Tagged: dessert

0

【昭和懷舊打卡咖啡屋 精製和食+富士山飯糰】婆婆珈琲屋 Grandmama’s Cafe

主打日本精品、富士山產品嘅婆婆雜貨店喺尖沙咀開咗間昭和風懷舊Café婆婆珈琲屋。新店以富士山同獅子山為創作元素,製作擺盤精緻又好味嘅日本料理。每款特色漬物同飲品都係店主婆婆用心製作,由食材用料到餐具都花盡心思㗎!

0

【$228歎4道泰法Fusion菜 爆汁牛角包+咖喱和牛面頰】享慢煮泰 Lemon Grass By Fast Gourmet

想享受高質素高CP值嘅泰菜可以試吓喺堅尼地城嘅享慢煮泰,融合慢煮同泰式料理創作fusion菜。餐單中自選2-4道菜(HKD148-228),包括必試嘅自家製名物冬蔭龍蝦湯或法式龍蝦湯流心牛角包、前菜、慢煮料理同甜品。每道菜式都落足心思製作,款款都咁正呀!

0

【週末2人日式下午茶 靜岡蜜瓜甜點×極上壽司】帝都酒店櫻田日本餐廳

週末放鬆吓,不如歎個Tea啦!主打和食嘅帝都酒店櫻田日本餐廳推出咗靜岡蜜瓜日式下午茶(HKD448),甜點配極上壽司,仲附送2杯手調製作嘅蒸餾咖啡或柚子茶,人均二百幾蚊就食到。想解思鄉情就book位試吓啦!

0

【新界首間日式蛋料理餐廳 新推雲朵意粉+五式玉子燒】Tamago-EN

蛋!全部都係蛋!來自新加坡嘅日式蛋料理餐廳@Tamago-EN繼進駐旺角、北角之後,首間新界分店喺元朗開幕喇。除咗有生雞蛋拌飯、玉子串燒呢啲睇得又食得嘅招牌菜之外,最近更新推出4款雞蛋主題意粉,其中海蝦明太子醬冷意粉有成隻雲朵雞蛋鋪喺面,賣相即刻加晒分呀。快啲睇埋落去有咩正嘢啦! 元朗新店地方都夠晒寬敞,店面全部都以標誌性嘅雞蛋圖案做裝飾,非常易認。 先睇吓呢度必食嘅終極TKG生雞蛋拌飯(HKD39),招牌雲朵雞蛋鋪滿飯面,單睇賣相都好吸引啦。呢種生雞蛋拌飯雖然喺香港少有,但就係日本傳統嘅營養早餐,餐廳嚴選新鮮嘅沖繩雞蛋,將蛋白發打至蓬鬆狀態,食之前戳穿蛋黃,加入醬油、調味料撈嚟食,食落竟然一啲都唔單調,口感細滑富蛋香。除咗就咁食,仲可以加錢配醬漬三文魚、碎金鎗魚腩、牛油果等配料添。 5款特製玉子串燒(HKD68)都係呢度必食嘅蛋料理,蛋皮一層層咁捲,捲足4層先有呢個層次效果㗎。呢款玉子燒偏向關東口味,味道偏甜。上面仲有5款唔同口味嘅配料,包括親子三文魚、鱈魚子沙律、蟹肉、海藻醬同蕃茄仔。 特製TKP・海蝦明太子醬冷意粉(HKD92)係全新推出嘅意粉,得元朗同北角店有得食咋。呢款凍食嘅意粉面頭鋪上雲朵雞蛋,賣相搶眼。配上爽嫩嘅大蝦、明太子醬、沙律菜,配搭獨特,仲略帶梅子嘅酸酸甜甜,特別開胃! 另外推介埋呢款同樣新出嘅日式拿坡里義大利麵(HKD78),仲有盛載住半熟溫泉蛋嘅「雀巢」點綴。呢個「雀巢」係用幼麵炸成嘅麵餅,入口脆身。意粉以酸甜嘅蕃茄汁炒成,口味比較大眾化,大人小朋友都咁啱食㗎。 焦糖香桃梳乎厘班戟(HKD98)即叫即整,班戟面已經唧上焦糖,唔夠仲可以加埋旁邊嘅糖漿。微熱嘅班戟食落口感綿密,入口仍有梳乎厘嘅空氣感,配埋甜蜜嘅香桃同忌廉一齊食層次就更豐富喇。   たまご園 Tamago-EN 地址:元朗朗日路9號形點一期2060號舖 電話:2650 3335 營業時間:星期一至日:12:00-22:00

