皇室堡地庫B71號舖 電話:3583 2065 營業時間:星期一至日:11:00-23:00 HeyYO!! Frozen Yogurt 新界區分店: 地址:沙田港鐵沙田站大堂38號舖 電話:2608 9113 營業時間:星期一至日:11:00 – 23:00...