0

【旺角活化唐樓天台變茶室 三式和食×茶香班戟】蟲二

想搵個地方放空吓,旺角嘅蟲二就值得一去喇!呢間天台茶室最近就由百年唐樓活化嘅上海街618,打造成房內同戶外露天空間兼備嘅茶室。喺咁熱鬧嘅市區劃出寧靜一角享受中日料理,仲有兩款喺本店3rd Space人氣極高嘅茶香燒海鹽芝士麻糬班戟添。 蟲二呢個店名其實係指「風月無邊」,當「風月」去邊後就淨低「虫二」喇。雖然本店係上環普慶坊3rd Space嘅西式cafe,但呢度就主打中日料理,風格好唔同!日式擺盤融合中菜元素,室內有好多偏中國風嘅壁畫㗎。而cafe更設有露天空間,上嚟食嘢可以放鬆吓平日緊張嘅心情。 一汁三菜(HKD140/配熱茶)係呢度其中一款招牌料理,日式擺盤賣相好簡約別緻。成set有一款主菜、兩款漬物、慢煮蛋同柴魚湯。以漬物做配菜都落足心思,去皮車厘茄用咗杏脯汁醃製,仲有兩塊花蜜漬山藥添,夠晒特別。而個飯其實有兩種食法,除咗就咁配餸食之外,食到一半可以將慢煮蛋加入飯撈勻,再落柴魚湯當茶漬飯咁食。 三揀一嘅主菜就有赤味噌清酒燉豬肉、紅酒黑醋無花果燉牛肋粒同埋蘋果野菜咖喱日式雞肉,今次就試吓佢哋嘅燉牛肋粒啦!牛肋粒同蘿蔔都切成一口size,方便入口,而且都燉到非常軟腍,肉質有咬口又唔韌。個菜名有無花果,但搵唔到佢?原來無花果已經燉到融晒,令成道菜更加清甜,仲有淡淡無花果獨有嘅果香添! 3rd Space上環店嘅班戟咁出名,嚟到呢度梗係唔可以錯過啦!呢款伯爵茶傳統班戟(HKD85)並唔係梳乎厘班戟嚟嘅,而係比較有口感嘅厚身班戟,質感鬆軟有蛋香。賣點之一就係淋喺香蕉上面嘅海鹽芝士忌廉醬,炙燒後口感薄脆,味道微鹹,就好似濃稠版嘅芝士奶蓋咁,非常特別呀! 一切開原來內有乾坤!班戟中間夾住煙韌嘅伯爵綠茶味麻糬,配埋面頭嘅牛乳雪糕同芝士忌廉香蕉一齊食就夾晒喇! 想fresh啲可以試吓呢杯熱情果梳打(HKD55),入面嘅熱情果醬都係自家調配,酸甜度適中,飲落清爽開胃。 茶座嘅茶具都充滿日式簡約風格,好似香茅薄荷茶(HKD55)就用茶壺裝住上枱俾你慢慢斟嚟飲,唔驚啲茶凍得快。呢款聞落帶有淡淡薄荷香味,入口幾清新舒爽。   蟲二 地址:旺角上海街618號頂樓天台 電話:9220 9785 營業時間:星期一至日:12:00-22:00

0

【世界級得獎餅店今日開業 趣致甜品大玩港式主題】當文歷餅店by Dominique Ansel

甜品控注意!掀起甜品界熱話嘅紐約得獎名店Dominique Ansel Bakery強勢登陸香港喇,今日終於喺海港城正式開業,新店以Dominique嘅廣東話譯音命名為當文歷餅店。而榮獲世界50大「最佳甜點主廚」嘅Dominique Ansel,除咗帶嚟全球熱賣嘅招牌法式酥點外,更為香港店度身訂造一系列創意滿分嘅港式主題甜品。即刻睇吓新店點樣衝擊我哋嘅想像啦! 主廚Dominique Ansel特意為香港店設計一系列港式主題嘅創意甜品,全部都係香港限定,玩味十足添!部分蛋糕除咗以件裝發售,仲可以原個買走,以後節日慶祝都可以嚟揀返個喇。 呢款菠蘿包(HKD65/件裝;HKD520/原個)造型嘅椰子熱情果蛋糕,設計靈感當然係來自港式菠蘿油啦!用咗椰子慕絲同椰子味蛋糕整成菠蘿包嘅形狀,中間就以海鹽味忌廉同菠蘿青檸熱情果果醬扮牛油,賣相非常趣緻。 而紙包檸檬茶(HKD62/件裝;HKD480/原個)就連包裝盒都食得!呢款伯爵茶佛手柑蛋糕,外層用白朱古力整成,內層就係伯爵茶馬斯卡彭忌廉mix佛手柑奶酪、杏仁餅同脆片餅乾,食落茶味夠晒濃喎。 名為火腿通(HKD58/件裝)嘅芝士蛋糕以放大版通心粉造型出現,蛋糕用咗兩款芝士再加入檸檬整成,入口清新唔膩。加埋以白朱古力整嘅「火腿絲」、「青豆粒」同「紅蘿蔔棉花糖」做點綴,特製嘅火腿通就出世喇! 呢個罐裝黑白淡奶(HKD65/件裝)係咪好得意呢?其實佢係海鹽焦糖牛奶布甸嚟,海鹽焦糖味嘅奶凍入面有以冧酒浸過嘅蛋糕,層次好豐富㗎。 呢粒皮蛋(HKD58/件裝)其實係榛子咖啡撻,兩片蛋形嘅朱古力忌廉曲奇夾住牛奶朱古力慕絲同烤榛子忌廉,中間嘅「蛋黃」就用咖啡同黑芝麻味嘅啫喱整成,又幾有創意喎! 除咗港式創意甜品之外,餅店亦會賣各式現焗傳統法式酥點,包括全球最熱賣嘅招牌酥點DKA (Dominique’s Kouign Amann)。主廚Dominique更即場示範呢款DKA係點整嘅添。 DKA (Dominique’s Kouign Amann)(HKD38)係主廚以法國經典麵包Kouign Amann為基礎嘅改良版本。每件DKA都疊咗三層酥皮捏成,經烤焗後令外層焦糖化,相當脆身;入面就特別鬆化,食落仲有焦糖混合牛油嘅濃重香味,「全球最熱賣嘅招牌酥點」呢個名真係唔係浪得虛名! 另外,新鮮即製嘅仲有呢款魚蛋(HKD68),佢嘅真身原來係炸紅豆雪糕糯米糍!面頭灑上糖粉,再用火槍將佢燒到焦脆。食落去外熱內冷,簡直係冰火交融呀。 冬天凍冰冰梗係諗起充滿港式風味嘅炒栗子啦,呢度都有得食喎。每包8粒嘅栗子蓉瑪德蓮蛋糕設計成炒栗子(HKD68)造型,啡色嘅蛋糕仔用紙袋裝住,望落真係好似一粒粒嘅栗子咁。鬆軟嘅瑪德蓮蛋糕內係濃稠嘅栗子蓉,喺豐富嘅蛋香中滲透出陣陣栗子嘅清甜,而且每包都即叫即焗,保證新鮮熱辣! 想將呢啲嘢食同朋友開心share?餅店仲好貼心咁提供埋禮盒裝俾你買走!依家有DKA四件禮盒裝(HKD168)同港式奶茶曲奇杯禮盒裝(HKD108),唔知嚟緊仲會有邊款新禮盒推出呢?   當文歷餅店by Dominique Ansel 地址:尖沙咀海港城海運大廈地下63A號舖 電話:2613 8618 營業時間:星期一至四:08:00-21:00,星期五:08:00-21:30,星期六、日:09:00-22:00 開業日期:1月7日(今日) 12:00

0

【Fortnum’s海景伴經典下午茶 精選全日菜+聖誕禮品】Fortnum & Mason

英國人氣品牌Fortnum & Mason,首間海外店喺尖沙咀K11 Musea終於全面正式開業喇!兩層高嘅專門店同餐廳貫徹品牌嘅高雅華麗風格,依家就同大家睇吓呢度一系列富英倫風味嘅全日菜;當然唔少得萬眾期待、好搶手嘅三層高經典下午茶啦,裡面嘅鹹甜點全部都可以無限refill,想食就要趁早訂座喇。 尖沙咀新店樓高兩層,地面就係做食品禮盒嘅零售專門店,上一層就係面向維港嘅海景餐廳。餐廳Fortnum’s 181就以Fortnum’s嘅倫敦總店地址「181」命名,延續英國店優雅、高貴嘅風格。店內以品牌獨特嘅「尼羅河之綠」做主題色,全店無論係裝潢、茶具定商品都用咗呢種顏色,好有代表性呀! 當店員扭動過百年歷史嘅巨型音樂盒,就象徵下午茶時間正式開始喇。呢度最hit嘅經典下午茶(HKD588/位)聽聞連英女皇都鍾意食㗎!三層高嘅下午茶有齊鹹甜點同鬆餅,另外配埋自家品牌士多啤梨醬、檸檬蛋黃醬同忌廉;其中酸酸甜甜嘅檸檬醬配鬆餅食就特別開胃清新。三層架上面嘅茶點全部都可以無限量refill,打破三層下午茶食唔飽嘅宿命。而下午茶仲會跟埋一壺Fortnum’s茶添,咁就食幾多都唔怕膩啦。 底層5種口味嘅手指三文治,由左至右分別係加冕雞、Fortnum’s自家品牌嘅煙燻三文魚配韃靼沙拉醬、青瓜配薄荷奶油芝士、珍稀雞蛋蛋黃醬配水芹同埋諾福克醃火腿配英國芥末。 除咗鹹點同鬆餅之外,甜品都係一個Tea Set入面嘅必要元素。呢個Tea Set嘅頂層就有5款精緻蛋糕俾你慢慢歎喇。 下午茶固然出名啦,但呢度仲有好多全日菜式都好出色㗎。頭盤就有蘇格蘭蛋配黑布丁及英式酸辣醬(HKD208),用咗英國傳統食物Black Pudding嚟做蘇格蘭蛋嘅外層,Black Pudding係以動物血、內臟同肉碎整成,有啲似台灣嘅米血,味道就再香濃啲。而入面個蛋黃就煮到啱啱好,仲係流心添。 另一款蟹肉配蛋白、香菜及蛋黃(HKD218)都係必食嘅頭盤推介,餐廳將蟹肉壓成餅狀。蟹肉餅分成上下兩層,下層就係蟹醬,用蟹肉、芥末、蕃茄醬等醬汁調製而成;上層係一絲絲蟹肉,面頭再鋪上香菜、蛋黃碎同蛋白碎,食落口感豐富又鮮味喎。 嚟到主菜喇!法式牛油香煎Brixham龍脷魚(HKD558)大大條,肉質幾鮮嫩。大廚並冇用複雜嘅烹調技巧,只係將新鮮嘅龍脷魚用牛油煎香就原條上枱,不過配有檸檬同特製醬汁俾你調味。 而呢道南瓜意大利雲吞配松子仁及鼠尾草(HKD248)除咗一望就見到嘅南瓜粒之外,一咬開粒意大利雲吞仲食到滿滿嘅南瓜蓉內餡,細滑香甜。 餐廳嘅甜品更加冇令大家失望,大大杯嘅英式傳統新地(HKD118)就夠晒滿足呀!呢杯新地以士多啤梨做主題,入面唔止有大量新鮮士多啤梨果肉、雪糕同埋自家品牌士多啤梨果醬,仲有菠蘿肉添,再將忌廉炙燒封頂,層次分明又有多重口感。 而呢款喬治國王布甸配白蘭地醬(價錢待定) 就係聖誕限定甜品,淋上白蘭地醬令布甸嘅酒香更加濃郁。 食飽飽就可以到下層專門店買佢哋自家品牌嘅食品禮盒喇!好多人都重點買Fortnum’s嘅茶葉同餅乾,但其實仲有酒類、咖啡、果醬等商品㗎。臨近聖誕,一於等小編精選啲聖誕限定商品俾大家啦! 【Fortnum & Mason開業 率先試香港限定茶葉】Fortnum & Mason 尖沙咀 ∣ 小編經過K11 MUSEA見到181 at Fortnum &...

0

【新藝術咖啡館×村上隆展品 自由打印咖啡配精緻輕食】CURATOR

講到生活藝術又點少得咖啡同美食呢?下星期一喺K11 Musea正式開業嘅藝術咖啡館CURATOR正正將兩者同藝術結合,最大賣點就梗係藝術打印咖啡啦!可以俾客人將自己鍾意嘅相列印喺咖啡面,夠晒獨一無二。店內亦提供一系列靚到藝術品咁嘅多士輕食、意粉主菜。所以話藝術館都唔一定好嚴肅嘅,喺度chill住歎咖啡、美食,一邊欣賞村上隆等藝術品都得啫! 主張「藝術融入生活」嘅CURATOR店面簡潔,店內會展出村上隆、草間彌生等藝術家嘅作品,而且仲會不定期更新咖啡館入面嘅藝術品,令客人有新鮮感。而另一邊就係開放式嘅Coffee Corner同廚房,客人可以望到咖啡師沖製咖啡。 話明咖啡都係藝術嘅一種,就由咖啡沖煮開始講起啦。咖啡館引入咗全港獨家嘅得獎咖啡機Aremde NEXUS one,打破傳統咖啡機封閉式嘅設計,等你可以直接欣賞到咖啡沖製嘅過程。 呢度仲有一大賣點係呢款藝術打印咖啡 (HKD88),連梵高嘅畫作《星夜》都印到喺咖啡面嘅忌廉,仲打印得幾仔細添。除咗呢幅名畫之外,呢部獨有嘅Coffee Printing Machine仲可以印到唔同類型嘅圖片㗎。只要客人提供相俾咖啡師,就可以印出屬於自己又獨一無二嘅藝術咖啡喇。 呢款斯人若彩虹,遇見方知有(HKD128)聽個名咁有詩意,其實佢就係賣相非常精緻嘅鮮果多士。喺脆卜卜嘅多士上面鋪滿士多啤梨、棉花糖、食用花瓣,再加朱古力榛子醬。望住咁靚嘅多士,食都食得開心啲啦。 想食啲健康輕食,可以試吓呢度嘅烤蝦牛油果沙律(HKD138)。將牛油果切成一片片鋪喺沙律菜上面,配埋粟米片、青瓜、蕃茄仔等配料,拌入墨西哥辣檸檬汁,感覺好清新。上面擺咗兩隻剝咗殻嘅大蝦,蝦肉爽滑彈牙。 小編大推呢款以黃油烤蝦配蕃茄醬炒意粉嘅大蝦意粉(HKD188)!面頭灑上巴馬臣芝士粉,食落酸酸甜甜好開胃,意粉質地就偏硬身。 除咗咖啡之外,呢度仲有好多飲品選擇。茶飲可以揀呢款雪橙冰紅茶(HKD78),就咁睇個外型已經好有特色。上面較細嘅壺沖緊帶有果香嘅熱紅茶,上枱後俾客人自己將茶倒入下面放滿冰塊嘅壺入面,可以依照自己嘅口味調教茶嘅濃淡度,然後倒落旁邊個杯度慢慢品嚐喇。   CURATOR 地址:尖沙咀梳士巴利道18號K11 MUSEA B1樓B113C號舖 電話:待定 營業時間:待定 開業日期:10月7日

0

【Afternoon Tea TEAROOM襲港 必食籐籃下午茶+Short Cake】Afternoon Tea TEAROOM

喺日本有成90幾間分店嘅Afternoon Tea TEAROOM,終於嚟到香港尖沙咀開佢哋日本以外第一間海外分店,今個星期六就正式開業喇!依家率先睇吓佢哋招牌嘅Tea Set同埋日本熱賣嘅餐點先啦。 新店貫徹日本品牌嘅風格,以木質同綠色做主調,入到去感覺都relax啲㗎。特別一提,呢度所以餐點都係全日供應,想夜晚過嚟High Tea都仲得喎。 唔好聽佢哋個名就以為淨係得下午茶食,香港店同日本一樣有唔少主菜選擇。其中唔少得有季節限定嘅菜式,好似呢道Grilled Vegetables Plate with Smoked Duck(HKD138/單點;HKD168/套餐),烤鴨胸配以7種唔同嘅烤蔬菜,而蔬菜食材都係日本直送,食落新鮮。面頭淋上開胃嘅黑醋,蘑菇汁就另上俾你自己蘸嚟食。 Green Cream Pasta with Shrimp(HKD118/單點;HKD148/套餐)係用青醬加入蝦肉、西蘭花煮嘅意粉,食落超creamy。跟餐配埋mini salad、餐包同一款自選茶飲,CP值比單點嘅高。 重頭戲嚟喇!嚟Afternoon Tea TEAROOM點可以唔食呢度嘅Afternoon Tea Set(HKD168)?!呢個經典嘅籐籃下午茶俾你喺8款甜品當中任選3款,慢慢歎你鍾意嘅甜品款式。Tea Set仲會包埋一款自選嘅茶飲,又幾抵食喎。當中招牌嘅Strawberry Short Cake(HKD88/單點)就梗係必食之選啦,所用嘅士多啤梨醬汁同鮮忌廉都係每星期由日本空運到港㗎。而Tea Set入面嘅蛋糕size會係單點嘅一半,咁就有quota試埋其他兩款啦。 而呢款Sweet Potato Pudding(HKD88)係每日新鮮焗製,質地軟身嘅布甸食落有好香甜嘅蕃薯味,仲有唔少蕃薯粒喺入面添,真材實料㗎。而淋上面嘅焦糖醬都好香濃,加埋雲呢嗱雪糕好match呀! TEAROOM嘅茶飲全部都以日本優質茶葉沖出嚟。其中小編大愛呢款Chai Tea(HKD78/單點),以日本紅茶沖成嘅奶茶入口順滑,奶香十足,仲可以按自己喜好落啲以肉桂、豆蔻、丁香等混合而成嘅香料,令奶茶味道層次更豐富。 日本嘅Afternoon Tea除咗TEAROOM之外,仲有主要賣一啲生活精品同家品嘅LIVING區。香港店今次都引入咗少量同茶相關嘅精品,例如日本茶葉、茶具、杯等等,睇啱就可以帶返屋企喇。...